| e-texts navigator |
| Wylie |
38a1 རྣལ་འབྱོར་མ་ཙན་དྲ་མཱ་ལེ་དང་། ལོ་ཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ། ། @། ། རྒྱ་གར་སྐད་དུ། ཤྲཱི་ཛྙཱ་ན་མཱ་ལ་ཏནྟྲ་རཱ་ཛ། བོད་སྐད་དུ། དཔལ་ཡེ་ཤེས་ཕྲེང་བའི་རྒྱུད་ཀྱི་རྒྱལ་པོ། དཔལ་རྡོ་རྗེ
38a2 སེམས་དཔའ་ལ་ཕྱག་འཚལ་ལོ། །ཀྱེ་ལགས་གསང་བདག་རྡོ་རྗེ་འཛིན། །གསང་བ་བླ་ན་མེད་པ་ཡི། །ལྟ་བ་ཞེས་པ་གང་གང་ལགས། །སྤྱོད་པ་གང་དང་གང་ལགས་པ། །གཙོ་བོས་བདག་ལ་བཤད་དུ་གསོལ། །བཅོམ་ལྡན
38a3 འདས་ཀྱིས་བཀའ་སྩལ་པ། །ལྟ་བ་ཤེས་རབ་ཕ་རོལ་ཕྱིན། །གདོད་ནས་སྤྲོས་བྲལ་ལྷུན་གྱིས་གྲུབ། །རང་རིག་ཡེ་ཤེས་དབྱིངས་ན་གསལ། །མ་རིག་མུན་པས་སྒྲིབས་པ་མེད། །ཤེས་རབ་སྙིང་པོ་རྩེར་བྱུང་བ། །ལྟ་བ
38a4 ཀུན་གྱི་ཡང་རྩེ་ཡིན། །དོན་དམ་རང་རིག་ཡེ་ཤེས་ལ། །བླང་བ་མེད་ཅིང་དོར་བ་མེད། །དམན་དང་གྱ་ནོམ་གཉིས་ཀ་མེད། །བསྒོམ་པ་པོ་མེད་བསྒོམ་བྱ་མེད། །དམིགས་མེད་གནས་སུ་སྙིང་རྗེ་དང་། །དམིགས་མེད་གནསུ
38a5 ཤེས་རབ་གཉིས། །བློ་དང་ལྷན་ཅིག་གཅིག་གྱུར་པ། །ནམ་མཁར་ནམཁའི་རང་བཞིན་ནོ། །རང་རིག་ཡེ་ཤེས་གང་འདོད་པས། །མཚན་མའི་རྣམ་རྟོག་བསྒོམ་པ་མིན། །དམན་པ་རྣམས་ལ་སྐུར་མི་གདབ། །དེ་ཉིད
38a6 ལ་ཡང་སྒྲོ་མྀ་གདགས། །དང་པོར་བསྐལ་པར་བསྒོམས་པ་དང་། །རང་རིག་སྐད་ཅིག་ཐོབ་པ་གཉིས། །བརྒྱ་སྟོང་ལ་སོགས་ཆར་མི་ཕོད། །དཔེ་དང་བགྲང་བར་མི་ནུས་ཏེ། །དཔེར་ན་མཚོ་དང་རླབས་རྗེས་བཞིན། །དངོས
38a7 པོ་སྒོམ་པ་བསྒོམ་པ་མིན། །དངོས་མེད་སྒོམ་པ་སྒོམ་པ་མིན། །དངོས་དང་དངོས་མེད་རོ་མཉམ་ན། །མ་བསྒོམས་ན་ཡང་བསྒོམས་པ་ཉིད། །བསྒོམ་དང་མི་བསྒོམ་གཉིས་ཀ་མེད། །འོད་གསལ་དེ་ལ་སེམས་ཟིན་ན། །
38a8 གཟུང་འཛིན་དགྲ་ཡི་དཔུང་རྣམས་འཇོམས། །ཕྱོགས་བཅུ་འཇིག་རྟེན་ཁམས་བཅས་པའི། །དཔའ་བོ་མཁའ་འགྲོ་མཆོད་པའི་གནས། །རབ་ཀྱིས་མཉམ་གཞག་རྗེས་ཐོབ་སྤངས། །འབྲིང་གིས་རྗེས་ཐོབ་སྟོང་པར་ལྟ། །
iiif viewer powered by OpenSeadragon
