| e-texts navigator |
| Wylie |
27b1 སྔགས་གཙད་པར་བྱེད་པའི་སྔགས་སོ། །རིག་པའི་རྒྱལ་པོ་བླ་མེད་ནི། །གསང་ཆེན་འདི་ལས་འབྱུང་བར་འགྱུར། །གསང་ཆེན་རྒྱུད་འདི་ངོ་མཚར་ཏེ། །རྨད་བྱུང་བས་ཆེས་རྨད་དུ་བྱུང་། །བསྟན་པའི་སྙིང་པོ་གསང་ཆེན་འདི། །གསུངས་པའི་དེ་མ་ཐག་ཏུ་ནི། ཕྱོགས
27b2 བཅུའི་རིག་སྔགས་འཆང་བ་རྣམས། །ངོ་མཚར་བསྐྱེད་ནས་ཐལ་མོ་སྦྱར། །བདེ་བའི་སྙིང་པོ་ཤིན་ཏུ་ལེགས། །ལེགས་སོ་ལེགས་སོ་རྡོ་རྗེ་འཛིན། །གང་ལ་བདེ་བསྐྱེད་དཔལ་ཐོབ་བྱེད། །བདག་ཅག་རྣམས་ལ་ཐུགས་རྗེ་ཡིས། །རྒྱུད་ཀྱི་སྙིང་པོ་འདི་བཤད་པ། །རྗེ
27b3 ཆེན་ལེགས་སོ་ངོ་མཚར་ཆེ། །འཕགས་མ་རྡོ་རྗེ་ལུ་གུ་རྒྱུད་ཀྱི་རྟོག་པ་ལས་སྦྱིན་སྲེག་གི་ལེའུ་སྟེ་བཞི་བའོ། །འཕགས་མ་རྡོ་རྗེ་ལུ་གུ་རྒྱུད་ཀྱི་རྟོག་པ་ཨོཊྱ་ན་ནས་འབྱུང་བ་རྫོགས་།། །།པཎྜི་ཏ་ཨ་ཏུ་ལ་ད་ས་བཛྲ་ལ་ཞུས་ནས། བོད་ཀྱི་ལོ་ཙྭ་ང་མར་པ
27b4 ཆོས་ཀྱི་དབང་ཕྱུག་གྲགས་པས་བསྒྱུར་བའོ། ། @##། །རྒྱ་གར་སྐད་དུ། བཛྲ་ཏུཎྜ་ནཱ་མ་ནཱ་ག་ས་མ་ཡ། བོད་སྐད་དུ། རྡོ་རྗེ་མཆུ་ཞེས་བྱ་བ་ཀླུའི་དམ་ཚིག་གོ། །ཐམས་ཅད་མཁྱེན་པ་ལ་ཕྱག་འཚལ
27b5 ལོ། །དེ་ནས་བཅོམ་ལྡན་འདས་གྲོང་ཁྱེར་ཆེན་པོ་གཡོག་འདོར་ན་བཞུགས་ཏེ། འཁོར་འདུས་པ་ཆེན་པོ་འཇོག་པོ་ལ་སོགས་པ་ཀླུའི་འཁོར་དང་། ལྷ་དང་མིའི་ཚོགས་ཀྱི་འཁོར་ཆེན་པོ་ལ་སེམས་ཅན་རྣམས་ཀྱི་དོན་ཆེན་པོའི་ཕྱིར་ཏེ། བསམ་པ་དང་རེ་བ་ཐམས་ཅད
27b6 ཡོངས་སུ་སྐོང་བ་བདེ་བར་བྱེད་པའི་ཆོས་སྟོན་ཏོ། །དེ་ནས་གྲོང་ཁྱེར་དེ་ནས་བྲམ་ཟེའི་ཁྱེའུ་ཁྱབ་མ་སྤྱན་ཞེས་བྱ་བ་ཕྱུག་པ་ནོར་ཆེ་བ། ལོངས་སྤྱོད་ཆེ་བ། རྫས་དང་ཡོ་བྱད་མང་པོ་ཕུན་སུམ་ཚོགས་པ། རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་ཏུ་ཕྱིན་པ། སྔགས
27b7 ལ་འཇུག་པ། སྔགས་གྲུབ་པ་ཞིག་འདུག་སྟེ་དེ་ཡང་ཡང་དང་ཡང་དུ་ཀླུ་འགུགས་ཤིང་མེའི་སྦྱིན་སྲེག་བྱེད་དོ། །བྲམ་ཟེ་དེའི་ལོ་ཏོག་སྨིན་ཀར་ཆར་ཆད་པར་གྱུར་ནས། །དེས་ང་རྒྱལ་གྱི་སྒྲས་སྔགས་བརྗོད་པ་དང་མཐུན་པས་འདི་སྐད་ཅེས་བདག་གིས་ཆར་པའི
iiif viewer powered by OpenSeadragon
