| e-texts navigator |
| Wylie |
233a1 གིས་ཞི་བྱས་ཏེ། །གཅིག་གམ་ལྔའམ་བདུན་ནམ་ནི། །ཉི་ཤུ་རྩ་གཅིག་བརྒྱ་རྩ་བརྒྱད། །ཅི་ནུས་པར་ནི་གདབ་པར་བྱ། །དུས་ནི་མཚན་མོ་ཤེས་པ་སྟེ། །དང་པོ་ལ་ནི་དཀྱིལ་འཁོར་གྱིས། །ཕྱག་རྒྱ་ཆེན་པོ་རྫོགས་པ་སྟེ། །གསུམ་པ་བཞི་པ་གཉིས་པ་དག་།ཆོས
233a2 ཀྱི་སྐུ་ཡི་གཟུགས་བརྙན་གདབ། །བུམ་དབང་ས་ལ་གདབ་པ་སྟེ། །གསང་དབང་ས་དང་ཆུ་ལ་གདབ། །གསུམ་པ་མེ་དང་རླུང་ལ་གདབ། །བཞི་པ་ནམ་མཁར་གསུངས་པའོ། །དང་པོ་འཕོ་བས་མ་ལྷུང་ལ། །གཉིས་པ་རོ་བསྲེག་མ་ལྷུང་བའོ། །གསུམ་པ་ཚ་ཚས་མ་ལྷུང་ན། །འཆི
233a3 བསླུ་བའི་དམ་པ་སྟེ། །སྲིད་པའི་འཆི་བ་ལས་གྲོལ་ངེས། །དམན་པའི་འཕོ་བ་ལ་སོགས་པས། །ལྷུང་ཞིང་འཆི་བ་ཁོ་ནར་ངེས། །དེ་བས་སྲིད་ལས་གྲོལ་འདོད་པས། །བླ་མ་དམ་པ་རབ་མཉེས་ཏེ། །འཕོ་བ་ལ་སོགས་གདམས་ངག་བླང་། །རྒྱུད་འདི་གཏད་ཀྱིས་ལེགས་པར་ཟུང་། །དེའི
233a4 ཚེ་འཇིག་རྟེན་གྱི་ཁམས་ཀྱི་ས་ཆེན་པོ་ཡང་གཡོས་པར་གྱུར་ཏོ། །མཆོད་པ་སྣ་ཚོགས་པའི་ཆར་ཡང་བབ་བོ། །དཔའ་བོ་དང་མཁའ་འགྲོ་མ་དང་དུར་ཁྲོད་ན་གནས་པའི་རོ་ལངས་ཆེན་པོ་ཐམས་ཅད་རྒྱུད་ཀྱི་དོན་ལ་རྗེས་སུ་ཡི་རངས་པར་གྱུར་ཏོ། །དཔལ་གསང་བ་མེ་འབར་བའི་རྒྱུད་ཀྱི་རྒྱལ་པོ
233a5 རྫོགས་སོ། ། །།པཎྜི་ཏ་ག་ཡ་དྷ་ར་དང་། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།། @##། །རྒྱ་གར་སྐད་དུ། ཤྲཱི་ཨ་མྲྀ་ཏ་གུཧྱ་ཏནྟྲ་རཱ་ཛ། བོད་སྐད་དུ། དཔལ་གསང་བ་བདུད་རྩིའི་རྒྱུད་ཀྱི་རྒྱལ་པོ། བཅོམ
233a6 ལྡན་འདས་དཔལ་བདེ་བ་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་ལ་བཞུགས་སོ། །དེའི་ཚེ་བྱང་ཆུབ་སེམས་དཔའ་རྡོ་རྗེ་སྙིང་པོས་གསོལ་པ། དཀྱིལ
233a7 འཁོར་དབྱེ་བ་ཇི་ལྟ་བུ། །སྔགས་དང་གཏོར་མ་ཇི་ལྟ་བུ། །སྦྱིན་སྲེག་མཆོད་སོགས་ཇི་ལྟ་བུ། །ཁྱོད་ཀྱིས་བདག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །དང་པོ་དཀྱིལ་འཁོར་དབྱེ་བ་ཡང་། །ཕྱི་ལ་གཟུགས་བརྙན་དཀྱིལ་འཁོར་ཏེ། །ནང་དུ་ལུས་ཀྱི་དཀྱིལ
iiif viewer powered by OpenSeadragon
