T38 śatapañcāśatka-nāma-stotra brgya lnga bcu pa zhes bya ba'i bstod pa

བོད་ཡིག

[110a] rgya gar skad du/ sha ta pany+tsa sha ti ka nA ma s+ya sto tra/ bod skad du/ brgya lnga bcu pa zhes bya ba'i bstod pa/ dkon mchog gsum la phyag 'tshal lo// gang zhig la ni nyes pa kun// gtan nas yong ye mi mnga' zhing // gang la'ang rnam pa thams cad du// yon tan thams cad gnas gyur pa// gal te sems shig yod na ni// de nyid la ni skyabs 'gro zhing // de bstod de ni bkur ba dang // de yi bstan la gnas pa'i rigs// thams cad mkhyen pa yon tan kun// mnga' la de yang nyam mi mnga'// nyes pa bag chags bcas de yang // skyob pa gcig pu la mi mnga'// bcom ldan 'das kyi sku dang ni// gsung dang thugs kyi phrin las la// zhe 'gras gyur pa gang gis kyang // chos dang ldan par glags mi rnyed// rgya mtshor gnya' shing bu ga ru// rus sbal mgrin pa chud pa ltar// dam chos dga' ston cher bcas pa'i// mi nyid bdag gis thob nas ni// mi rtag nyid dang rjes 'brel zhing // las kyi klags la dogs bcas pa// bdag gi lce 'di nyid kyis go// snying po ci phyir blang mi bya// de ltar thub pa'i yon tan kyi// yul lta grangs med shes mod kyi// rang gi don la gus pa yis// de yi phyogs gcig bsgrims te brjod// gang gi yon tan grangs dag dang // mthu la thug pa ma mchis la// rmad byung phrin las dpag med can// rang byung khyod la phyag 'tshal lo// 'di snyed bgyi ba'i mtha' med na// 'di ltar lags zhes ci zhig smos// [110b] khyod kyi yon tan slad du bdag // bsod nams snyam nas spyi brtol skyes// bstod pa gleng bslang ba ste le'u dang po'o// // spyod dam mi spyod snyam pa yi// rnam par rtog pa rnam spangs nas// 'gro ba 'di ni nyam thag ces// khyod bdag nyid kyis zhal gyis bzhes// khyod ni ma bcol lags mdzad pa// khyod ni rgyu med bzhin du byams// khyod ni ma 'dris mdza' bshes te// 'brel pa med pa'i gnyen 'dun lags// nyid kyi sha yang stsol mdzad na// dngos po gzhan lta smos ci 'tshal// legs mdzad khyod kyis srog kyang ni// slong ba'i skye bo rnams la btang // nyid kyi sku dang srog dag gis// lus can gshed mas zin rnams kyi// lus dang srog kyang khyod kyis ni// lan brgya phrag du bslu ba mdzad// ngan 'gros bsnyengs slad ma lags la// bzhed pa'i 'gro ba'ang sgrub ma lags// dgongs pa dag pa 'ba' zhig gis// khyod kyis tshul khrims goms par mdzad// rtag tu gya gyu rnam spangs shing // drang brtan rnams ni rtag bsten pas// yongs su dag pa'i las rnams kyis// khyod ni gzhi rten gcig pur gyur// sdug bsngal mang pos gzir ba na// khyed kyis dge ba'i thugs kyis ni// nyon mongs rnams la sran btsugs nas// skye bo nyon mongs can la brtse// khyod kyis gzhan gyi don slad du// sku srog btang nas dgyes gyur gang // de 'dra srog chags 'gums pa las// sos pa rnams la'ang byung ma gyur// khyod ni lan 'ga' ma lags par// gtubs kyang sdug bsngal mi dgongs par// gshed ma bgyid pa'i sems can la'ang // gtso bo thugs rjer gyur pa gang // khyod kyi thugs ni rin po che// rdzogs pa'i byang chub sa bon te// dpa' khyod kho nas snying por mkhyen// de gzhan skye bos 'ol mi mchi// dka' spyad las ni ma bgyis par// go 'phang rnyed dka' mi 'thob ces// de slad nyid la'ang ma gzigs par// khyod kyi brtson 'grus legs par spel// khyad par 'phags par bgyi ba la// khyod la thang lhod 'ga' ma byung // de slad khyod kyi khyad par rnams// thog drung rim pa dbyer ma mchis// [111a] thugs ni thugs rje chen po dang // rtag tu rjes su 'brel slad du// ting 'dzin 'bras bur bcas pa yi// shin tu bde la'ang khyod ma chags// gzhan dang thun mong ma lags pa'i// bde ba gang de gya nom yang // dam pa'i spyod ldan khyod 'dra la// gnod par bas kyi sman ma mchis// 'dres pa las ni legs bshad nyid// snying po skyon med nyi tshe zhig // khyod kyis kun bzhes thugs la bzhag // nyes bshad dug bzhin yongs su spangs// rin chen snying po mkhyen khyod kyis// legs bshad srog gis 'jal ba na// skye ba de dang de dag tu// byang chub slad du dpa' rtsal bstan// de slad grangs med gsum dag tu// khyod ni de ltar brtson pa na// brtson 'grus 'ba' zhig grogs gyur pas// go 'phang bla na med pa brnyes// rgyu la bstod pa ste le'u gnyis pa'o// // mtho la phrag dog mi mdzad cing // dma' la rngan can mi mdzad la// mnyam la 'gran pa mi mnga' bas// khyod ni 'jig rten gtso bor gyur// khyod ni yon tan rgyu rnams la// mngon bgyis 'bras bu rnams la min// yang dag sgrub pa de nyid kyis// khyod kyi yon tan pha mthar phyin// ji ltar khyod kyi zhabs rdul yang // bsod nams skye ba mched 'gyur ba// de ltar khyod kyis legs spyad pas// bdag nyid rab tu bskrun pa mdzad// nyes pa nyams smad rtsa nas bton// yon tan spel nas rnam par sbyangs// gzhung lugs bzang po des na khyod// grub mchog lhag par brnyes pa lags// ji ltar bdag gi rgyud la de// bag chags lhag ma'ang ma lus pa// de ltar rnam pa thams cad du// nyes pa khyod kyis rab tu bcom// ji ltar gzhan la de dag dang // 'dra ba tsam yang mi gda' ba// de ltar khyod kyis bsags bsags nas// bdag nyid la ni yon tan bsgrubs// 'jig rten pa yi dpe dngos kun// gegs bgyid pa dang sgrib pa can// re zhig pa dang nyi tshe ba// shin tu rnyed par sra ba lags// khyod kyis yon tan bla med la// gegs bgyid ma mchis rtogs ma mchis// [111b] brtan pa dang ni rgyun chags pas// dpe lta mchis par ga la 'gyur// gang tshe khyod kyi dgongs pa'i dkyil// gting dang pha rol med brtags na// rgya mtsho zab pa nyid kyang ni// gnag rjes lta bur sa ler gda'// chos rnams kun gyis mi bskyod pa// khyod kyi brtan pa mngon bsams na// sa yi brtan pa nyid kyang ni// shir sha'i ge sar rtse ltar chung // thub pa khyod kyi ye shes kyi// snang bas mi shes rab rib dag // 'joms pa'i thad na nyi ma yang // me khyer tsam du'ang mi spyod do// khyod kyi gsung thugs mdzad spyod rnams// dag pa'i gan na ston zla dang // chu dang nam mkha'i dag pa rnams// dri ma can ni lta bur gda'// 'jig rten legs pa gang ci'ang rung // thams cad bsngos na'ang der bas te// nyon mongs 'jig rten chos rnams kyis// sangs rgyas chos la khyad mi khor// rin chen chos gang brnyes nas khyod// mchog tu gyur pa de nyid dang // khyad du bsgrun zhing de dang ni// khyod dang bsgrun ldom kho nar bas// gang la spyi tsam bstun nas ni// cung zad brjod par bgyid pa de// smra ba po yi rang dga' dang // thabs dang gcam bu tsam du bas// dpe med pa la bstod pa ste le'u gsum pa'o// // khyod ni bdud las rnam rgyal te// 'gro kun dad par mdzad pa yang // bdag gis chos nyid rjes bsams na// chen po ltar gang ma mthong ngo // sdang bas rgol bar rtsol byed pa// mang po'ang gzhom par bya ba ni// khyad par gnas la brten pa yi// bzod pa'i tshegs su mtshar mi che// gang tshe bdud rnams mngon btul ba// de yi nub mo kho na la// nyon mongs shin tu che spangs pa// de nyid rmad du byung ba lags// 'od zer phreng ba stong ldan pa'i// nyi mas mun bsal gang lags dang // dpa' bo khyod kyis mu stegs las// rgyal bar mdzad pa ci zhig mtshar// 'dod chags bral bas chags bcas dang // zhe sdang bral bas zhe sdang can// gti mug bral bas rmongs pa ste// gsum pos rtag tu gsum dag btul// dam chos rab tu bstod pa dang // dam chos ma lags smod mdzad kyang // dam pa dag dang tha ma la// khyod ni chags dang khro mi mnga'// [112a] dgra bcom pa dang mu stegs la// rjes su chags dang khong khro bar// khyod kyi thugs ni mi 'gyur na// khyod la bstod du ci zhig mchis// yon tan rnams la'ang ma chags la// yon tan can la'ang bzhed mi mnga'// kye ma'o khyod kyi thugs stobs ni// rab dang yongs su dag pa lags// dbang po rnams ni rab dang ba// dus rnams rtag tu mi nyams pas// khyod thugs rtag tu dang ba dag // mngon sum gyur pa bzhin du gda'// rang bzhin dam pa legs gsungs dang // mdzad spyod bzang pos bsgrags pas na// khyod kyi blo gros dgongs pa dag // rnam dag byis pa'i bar la grags// rmad du byung ba'i bstod pa ste le'u bzhi pa'o// // nye bar zhi la yid du 'ong // 'bar la gnod pa mdzad mi mnga'// dul la rngom brjid che ba yis// sku 'dis su zhig dad mi mdzad// khyod kyi sku de gang gis na// lan brgyar mthong dang gang zhig gis// dang por mthong ba de gnyis ka / 'dra bar mig ni mgu bar mdzad// khyod kyi sku ni mdzes pa'i phyir// blta bas mi ngoms rang bzhin pas// mthong ngo cog ni phyi phyir zhing // dga' ba bskyed par mdzad pa lags// rten gyi yon tan dag dang ni// brten pa'i yon tan phan tshun du// 'tsham pas khyod kyi sku dang ni// yon tan phun tshogs mchog dang ldan// mtshan dang dpe byad bzang 'bar ba// khyod kyi sku las ma gtogs pa// de bzhin gshegs pa'i yon tan 'di// gzhan gang zhig la legs gnas 'gyur// khyod sku rten pa'i yon tan la// nga dpal che zhes gsung gsung ltar// de yi yon tan rnams kyang slar// des legs bkod ces gsungs pa 'dra// sku la bstod pa ste le'u lnga pa'o// // 'gro ba 'di dag thams cad ni// khyad med nyon mongs rnams kyis bcings// khyod ni 'gro ba'i nyon mongs dag // dgrol slad yun ring thugs rjes bsdams// dang por khyod la phyag bgyi'am// 'on te gang gis 'khor bar khyod// skyon mkhyen yun ring de lta bur// bzhugs mdzad thugs rje che la bgyi// [112b] dben pa'i bde ba spang gyur khyod// mang po'i nang du bzhugs pa gang // de khyod thugs rjes dus 'das pa// glags shig thod nas bgyis par bas// rig pa yis ni mtsho nang nas// klu bzhin khyod kyi thugs rje yis// dgon pa zhi gnas grong gi mthar// gdul ba'i don gyi slad du drangs// nyer zhi mchog la gnas bzhin du// thugs rje gtso dang ldan pas na// rol mo mkhan gyi sgyu rtsal yang // khyod kyi zhabs kyi 'dor bar mdzad// rdzu 'phrul seng ge'i sgra dang ni// nyid kyi yon tan brjod pa gang // de ni bzhed spyod mi mnga' ba// khyod kyi thugs rjes bstan pa lags// gzhan gyi don du rab bzang gi// nyid kyi don la brtse med pas// mgon po khyod nyid 'ba' zhig la// thugs rjes thugs rje mdzad ma gyur// 'di ltar res 'ga' brtan pas gang // gzhan don bsgrub pa mdzad slad du// khyod ni lan brgyar phyogs dag tu// gtor ma bzhin du btang ba lags// de ltar khyod la gnod mdzad kyang // nongs pa can du mi rtsi bas// khyod kyi bzhed pa kho na dang // mthun 'jug pa ni lags par gda'// thugs la bstod pa ste le'u drug pa'o// // tshig bzang ba dang don che dang // bden pa dang ni snyan pa dang // zab gsal gnyis ka'i don ldan dang // bsdus dang spros pa dang ldan pa// khyod kyi gsung ni de lta bu// khyod kyi dgra bos thos na yang // thams cad mkhyen pa lags so zhes// su zhig nges pa skye mi 'gyur// mang po ril gyis snyan pa lags// bcos ma 'ga' tsam snyan pa lags// khyod kyi gsung don grub pas kyang // thams cad legs gsungs kho na lags// khyod kyi gsung ni rnam brtags na// gang zhig 'jam dang rtsub pa dang // gang yang de gnyis ldan pa dag // thams cad ro gcig nyid du 'gyur// e ma'o shin tu yongs dag pa'i// phrin las rnams kyang rab tu bzo// de yis rin chen gsung rnams kyi// snod 'di 'dra ba 'di bgyis so// khyod zhal blta na rab sdug pa// de las mnyan na snyan pa yi// gsung 'di dag ni zla ba las// bdud rtsi 'dzag pa bzhin du gda'// khyod kyi gsung ni 'dod chags kyi// rdul rab zhi mdzad char sprin 'dra// [113a] zhe sdang sbrul ni gdon pa'i phyir// nam mkha' lding dang 'dra ba lags// yang dang yang du mi shes pa'i// rab rib 'joms pas gdugs dang 'dra// nga rgyal ri bo mngon 'joms pas// brgya byin mtshon cha 'dra ba lags// don gzigs pas ni mi slu ba// nongs mi mnga' phyir rjes su mthun// legs par sbyar bas ge sla ste// khyod kyi gsung ni legs gsum ldan// re zhig dang por khyod kyi gsung // nyan pa rnams kyi yid 'phrog mdzad// de nas yid la bsam bgyis na// rdul dang mun pa dag kyang sel// phongs pa rnams kyi dbugs 'byin cing // bag med rnams ni skrag par mdzad// bde ba can dag skyo bgyid pas// khyod gsung kun dang 'tsham par 'jug // mkhas pa rnams kyi dga' ba skyed// bar ma rnams kyi blo yang spel// tha ma'i rab rib rnam 'joms pas// gsung 'di skye bo kun la sman// lta ba dag las dgar mdzad cing // mya ngan 'das par nye bar 'dren// nyes pa sel mdzad khyod kyi gsung // yon tan rnams kyi char yang 'bebs// kun la ma thogs thugs mnga' zhing // dgongs pa'ang kun du nyer gnas pas// de slad khyod kyis lung bstan kun// thams cad la yang slu mi mnga'// gang slad yul min dus min dang // snod min rnams su mi 'jug pa// de slad khyod gsung don mchis te// brtson 'grus legs par brtsams pa bzhin// gsung la bstod pa ste le'u bdun pa'o// // bgrod pa gcig dang thabs bde dang // legs par 'brel dang nyes pa med// thog ma bar dang mthar dge bas// khyod kyi bstan 'dra gzhan la med// khyod kyi gzhung lugs de lta bu// gcig pu phangs la lta chags pas// byis pa gal te smod bgyid na// lta dang 'dra ba'i dgra ma mchis// gzhan ni 'gro ba'i don slad du// sdug bsngal mang bstar gang lags pa// de bsams khyod bstan ngan na yang // gnas par bgyi ba la thug na// phan pa gsung zhing phan mdzad pa// khyod kyi bstan pa ci smos te// mgo la zhugs ni 'bar bas kyang // ci yi slad du sgrub mi bgyid// [113b] khyod kyi bstan pas rang dbang dang // byang chub bde dang zhi ba dang // khyod kyi yon tan bsngags pa dang // legs pa bzhi po 'di kun thob// dpa' bo khyod kyi bstan pa 'di// mu stegs thams cad skrag mdzad la// bdud ni sems khong chud mdzad cing // lha dang mi rnams dbugs kyang 'byin// 'chi bdag bstan pa khams gsum gyi// sa chen dag na spyod bgyid pa// mi thogs bzlog pa ma mchis pa'ang // khyod kyi bstan pas zil gyis mnan// khyod kyi bstan pa'i lugs 'tshal ba// dga' na bskal par yang gnas la// gang du bdud kyis mi rdzi ba// der yang dga' mgur rab tu mchi// lung gi don ni bsam pa dang // bsgom dang gus par mnyan pa yi// dus gsum cha dbye khyod kyi ni// bstan las gzhan la mchis ma lags// drang srong skyes mchog khyod kyi bstan// de ltar legs pas khyab 'di la// ma gus gang lags de las ni// sdug bsngal chen po'ang ci zhig mchis// bstan pa la bstod pa ste le'u brgyad pa'o// // khyod thos pas ni spro ba skye// mthong bas dad pa skye bar 'gyur// khyod gsung thos pas dga' 'gyur te// bstan pas rnam par grol bar mdzad// khyod kyi sras kyis mgu bar 'gyur// 'phel bas skye dgu rnams kyang dga'// gshegs pa na ni phan 'dogs mdzad// ldog pa na ni rgud par 'gyur// bsgrags pas sdig pa 'phrog par mdzad// khyod dran pas ni rangs par 'gyur// btsal bas blo gros skye 'gyur te// yongs su shes pas rnam par 'dag // khyod la bsu bas dpal du byed// bsten pas blo gros mchog tu 'gyur// bsten na 'jigs pa med par mdzad// bsnyen bkur bgyis pas bde bar 'gyur// tshul khrims phun sum tshogs pas dag // bsam gtan phun sum tshogs pas dang // shes rab phun tshogs mi 'khrugs pas// khyod ni bsod nams mtsho chen lags// khyod sku bltar 'os rin chen te// legs gsungs mnyan 'os rin chen lags// chos ni spyad 'os rin chen pas// khyod ni rin chen 'byung gnas lags// khyod ni chu bos bdas pa'i gling // smas pa'i bdag nyid skyob pa ste// [114a] srid pa'i 'jigs pas nyen pa'i skyabs// thar 'tshal rnams kyi 'dren pa lags// tshul khrims dag phyir snod kyi mchog // zhing gshin 'bras bu phun sum tshogs// srog chags kun la phan mdzad phyir// grogs kyi phul yang khyod lags so// phan 'dogs mdzad pas mdza' bshes te// 'grogs na bde phyir snying du sdug // zhi phyir gcig tu yid du 'ong // yon tan kun mnga' mchod 'os khyod// sdig pa med pas yid dang 'thad// sku gsung bzang bas dga' bar mdzad// don kun 'grub phyir dpal yangs te// yon tan legs rten bkra shis lags// smon lam la bstod pa ste le'u dgu pa'o// // khyod ni rngan then bgyid la skul// chom rkun bgyid pa tshar yang gcod// gya gyu can rnams rnal du 'god// dal bus bgyid la gzhen skul 'debs// dul ba rnams ni lam la sbyor// dmu rgod rnams la btang snyoms mdzad// de slad skyes bu 'dul ba yi// kha lo sgyur ba bla med mchog // khyod ni nyam thag rnams la brtse// bde bar gnas la phan par dgyes// phongs par gnas la thugs rje bas// kun la phan par bzhed pa lags// khyod ni dgra bo rnams la'ang byams// nyams par gyur la phan 'dogs mdzad// gtum po rnams la thugs brtse bas// khyod ni ya rabs rmad cig lags// phan 'dogs bgyid slad pha ma dag // gal te bla mar 'tshal na go// khyod ni lhag par phan 'dogs pas// bla ma nyid gyur smos ci 'tshal// rang gi don la mi lta bas// nyid kyi dgra bo ltar gyur cing // g.yang sa'i mun na gnas rnams la// ra ba lta bur gyur pa'ang khyod// 'jig rten gnyis kar sman gdags dang // 'jig rten las ni 'da' slad du// mun par gyur pa'i 'jig rten la// khyod kyis shes rab snang bar mdzad// yul la nye bar spyod pa na// lha mi'i spyod pa tha dad kyang // chos kyi longs spyod thun mong bas// khyod la dbye ba mi mnga'o// bcom ldan khyod kyis skye ba dang // na tshod rigs dang yul dang ni// dus kyi skyon med chos rnams kyis// [114b] 'di dag kun la sman yon btags// khyod kyi nyan thos srid bral zhing // ya mtshan 'dzin pa med rnams la'ang // lha rnams thal sbyar smon bgyid cing // ya mtshan che ba lta bur mchod// e ma'o sangs rgyas 'khor ba yi// nyid gur gyur pa byung ba brjid// des ni mi yang lha rnams kyis// smon par bya ba nyid du gyur// lam la 'jug pa la bstod pa ste le'u bcu pa'o// // mnyel dang zhe bde nyams gyur dang // skye bo ngan dang 'grogs pa dang // mi mthun pa dang mang po yi// skyon yang yon tan bzhin dgongs shing // 'gro ba'i don slad ma chags pa'i// thugs kyis brtson pa gang mdzad pa// sangs rgyas rnams kyi sangs rgyas kyi// chos nyid bcom ldan de rmad do// bshos kyang phal pa gsol mdzad cing // res 'ga' smyung ba dag kyang mdzad// nyam nga'i shul du'ang gshegs mdzad cing // rad rod can du'ang mnal ba mdzad// mgon khyod gtso bor gyur lags kyang // gdul bya rnams la byams slad du// sku ngas brngo dang gcam tshul dang // skad dang cha lugs sgyur ba'ang mdzad// kun gyis dga' mgur rang don phyir// bran bzhin bskor bar bsgrims pa las// mgon khyod rtag tu bdag nyid la// mnga' ma mchis pa'ang ma lags so// khyod la gang dang gang du yang // ji skad bskul ba'ang mi spong ste// nyid kyi sgrub pa bzang po las// 'da' bar 'gyur ba ma mchis so// ji ltar khyod ni gnod bgyid la// phan pa lhur mdzad de lta bur// skye bo dag ni phan bgyid la'ang // phan pa de ltar lhur mi bgyid// khyod ni gnod bgyid dgra bo la// phan pa mdzad pa'i bshes lags te// rtag tu skyon dag tshol ba la// yon tan 'ba' zhig tshol ba lags// khyod ni gang na dug bcas shing // zhugs dang bcas par spyan drangs pa// der ni brtser bcas gshegs pa dang // khyod la bdud rtsi can du gyur// bzod pas mi snyan brjod pa dang // 'khu ba dag ni bde legs kyis// mi snyan smra la bden pas te// khyod kyis sdang ba byams pas btul// thog ma med dus goms pa yis// mi yi rang bzhin mang po yang // [115a] khyod kyis ngan song rnam bzlog nas// skad cig nyid la yongs su bsgyur// dka' ba mdzad pa la bstod pa ste le'u bcu gcig pa'o// // rtsub pa dang 'jam bgyis pa dang // 'jungs pa rnams ni gtong phod dang // gtum pa des par bgyis pa gang // de ni khyod kyi thabs mkhas lags// dga' bo'i dbang po nyer zhi dang // nga rgyal khengs pa 'dud pa dang // sor mo'i phreng ba'ang zhi bgyis na// su zhig ngo mtshar bskyed mi bgyid// khyod kyi chos kyi ros tshim pas// gser las bgyis pa'i mal spangs nas// ran mang bting ba'i gnas mal du// brten rnams bsod nyams nyal bar bgyid// khyod kyis dus dang bsam mkhyen pas// res 'ga' zhus na'ang mi gsung la// spros gyur gzhan la bstan pa dang // drung du gshegs nas bshad pa'ang mdzad// dri med gos la tshon bzhin du// thog mar sbyin sogs gtam dag gis// sems la spro ba bskyed nas ni// phyi nas chos ni bstan pa mdzad// 'khor ba mi bzad gting nas ni// 'gro ba nyon mongs drang slad du// khyod kyis gang zhig ma stsal ba'i// thabs dang spyod pa de ma mchis// sku yi cha lugs rnam mang dang // gsung gis so so'i skad bzhin du// gdul bya'i bsam pa tha dad pa// de dang der ni khyod kyis mdzad// de dag kun kyang dag pa dang // mi 'gal ba dang mchod 'os dang // brjid dang lha mi rnams la ni// sman 'dogs bkur ba sha stag lags// smra dang bgyid pa phal cher ni// legs par rdo thogs ma lags kyi// bden par gsung ba khyod la ni// de gnyis gzhan du gda' ba lags// bdag nyid dag pa 'ba' zhig gis// khyod kyis 'gro ba'i dpal zhing mdzad// 'di ltar rnam pa 'di 'dra'i zhing // 'jig rten gsum na mchis ma lags// thog med srid pa nyam nga bar// snga nas gcig tu nyams pa yi// sems can kun la sman slad du// khyod ni de ltar brtson pa lags// mkhas pa la bstod pa le'u bcu gnyis pa'o// // gang gis khyod drin lan lon pa'i// sgrub de mchis snyam mi bgyid de// [115b] skye bo gang dag mya ngan 'das// de dag gis kyang lan ma lon// khyod kyi chos la gnas de dag // rang don kho na bgyid par bas// de yi slad du 'o brgyal gang // de la lan go ci zhig lon// khyod ni sems can gnyid log pa'i// rgyud la gzigs pa'i zhugs tse ba// bag med gyur pa rnams kyi ni// grogs bzang bag dang bcas pa lags// khyod kyis nyon mongs gzhom pa bshad// bdud kyi g.yo dag bstan pa mdzad// 'khor ba'i rang bzhin mi bzad brjod// 'jigs pa med pa'i phyogs kyang bstan// phan dgongs thugs rje can gyis ni// sems can rnams la bgyi 'tshal ba// gang zhig khyod kyis ma mdzad pa// gzhan go ci zhig mchis lags kye// gal te chos ni 'di dag dang // spo ba zhig tu btub na ni// gdon mi 'tshal bar khyod kyis ni// lha sbyin la brten kun la'ang stsol// de slad 'gro la brda sprod pa// 'gro ba'i mgon po khyod kyis ni// 'di na phan tshun byed pa po// med pa skad du nges par gsungs// 'jig rten rnams la thugs brtse bas// yun rings sa stengs dam chos bshad// 'jig rten gsum phan 'dogs nus pa'i// slob ma dam pa'ang mang du bskrun// mngon du gdul bya'i tshogs kyang ni// mdzes bzangs yan chad btul lags pas// da go khyod la sems can gyi// bu lon lhag ma ci mchis na// 'di ltar rdo rje'i ting 'dzin gyis// sku gdung til 'bru bzhin blags nas// mjug tu'ang khyod kyis shin tu ni// dka' spyad yal bar ma dor ro// gzugs kyi sku dang chos 'di dag // gzhan don kho nar mdzad do zhes// 'jig rten yid ches dka' 'di la// khyod kyis mya ngan 'das pa bstan// de slad chos sku ma lus pa// sras kyi mchog la gtad mdzad de// gzugs sku til 'bru ltar bshig nas// khyod ni yongs su mya ngan 'das// e ma'o gnas pa e ma'o tshul// e ma'o yon tan e ma'o sku// sangs rgyas kyi ni chos rnams la// ya mtshan mi che 'ga' ma mchis// phan 'dogs mdzad cing blta na sdug // sku gsung phrin las zhi gyur pa// khyod la'ang sdang bar rab bgyid pa'i// [116a] rmongs pa mi bzad pa la gzigs// bsod nams rgya mtsho rin chen gter// yon tan 'byung gnas chos kyi tshogs// khyod la sems can gang 'dud pa// de dag la yang phyag 'tshal legs// mgon khyod yon tan mi bas kyang // bdag gi zho sha bas 'tshal bas// des na 'jigs pa mchis slad du// glo ba la ni bcags bzhin mchis// khyod kyi rang gi ngo bo nyid// tshad ma mchis la bsam mi khyab// bstan min grangs kyang ma mchis pa// khyod bdag nyid kyis mkhyen lags grang // mtsho chen chab ni bas par ma gyur kyang // skye bo'i gdung ba rab tu zhi bgyid ltar// khyod kyi yon tan cha tsam ma bsgrags kyang // bdag ni mchog tu glo pa dga' zhing mchis// bdag gis thub la dad pas spobs skyes pa'i// dge ba'i las 'di'i 'bras bu 'khrungs pa yis// ngan rtog rlung dmar 'tshubs pas dkrugs pa yi// 'gro ba'i sems ni rnal du gnas par shog // bu lon med par bstod pa ste le'u bcu gsum pa'o// // brgya lnga bcu pa'i bstod pa slob dpon mkhas pa chen po bram ze rta dbyangs kyis mdzad pa rdzogs so// // rgya gar gyi mkhan po shrI shrad+d+haka ra wa r+m+ma dang / lo tsA ba shAkya blo gros kyis bsgyur cing zhus te gtan la phab pa'o//