T1 viśeṣa-stava khyad par du 'phags pa'i bstod pa

བོད་ཡིག

[1b] rgya gar skad du/ bi shiSh+Ta sta baH/ bod skad du/ khyad par du 'phags pa'i bstod pa/ de bzhin gshegs pa thams cad la phyag 'tshal lo// bdag ni ston pa gzhan spangs nas// bcom ldan khyod la skyabs mchis pa// de ci'i slad du zhe na khyod// skyon mi mnga' la yon tan ldan// gang phyir 'jig rten skyon la dga'// yon tan 'dzin par zhen pas na// skyon yang yon tan ltar mthong nas// gzhan la skyabs su mchis par gyur// khyab 'jug dbang phyug la sogs pa// de la skye bo dga' dad pas// de yi yon tan gang bsgrags pa// khyod kyi bstan la de dag skyon// lha chen khros pa'i mda' gcig gis// grong khyer sum brtsegs bsregs zhes gda'// khyod kyi ye shes mda' chen gyis// khro ba'i sems nyid nges par bsregs// lha chen gyis ni 'dod pa dag // bsregs nyes pas na phyir yang drangs// khyod kyi ye shes zhugs kyis ni// 'dod pa rtsad bcad bsregs nas bton// lha chen thig le'i mchog ma la// chags pa skyes pas gdong bzhi byung // [2a] bdud kyi bu mo sgeg mo yis// khyod kyi ba spu'i rtse ma g.yos// lha chen phyed ni chung ma bas// ngur pa yis kyang thub ma lags// khyod ni bde bar bgyid pa yi// 'dod pa nyid kyis rmongs ma gyur// 'khor lo mdung thung can dag gis// bdud stobs de las rgyal mi nus// khyod ni 'khor lo mdung med par// byams pa'i mtshon gang lags pas rgyal// rgan pos khyab 'jug mda' yis bsnun// lha chen mgrin pa sngo gyur pas// lha 'di gnyis la gnod bgyid mchis// mgon khyod gnod bgyid bral ba lags// khyab 'jug mi thung gzugs bsgyur nas// g.yo thabs kyis ni stobs ldan bslus// khyod ni g.yo yang mkhyen gyur la// gzhan dag la yang slu mi mdzad// mgon khyod rdzu 'phrul tsam blang gi// rmad byung gang gis mthong ba des// khyab 'jug 'jig rten gsum brgal ba// 'phye bo mchi ba bzhin du mthong // gzhon nu tshangs par spyod pa na// drug ldan ma dang lhan cig spyod// khyod kyis 'khrig pa'i sbyor ba bdun// thal ba bzhin du bgyis par gyur// tshangs sogs 'jig rten 'byin pa po// bdag gcig yin par smra zhes grag // de nyid gzigs khyod 'jig rten dang // de yang las las skyes zhes bstan// [2b] brgya byin gyis ni bshol med ma// mthong nas 'dod pas rmongs zhes grag // dpa' khyod 'dod pa nyid kyis ni// ma rmongs slad du btsun mo btang // sgra gcan lag pas zla ba yang // dbang med par ni mid pa lags// mnga' brnyes khyod la sems can gang // dbang med bgyid pa de ma mchis// mi dbang dga' byed gos sred sogs// nags tshal nas ni phyir yang mchis// bde bar gshegs khyod dben pa yi// bdud rtsis ngoms las phyir mi byon// mchod sbyin la ni phyugs 'gums par// drang srong rnams ni smra zhes grag // sdig med khyod kyis grog ma la'ang // gnod pa bgyid par rjes ma gnang // gzhan dag rang don mchod sbyin la// gzhan gyi srog gi sbyin sreg byed// gzhan gyi don du khyod gcig pu// rang gi srog gis sbyin sreg mdzad// drang srong dmod me mi bzad pas// skye bo mang po bsregs par 'gyur// khyod kyis ye shes me yis ni// skye bo rnams kyi skye rgyu bsregs// rgyas pa dran pa'i mthu chung bas// mang po bgyis pa'i tshig dag ni// ltag 'og 'gal bar gyur ces thos// thub pa khyod kyi kun kyang min// drang srong dmod pa grub pa las// dka' thub grub par rjes su dpag // mgon khyod thugs rje grub pa las// dka' thub grub par rjes su dpag // lha chen 'dod pa can gyi mtshan// drang srong rnams kyi dmod pas lhung // khyod kyis phung khrol mtha' dag gi// rtsa ba 'dod pa nyid lhung bgyis// gling las skyes sogs phal cher ni// gzhan gyis gang smras smra bar bgyid// khyod kyis thun mong ma yin chos// rang gis thugs su chud nas bstan// mu stegs can gyi rig byed tshig // dben pa kho nar smra bar bgyid// khyod kyis bsgrags nas seng ge yi// sgra yis chos dag ston par mdzad// grangs can b+ha ra dwa dza ni// de nyid mthong yang dpyid ldan la// yongs su chags kyi gtso khyod kyi// slob ma'ang bud med nyid ma chags// 'ug pa pas ni dman pa las// khyad par can la sbyin zhes bstan// mgon po khyod ni thugs rje yis// khyi la'ang sbyin par bya zhes gsungs// lus kyi dka' thub bgyis pa yis// mdud pa 'jig par gcer bus 'tshal// khyod ni thugs kyi dka' thub kyis// [3a] mdud pa 'jig par bzhed pa lags// rtog ge pa dag dngos po rnams// ltos pa med par grub par 'tshal// tshig dbang khyod kyis cung zad kyang // mi ltos med ces legs par gsungs// ne tsos nyi ma brtol nas ni// thar pa mchis par bshad ces grag // khyod ni mya ngan 'das brnyes la// gang du yang ni gshegs ma mchis// thar pa rgyud gzhan skyed pa dang // ne tsos lam gzhan song bar gyur// khyod nyid lam gang nas gshegs pa// de nyid nas ni slob ma'ang mchi// khyab 'jug dag gis bud med ni// stong phrag drug cu yongs bzung gyur// ston pa 'jig rten 'das khyod la// bdag gi med cing yongs 'dzin med// ka shi mdzes dga' mo la ni// rgyas pa yongs chags rnam par 'gyur// khyod khab bzhugs na'ang phung khrol ba'i// gdon gyis dbang po rmongs ma gyur// rgyas pa 'dod gdungs g.yen spyo bas// bud med kyi ni rdog pas bsnun// khyod ni khyim par bzhugs na yang // phyir zhing 'khrug par 'gyur ba med// dga' byed chung ma'i don gyi phyir// rgya mtsho'i pha rol son ces grag // khyod kyis bud med stong phrag ni// brgyad cu spangs nas nags su gshegs// rna can 'thab dka' la sogs la// khyab 'jug gis ni gnod pa brtsams// sems can rnams la phan bzhed pa// khyod kyis srog kyang btang ba mdzad// khyab 'jug gis ni sgyu byas nas// gom gsum gyis phrogs gang yin pa'i// sa de nges par thar bzhed pa// khyod kyis rtsa bzhin btang bar gyur// dga' byed srog gcod byed pa'i mdas// 'jig rten rgyal rigs med byas nas// grags pa thob pa gang yin de// khyod kyi bstan la grags pa min// sgra ngan dang ni skya bseng dag // gang gi phyir ni g.yul bkye ba'i// dpal de khyod kyis 'khri shing ni// gdug pa bzhin du spangs nas gshegs// khyod kyi bstan pa rnyed pa na// thang shing nags na lha chen po// rnal 'byor dbang phyug spyod pa po// de ni mi shes spyod par bas// dbang po gshol med byi bo zhes// bram ze da dung bar du sgrogs// khyod kyis 'bras bu mchog brnyes pa'i// grags pa brgya byin sgrogs par gyur// [3b] khyab 'jug dag ni nag bkra bos// bred 'thoms gyur nas kun gtong gi// khri yi 'og tu zhugs par gyur// gtso khyod kun du bsnyengs mi mnga'// skye dgu'i bdag po rang nyid kyi// bu mo dang ni 'khrig ces thos// thub pa khyod kyi slob ma yang // tshangs par spyod pa skyon ma mchis// bram ze rnams ni dge sdig dag // sbyin pa len cing 'pho bar smra// khyod kyis byas pa chud mi za// ma byas pa dang phrad med gsungs// ser skyas bdag gi mtshan nyid ni// shes dang ldan pa rab tu brtags// khyod kyis de ltar yin na bdag // mi rtag nyid dang ldan zhes bstan// gzegs zan gyis ni shes las bdag // gzhan dang khyad par yongs su brjod// khyod kyis de ni shes med na// shing dang 'dra bar thal 'gyur gsungs// gcer bus lus kyi tshad bzhin du// srog ni zhum dang rgyas par smra// khyod kyis de ni phyogs gcig na// rnam par 'jig par 'gyur zhes gsungs// bram zes 'gro ba rnams kyi rgyu// skyes bu rtag pa yin zhes bstan// khyod kyis rtag pa zhes bya ba'i// rgyu ni ci yang med ces gsungs// bdag nyid chen po dug can pa'i// sras po stong phrag drug cu dag // ser skyas bltas pa tsam gyis bsregs// de la'ang khyod ni thugs rje mdzad// ser skya de nyid rig pas ni// gtso las 'gro ba skye bar bshad// khyod kyi 'gro ba'i skye ba ni// nyon mongs las las byung bar bsgrags// ser skya la sogs thar pa yi// bdag ni srid pa'i rgyu zhes zer// khyod ni zhi bar gshegs gyur nas// zhugs gum lta bur bgrang du med// mu stegs byed pa kha cig ni// thar pa 'gro dang ldan zhes smra// gang la 'gro yod de 'khor ba// khyod kyis thugs su chud nas bstan// gcer bus kun dga' ra ba sogs// rtsig pa sdig pa'i rgyu zhes zer// thams cad mkhyen pa khyod nyid ni// de nyid bsod nams rgyu zhes gsungs// lus las lus gzhan dag tu ni// phra ba'i srog ni 'pho zhes grag // khyod kyi lus las gzhan gyur pa'i// srog ni yod pa min zhes gsungs// khros pas g.yul ngor bsad na ni// bde 'gror 'gyur zhes rgyas pa zer// [4a] mgon po khyod kyis gnas skabs de'i// sems ni ngan 'gro yin zhes gsungs// skya bseng bu ni brjod byas na// bsod nams 'gyur zhes so sor smra// gang zhig bgrod min bgrod byed pa// de dag khyod kyi bstan la smad// skem byed dbang po nye dbang po// drag po la sogs 'jigs pa dang // bsdigs phyir mtshon cha rtag tu thogs// khyod bsnyengs bral zhing bsdigs mi mdzad// khyod ni sus kyang mi bsnyengs la// su la'ang bsdigs par mi mdzad pas// khyod nyid gcig pu mtshon mi bsnams// des na 'gro ba rnams las 'phags// smra po nyon mongs bcas pa'i tshig // rig byed la sogs tshig dag ni// phal cher ltag 'og 'gal ba lags// khyod kyi thams cad mkhyen pa'i gsung // gzhan gyi bstan bcos gzhan dag ni// phal cher snga phyi 'gal ba las// khyod nyid kyi ni gzhung lugs dag // thog ma bar mthar skyon ma mchis// chos 'dod pa dag dmangs rigs la// blo gros sbyin par bya min zer// khyod ni gdol pa rnams la yang // thugs rjes dam chos ston par mdzad// ljon shing bzang po rnams spangs nas// ngan pa la ni su zhig brten// 'dod chags bral brnyes khyod bzhugs na// mkhas pa su zhig ston gzhan 'dud// ser skyas yul rnams la spyad bzhin// ye shes 'gyur mchi sdig bral ba// khyod kyis kun nas nyon mongs la// thar pa ga la yod ces gsungs// bsod nams byas pa'i tshogs dag ni// sems can rnams la yongs bsngo bar// bcom ldan khyod kyis gang gsungs pa// de gzhan bstan bcos las ma bshad// lha rten dang ni mchod sbyin la// sems can gsod par byed pa gang // 'jig rten pa ni chos su 'tshal// khyod kyi bstan la de dag smad// gang zhig srog chags la rtag gnod// de la chos nyid ga la yod// gtso bo khyod kyis rang nyid kyi// srog gis sems can legs par bsrungs// shAkya'i rgyal rigs 'khrungs khyod kyis// gang zhig bden dang mi slu dang // tshangs par spyod dang dul ba dang // brtser ldan dam chos lags par dgongs// [4b] rig byed mtha' la 'byams pas kyang // g.yul ngor dgra mngon 'ongs bsad ces// 'jig rten smra yi khyod kyis ni// dgra la'ang snying rje bya zhes gsungs// gzhon nus rang gi zhang po la// mdung gis bsnun zhes bka' mchid gda'// dpa' bo khyod kyis nyon mongs pa'i// dra ba shes rab mtshon gyis dral// khyab 'jug gis ni rang nyid kyi// slas kyang yongs su bskyab ma nus// gtso bo khyod kyis sems can kun// bskyab pa'i slad du brtson pa lags// rgan pos sbyar ba'i 'jigs shes nas// khyab 'jug gis ni bcom brlag btang // thub pa khyod la bsnyings bgyid gang // sems can de ni 'ga' ma mchis// khyab 'jug gis ni gnyen 'dun dag // le lan gyis ni gtugs par gyur// khyod kyi gnyen 'dun thams cad ni// 'khor ba las ni rnam par sgrol// mu stegs can gyi gzhung lugs la// ji ltar ji ltar rnam bsams pa// de lta de ltar mgon khyod la// bdag gi sems ni dad par gyur// de ltar thams cad mkhyen min pa'i// grub mtha'i skyon gyi brlag sems ldan// bsam brlag rnams kyis skyon med pa'i// ston pa khyod kyang mi mthong ngo // 'jig rten lha dang bram ze dang // rig byed shAkya 'di dag ces// sdang bar smra ba rang skyon nyid// ci phyir sems par byed ce na// gang slad khyod kyi bstan pa ni// bde bas bde nyid thob bgyid pa// de slad smra ba'i seng khyod kyi// gzhung lugs la ni 'gro 'di dga'// khyod kyi yon tan yang dag pa// rnam pa 'di ltar rab brjod pas// bdag gis bsod nams gang thob des// 'gro ba'i 'jig rten khyod 'drar shog // mgon po khyad par 'phags bstod pa// bton pas bdag gis dge bsags pa// gang yin des ni 'gro ba kun// byang chub lam la gzhol gyur cig // khyad par du 'phags pa'i bstod pa slob dpon mtho btsun grub rjes mdzad pa rdzogs so// // rgya gar gyi mkhan po sarba dz+nyA de wa dang / zhu chen gyi lo tsA ba ban de rin chen mchog gis bsgyur/ slad kyis ban de dpal brtsegs rak+Shi tas bsgyur cing zhus te gtan la phab pa'o//