Wylie

e-texts based on the ACIP/ALL Input

རྒྱ་གར་སྐད་དུ། བི་མ་ལ་རཏན་ལེ་ཁ་ནཱ་མ། །བོད་སྐད་དུ། དྲི་མ་མེད་པའི་རིན་པོ་ཆེའི་ཕྲིན་ཡིག་ཅེས་བྱ་བ། །བླ་མ་རྣམས་ལ་ཕྱག་འཚལ་ལོ། །རྗེ་བརྩུན་སྒྲོལ་མ་ལ་ཕྱག་འཚལ་ལོ། །མཧཱ་གྷ་ཏིར་སྐུ་བཏམས་ནས། །སངས་རྒྱས ་བསྟན་པ་འཕེལ་མཛད་ཅིང། །རྒྱལ་སྲིད་ཆོས་ཀྱིས་སྐྱོང་མཛད་པ། །ནིར་ཡ་ཕ་ལ་རྒྱལ་གྱུར་ཅིག་།ཁྱོད་ཀྱིས་སྔོན་ཆད་སྦྱིན་པ་དང། །དགེ་བ་བཅུ་དང་གསོ་སྦྱོང་དང། །བཟོད་དང་བརྩོན་འགྲུས་ལ་གོམས་པས། །ལྷ་ཁྱོད་ད་ལྟ་ཕུན ་སུམ་ཚོགས། །བླ་མ་རྣམས་ཀྱི་བཀའ་ལུང་དང། །མདོ་སོགས་ཆོས་ཀྱི་རྗེས་འབྲང་འདི། །གུས་པས་སྤྱི་བོས་བླང་མཛོད་དང། །བདག་གཞན་གཉིས་ལ་ཕན་པར་འགྱུར། །ཐེ་ཚོམ་ཐམས་ཅད་རྣམ་སྤངས་ཤིང། །སྒྲུབ་ལ་ནན་ཏན ་ཆེ་བར་མཛོད། །གཉིད་རྨུགས་ལེ་ལོ་རྣམ་སྤངས་ཞིང། །རྟག་ཏུ་བརྩོན་འགྲུས་འབད་པར་བྱ། །དྲན་དང་ཤེས་བཞིན་བག་ཡོད་པས། །དབང་པོའི་སྒོ་རྣམས་རྟག་ཏུ་བསྲུང། །ཉིན་མཚན་དུས་གསུམ་ཡང་དང་ཡང། །སེམས་ཀྱི་རྒྱུད ་ལ་བརྟག་པར་བྱ། །རང་སྐྱོན་རྟོག་ལ་མིག་བཞིན་བྱ། །གཞན་སྐྱོན་རྟོག་ལ་ལོང་བ་བཞིན། །དྲན་དང་ང་རྒྱལ་མེད་པ་དང། །སྟོང་ཉིད་རྟག་ཏུ་བསྒོམ་པར་བྱ། །བདག་གི་ཉེས་པ་བསྒྲགས་བྱ་ཞིང། །གཞན་གྱི་འཁྲུལ་པ་བཙལ་མི་བྱ།། ་གཞན་གྱི་ཡོན་ཏན་བསྒྲག་པར་བྱ། །བདག་གི་ཡོན་ཏན་སྦ་བར་བྱ། །རྙེད་དང་བཀུར་སྟི་སྤང་བྱ་ཞིང། །ཁེང་གྲགས་རྟག་ཏུ་སྤང་བར་བྱ། །བྱམས་དང་སྙིང་རྗེ་བསྒོམ་བྱ་ཞིང། །བྱང་ཆུབ་སེམས་ནི་བརྟན་པར་མཛོད། །མི་དགེ་བཅུ་ནི་སྤང་བྱ ་ཞིང། །རྟག་ཏུ་དད་པ་བརྟན་པར་བྱ། །འདོད་པ་ཆུང་ཞིང་ཆོག་ཤེས་དང། །བྱས་ལ་དྲིན་དུ་གཟོ་བར་བྱ། །ཁྲོ་དང་ང་རྒྱལ་སྤང་བྱ་ཞིང། །དམན་པའི་སེམས་དང་ལྡན་པར་བྱ། །ལོག་པའི་འཚོ་བ་རྣམ་སྤང་ཞིང། །ཆོས་ཀྱི་འཚོ་བས་འཚོ་བར ་བྱ། །ཟང་ཟིང་ཐམས་ཅད་རྣམ་སྤང་ཞིང། །འཕགས་པའི་ནོར་གྱིས་ཕྱུག་པར་བྱ། །རྟག་ཏུ་འདུ་འཛི་སྤང་བྱ་ཞིང། །དགོན་པ་ལ་ནི་གནས་པར་བྱ། །འཁྱལ་པའི་ཚིག་རྣམས་སྤང་བྱ་ཞིང། །རྟག་ཏུ་ངག་ནི་བསྡམ་པར་བྱ། །བླ་མ་མཁན ་པོ་མཐོང་བའི་ཚེ། །གུས་པས་རིམ་གྲོ་བསྐྱེད་པར་བྱ། །ཁྱད་པར་ཅན་གྱི་སྐྱེས་བུ་དང། །གང་ཟག་ཆོས་ཀྱི་མིག་ཅན་དང། །ལས་དང་པོ་ཡི་སེམས་ཅན་ལ། །སྟོན་པའི་འདུ་ཤེས་བསྐྱེད་པར་བྱ། །སྡུག་བསྔལ་དག་གིས་གདུངས་བ ་དང། །སེམས་ཅན་ཐམས་ཅད་མཐོང་བའི་ཚེ། །བྱང་ཆུབ་སེམས་ནི་བསྐྱེད་བྱ་སྟེ། །ཕ་མ་བུ་ཚའི་འདུ་ཤེས་བསྐྱེད། །འཇིག་རྟེན་བྱ་བ་ཀུན་སྤངས་ཏེ། །རྟག་ཏུ་ཏིང་འཛིན་བསྒོམ་པར་མཛོད། །སྡིག་པའི་གྲོགས་པོ་སྤང་བྱ་ཞིང། །དགེ་བའི ་བཤེས་ལ་བརྟེན་པར་མཛོད། །ཚུལ་ཁྲིམས་འཆལ་བའི་དགེ་སློང་དང། །ཆོས་ཀྱིས་ཕོངས་པ་གཞན་དག་དང། །སྡིག་པ་སྤྱོད་པ་མཐོང་བའི་ཚེ། །དེ་དག་ཡལ་བར་དོར་མི་བྱ། །མི་དགེའི་བཤེས་གཉེན་ཐམས་ཅད་དང། །སྡིག་པའི་གྲོགས ་པོ་ཐམས་ཅད་དང། །དཀོན་མཆོག་གསུམ་དང་བླ་མ་དང། །མཁན་པོ་སློབ་དཔོན་མི་གུས་དང། །བྱས་ལ་དྲིན་དུ་མི་གཟོ་དང། །ཚེ་འདི་འབའ་ཞིག་དྲན་པ་དང། །གཞན་ཡང་དད་པ་ཆུང་བ་དང། །ཞག་གསུམ་འདས་པར་གནས་མི་བྱ། །སྡང ་དང་མི་བདེའི་ས་སྤང་ཞིང། །གང་དུ་བདེ་བར་འགྲོ་བར་བྱ། །གང་ལ་ཆགས་པ་སྤང་བྱ་ཞིང། །ཆགས་པ་མེད་པར་གནས་པར་བྱ། །ཆགས་པས་བདེ་འགྲོ་མི་ཐོབ་ཅིང། །ཐར་པའི་སྲོག་ཀྱང་གཅོད་པར་བྱེད། །གང་དུ་དགེ ་བའི་བཤེས་གནས་པ། །དེར་ནི་རྟག་ཏུ་གནས་པར་བྱ། །བླ་མ་རྟག་ཏུ་བརྟེན་པ་དང། །རྟག་ཏུ་མདོ་སྡེ་བལྟ་བར་བྱ། །ཐོག་མར་བརྩམས་པ་གང་ཡིན་པ། །དང་པོར་དེ་ཉིད་བསྒྲུབ་བྱ་ཞིང། །གཞན་དུ་གཉིས་ཀ་འགྲུབ་མི་འགྱུར། །གཞན་དུ ་སྡིག་པ་བཤགས་པ་དང། །བསོད་ནམས་མཆོག་ལ་འབར་བར་བྱ། །འཇིག་རྟེན་སྤྱོད་དང་འཐུན་པ་དང། །རྟག་ཏུ་ཕ་རོལ་སེམས་བསྲུང་མཛོད། །གང་ཚེ་མཐོ་བའི་སེམས་སྐྱེས་ཚེ། །དེ་ཚེ་ང་རྒྱལ་བཅག་བྱ་ཞིང། །གང་དུ་བག ་ཡོད་བྲལ་བའི་ཚེ། །བླ་མའི་གདམ་ངག་དྲན་པར་བྱ། །ཞུམ་པའི་སེམས་ནི་བྱུང་བའི་ཚེ། །སེམས་ཀྱི་གཟེངས་ཀྱང་བསྟོད་པར་བྱ། །ཤེས་རབ་ཕ་རོལ་ཕྱིན་དྲན་ཏེ། །སྤྲོས་པ་མ་ལུས་ཞི་བར་མཛོད། །གང་དུ་ཆགས་སྡང་ཡུལ་བྱུང ་ཚེ། །སྒྱུ་མ་སྤྲུལ་བ་བཞིན་དུ་བལྟ། །མི་སྙན་ཚིགས་རྣམས་ཐོས་པའི་ཚེ། །བྲག་ཆ་ལྟ་བུར་མཁྱེན་པར་མཛོད། །ལུས་ལ་གནོད་པ་བྱུང་བའི་ཚེ། །སྔོན་གྱི་ལས་སུ་བལྟ་བར་བྱ། །བས་མཛའ་དགོན་པར་རབ་གནས་ཤིང། །རི ་དྭགས་ཤི་བའི་རོ་བཞིན་དུ། །གང་དུ་སུས་ཀྱང་མི་ཤེས་པར། །བདག་གིས་བདག་ཉིད་སྦ་བར་བྱ། །རྟག་ཏུ་ཡི་དམ་བརྟན་པར་བྱ། །འདོད་དང་གནོད་སེམས་གཉིད་དང་རྨུགས། །ལེ་ལོ་སྙོམས་ལས་སེམས་བྱུང་ཚེ།། ་དེ་ཚེ་བདག་ལ་རྔན་བགྲང་ཞིང། །བརྟུལ་ཞུགས་སྙིང་པོ་དྲན་བྱ་དང། །མི་རྟག་པ་དང་འཆི་བ་བསམ། །གཞན་གྱི་མདུན་དུ་གནས་པའི་ཚེ། །ཞི་དེས་གསོད་པོར་སྨྲ་བར་བྱ། །ཁྲོ་གཉེར་ངོ་ཟུམ་སྤང་བྱ་ཞིང། །རྟག་ཏུ ་འཛུམ་ཞིང་གནས་པར་བྱ། །རྟག་ཏུ་གཞན་ལ་དགའ་བྱ་ཞིང། །སེར་སྣ་མེད་ཅིང་གཏོང་ལ་དགའ་། །རྟག་ཏུ་ཕྲག་དོག་སྤང་བར་བྱ། །གཞན་གྱི་སེམས་ནི་བསྲུང་བྱ་ཞིང། །རྩོད་པ་ཐམས་ཅད་སྤང་བར་བྱ། །ངོ་དགའ་མེད་ཅིང་གསང་འགྲོགས ་མེད། །རྟག་ཏུ་གཟུངས་ནི་ཐུབ་པར་བྱ། །རྟག་ཏུ་བཟོད་དང་ལྡན་པ་དང། །འདོད་པ་ཆུང་ཞིང་ཆོག་ཤེས་མཛོད། །གདོལ་བ་བྲན་གྱི་འདུ་ཤེས་སོ། །ངོ་ཚ་ཤེས་དང་ཁྲེལ་ཡོད་དང། །ཕ་རོལ་མགུ་བྱ་དེ་ལ་བརྩོན། །རང་གི་སྡོམ་པ་བསྡམ ་པར་མཛོད། །གཞན་པ་བརྙས་པ་སྤང་བྱ་ཞིང། །གུས་པའི་ཚུལ་གྱིས་གནས་པར་བྱ། །གཞན་ལ་གདམ་ངག་བྱེད་པའི་ཚེ། །སྙིང་རྗེ་ཕན་སེམས་ལྡན་པར་མཛོད། །སངས་རྒྱས་ཆོས་ལ་གུས་པ་དང། །དམ་ཆོས་ནམ་ཡང་སྤང་མི་བྱ།། ་རྟག་ཏུ་དཀོན་མཆོག་གུས་པ་དང། །འཁོར་གསུམ་ཡོངས་སུ་དག་པར་མཛོད། །སྔོན་དུ་སྙིང་རྗེ་སོང་བ་ཡིས། །ཉིན་དང་མཚན་མོ་ལན་གསུམ་དུ། །མཆོད་པ་བདུན་དུ་རབ་གྲགས་པའི། །ཕུང་པོ་གསུམ་པ་གདོན་པར ་མཛོད། །འགྲོ་བའི་སྡུག་བསྔལ་བསལ་འདོད་པས། །སྨོན་ལམ་རྒྱ་ཆེན་གདབ་པ་དང། །སེམས་ཅན་སྨིན་དང་བྱང་ཆུབ་འདོད། །ཐམས་ཅད་བྱང་ཆུབ་ཆེན་པོར་བསྔོ། །དུས་ནི་རིང་པོར་དམ་བཅས་ནས། །རྟག་ཏུ་བརྩོན ་དང་ལྡན་པར་བྱ། །དེ་ལྟར་མཛད་ན་ཚོགས་གཉིས་པོ། །རྫོགས་འགྱུར་སྒྲིབ་གཉིས་ཟད་པར་འགྱུར། །མི་ལུས་ཐོབ་པ་དོན་ཡོད་ཅིང། །མཐོང་བའི་ཆོས་ལ་མྱ་ངན་འདའ་། །བདག་དང་གཞན་དོན་རྫོགས ་གྱུར་ནས། །དམ་པ་གཉིས་ནི་ཐོབ་པར་འགྱུར། །སོ་གའི་ཁུ་བྱུག་གཞོན་ནུ་སྐད་སྙན་སྒྲོགས་ཞེས་ཏེ། །རྨ་བྱ་གཞོན་ནུ་སྐད་མི་སྙན་པ་མི་སྒྲོགས་མིན། །མཁས་པ་མང་པོས་གསུངས་པ་ཡོད ་མོད་ཀྱི། །རྒྱལ་པོ་གདུང་བ་བཅད་ཕྱིར་བྲིས་པ་ཡིན། །ཕན་སེམས་ལྡན་པའི་གཏམ་འདི་ལེགས་པར་དགོངས་མཛོད་ལ། །རྟོག་དང ་ལྡན་པའི་སྐྱེ་བོ་གཞན་ལའང་སྨྲ་བར་མཛོད། །རྟག་ཏུ་ལྷ་དྲུག་དྲན་མཛོད་དམ་ཚིགས་གཙང་བར་མཛོད། །རྒྱལ་སྲིད་ཆོས་ཀྱིས་སྐྱོང་མཛོད་བདག་ལ་བཟོད་པར་མཛོད། ། ་དྲི་མ་མེད་པའི་རིན་པོ་ཆེའི་ཕྲིན་ཡིག་ཅེས་བྱ་བ་གནས་བརྟན་མཁས་པ་ཆེན་པོ་དཱི་བཾ་ཀ་ར་ཤྲཱི་ཛྙཱ་ན་བ་རྒྱལ་པོ་ནིརྱ་ཕ་ལ་ལ་བརྫངས་པ་ཤལོ་ཀ་བཞི་བཅུ་བ་རྫོགས ་སོ།། །།དུས་དེ་ཉིད་དུ་བླ་མ་དེ་ཉིད་དང་ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་བའོ།། བཀྲ་ཤིས། །། ་