བོད་ཡིག

e-texts based on the ACIP/ALL Input

rgya gar skad du/ bi ma la ratna le kha nA ma/ /bod skad du/ dri ma med pa'i rin po che'i phrin yig ces bya ba/ /bla ma rnams la phyag 'tshal lo/ /rje brtsun sgrol ma la phyag 'tshal lo/ /mahA g+ha tir sku btams nas/ /sangs rgyas bstan pa 'phel mdzad cing/ /rgyal srid chos kyis skyong mdzad pa/ /nir ya pha la rgyal gyur cig /khyod kyis sngon chad sbyin pa dang/ /dge ba bcu dang gso sbyong dang/ /bzod dang brtson 'grus la goms pas/ /lha khyod da lta phun sum tshogs/ /bla ma rnams kyi bka' lung dang/ /mdo sogs chos kyi rjes 'brang 'di/ /gus pas spyi bos blang mdzod dang/ /bdag gzhan gnyis la phan par 'gyur/ /the tshom thams cad rnam spangs shing/ /sgrub la nan tan che bar mdzod/ /gnyid rmugs le lo rnam spangs zhing/ /rtag tu brtson 'grus 'bad par bya/ /dran dang shes bzhin bag yod pas/ /dbang po'i sgo rnams rtag tu bsrung/ /nyin mtshan dus gsum yang dang yang/ /sems kyi rgyud la brtag par bya/ /rang skyon rtog la mig bzhin bya/ /gzhan skyon rtog la long ba bzhin/ /dran dang nga rgyal med pa dang/ /stong nyid rtag tu bsgom par bya/ /bdag gi nyes pa bsgrags bya zhing/ /gzhan gyi 'khrul pa btsal mi bya// gzhan gyi yon tan bsgrag par bya/ /bdag gi yon tan sba bar bya/ /rnyed dang bkur sti spang bya zhing/ /kheng grags rtag tu spang bar bya/ /byams dang snying rje bsgom bya zhing/ /byang chub sems ni brtan par mdzod/ /mi dge bcu ni spang bya zhing/ /rtag tu dad pa brtan par bya/ /'dod pa chung zhing chog shes dang/ /byas la drin du gzo bar bya/ /khro dang nga rgyal spang bya zhing/ /dman pa'i sems dang ldan par bya/ /log pa'i 'tsho ba rnam spang zhing/ /chos kyi 'tsho bas 'tsho bar bya/ /zang zing thams cad rnam spang zhing/ /'phags pa'i nor gyis phyug par bya/ /rtag tu 'du 'dzi spang bya zhing/ /dgon pa la ni gnas par bya/ /'khyal pa'i tshig rnams spang bya zhing/ /rtag tu ngag ni bsdam par bya/ /bla ma mkhan po mthong ba'i tshe/ /gus pas rim gro bskyed par bya/ /khyad par can gyi skyes bu dang/ /gang zag chos kyi mig can dang/ /las dang po yi sems can la/ /ston pa'i 'du shes bskyed par bya/ /sdug bsngal dag gis gdungs ba dang/ /sems can thams cad mthong ba'i tshe/ /byang chub sems ni bskyed bya ste/ /pha ma bu tsha'i 'du shes bskyed/ /'jig rten bya ba kun spangs te/ /rtag tu ting 'dzin bsgom par mdzod/ /sdig pa'i grogs po spang bya zhing/ /dge ba'i bshes la brten par mdzod/ /tshul khrims 'chal ba'i dge slong dang/ /chos kyis phongs pa gzhan dag dang/ /sdig pa spyod pa mthong ba'i tshe/ /de dag yal bar dor mi bya/ /mi dge'i bshes gnyen thams cad dang/ /sdig pa'i grogs po thams cad dang/ /dkon mchog gsum dang bla ma dang/ /mkhan po slob dpon mi gus dang/ /byas la drin du mi gzo dang/ /tshe 'di 'ba' zhig dran pa dang/ /gzhan yang dad pa chung ba dang/ /zhag gsum 'das par gnas mi bya/ /sdang dang mi bde'i sa spang zhing/ /gang du bde bar 'gro bar bya/ /gang la chags pa spang bya zhing/ /chags pa med par gnas par bya/ /chags pas bde 'gro mi thob cing/ /thar pa'i srog kyang gcod par byed/ /gang du dge ba'i bshes gnas pa/ /der ni rtag tu gnas par bya/ /bla ma rtag tu brten pa dang/ /rtag tu mdo sde blta bar bya/ /thog mar brtsams pa gang yin pa/ /dang por de nyid bsgrub bya zhing/ /gzhan du gnyis ka 'grub mi 'gyur/ /gzhan du sdig pa bshags pa dang/ /bsod nams mchog la 'bar bar bya/ /'jig rten spyod dang 'thun pa dang/ /rtag tu pha rol sems bsrung mdzod/ /gang tshe mtho ba'i sems skyes tshe/ /de tshe nga rgyal bcag bya zhing/ /gang du bag yod bral ba'i tshe/ /bla ma'i gdam ngag dran par bya/ /zhum pa'i sems ni byung ba'i tshe/ /sems kyi gzengs kyang bstod par bya/ /shes rab pha rol phyin dran te/ /spros pa ma lus zhi bar mdzod/ /gang du chags sdang yul byung tshe/ /sgyu ma sprul ba bzhin du blta/ /mi snyan tshigs rnams thos pa'i tshe/ /brag cha lta bur mkhyen par mdzod/ /lus la gnod pa byung ba'i tshe/ /sngon gyi las su blta bar bya/ /bas mdza' dgon par rab gnas shing/ /ri dwags shi ba'i ro bzhin du/ /gang du sus kyang mi shes par/ /bdag gis bdag nyid sba bar bya/ /rtag tu yi dam brtan par bya/ /'dod dang gnod sems gnyid dang rmugs/ /le lo snyoms las sems byung tshe// de tshe bdag la rngan bgrang zhing/ /brtul zhugs snying po dran bya dang/ /mi rtag pa dang 'chi ba bsam/ /gzhan gyi mdun du gnas pa'i tshe/ /zhi des gsod por smra bar bya/ /khro gnyer ngo zum spang bya zhing/ /rtag tu 'dzum zhing gnas par bya/ /rtag tu gzhan la dga' bya zhing/ /ser sna med cing gtong la dga' / /rtag tu phrag dog spang bar bya/ /gzhan gyi sems ni bsrung bya zhing/ /rtsod pa thams cad spang bar bya/ /ngo dga' med cing gsang 'grogs med/ /rtag tu gzungs ni thub par bya/ /rtag tu bzod dang ldan pa dang/ /'dod pa chung zhing chog shes mdzod/ /gdol ba bran gyi 'du shes so/ /ngo tsha shes dang khrel yod dang/ /pha rol mgu bya de la brtson/ /rang gi sdom pa bsdam par mdzod/ /gzhan pa brnyas pa spang bya zhing/ /gus pa'i tshul gyis gnas par bya/ /gzhan la gdam ngag byed pa'i tshe/ /snying rje phan sems ldan par mdzod/ /sangs rgyas chos la gus pa dang/ /dam chos nam yang spang mi bya// rtag tu dkon mchog gus pa dang/ /'khor gsum yongs su dag par mdzod/ /sngon du snying rje song ba yis/ /nyin dang mtshan mo lan gsum du/ /mchod pa bdun du rab grags pa'i/ /phung po gsum pa gdon par mdzod/ /'gro ba'i sdug bsngal bsal 'dod pas/ /smon lam rgya chen gdab pa dang/ /sems can smin dang byang chub 'dod/ /thams cad byang chub chen por bsngo/ /dus ni ring por dam bcas nas/ /rtag tu brtson dang ldan par bya/ /de ltar mdzad na tshogs gnyis po/ /rdzogs 'gyur sgrib gnyis zad par 'gyur/ /mi lus thob pa don yod cing/ /mthong ba'i chos la mya ngan 'da' / /bdag dang gzhan don rdzogs gyur nas/ /dam pa gnyis ni thob par 'gyur/ /so ga'i khu byug gzhon nu skad snyan sgrogs zhes te/ /rma bya gzhon nu skad mi snyan pa mi sgrogs min/ /mkhas pa mang pos gsungs pa yod mod kyi/ /rgyal po gdung ba bcad phyir bris pa yin/ /phan sems ldan pa'i gtam 'di legs par dgongs mdzod la/ /rtog dang ldan pa'i skye bo gzhan la'ang smra bar mdzod/ /rtag tu lha drug dran mdzod dam tshigs gtsang bar mdzod/ /rgyal srid chos kyis skyong mdzod bdag la bzod par mdzod/ / dri ma med pa'i rin po che'i phrin yig ces bya ba gnas brtan mkhas pa chen po dI baM ka ra sh+rI dz+nyA na ba rgyal po nirya pha la la brdzangs pa shlo ka bzhi bcu ba rdzogs so// //dus de nyid du bla ma de nyid dang lo tsA ba dge slong tshul khrims rgyal bas bsgyur ba'o// bkra shis/ //