བོད་ཡིག

e-texts based on the ACIP/ALL Input

sum stong lnga brgya lnga bcu yod ce'o/ / !/ (/dbu ma shes rab la 'jug pa zhes bya ba bzhugs so/) /rgya gar skad du/ ma d+hya ma kA ba tA ra pra dz+nyA nA ma/ bod skad du/ dbu ma shes rab la 'jug pa zhes bya ba/ 'jam dpal gzhon nur gyur pa la phyag 'tshal lo/ /dbu ma shes rab la 'jug pa'i/ /don ni bdag gis bshad bya ste/ /dgag sgrub gnyis ka dgag 'ba' zhig /dngos la dgag sgrub 'ga' yang med/ /de lta bu ni gom byas na/ /phun sum tshogs pa thob par 'gyur/ /mi dge bcu ni spangs nas ni/ /dge ba bcu ni dang du blangs/ /dngos por zhen pa bkag nas ni/ /rang la sgrub tu cung zad med/ /snang ba'i dngos po 'di yang ni/ /yang dag pa yi rang bzhin med/ /du ma dang ni gcig bral phyir/ /sgyu ma'i glang po ji bzhin no/ /cha shas sna tshogs gnas pa na/ /rdul phran gcig pu nyid ma yin/ /de nyid med pas du ma gang/ /phan tshun spangs te gnas pa na/ /gzhan gyi dngos po ga la yod/ /de nyid med pas de bsags pa'i/ /rags pa'i gzugs dang rdzas sogs gang/ /rnam pa sna tshogs snang ba dang/ /shes pa tha ni mi dad pas/ /shes pa du ma nyid du 'gyur/ /rnam pa rdzun pa nyid kyis ni/ /shes pa de yang rdzun par 'gyur/ /de lta min na bden nyid 'gyur/ /de nyid phyir na sems 'byung gang/ /gcig dang du ma spangs pa yi/ /dngos po gang yang mi gnas te/ /phan tshun spangs te gnas phyir ro/ /mngon sum la sogs 'gal zhe na/ /ma yin ma brtags nyams dga' ba/ /de ni bdag gis bkag la med/ /tha snyad tsam zhig sgrub pa'i phyir/ /dam bca' gtan tshigs nyid ma yin/ /ye nas skye med dang 'di la/ /dgag bya med la sgrub bya med/ /mya ngan 'das dang ma 'das pa/ /skye med dang du khyad par med/ /skye med nyid kyang ma yin te/ /skye ba'i dngos po med phyir ro/ /kun rdzob med la don dam med/ /sangs rgyas med la sems can med/ /lta ba med cing sgom pa med/ /'bras bu med cing spyod pa med/ /de yi don ni bsgom bya ste/ / rtog med blo ni rang zhir bzhag/ /dngos gzungs med cing g.yeng ba med/ /mtshan ma med cing gsal bar sgom/ /langs la dngos por snang ba kun/ /sgyu ma tsam du shes byas nas/ /sdom pa rnam gsum 'bad pas bsrung/ /yan lag bdun pa la sogs bya/ /snying rjes phan sems che bar bya/ /yul la chags pa spang bya zhing/ /'gron po'i tshul gyis gnas par bya/ /sems can ma dang spangs nas ni/ /bdag nyid dgon par gnas par bya/ /de yi 'bras bu sangs rgyas kyis/ /'bras bu chen po thob la ste/ /chos kyi sku dang longs spyod rdzogs/ /sprul pa'i sku ru gnas pa yis/ /sems can thams cad sgrol bar byed/ /de phyir 'bad pas thams cad kyis/ /dang po lta bar thag bcad de/ /bar du bsgom pas nyams su blang/ /tha mar 'bras bu thob par 'gyur/ /de bas 'bad de brtson par bya/ /de ltar bdag gis bshad 'di la/ /phyogs 'dzin pa yi sems bor la/ /rigs pa yis ni dpyad par bya/ /chos la skur ba gdab mi bya/ /g.yeng ba thams cad spangs nas ni/ /sgrub ni rab tu brtson par bya/ /bdag gis 'di byas bsod nams kyis/ /sems can thams cad grol gyur cig /dbu ma shes rab la 'jug pa zhes bya ba/ /slob dpon chen po zla ba grags pas mdzad pa rdzogs so// //paN+Di ta de nyid dang lots+tsha ba bgos khu ba lha btsas kyi bsgyur ba'o// //bkra shis shog//