བོད་ཡིག

e-texts based on the ACIP/ALL Input

bshad pa/ brda' sprod pa chen po bstan bcos thams cad 'chad par bzhed pa/ slob dpon 'phags pa klu sgrub kyis mdzad pa rdzogs so// //rtsod pa bzlog pa'i 'grel pa slob dpon nA gA rdzu nas mdzad pa bzhugs so// // rgya gar skad du/ bi gra nya bya brta ni brit+ti/ bod skad du/ rtsod pa bzlog pa'i 'grel pa/ 'jam dpal gzhon nur gyur pa la phyag 'tshal lo/ /gal te dngos po thams cad kyi/ /rang bzhin kun la yod min na/ /khyod kyi tshig kyang rang bzhin med/ /rang bzhin bzlog par mi nus so/ /gal te dngos po thams cad kyi rang bzhin rgyu dang rkyen dang/ rgyu dang rkyen tshogs pa dang tha dad pa kun la yod pa ma yin pa'i phyir dngos po thams cad stong pa yin te myu gu ni rgyu sa bon du gyur pa la yang med/ rkyen zhes bya ba sa dang chu dang me dang rlung la sogs pa re re la yang med/ /rkyen 'dus pa dag la yang med/ rgyu dang rkyen tshogs pa dag la yang med/ /rgyu dang rkyen tshogs pa la ma gtogs pa tha dad pa la yang med do/ /gang gi phyir rang bzhin 'di de thams cad la yang med pa de'i phyir myu gu'i rang bzhin med de/ de bas na stong pa yin no/ /ji ltar myu gu rang bzhin med/ /rang bzhin med pa nyid yin pa'i phyir stong pa yin pa de bzhin du dngos po thams cad kyang rang bzhin med pa nyid yin pa'i phyir stong pa yin no zhe na/ gal te de lta yin na ni dngos po thams cad stong pa yin no/ /zhes bya ba gang yin pa'i khyod kyi tshig de yang stong pa yin no/ /ci'i phyir zhe na/ de yang rgyu 'byung ba chen po rnams dang mtshungs par ldan pa rnams dang ldan pa ma yin pa rnams la yang med/ /rkyen brang dang/ lkog ma dang/ mchu dang/ lce dang/ so'i brun dang/ rkan dang/ sna dang/ spyi bo la sogs pa dang/ 'bad pa rnams la yang med/ gnyi ga tshogs pa lam gtogs pa tha dad pa yang med do/ /gang gi phyir 'di thams cad la med pa'i phyir/ 'di rang bzhin med pa yin te/ rang bzhin med pa'i phyir stong pa yin no/ /de lta bas na 'dis dngos po thams cad bzlog par byed mi nus so/ /me med pas kyang sreg par mi nus la/ /mtshon cha med pas kyang bcad par mi nus shing chu med pas kyang bcad par mi nus pa de bzhin du tshig med pas kyang/ dngos po thams cad kyi rang bzhin bzlog par byed mi nus pas de la dngos po thams cad kyi rang bzhin bkag go zhes smras pa gang yin pa de mi rung ngo/ /'on te tshig de rang bzhin bcas/ /khyod kyi dam bcas snga ma nyams/ /mi 'dra nyid de de yin na/ /gtan tshigs khyad par brjod par byos/ /'on te skyon der gyur na mi rung ngo snyam nas nga'i tshig de ni rang bzhin dang bcas pa yin te/ de'i phyir stong pa ma yin no/ /de bas na 'dis ni dngos po thams cad kyi rang bzhin bkag go snyam du sems na/ 'o na de ltar yin na ni dngos po thams cad ni stong pa yin no zhes sngar dam bcas pa gang yin pa de nyams pa yin no/ /'di ltar gzhan yang thams cad kyi nang du ni khyod kyi tshig kyang 'dus pa yin na/ ci'i phyir zhe na/ dngos po thams cad stong pa yin bzhin du 'di ltar stong pa nyid ma yin pa'i phyir des dngos po thams cad kyi rang bzhin bkag go zhes bya ba'i khyod kyi tshig stong pa ma yin par 'gyur/ de lta na ni smras pa mu drug tu thal bar 'gyur 'o/ /de yang ji lta bu zhe na/ 'on kyang gal te dngos po thams cad stong pa yin no/ /zhe na/ khyod kyi tshigs kyang stong pa yin te/ thams cad kyi nang du 'dus pa'i phyir la/ stong pa'i phyir des ni dgag pa mi 'thad pas de la dngos po thams cad ni stong pa yin no/ /zhes dgag pa gang yin pa de 'thad pa ma yin no/ /gal te 'thad pa ma yin no zhe na/ dngos po thams cad ni stong pa yin no zhes bkag pas des na khyod kyi tshig kyang stong pa yin la/ stong pa nyid yin pa'i phyir des 'gog pa mi 'thad do/ /gal te dngos po thams cad ni stong pa yin na/ gang gi 'gog par byed pa khyod kyi tshig ni stong pa ma yin no zhe na/ des na khyod kyi tshig thams cad kyi nang du ma bsdus pa yin te/ de la 'gal ba'i dper 'gyur ro/ /gal te thams cad kyi nang du khyod kyi tshig bsdus so zhe na/ dngos po thams cad stong pa yin pas des na de yang stong pa yin no/ /de'i phyir 'dis 'gog pa med do/ /gal te stong pa yin yang dngos po thams cad ni stong pa'o zhes 'dis 'gog pa yod do zhe na/ des na dngos po thams cad stong pa yin yang bya ba byed nus par 'gyur te/ de ni 'dod pa ma yin no/ /gal te 'gal ba'i dper gyur nas mi rung ngo/ /snyam nas dngos po thams cad stong pa yin te/ bya ba byed mi nus so zhe na/ khyod kyi tshig stong pas kyang dngos po thams cad kyi rang bzhin 'gog par mi 'thad do/ /ji ltar gzhan yang de skad zer na ni kha cig ni stong kha cig ni mi stong ngo zhes mi 'dra ba nyid du thal bar 'gyur ro/ /mi 'dra ba nyid yin na ni gang gis na kha cig ni stong kha cig ni mi stong par gyur pa'i gtan tshigs kyi khyad par yang smros shig /gtan tshigs de yang ma bstan pas de la dngos po thams cad ni stong pa'o// zhes smras pa gang yin pa de mi rung ngo/ /'di ltar gzhan yang/ de sgra ma 'byin lta bu'o zhes/ /khyod blo sems na de mi 'thad/ /'di la sgra ni yod pa yis/ /'byung bar 'gyur ba de bzlog yin/ /dper na kha cig na re sgra ma 'byin cig ces bdag nyid sgra 'byin pa na sgra des sgra de bzlog par byed do/ /de bzhin du dngos po thams cad ni stong pa zhes stong pa'i rang bzhin gyi tshig gis dngos po thams cad kyi rang bzhin bzlog par byed do/ /'dir smras pa/ de yang 'thad pa ma yin te/ 'di la sgra yod pas sgra 'byung bar 'gyur pa 'gog par byed pa yin gyi/ 'dir khyod kyi yod pa'i tshig gis dngos po thams cad kyi rang bzhin 'gog par mi byed de/ khyod kyi lugs kyi tshig kyang yod pa ma yin/ dngos po thams cad kyi rang bzhin yang yod pa ma yin pas// de'i phyir sgra ma 'byin zhes pa lta bu'o/ /zhes bya ba 'di ni mi mthun par smras pa yin no/ /'gog pa'i 'gog pa'ang de lta zhes/ 'dod na de yang bzang min te/ de lta na yang khyod dam bcas/ /mtshan nyid skyon yod nged la med/ /khyod kyi blo la rnam pa 'di nyid kyis 'gog pa'i 'gog pa yang mi 'thad de/ de la khyod kyis dngos po thams cad kyi rang bzhin 'gog pa'i tshig 'gog par byed pa'i tshig gang yin pa de yang mi 'thad do snyam du sems na/ 'dir smra bar bya ste/ de yang bzang po ma yin te/ de ci'i phyir zhe na/ khyed la ni dam bcas pa'i mtshan nyid kyis 'thob kyi/ nged la ni med pas de la de lta yin na ni 'gog pa'i 'gog pa yang 'thad pa ma yin no/ /zhes smras pa gnag yin pa de mi rung ngo/ /'di ltar gzhan yang/ re zhig dngos rnams mngon sum gyis/ /dmigs nas bzlog par byed min na/ /gang gis dngos rnams dmigs 'gyur ba/ /mngon sum de ni med pa yin/ /gal te khyod kyis dngos po thams cad mngon sum gyis dmigs nas dngos po thams cad ni stong pa'o zhes bzlog par byed na ni rung na/ /de yang 'thad pa ma yin te/ ci'i phyir zhe na/ dngos po thams cad kyi nang du mi mngon sum gyi tshad ma yang 'dus pa'i phyir stong pa yin la/ dngos po la dmigs par byed pa gang yin pa de yang stong pa yin/ /de'i phyir tshad mas dmigs pa med do/ /mi dmigs pa 'gog pa yang mi 'thad pas de la dngos po thams cad ni stong pa'o zhes smras pa gang yin pa de 'thad pa ma yin no/ /'on te khyed kyi blo la rjes su dpag pa dang lung dang dpes 'jal bas dmigs nas dngos po 'di thams cad bzlog par byed do snyam du sems na 'dir smra bar bya ste/ rjes dpag lung dang dpas 'jal dang/ /rjes dpag lung gi sgrub bya dang/ /dpes sgrub bya ba'i don gang yin/ /mngon sum gyis ni lan btab bo/ /rjes su/ dpag pa dang/ dpes 'jal ba dang/ lung yang mngon sum gyi tshad mas lan btab pa yin te/ 'di ltar mngon sum gyi tshad ma ni stong pa yin te/ dngos po thams cad stong pa nyid yin pa'i phyir ro/ /de bzhin du rjes su dpag pa dang/ dpes 'ja' ba dang/ lung yang stong pa yin te/ dngos po thams cad stong pa nyid yin pa'i phyir ro/ /rjes su dpag pas bsgrub par bya ba'i don dang/ lung gis bsgrub par bya ba dang/ dpes bsgrub par bya ba gang yin pa de dag kyang stong pa yin te/ dngos po thams cad stong pa nyid yin pa'i phyir ro/ /rjes su dpag pa dang/ lung dang/ dpes 'jal bdag gis dngos po rnams la dmigs par byed pa gang yin pa de yang stong pa nyid yin te/ de'i phyir dngos po rnams dmigs pa med do/ /mi dmigs pa'i rang bzhin 'gog pa mi 'thad pas de la dngos po thams cad ni stong pa'o zhes smras pa gang yin pa de mi rung ngo/ /'di ltar gzhan yang/ skye bo chos kyi gnas skabs mkhas/ /dge ba dag gi chos rnams la/ /dge ba'i rang bzhin yin par ni// sems shing lhag ma rnams dang yang/ 'di la skye bo chos kyi gnas skabs la mkhas pa rnams ni dge ba'i chos rnams la brgya rtsa bcu dgu sems te/ 'di lta ste/ rnam par shes pa dang/ tshor ba dang/ 'du shes dang/ sems dpa' dang/ reg pa dang/ yid la byed pa dang/ 'dun pa dang/ mos pa dang/ brtson 'grus dang/ dran pa dang/ ting nge 'dzin dang/ shes rab dang/ btang snyoms dang/ sbyor ba dang/ yang dag par sbyor ba dang/ thob pa dang/ lhag pa'i bsam pa dang/ khong khro ba med pa dang/ dga' ba dang/ 'bad pa dang/ rtsol ba dang/ rmongs 'brel dang/ spros pa dang/ gnos pa med pa dang/ dbang dang ldan pa dang/ khong khro dang/ yid la gcags pa med pa dang/ 'dzin pa dang/ mi 'dzin pa dang/ dran pa dang/ brtan pa dang/ lhag par zhen pa dang/ rmongs pa med pa dang/ mi rtsol ba dang/ spro ba med pa dang/ don du gnyer ba dang/ smon lam dang/ rgyags pa dang/ yul dang mi ldan pa dang/ nges par 'byin pa ma yin pa dang/ skye ba dang/ gnas pa dang/ mi rtag pa dang/ dga' ba dang/ ldan pa dang/ yongs su gdung ba dang/ mi dga' ba dang/ rtog pa dang/ sdug pa dang/ dang ba dang/ 'dod pa mi mthun pa dang/ mthun par 'dzin pa dang/ /rjes su mi mthun par gzung ba dang/ mi 'jigs pa dang/ zhes dang/ ri mor byed pa dang/ dad pa dang/ ma dad pa dang/ bsgo ba bzhin byed pa dang/ gus pa dang/ ma gus pa dang/ rgod pa dang/ shin tu sbyangs pa dang/ ngag dang/ mgul ba dang/ grub pa dang/ ma dang ba dang/ shin tu ma sbyangs pa dang/ rnam par byang ba dang/ brtan pa dang/ nges pa dang/ yid la gcags pa dang/ mya ngan dang/ 'khrug pa dang/ rgyags pa dang/ mi mthun par 'dzin pa dang/ the tshom dang/ sdom pa yongs su dag pa dang/ nang legs par dang ba dang/ 'jigs pa'i phyogs gcig dang/ dad pa dang/ ngo tsha shes pa dang/ gnam pa dang/ mi 'drid pa dang/ nye bar zhi ba dang/ rtags bag ma yin pa dang/ bag yod pa dang/ byams par lta ba dang/ so sor brtags pa dang/ yid byung ba dang/ yongs su gdung ba med pa dang/ rgyags pa med pa dang/ chags pa med pa dang/ zhe sdang med pa dang/ gti mug med pa dang/ thams cad shes pa nyid dang/ mi gtong ba dang/ 'byor pa dang/ khrel yod pa dang/ mi 'chab pa dang/ snying rje dang/ sems pa mi gtong ba dang/ byams pa dang/ zhum pa med pa dang/ dgra bral ba dang/ rdzu 'phrul dang/ khon du mi 'dzin pa dang/ phrag dog med pa dang/ sems yongs su btugs pa med pa dang/ bzod pa dang/ rnam par spong ba dang/ nges pa ma yin pa dang/ yongs su longs spyod pa'i rjes su mthun pa dang/ bsod nams dang/ 'du shes pa'i snyoms par 'jug pa dang/ nges par 'byin pa nyid dang thams cad mi shes pa nyid dang/ 'dus ma byas pa'i chos so zhes de ltar dge ba'i chos rnams la dge ba'i rang bzhin brgya rtsa bcu dgu dang/ de bzhin du mi dge ba'i chos rnams la mi dge ba'i rang bzhin dang/ bsgrib la lung du ma bstan pa rnams la bsgribs la lung du ma bstan pa'i rang bzhin dang/ ma bsgribs la lung du ma bstan pa rnams la ma sgribs la lung du ma bstan pa'i rang bzhin dang/ 'dod par gsungs pa rnams la 'dod par gsungs pa dang/ gzugs su gsungs pa rnams la gzugs su gsungs pa dang/ gzugs med par gsungs pa rnams la gzugs med par gsungs pa dang/ zag pa med pa rnams la zag pa med pa dang/ sdug bsngal dang/ kun 'byung ba dang/ 'gog pa dang/ lam zhes bya ba rnams la sdug bsngal dang/ kun 'byung ba dang/ 'gog pa dang/ lam zhes bya ba'i rang bzhin dang/ bsgom pas spang bar bya ba rnams la bsgom pas spang bar bya ba dang/ spang bar bya ba rnams la bsgom pas spang bar bya ba dang/ spang bar bya ba ma yin par rnams la/ spang bar bya ba ma yin pa'i rang bzhin du sems te/ de'i phyir de ltar na rnam pa du ma'i chos kyi rang bzhin mthong bas de bas na dngos po thams cad ni rang bzhin med pa ste/ rang bzhin med pa nyid yin pa'i phyir stong pa'o/ /zhes smras pa gang yin pa de mi rung ngo/ /'di ltar gzhan yang/ des 'byin la sogs rnams kyi chos/ /gnas skabs gsungs pa de rnams la/ /nges 'byin rang bzhin chos rnams dang/ /nges 'byin min gang tshul de bzhin/ /'di la nges par 'byin pa'i chos kyi gnas skabs gsungs pa rnams la des par 'byin pa'i rang bzhin dang/ nges par 'byin pa ma yin pa rnams la nges par 'byin pa ma yin pa'i rang bzhin dang/ byang chub kyi yan lag dang ldan pa rnams la byang chub kyi yan lag dang ldan pa dang/ byang chub kyi yan lag dang mi ldan pa rnams la byang chub kyi yan lag dang mi ldan pa dang/ byang chub kyi phyogs dang ldan pa rnams la byang chub kyi phyogs dang ldan pa dang/ byang chub kyi phyogs dang mi ldan pa rnams la byang chub kyi phyogs dang mi ldan pa dang/ lhag ma rnams la yang de bzhin te/ de'i phyir de ltar rnam pa du ma'i chos rnams kyi rang bzhin mthong ba de'i phyir dngos po thams cad ni rang bzhin med pa ste/ de bas na stong pa'o zhes smras pa gang yin pa de mi rung ngo/ /'di ltar gzhan yang/ gal te chos gyi rang bzhin med/ /rang bzhin med ces bya ba'i ming/ /ming yang de bzhin med 'gyur nyid/ /gzhi med ming ni med phyir ro/ /gal te chos thams cad kyi rang bzhin med pa yin na de la yang rang bzhin med pa yin no/ /de la rang bzhin med do/ /zhes bya ba'i ming yang de bzhin du med par 'gyur ro/ /ci'i phyir zhe na/ gzhi med pa'i ming ni 'ga' yang med pa'i phyir ro/ /de bas na mi srid pa'i phyir dngos po rnams kyi rang bzhin yod do/ /rang bzhin yod pa'i phyir dngos po thams cad stong pa ma yin no/ /de bas chos thams cad rang bzhin med pa ste/ rang bzhin med pa nyid yin pa'i phyir stong pa'o/ /zhes smras pa gang yin pa de rigs pa ma yin no/ /'on te 'di ltar rang bzhin yod/ /de ni chos la med ce na/ /chos rnams med pa'i rang bzhin te/ gang gi yin pa de bstan rigs/ /'on te gzhi med pa'i ming du gyur na mi rung ngo/ /snyam nas rang bzhin ni yod la/ de yang chos thams cad la ni mi srid do/ /de ltar na chos rnams la rang bzhin med pa'i phyir chos ni stong par 'grub par 'gyur la/ ming gzhi med par yang ma yin no snyam du sems na/ /'dir smra bar bya ste/ de lta yin na rang bzhin de chos la ma gtogs pa'i don gang yin pa'i don de bstan pa'i rigs so/ /de yang ma bstan pas de'i phyir rang bzhin ni yod la/ de yang chos rnams ni med do/ /zhes rtog pa gang yin pa de nyams su/ /'di ltar gzhan yang/ gang phyir khyim na bum pa de/ /med ces yod pa nyid la 'gog /mthong ste de phyir khyod kyis 'di/ /yod pa'i rang bzhin 'gog pa yin/ /'di la don yod pa la 'gog par byed kyi/ med pa la ni ma yin te/ dper na khyim na bum pa med ces bya ba lta bu ste/ bum pa yod pa la 'gog pa yin gyi/ med pa la ni ma yin no/ /de bzhin du chos rnams kyi rang bzhin med do zhes bya ba yang rang bzhin yod pa la 'gog par 'gyur ba yin gyi/ med pa la ni ma yin pas de la chos thams cad kyi rang bzhin med do zhes smras pa gang yin pa de mi rung ngo/ /'di ltar gzhan yang 'gog pa yod pa nyid kyi phyir dngos po thams cad kyi rang bzhin rab tu grub pa yin no/ / ji lta rang bzhin de med na/ /khyod kyi tshig des ci zhig dgag /med pa yin na tshig med par/ /'gog par rab tu grub pa yin/ /ji ste rang bzhin de med pa nyid yin na/ dngos po thams cad med do zhes bya ba'i tshig 'dis khyod kyi ci zhig 'gog par byed/ /'di ltar med pa la ni tshig med par yang 'gog pa 'grub ste/ /ji ltar me la grang ba nyid dang/ chu la tsha ba nyid lta bu'o/ /'di ltar gzhan yang/ byis pa rnams ni smig rgyu la/ /ji ltar log par chur 'dzin ltar/ /de bzhin khyod kyis log par 'dzin/ /yod pa min la 'gag par bya/ /khyod kyi blo la ji ltar byis pa rnams smig rgyu la log par chur 'dzin pa na de ni skyes bu mkhas pa'i rang bzhin can gyis 'dzin pa de bzlog pa'i phyir de na chu med kyi/ /de ni smig rgyu'o zhes zer ba de bzhin du rang bzhin pa med pa rnams la sems can rnams kyis rang bzhin du 'dzin pa gang yin pa de bzlog pa'i phyir dngos po thams cad ni rang bzhin med pa'o/ /zhes bya'o snyam du sems na/ 'dir smra bar bya ste/ de lta na ni 'dzin pa dang/ /gzung dang 'dzin pa po de dang/ /'gog dang dgag bya 'gog pa po/ /de drug yod pa ma yin nam/ /gal te de lta na ni re zhig sems can rnams kyi 'dzin pa yang yod pa dang/ gzung ba yod pa dang/ de 'dzin pa po yod pa dang/ log par 'dzin pa de 'gog pa yang yod pa dang/ dgag par bya ba log par 'dzin pa de yang yod pa dang/ khyod la sogs pa 'dzin pa de 'gog pa po yang yod de/ drug tu grub pa ma yin nam/ de drug tu gyur na ni/ ma bkag pa nyid yin pa'i phyir dngos po thams cad ni stong pa'o zhes smras pa gang yin pa de mi rung ngo/ /ci ste 'dzin pa yod min zhing/ /gzung med 'dzin pa po med na/ /'o na 'gog dang dgag bya dang/ 'gog pa po yang yod min te/ /ci ste skyon der gyur na mi rung ngo/ /snyam nas 'dzin pa yang med/ /gzung ba yang med/ 'dzin pa po yang med do zhe na/ de lta na ni dngos po thams cad ni rang bzhin med do zhes bya ba 'dzin pa 'gog pa gang yin pa de yang med la/ dgag par bya ba yang med/ 'gog pa po yang med par 'gyur te/ gal te 'gog dang dgag bya dang/ /'gog pa po yang yod min na/ /dngos po kun dang de rnams kyi/ /rang bzhin nyid kyang grub yin na/ /gal te 'gog pa yang med/ /dgag par bya ba yang med/ 'gog pa po yang med na ni/ dngos po thams cad kyang ma bkag par yod la/ dngos po rnams kyi rang bzhin yang yod do/ /'di ltar gzhan yang/ khyod la gtan tshigs ma grub ste/ /rang bzhin med phyir khyed gtan tshigs/ /gang la yod de khyod don de/ /gtan tshigs med phyir grub mi 'thad/ /dngos po thams cad ni rang bzhin med do zhes bya ba'i don 'di la khyod kyis gtan tshigs ma grub ste/ ci'i phyir zhe na/ dngos po thams cad ni rang bzhin med pa'i phyir stong pa yin pas de'i phyir gtan tshigs ga la yod/ gtan tshigs med na ni gtan tshigs med par dngos po thams cad stong pa'o zhes bya ba'i don ga la grub pas de la dngos po thams cad stong pa'o zhes smras pa gang yin pa de mi rung ngo/ /'di ltar gzhan yang/ khyod la gtan tshigs med par yang/ /rang bzhin bzlog par grub yin na/ /nga la 'ang gtan tshigs med par ni/ / rang bzhin nyid ni yod par 'grub/ /ci ste de la gtan tshigs med par yang dngos po rnams kyi rang bzhin med par 'grub po snyam du sems na /ji ltar khyod la gtan tshigs med pa rang bzhin bzlog par grub pa de bzhin du ngal yang gtan tshigs med par dngos po'i rang bzhin yod par 'grub bo/ /nga la yang zhes bya ba ni nged la yang ngo/ /gal te gtan tshigs yod na dngos/ /rang bzhin med ces bya mi 'thad/ /'jig rten na ni rang bzhin med/ /dngos po 'ga' yang yod min no/ /gal te dngos po rnams kyi rang bzhin med pa nyid kyi gtan tshigs yod pa kho na'o snyam du sems na/ dngos po thams cad rang bzhin med do zhes bya ba mi 'thad do/ /ci'i phyir zhe na/ 'jig rten na rang bzhin med pa'i dngos po 'ga' yang yod pa ma yin no/ /'di ltar rang bzhin yod min na/ /gal te 'gog snga dgag 'phyi zhes/ /zer na 'thad pa ma yin la/ /dgag par bya ba yod pa ma yin na ci zhig la 'gog par byed/ 'chi zhing cig car mi 'thad do/ /rang bzhin med pa zhes bya ba 'dir gal te 'gog pa ni snga ma la dgag par bya ba ni 'phyi'o zhe na/ 'thad pa ma yin te/ dgag par bya ba yod pa ma yin na gang gi 'gog pa yin par 'gyur/ 'on te 'gog pa ni 'phyi la dgag par bya ba snga'o zhe na/ 'thad pa ma yin te/ dgag par bya ba grub zin na/ /ci zhig 'gog par byed/ 'on te 'gog pa dang dgag par bya ba mgo mnyam mo zhe na/ de lta na yang 'gog pa ni dgag par bya ba'i don gyi rgyu ma yin la/ dgag par bya ba yang 'gog pa'i ma yin te/ dper na ri bong gi rA g.yas g.yon gnyis mgo mnyam du skyes pa lta bu ste/ rwa g.yas pa yang g.yon pa'i rgyu ma yin pa/ g.yon pa yang g.yas pa'i rgyu ma yin pa lta bu yin pas de la dngos po thams cad rang bzhin med do zhes smras pa gang yin pa de mi rung ngo/ /'dir bshad pa/ re zhig khyod kyis/ gal te dngos po thams cad kyi/ /rang bzhin kun la'ang yod min na/ /khyod kyi tshig kyang rang bzhin med/ /rang bzhin bzlog par mi nus so/ /zhes smras pa gang yin pa de la bshad par bya ste/ gal te nga'i tshig rgyu rkyen dang/ /tshogs dang tha dad la yang med/ /'o na dngos rnams stong 'grub ste/ /rang bzhin med pa nyid phyir ro/ /gal te nga'i tshig rgyu 'byung ba chen po rnams dang mtshungs par ldan pa rnams dang/ ldan pa ma yin pa rnams la yang med/ rkyen dran dang/ lkog pa dang/ mchu dang/ lce dang/ so'i brun dang/ rkan dang/ sna dang/ spyi bo la sogs pa dang/ 'bad pa rnams la yang med/ gnyi ga tshogs pa la yang med/ rgyu dang rkyen tshogs pa la ma gtogs par tha dad pa yang med do/ /de'i phyir rang bzhin med pa yin te/ rang bzhin med pa'i phyir stong pa yin no zhe na/ 'o na ni da'i tshig ste stong par grub ste/ rang bzhin med pa nyid yin pa'i phyir ro/ /ji ltar nga'i tshig de rang bzhin med pa nyid yin pa'i phyir stong pa yin pa de bzhin du dngos po thams cad kyang rang bzhin med pa nyid yin pa'i phyir stong pa yin pas na de la khyod kyis chos kyi tshig stong pa yin pa'i phyir dngos po thams cad stong pa nyid du mi 'thad do zhes smras pa gang yin pa de mi rung ngo/ /'di ltar gzhan yang/ dngos rnams brten nas 'byung ba gang/ /de ni stong nyid ces bya dang/ /gang zhig brten nas 'byung ba de/ /rang bzhin nyid med yin par smra/ khyod kyis ni dngos po rnams kyi stong pa nyid kyi don khong du ma chud par khyod kyi tshig rang bzhin med pa yin pa'i phyir/ dngos po rnams kyi rang bzhin 'gog pa mi 'thad de zhes klan ka tshol ba smra bar byed de/ 'dir ni dngos po rnams brten nas 'byung ba gang yin pa de ni stong pa nyid yin no/ /ci'i phyir zhe na/ rang bzhin med pa nyid yin pa'i phyir ro/ /dngos po gang dag rten cing 'brel bar 'byung ba de dag ni rang bzhin dang bcas pa ma yin te/ rang bzhin med pa'i phyir ro/ /ci'i phyir zhe na/ rgyu dang rkyen la bltos pa dang bcas pa'i phyir ro/ /gal te dngos po rnams rang bzhin gyis yod na ni rgyu dang rkyen med kyang yod par 'gyur ba zhig na/ de ltar yang ma yin pas de'i phyir rang bzhin med pa yin te/ des na stong pa'o/ /zhes bya bar 'thad do/ /de bzhin du nga'i tshig kyang rten cing 'brel bar 'byung ba yin/ /de'i phyir rang bzhin med do/ /rang bzhin med pa nyid yin pa'i phyir stong pa zhes bya bar 'thad pa yin no// ji ltar bum pa dang snam bu la sogs pa rten cing 'brel par 'byung ba nyid yin pa'i phyir rang bzhin stong pa yin yang sbrang rtsi dang/ chu dang 'o thug 'dzin pa dang/ len pa dang/ grang ba dang/ rlung dang/ nyi ma yongs su skyob par nus pa de bzhin du nga'i tshig kyang rten cing 'brel par 'byung ba yin pa'i phyir rang bzhin med pa yin yang dngos po rnams rang bzhin med par rab tu bsgrub par nus pa yin pas de la khyod kyi tshig rang bzhin med pa nyid yin pa'i phyir dngos po thams cad kyi rang bzhin 'gog pa 'thad pa yin no/ /zhes smras pa gang yin pa de mi rung ngo/ /'di ltar gzhan yang/ sprul pa yis ni sprul pa dang/ /sgyu ma yi ni skyes bu yis/ /sgyu mas phyung la 'gog byed ltar/ /'gog pa de yang de bzhin 'gyur ji ltar sprul pa'i skyes bus sprul pa'i skyes bu zhig don 'ga' zhig gi phyir 'ong bar byed pa la 'gog pa byed pa dang/ sgyu ma mkhan gyis phyung ba'i sgyu ma'i skyes bus sgyu ma'i skyes bu gzhan zhig don 'ga' zhig gi phyir 'ong bar byed pa la 'gog par byed pa bzhin te de la sprul pa'i skyes bu dgag par bya ba gang yin pa de yang stong pa yin/ 'gog par byed pa de yang stong pa yin sgyu ma'i skyes bu dgag par bya ba gang yin pa de yang stong pa yin 'gog par byed pa gang yin pa de yang stong pa yin pa de bzhin du nga'i tshig stong pas kyang dngos po thams cad stong pas kyang dngos po thams cad kyi rang bzhin 'gog pa 'thad pa na de la khyod kyi tshig stong pa nyid yin pa'i phyir dngos po thams cad kyi rang bzhin 'gog pa 'thad pa ma yin no/ /zhes smras pa gang yin pa de rung ba ma yin no/ /de la khyod kyis mu drug tu smras pa gang yin pa de yang de nyid kyis bkag pa yin te/ de lta yin na thams cad kyi nang du nga'i tshig kyang ma 'dus pa yin zhing mi stong pa'ang ma yin la/ dngos po thams cad kyang mi stong pa ma yin no/ /yang khyod kyis/ 'on te tshig de rang bzhin bcas/ /khyod kyi dam bcas snga ma nyams/ /mi 'dra nyid de de yin na/ /gtan tshigs khyad par brjod par byos/ /zhes smras pa gang yin pa 'di la bshad par bya ste/ nga yi tshig de rang bzhin med/ /de phyir smras pa ma nyams la/ /mi 'dra nyid kyang med pas na/ /gtan tshigs khyad pa bshad mi bya/ /re zhig nga'i tshigs de ni rten cing 'brel par 'byung ba yin pa'i phyir rang bzhin 'thad pa ma yin te/ ji skad du sngar rang bzhin/ 'thad pa ma yin pa'i phyir stong pa yin no/ /zhes bshad pa lta bu'o/ /gang gi phyir nga'i tshig de yang stong pa yin/ /dngos po lhag ma rnams kyang stong pa yin pa de'i phyir mi 'dra ba nyid med do/ /gal te de na re tshig de ni stong pa ma yin la dngos po lhag ma thams cad ni stong pa yin no/ /zhes 'chad na ni des na mi 'dra ba nyid du yang 'gyur na/ de ni de lta ma yin pas de'i phyir mi 'dra ba nyid med do/ /gang gi phyir tshig de ni stong pa ma yin la dngos po lhag ma thams cad ni stong pa yin no zhes mi 'dra ba nyid mi srid pa de'i phyir kho bos gtan tshig des na tshig de ni stong pa ma yin la/ dngos po thams cad ni stong pa yin no/ /zhes gtan tshig kyi khyad par bshad par mi bya ste/ de la khyed kyis smras pa yang nyams la/ mi 'dra ba nyid kyang yin pas khyod kyis gtan tshigs kyi khyad par yang brjod par byos shig ces smras pa gang yin pa de mi rung ngo/ /yang/ de sgra ma 'byin lta bu'o zhes/ khyod blo sems na de mi 'thad/ /'di la sgra ni yod pa yis/ /'byung bar 'gyur ba de bzlog yin/ zhes smras pa gang yin pa 'di la bshad par bya ste/ sgra ma 'byin zhes bya bzhin zhes/ /khyod kyi gang brtsams dpe 'di min/ /da ni sgra yis sgra bzlog pas/ /'di ni de lta ma yin no/ /'di na nges kyi dpe ma yin te/ ji ltar 'ga' zhig na ra sgra ma 'byin zhes de skad zer ba na sgra nyid 'byin cing sgra bzlog par byed pa ltar tshig stong pa des ni stong pa nyid 'gog par mi byed do/ /ci'i phyir zhe na/ 'di la dpe sgras sgra bzlog par byed pa de ltar 'di ni ma yin te/ nges ni dngos po thams cad rang bzhin med pa yin te/ rang bzhin med pa'i phyir stong pa yin no zhes 'chad do/ /ci'i phyir zhe na/ gal te rang bzhin med nyid kyis/ /ji ste rang bzhin med la bzlog /rang bzhin med pa nyid log na/ /rang bzhin nyid du rab grub 'gyur/ /ji ltar sgra ma 'byin ces bya ba lta bu sgras sgra bzlog par byed pa de bzhin du/ gal te tshig rang bzhin med pa nyid kyis dngos po rang bzhin med pa rnams la bzlog par byed na ni des na dpe 'thad par 'gyur ba zhig na/ 'dir ni tshig rang bzhin med pa nyid kyis dngos po rnams kyi rang bzhin 'gog par byed do/ /gal te tshig rang bzhin med pa nyid kyis dngos po rnams kyi rang bzhin med pa nyid 'gog par byed na ni rang bzhin med pa nyid bkag pa nyid kyi phyir dngos po rnams rang bzhin dang bcas par 'gyur la/ rang bzhin dang bcas pa'i phyir stong pa ma yin par 'gyur ro/ /kho bo cag ni dngos po rnams stong pa nyid du smra'i/ stong pa nyid ma yin par ni smra ba ma yin pas dpe 'di ma yin pa nyid do/ /yang na kha cig sprul pa yis/ /bud med la ni bud med snyam/ /log 'dzin 'byung la sprul pa yis/ /'gog byed 'di ni de lta yin/ /yang na ji ltar skyes bu kha cig sprul pa'i bud med rang bzhin gyi stong pa yin pa la don dam par bud med do snyam du log par 'dzin par 'gyur ro// de'i phyir de log par 'dzin pa des 'dod chags bskyed pa la de bzhin gshegs pa'am/ de bzhin gshegs pa'i nyan thos kyis sprul pa zhig sprul la/ des de'i log par 'dzin pa de bzlog par byed do/ /de bzhin du nga'i tshig stong pa sprul pa lta bus dngos po thams cad kyi rang bzhin med pa sprul pa'i bud med dang 'dra ba dag la rang bzhin yod par 'dzin pa gang yin pa bzlog par byed do/ /de bas na 'dir stong pa nyid du rab tu bsgrub pa la dpe 'di 'thad pa yin gyi/ cig shos ni ma yin no/ /yang na gang phyir bsgrub bya dang/ /gtan tshigs 'di mtshungs sgra yod min/ /tha snyad khas ni ma blangs par/ /nged cag tshad par mi byed do/ /bsgrub par bya ba dang/ sgra ma 'byin zhes bya ba lta bu'o/ /zhes bya ba'i gtan tshigs 'di mtshungs pa kho na yin no/ /ci'i phyir zhe na/ dngos po thams cad ni rang bzhin med pa nyid du khyad par med pa nyid kyi phyir sgra de ni rten cing 'brel par 'byung ba nyid yin pa'i phyir dang rang bzhin yod pa ma yin no/ /de lta bas na rang bzhin yod pa ma yin pa nyid kyi phyir/ 'di la sgra ni med pa yis/ /'byung bar 'gyur ba de bzlog yin/ /zhes smras pa gang yin pa bzlog pa yin no/ /gzhan yang tha snyad kyi bden pa khas ma blangs shing ma brten par dngos po thams cad stong pa'o zhes mi 'chad do/ /tha snyad kyi den pa khas ma blangs par ni chos bstan par mi nus te/ ji skad du/ tha snyad la ni ma brten par/ /dam pa'i don ni mi ston la/ /dam pa'i don la ma brten par/ /mya ngan 'das pa mi rtogs so/ /zhes gsungs pa lta bu'o/ /de bas na dngos po thams cad kyi rang bzhin med pa nyid du gnyi ga 'thad pa na nga'i tshig bzhin du dngos po thams cad stong pa yin no/ /yang khyod kyis/ 'gog pa'i 'gog pa'ang de lta zhes/ /'dod na de yang bzang min te/ /de lta na yang khyed dam bcas/ /mtshan nyid skyon yod nged la med/ /ces smras pa gang yin pa 'di la bshad par bya ste/ gal te ngas dam bcas 'ga' yod/ /des nang la skyon de yod/ /nga la dam bcas med pa na/ /nga la skyon med kho na yin/ /gal te dam bcas pa 'ga' zhig yod na ni des na khyod kyis ji skad smras pa bzhin du nga la dam bcas pa'i mtshan nyid khas blangs pa sngon du song ba'i skyon yod pa zhig nang la ni dam bcas pa 'ga' yang med do/ /de'i phyir dngos po thams cad stong pa gtan du nye bar zhi ba rang bzhin gyis dben pa dag la dam bcas pa'ang ga la yod/ /dam bcas pa'i mtshan nyid kyang ga la yod/ /dam bcas pa'i mtshan nyid las byung ba'i skyon yang ga la yod de/ de la khyod la dam bcas pa'i mtshan nyid kyis thob pa'i phyir khyod nyid la skyon yod do zhes smras pa gang yin pa de yang med do/ /yang khyod kyis re zhig dngos rnams mngon sum gyis/ /dmigs nas bzlog par byed yin na/ /gang gis dngos rnams dmigs 'gyur ba/ /mngon sum de ni med pa yin/ /rjes dpag lung dang dpes gzhal dang/ /rjes dpag lung gi bsgrub bya dang/ /de bas 'grub bya ba'i don gang yin/ /mngon sum gyis ni lan btab bo/ /zhes smras pa gang yin pa 'di la bshad par bya ste/ gal te mngon sum la sogs pa'i/ /don gyis 'ga' zhig dmigs na ni/ bsgrub pa 'am bzlog par bya na de/ /med phyir nga la klan ka med/ /gal te ngas mngon sum dang/ rjes su dpag pa dang/ dpes 'jal ba dang/ lung rnams kyis sam/ tshad ma bzhi rnams las gang yang rung ba zhig gis dmigs na ni de'i phyir sgrub par byed pa 'am/ don bzlog par bya na ngas don ji ltar yang ma dmigs pas de'i phyir bsgrub par yang mi bya/ bzlog par yang mi bya/ de ltar gyur dang de la khyod kyis gal te mngon sum la sogs pa rnams las tshad ma gang yang rung ba zhig gis dngos po rnams dmigs nas bzlog par byed pa yin na/ tshad ma de dag kyang med/ de dag gis khong du chud par bya ba'i don yang med pas zhes klan ka smras pa gang yin pa'i klan ka de nga la mi 'byung ngo/ /'di ltar gzhan yang/ gal te khyod kyi don de rnams/ tshad ma nyid kyis rab grub na/ /khyod kyi tshad ma de rnams kyang/ /ji ltar rab tu 'grub par 'gyur/ /gal te 'jal bar byed pa rnams kyis gzhal bar bya ba dag bzhin du khyod kyi don gzhal bya ba de rnams tshad ma nyid kyis rab tu 'grub pa yin par sems na/ 'o na da tshad ma rnam pa bzhi po mngon sum dang rjes su dpag pa dang/ dpes 'jal ba dang/ lud de rnams gang gis rab tu 'grub gal te re zhig tshad ma de rnams ni tshad ma gzhan rnams kyis yod par 'grub la/ don rnams ni tshad mas rab tu 'grub pa yin no zhe na/ dam bcas pa nyams par 'gyur ro/ /'o na da tshad ma rnam pa bzhi po mngon sum dang rjes su dpag pa dang/ dpes 'jal ba dang/ lung de rnams gang gis rab tu 'grub gal te re zhi tshad ma de rnams ni tshad ma gzhan rnams kyis yod par 'grub la/ don rnams ni tshad kyang tshad ma gzhan rnams kyis 'grub par sems na/ de ltar na thug pa med par 'gyur ro/ /de la thug pa med par gyur na nyes pa ci yod ce na/ de la 'di ltar bshad par bya ste/ de la dang po 'grub min na/ /bar ma min zhing tha ma'ang min/ /thug par med par gyur na/ /dang po 'grub par mi 'gyur ro//ci'i phyir zhes na/ tshad ma de rnams kyang tshad ma gzhan rnams kyis rab tu 'grub pa yin la/ de rnams kyang gzhan rnams kyis yin zhing/ de rnams kyang gzhan rnams kyi yin pas 'di la dang po med do/ /dang po med pa'i phyir bar ma yang ga la yod/ tha ma yang ga la yod de de'i phyir tshad ma de rnams ni chod ma gzhan rnams kyis rab tu 'grub bo zhes smras pa gang yin pa de mi 'thad do/ /'on te tshad ma med par yang/ /de rnams 'grub na smra ba nyams mi 'dra nyid de de yin na/ /gtan tshigs khyad par smra bar gyis/ /'o na te tshad ma rnams med par yang tshad ma de rnams 'grub pa yin la gzhal bar bya ba'i don rnams ni tshad ma rnams kyis rab tu 'grub pa yin no/ /snyam du sems na de lta na ni khyod kyis tshad ma rnams kyis don rnams 'grub bo zhes smras pa gan yin pa des nyams par 'gyur la don/ kha cig ni tshad ma rnams kyis rab tu 'grub pa yin/ kha cig ni ma yin no zhes mi 'dra ba nyid du yang 'gyur ro/ /de ltan ni gtan tshigs gang gis na don kha cig ni tshad ma rnams kyis rab tu 'grub pa yin la/ kha cig ni ma yin no/ /zhes gtan tshigs kyi khyad par yang smra bar bya ba yin na/ de yang ma bstan pas de'i phyir rtog pa ni yang 'thad pa ma yin no/ /'dir smras pa/ ji skad du/ ji ltar me yis gzhan bdag nyid/ /gsal byed de bzhin rang nyid ltar/ /de bzhin tshad ma rnams kyang ni/ /rang gzhan bdag nyid 'grub ce na/ zhes bstan pa lta bur tshad ma rnams ni rang gi bdag nyid dang/ gzhan gyi bdag nyid rab tu sgrub par byed pa yin te/ ji ltar mes rang gi bdag nyid dang/ gzhan gyi bdag nyid gsal bar byed pa de bzhin du tshad ma rnams kyang rang gi bdag nyid dang gzhan gyi bdag nyid rab tu sgrub par byed pa yin no zhe na/ 'dir bshad pa/ smras pa de ni mi mthun te/ /mun khong gi ni rdza ma ltar/ /de la mi dmigs ma mthong bas/ /me ni rang la gsal byed min/ /me dang 'dra bar tshad ma rnams/ /rang dang gzhan gyi bdag nyid gnyis/ /rab tu sgrub par byed pa yin no/ /zhes smras pa de ni mi mthun pa nyid yin te/ me ni rang la gsal bar byed pa ma yin te/ ji ltar mi ma 'bar ba'i lnga rol na mun khung na bum pa mi dmigs la/ mes gsal bar byas nas phyis dmigs pa de bzhin du/ gal te gsal bar ma byas pa'i snga rol tu mi mun khung na yod la/ phyis mes gsal bar 'gyur na ni de'i phyir rang gi bdag nyid gsal bar byed pa yin na/ /de yang de lta ma yin pas rtog pa 'di yang 'thad pa ma yin no/ /'di ltar gzhan yang/ gal te khyod kyi tshig gis ni/ /me 'di rang bdag gsal byed na/ /'o na me yis gzhan bzhin du/ /rang la sreg pa'ang byed par 'gyur/ /gal te khyod zer ba ji ltar me gzhan gyi rang bzhin gsal bar byed pa de bzhin du rang gi bdag nyid la yang gsal bar byed do zhe na/ 'o na ni ji ltar gzhan gyi bdag nyid sreg par byed pa de bzhin du rang gi bdag nyid la yang sreg par 'gyur ba zhig na/ de de ltar yang ma yin pas de la me ni gzhan gyi bdag nyid bzhin du rang gi bdag nyid la yang gsal bar byed do/ /zhes smras pa gang yin pa de mi rung ngo/ /'di ltar gzhan yang/ gal te khyod kyi tshig gis ni/ /mi yis rang gzhan bdag gsal byed/ /me bzhin du ni mun pa yang/ /rang gzhan bdag la sgrib par 'gyur/ /gal te khyod kyi lugs kyis ni me ni rang dang gzhan gyi bdag nyid gnyis gsal bar byed pa yin na/ 'o na ni da gnyen por gyur pa yang rang dang gzhan gyi bdag nyid gnyis sgrib par 'gyur ba zhig na/ de de ltar yang ma yin pas de la mi ni rang dang gzhan gyi bdag nyid gnyis gsal bar byed pa yin no zhes smras pa gang yin pa de rung ba ma yin no/ /'di ltar gzhan yang/ gsal byed de ni mun sel te/ /me dang gang na ma gnas pa/ /gzhan na 'ang mun pa yod min na/ /ji ltar gsal bar byed pa yin/ /'dir me la yang mun pa med la/ /gang na me yod pa de na yang mun pa med do// gsal bar byed pa zhes bya ba ni mun pa sel ba yin pas de'i phyir me la yang mun pa med la/ gang na me yod pa de na yang mun pa med/ mes gang zhig sel bas rang dang gzhan gyi bdag nyid gnyis gsal bar byed ba'i mes mun pa gang zhig sel bar byed/ 'dir smras pa/ 'o na gang gi phyir me la yang mun pa med/ me gang na yod pa de na yang mun pa med pa nyid kyi phyir me ni rang dang gzhan gyi bdag nyid gnyis gsal bar byed pa ma yin nam/ me 'byung ba nyid na me des mun pa gsal ba yin te/ de la yang mun pa de med me gang na yod pa de na yang mun pa med de de'i phyir me 'byung ba kho na rang gi bdag nyid dang/ gzhan gyi bdag nyid gnyi ga gsal bar byed pa yin no zhe na/ 'dir smras ba/ me 'byung ba na gsal byed pa/ /yang dag min par smra ba ste/ /me 'byung ba na mun pa dang/ /phrad pa med pa kho na yin/ /me de ni 'byung ba kho na na rang gi bdag nyid dang gzhan gyi bdag nyid gsal bar byed do/ /zhes smra ba de ni 'thad pa ma yin no/ /ci'i phyir zhe na/ me 'byung ba na mun pa dang/ /phrad pa med pa kho na yin/ /me de ni 'byung ba kho na na rang gi bdag nyid dang gzhan gyi bdag nyid gsal bar byed do zhes smra ba de ni 'thad pa ma yin no/ /ci'i phyir zhe na/ me 'byung ba nyid na mun pa dang phrad pa med pa yin te/ ma phrad pa'i phyir de sel bar mi byed do/ /mun pa ma bsal ba'i phyir gsal bar yang mi byed do/ /'di ltar gzhan yang/ yang na me dang ma phrad kyang/ /mun pa sel bar byed na ni/ /'di na yod pa gang yin pas/ /'jig rten khams kun mun sel 'gyur/ /'on te me ni mun pa dang ma phrad par yang sel bar byed do snyam du sems na/ 'o na ni dam phrad par 'dra bas 'di na gnas pa'i mes 'jig rten gyi khams thams cad na gnas pa'i mun pa sel bar 'gyur ba zhig na/ de ni de ltar yang ma yin pas de'i phyir me ni mun pa dang ma phrad par sel bar byed par 'dod pa gang yin pa de mi rung ngo/ /'di ltar gzhan yang gal te rang las tshad ma grub/ /gzhal bya rnams la ma ltos par/ /khyod kyi tshad ma 'grub 'gyur 'di/ / gzhan la mi ltos rang 'grub 'gyur/ /gal te me bzhin du rang las tshad ma grub bo snyam du sems na/ gzhal bar bya ba'i don rnams la ma ltos par yang tshad ma rnams rab tu 'grub par 'gyur ro/ /ci'i phyir zhe na/ rang las grub pa ni gzhan la bltos pa ma yin no/ 'o na te bltos na ni rang las grub pa ma yin no/ /'dir smras pa/ gal te tshad ma rnams gzhal bar bya ba don rnams la mi bltos na skyon cir 'gyur zhe na/ 'dir bshad pa/ gal te gzhal bya don rnams la/ ma bltos khyod kyis tshad ma 'grub/ /tshad ma 'di rnams kho na ni/ /gang gi yin par mu 'gyur ro/ /gal te tshad ma rnams gzhal bar bya ba don rnams la mi bltos par rab tu 'grub pa yin no/ /zhe na/ de lta ni khyod kyi tshad ma 'di rnams gang gi phyir tshad ma yang ma yin pa'i skyon de lta bur 'gyur ro/ /'on te tshad ma rnams don 'ga' zhig gi yin no zhe na/ de gzhal bar bya ba'i don rnams la mi bltos par tshad ma rnams su 'gyur ba ma yin no/ /'on te bltos nas de rnams 'grub/ /'dod na de la skyon cir 'gyur ma grub gzhan la mi bltos pas/ /grub pa sgrub par byed pa yin/ /'on te gsal bar bya ba'i don rnams la bltos nas tshad ma rnams 'grub pa yin par 'dod do zhe na/ de lta na ni don ma grub pa ni bltos pa med pa yin te/ lhas byin ma grub pa ni don 'ga' la yang bltos par ma yin pas khyed kyi tshad ma gzhi grub pas sgrub par byed pa yin no/ /grub pa sgrub par byed pa yang 'dod pa ma yin te/ byas pa byed par mi 'thad pa'i phyir ro/ /'di ltar gzhan yang/ gal te yod ye gzhal bya las/ /bltos nas tshad ma grub yin na/ /tshad ma rnams las ma bltos par/ /gzhal bar bya ba 'grub par 'gyur/ /gal te tshad ma rnams ni gzhal bar bya ba rnams la bltos nas so zhe na/ de tshad ma rnams la bltos nas gzhal bar bya ba 'grub par mi 'gyur ro/ / ci'i phyir zhe na/ bsgrub par bya ba ni sgrub par byed pa sgrub par mi byed la/ tshad ma rnams kyi sgrub par byed pa yang gzhal bya rnams yin zhes grag go /'di ltar gzhan yang/ gal te tshad ma rnams la ni/ /ma bltos par yang gzhal bya 'grub/ /gang phyir khyod kyi de grags pa/ /tshad ma grub pas ci zhig bya/ /gal te tshad ma rnams la ma bltos par gzhal bar bya ba rnams 'grub bo snyam du sems na/ cing khyod kyi tshad ma grub par yongs su brtags pas ci zhig bya/ ci'i phyir zhe na/ gang gi don du khyod kyi tshad ma de rnams yongs su brtags pa'i gzhal bar bya ba'i don ni tshad ma rnams med par yang grub pa yin pas de la khyod kyi tshad ma rnams kyis ci zhig bya/ ci ste khyod kyi tshad ma rnams/ /gzhal bya rnams la bltos nas 'grub/ /de lta khyod kyi tshad ma rnams gzhal bya nges par bzlog par 'gyur/ ci ste sngar smras pa'i skyon du 'gyur ba na mi rung ngo snyam nas tshad ma rnams ni gzhal bar bya ba'i don rnams la bltos pa yin no snyam du sems na de lta na ni khyod kyi tshad ma dang gzhal bar bya ba rnams bzlog par 'gyur te/ khyod kyi tshad ma rnams kyang gzhal bar bya bar 'gyur te/ gzhal bar bya ba rnams kyis rab tu bsgrub pa'i phyir ro/ /gzhal bar bya ba dag kyang tshad ma rnams su 'gyur te/ tshad ma rnams sgrub par byed pa yin pa'i phyir ro/ /don te khyod kyi tshad grub pas/ gzhal bar bya ba 'grub 'gyur la/ /gzhal bya grub pas tshad grub na/ /khyod kyi gnyi ga'ang 'grub mi 'gyur/ /'on te tshad ma grub pas gzhal bar bya ba 'grub par 'gyur te/ tshad ma la bltos pa'i phyir ro/ /gzhal bar bya ba 'grub pas kyang tshad ma 'grub par 'gyur te/ /gzhal bar bya ba la bltos pa'i phyir ro snyam du sems na de lta na ni khyod kyi gnyi ga yang 'grub par mi 'gyur ro/ /ci'i phyir zhe na/ gal te tshad mas gzhal bya 'grub/ /gzhal bya de dag rnams kyis kyang/ /de dag sgrub par bya yin na/ /de dag ji skad sgrub par 'gyur/ /gal te tshad ma rnams kyis ni gzhal bar bya ba rnams 'grub par byed la/ /gzhal bar bya ba de dag rnams kyis kyang tshad ma de dag bsgrub par bya ba yin no zhe na/ 'o na gzhal bar bya ba ma grub pa rnams kyi rgyu rab tu ma grub pa'i phyir gzhal bar bya ba ma grub pa dag ji ltar sgrub par 'gyur/ gal te gzhal byas tshad ma 'grub/ /tshad ma de dag rnams kyis kyang/ /de dag sgrub par bya yin na/ /de dag ji lta? sgrub par 'gyur/ /gal te yang gzhal bar bya ba rnams 'grub par 'gyur la/ tshad ma de rnams kyis kyang gzhal bar bya ba de dag bsgrub par bya ba yin no zhe na/ 'o na tshad ma ma grub rnams kyi rgyu rab tu ma grub pa'i phyir tshad ma ma grub pa dag ji ltar sgrub par 'gyur/ gal te pha yis bu bskyed bya/ /gal te bu de nyid kyis kyang/ /ci ste pha de bskyed byas na/ /da ni gang gis gang bskyed smros/ /ji ltar 'ga' zhig na re phas bu bskyed par bya ba yin la/ pha de yang bu de nyid kyis bskyed par bya ba yin no zhes zer na/ da de na gang gis gang bskyed par smos shig ces bya ba de bzhin du khyod na re tshad ma rnams kyis gzhal bar bya ba dag bsgrub par bya ba yin la/ tshad ma de dag nyid kyang gzhal bar bya ba de gnyid kyis sgrub par bya ba yin no/ /zhes zer ba da de na khyod kyi gang dag gis gang dag rab tu bsgrub par bya ba yin/ de dag gnyi ga 'ang pha dang bu'i/ /mtshan nyid 'dzin pas de yi phyir/ /de la kho bo the tshom gyur/ /de na pha gang bu gang smos/ /pha dang bu sngar bstan pa de gnyis las/ du ni gang phan gang de gnyi ga yang skyed par byed pa yin pa'i phyir pha'i mtshan nyid 'dzin par byed pa yin la/ bskyed par bya ba yin pa'i phyir bu'i mtshan nyid 'dzin pa yin pas 'di la kho bo the tshom du gyur na de la pha ni gang bu ni gang zhes bya ba de bzhin du khyod kyi tshad ma dang gzhal bar bya ba gang dag yin pa de dag kyang de na tshad ma dag ni gang yin/ gzhal bar bya ba dag ni gang yin/ /'di dag gnyi ga yang rab tu bsgrub par byed pa yin pa'i phyir tshad ma dag yin la/ bsgrub par bya ba dag yin pa'i phyir gzhal bar bya ba yin pas 'di la kho bo the tshom du 'gyur na tshad ma dag ni gang yin/ gzhal bar bya ba dag ni gang yin/ /tshad ma rnams ni rang nyid kyis/ /'grub min phan tshun gyis min pa 'am/ /tshad ma gzhan gyis ma yin la/ /gzhal byas ma yin rgyu med min/ /rang gis te mngon sum ni mngon sum de nyid kyis dang/ rjes su dpag pa ni rjes su dpag pa de nyid kyis dang/ lung ni lung de nyid kyis dang/ dpes gzhal ba ni dpes 'jal ba de nyid kyis rab tu mi 'grub la/ phan tshun gyis te/ mngon sum ni rjes su dpag pa dang/ dpes 'jal ba dang/ lung rnams kyis dang/ rjes su dpag pa ni mngon sum dang/ dpes 'jal ba dang/ lung rnams kyis dang/ dpes 'jal ba ni mngon sum dang rjes su dpag pa dang/ lung rnams kyis dang/ lung ni mngon sum dang/ rjes su dpag pa dang/ dpes 'jal bas kyang ma yin la/ rang gi ji lta ba bzhin du/ mngon sum dang/ rjes su dpag pa dang dpes 'jal ba dang/ lung rnams kyis ni mngon sum dang/ rjes su dpag pa dang/ dpes 'jal ba dang/ lung gzhan rnams kyis kyang ma yin la/ gzhal bar bya ba rang dang gzhan gyi yul gyi bsdus pa mdza' dag dang/ re res kyang ma yin la/ rgyu med pas kyang ma yin la/ kun bsdus pas kyang ma yin na'o/ /gtan tshigs sngar bstan pa de dag ni nyi shu 'am sum cu 'am bzhi bcu 'am sum cu rtsa drug gis mi grub na/ de la gang khyod kyis gzhal bar bya ba'i dngos po rnams ni tshad mas khong du chud par bya ba yin pa'i phyir dngos po gzhal bar bya ba de dag kyang yod la/ khyod kyi tshad ma gang dag gis dngos po gzhal bar bya ba dag yang dag par khong du chud pa'i tshad ma de dag kyang yod do zhes smras pa gang yin pa de mi rung ngo/ /gzhan yang khyod kyis/ skye ba chos kyi gnas skabs mkhas/ /dge ba dag gi chos rnams la/ /dge ba'i rang bzhin yin par ni/ /sems shing lhag ma rnams dang yang/ /zhes smras pa gang yin pa de la bshad par bya ste/ chos kyi gnas skabs rang mkhas pa/ /dge ba yi ni chos rnams kyi/ /dge ba'i rang bzhin smra ba gang/ /de ltar rab phye brjod bya yin/ /chos kyi gnas skabs la mkhas pa dag dge ba'i chos kyi dge ba'i rang gi ngo bo sems pa na de yang khyod kyi rab tu phye ste/ 'di ni dge ba'i ngo bo yin/ /'di dag ni dge ba'i chos de dag yin te/ /'di ni dge ba de rnam par shes pa yin/ 'di ni dge ba'i rnam par shes pa'i rang gi ngo bo yin/ de bzhin du thams cad la bstan par bya ba yin na/ de yang ma bstan pas de'i phyir rang ji lta ba bzhin du chos rnams kyi rang gi ngo bo bstan to/ /zhes smras pa gang yin pa de mi rung ngo/ /'di ltar gzhan yang/ gal te dge ba'i chos rnams kyis/ /dge ba'i rang gi ngo bo de/ /brten nas skyen de lta na/ /gzhan dngos rang dor ji ltar 'gyur/ /gal te dge ba'i chos rnams kyi rang gi ngo bo ni rgyu dang rkyen tshogs pa la brten nas skye'o zhe na/ de gzhan gyi dngos po la brten nas skyes pa yin na/ dge ba'i chos rnams kyi rang gi ngo bo ji ltar 'gyur/ mi dge ba la sogs pa dag la yang de bzhin du sbyar ro/ /de la gang gi phyir dge ba'i chos rnams kyi dge ba'i rang gi ngo bo yang bstan la/ de bzhin du mi dge ba la sogs pa dag ni yang mi dge ba la sogs pa'i rang bzin yang bstan pa yin no/ /zhes smras pa gang yin pa de mi rung ngo/ /'di ltar gzhan yang/ 'on te dge ba'i chos rnams kyi/ /rang gi ngo bo de 'ga' la 'ang/ /ma brten skye na de lta na/ /tshangs par spyod la gnas mi 'gyur/ /'on te dge ba'i chos rnams kyi dge ba'i rang gi ngo bo ni dga' la 'ang ma brten par skye la/ mi dge ba la sogs pa dag gi yang de lta bu yin no/ /snyam du sems na/ de lta na ni tshangs par spyod pa la gnas par mi 'gyur ro/ /ci'i phyir zhe na/ de lta yin na rten cing 'brel bar 'byung ba btang ba yin no rten cing 'brel bar 'byung ba btang ba'i phyir/ rten cing 'brel bar 'byung ba mthong ba btang ba yin te/ rten cing 'brel bar 'byung ba yod pa ma yin pa ni mthong ba ste/ dmigs par 'thad ba ma yin no/ /rten cing 'brel bar 'byung ba mthong ba med na chos mthong ba med pa yin no/ /bcom ldan 'das kyis ni dge slong sus rten cing 'brel bar 'byung ba mthong ba des chos mthong ngo/ /zhes gsungs so/ /chos mthong ba med pa'i phyir tshangs par spyod pa la gnas pa med pa yin no/ /yang na rten cing 'brel bar 'byung ba btang bas sdug bsngal kun 'byung ba btang ba yin de/ sdug bsngal kun 'byung ba ni rten cing 'brel bar 'byung ba yin pas so/ sdug bsngal kun 'byung ba btang bas sdug bsngal btang ba yin te/ kun 'byung ba med na gang las sdug bsngal kun 'byung bar 'gyur/ sdug bsngal btang ba'i phyir dang/ kun 'byung ba btang ba'i phyir/ /sdug bsngal 'gog pa btang ba yin te/ sdug bsngal dang kun 'byung ba gnyis med na gang zhig spangs pas 'gog par 'gyur pas so/ /sdug bsngal 'gog pa med na gang zhig thob par bya ba'i phyir sdug bsngal 'gog par 'gyur ba'i lam du 'gyur/ des na 'phags pa'i bden pa bzhi dag med par 'gyur te/ de med pa'i phyir dge sbyong tshul gyi 'bras bu med par 'gyur te/ bden pa mthong ba las dge sbyong gi tshul gyi 'bras bu rnams yang dag par thob pas so/ /dge sbyong gi tshul gyi 'bras bu rnams med pas tshangs par spyod pa la/ gnas par mi 'gyur ro/ /'di ltar gzhan yang/ rgyu mi ldan pa rtag pa'i phyir/ /chos rnams thams cad rtag par 'gyur/ /chos sam chos ma yin med cing/ /'jig rten pa yi tha snyad med/ /de lta yin na rten cing 'brel bar 'byung ba gtong ba khyod la skyon du 'gyur zhe na/ chos med pa dang/ chos ma yin pa med pa dang 'jig rten pa yi tha snyad rnams med par 'gyur ro/ /ci'i phyir zhe na/ 'di thams cad ni rten cing 'brel par 'byung ba yin na rten cing 'brel par 'byung ba de med na gang las 'byung bar 'gyur/ gzhan yang rang gi ngo bo dang bcas pa dang/ rten cing 'brel bar 'byung ba ma yin pa dang/ rgyu med pa las byung ba dang rtag par 'gyur te/ rgyu med pa rnams ni rtag pa nyid yin pa'i phyir dang/ de la tshangs par spyod pa gnas pa ma yin pa de nyid du 'gyur ro/ /grub pa'i mdza' dang yang 'gal te/ ci'i phyir zhe na/ bcom ldan 'das kyis 'du byed thams cad ni mi rtag pa'o/ /zhes bshad pa yin no/ /de dag ni rang gi ngo bo nyid dang bcas pa'i rtag pa nyid kyis rtag pa yin no/ /mi dge ba dang lung ma bstan/ /nges 'byin sogs la'ang skyon de bzhin/ /de bas khyod kyi 'dus byas kun/ /'dus ma byas pa nyid du 'gyur/ /de dge ba'i chos rnams la rtag pa de bstan pa gang yin pa de nyid mi dge ba rnams dang/ lung du ma bstan pa rnam la yang yod/ /de nyid nges par 'byin pa la sogs pa la yang yod do/ /de bas na khyod kyi 'dus byas 'di thams cad 'dus ma byas su 'gyur ro/ /ci'i phyir zhe na/ rgyu med na skye ba dang gnas pa dang 'jig pa dag med pa'i phyir/ de med na 'dus byas kyi mtshan nyid med pa'i phyir thams cad 'dus ma byas su 'gyur ro/ /de la dge ba la sogs pa dag gi dngos po dag gi rang gi ngo bo yod pa'i phyir dngos po thams cad stong pa ma yin no zhes smras pa gang yin pa de mi rung ngo/ /gzhan yang khyod kyis/ gal te chos kyi rang bzhin med/ /rang bzhin med ces bya ba'i ming/ /de yang de bzhin med 'gyur te/ /gzhi med ming ni med bas so/ /zhes smras pa gang yin pa 'di la bshad par bya ste/ gang zhig rang bzhin bcas pa zhes/ /ming ni yod par smra ba la/ /de ltar ming gis lan btab kyis nga ni ming yod mi smra'o/ /gang zhig ming 'dir rang bzhin dang bcas pa yin no/ /zhes ming yod par smra ba de la khyod kyis lan gdab par bya ba yin gyi/ gal te ming can gyi rang bzhin de med na/ de'i phyir ming de yang rang bzhin yod pa ma yin par bya dgos te/ yod pa ma yin pa la ni ming gi rang bzhin yod par mi 'gyur bas nged cag yang ming gi rang bzhin yod par mi smra'o/ /de bas na dngos po rnams kyi rang bzhin yang med pa'i phyir ming gi rang bzhin yang med pa yin no/ /de'i phyir stong pa yin no/ /stong pa nyid yin pa'i phyir yod pa ma yin pas de la khyod kyis ming yod pa'i phyir rang gi ngo bo yod do/ /zhes smras pa gang yin pa de mi rung ngo/ /'di ltar gzhan yang/ med la ming med ces gang 'di/ /ci de yod pa'am med pa yin/ gal te yod pa'am med pa yin/ /khyod kyis smras pa gnyi ga'ang nyams/ /med pa la ming med do zhes bya ba gang yin pa 'di ci ming med pa de yod pa yin nam/ 'on te med pa yin/ gal te ming de yod pa zhig gi yin nam/ gal te med pa zhig gi yin na dam bcas pa gnyi ga yang nyams par 'gyur te/ de la gal te re zhig ming med pa zhes bya ba yod pa'i yin no zhe na/ ming med do zhes dam bcas pa nyams par 'gyur te/ da ni med pa ma yin te/ da ni de yod pas so ci ste ming med pa zhes bya ba med pa'i yin no/ /zhe na/ med pa la ni ming med do/ /de bas na ming gi rang bzhin yod do/ /zhes khyod kyis dam bcas pa gang yin pa de nyams pa yin no/ /'di ltar/ gzhan yang/ dngos po dag ni thams cad kyis/ / stong ba nyid ni sngar bstan pas/ /de phyir dam bcas med par yang/ /klan ka gang yin de tshol byed/ /'dir nged cag gis sngar dngos po thams cad kyi stong pa nyid rgya cher bstan pas der ming yang stong pa nyid du bstan pa yin no/ /de'i phyir dam bcas pa med par yang khyod klan ka 'di tshol bar byed kyi/ /nged ming yod do zhes mi smra'o/ /gzhan yang khyod kyis/ /'on te 'di ltar rang bzhin yod/ /de ni chos la med ce na/ /chos rnams med par rang bzhin te/ /gang gi yin par de bstan rigs/ /zhes smras ba gang yin pa 'di la bshad par bya ste/ /'on te rang bzhin zhig yod la/ /de ni chos la med de zhes/ /dogs pa bsu ba smra ba 'di/ /dogs pa gang yin de med do/ /de ni chos rnams kyi rang bzhin yang 'gog par mi byed la/ chos la ma gtogs pa don 'ga' zhig gi rang bzhin yin par yang khas mi len no/ /de lha yin na 'on te chos rnams rang bzhin med pa yin na/ rang bzhin te chos la ma gtogs pa don gzhan gang zhig gi yin pa de bstan pa'i rigs so zhes bya ba'i khyod kyi klan ka de thag bsrings pa yin pas kla na kar mi 'gyur ba ma yin nam/ gzhan yang khyod kyis/ gang phyir khyim na bum pa de/ /med ces yod pa nyid la 'gog /mthong ste de phyir khyod kyis ni/ /yod pa'i rang bzhin 'gog pa yin/ zhes smras pa gan yin pa 'di la bshad par bya ste/ gal te yod la 'gog yin na/ /'o na stong nyid rab 'grub ste/ /dngos po rnams rang bzhin med nyid la/ /khyod ni 'gog par byed pas so/ /gal te yod pa kho na la 'gog bar byed pa yin gyi/ med pa la ni ma yin no/ /khyed kyang dngos po thams cad kyi rang bzhin med pa nyid 'gog bar byed pa yin pas 'o na dngos po thams cad kyi rang bzhin med pa nyid rab tu grub pa ma yin nam/ khyod kyi bstan tshigs 'gog par byed pa yod pa'i phyir dang/ dngos po thams cad kyi rang bzhin med pa nyid bgag pa'i phyir stong pa nyid rab tu grub pa yin no/ /stong nyid gang la khyod 'gog pa'i/ /stong nyid de yang med yin na/ /'o na yod la 'gog yin zhes/ /smras pa de nyams ma yin nam/ /ce ste khyod dngos po thams cad kyi rang bzhin med pa nyid de stong pa nyid 'gog par byed pa stong pa de yang med pa yin na 'o na yod pa la 'gog par byed kyi med pa la ni ma yin no/ /zhes khyod kyis dam bcas pa gang yin pa de nyams pa yin no/ /'di ltar gzhan yang/ /dgag bya ci yang med pas na/ /da ni ci yang mi 'gog go /de'i phyir 'gog par byed do zhes/ /bkur ba de ni khyod kyis btab/ /gal te ngas ci zhig 'gog par byed na ni de'i phyir khyod kyis de dag kyang smra ba'i rigs na gang gi phyir dgag par bya ba ci yang med pas nga ni cung zad kyang 'gog pa mi byed do/ /de'i phyir dngos po thams cad stong pa yin te/ /dgag par bya ba dang/ 'gog par byed pa yod pa ma yin pa las 'gog par byed do zhes khyod kyis bkur ba thog tu ma bab pa de btab bo/ /gzhan yang khyod kyis/ ci ste rang bzhin de med na/ /khyod kyi tshig des ci zhig dgag /med pa yin na tshig med par/ /'gog pa rab tu 'grub pa yin/ /zhes smras pa gang yin pa de 'di la bshad par bya ste/ tshig med par yang med pa yi/ /'gog pa 'grub par 'gyur zhes pa/ /de la tshig? ni med ces bar/ /go bar byed kyi skye sel min/ /khyod kyi tshig dag med par yang ste/ /tshug ma gtogs par yang med pa'i 'gog pa 'grub na/ /de la ci dngos po thams cad rang bzhin med pa yin na zhes smras pa'i khyod kyi tshig des ci zhig byed ces smras pa gang yin pa 'di la bshad par bya ste/ /dngos po thams cad rang bzhin med pa'o zhes bya ba'i tshig 'di ni dngos po rnams rang bzhin med pa nyid du byed pa ma yin gyi/ 'on kyang rang bzhin med pa la dngos po rnams rang bzhin med pa'o/ /zhes go bar byed pa yin no/ /dper na 'ga' zhig na re lhas byin khyim na med bzhin du lhas sbyin khyim na yod do zhes zer ba dang/ de ni de la kha cig na re med do zhes zer ba na/ tshig des lhas byin med par mi byed kyi lhas byin khyim na mi srid par ston pa 'ba' zhig tu zad do/ /de bzhin du dngos po rnams kyi rang bzhin med do zhes bya ba'i tshig de yang dngos po rnams kyi rang bzhin med pa nyid du byed pa ma yin gyi/ 'on kyang dngos po thams cad rang bzhin med pa sgyu ma'i skyes bu dang 'dra bar skyes bu yang dag pa'i ngo bo dang bral ba rnams la rmongs pa'i phyir byis pa'i skye bo ma rig pas rmongs pa rnams kyi rang bzhin dang bcas pa nyid du sgro btags pa rnams la rang bzhin yod pa ma yin par go bar byed pa yin pas de la rang bzhin yod pa ma yin na tshig med par yang tshig ma gtogs par yang rang bzhin yod pa ma yin par rab tu grub pa yin no/ /rang bzhin med do zhes bya ba'i tshig des ci zhig byed ces khyod kyis smras pa gang yin pa de rigs pa ma yin no/ /gzhan yang/ byis pa rnams ni smig rgyu la/ /ji ltar log par chur 'dzin ltar/ /de bzhin khyod kyis log par 'dzin/ /yod pa yin la dgag par bya/ /zhes bshad pa la sogs pa yang khyod kyis tshigs su bcad pa bzhi smras pa gang yin pa 'di la bshad par bya ste/ smig rgyu'i dpe la khyod kyis kyang/ /'gro ba chen po smras pa gang/ /der yang ci nas dpe de 'thad/ /gtan la dbab pa mnyan par gyis/ /khyod kyis smig rgyu'i dpe de la 'gro ba chen po smras pa gang yin pa der yang dpe de ci nas kyang 'thad pa gtan la dbab pa gang yin pa de nyon cig /gal te 'dzin de rang bzhin yod/ /brten nas 'byung bar mi 'gyur ro/ /'dzin pa gang zhig brten nas 'byung/ /de nyid stong nyid ma yin nam// gal te smig rgyu la chu'o snyam du 'dzin pa rang bzhin gyis yod pa zhig yin na/ rten cing 'brel par 'byung ba yin par mi 'gyur ba zhig na/ gang gi phyir smig rgyu la yang brten/ phyin ci log gi lta ba dang/ tshul bzhin ma yin ba'i yid la byed pa la yang brten nas byung ba de'i phyir rten cing 'brel par 'byung ba yin no/ /gang gi phyir rten cing 'brel bar 'byung ba yin pa de'i phyir rang bzhin stong pa yin te/ sngar ji skad bstan pa de 'dra'o/ /'di ltar gzhan yang/ gal te 'dzin pa rang bzhin yod/ /'dzin pa de la su zhig bzlog /lhag ma rnams la'ang tshul de yin/ /de phyir klan ka de med do/ /gal te smig rgyu la chur 'dzin pa 'di rang bzhin gyis yod pa zhig yin na/ de la sus kyang zlog par mi 'gyur te/ ji ltar me'i tsha ba nyid dang/ /chu'i bsher ba nyid dang/ /nam mkha' mi bsgrib pa nyid bzhin du rang bzhin ni bzlog bar mi nus pa yin na de ni bzlog par yang mthong ngo?/ /de'i phyir 'dzin pa de rang bzhin gyis med pa yin no/ /'di ji lta ba bzhin na bzung ba la sogs pa chos lhag ma lnga po rnams la yang tshul de lta bur rtog par bya ba yin pas de drug tshan yod pa'i phyir dngos po thams cad stong pa ma yin no zhes smra ba gang yin pa de mi rung ngo/ /gzhan yang khyod la gtan tshigS ma grub ste/ rang bzhin med phyir khyod gtan tshigs/ gal yod de khyod don de/ gtan tshigs med par 'grub mi 'thad/ ces bya ba 'dir bshad par bya ste/ /'di la snga mas gtan tshigs med/ /lan btab bsgrub byar mtshungs phyir ro/ snga ma smig rgyu'i dpes bzlog pa/ bsgrub tshe smras pa gang yin pa'o/ /da ltar gyi 'gro ba 'di dag dang sdang bstan pas gtan tshigs med pa'i yang lan btab par rig par bya ste/ sngar gtan tshigs bstan pa drug tshan 'gog par byed pa'i 'gro ba gang yin pa de nyid 'dir yang 'gro bar bya ba yin no/ /gzhan yang/ 'di ltar rang bzhin yod min na/ /gal te 'gog lnga dgag 'phyi zhes/ /zer na 'thad pa ma yin na/ /'phyi dang cig car mi 'thad do/ /zhes smras pa gang yin pa 'di la bshad par bya ste /dus gsum gtan tshigs gang yod sngar/ /lan btab de dang mtshungs phyir ro/ /dus gsum phyed kyis gtan tshigs ni/ /stong nyid smra ba rnams la rung/ /gtan tshigs dus gsum 'gog par byed pa zhes bya ba gang yin pa de ni lan btab zin te/ gang gi phyir bsgrub par bya ba dang mtshungs pa'i phyir ro/ /'di ltar khyod kyi tshig gis 'gog pa dus gsum du yang mi 'thad par 'gyur ba'i 'gog pa bzhin du dgag par bya ba yang de yin no/ /de'i phyir 'gog pa dang dgag par bya ba med na 'gog pa bkag go snyam du khyod sems pa gang yin pa de mi rung ngo/ /'gog pa dus gsum la zhes bya ba'i gtan tshigs dus gsum 'gog par byed ba zhes bya ba gang yin pa de nyid ni dngos po thams cad 'gog par byed pa zhes bya ba gang yin pa'i phyir stod pa nyid smra ba rnams la yod pa nyid yin gyi/ khyed la ni med do/ /yang na 'di ji ltar lan btab pa yin zhe na/ dgag bya ci yang med pas na/ /da ni ci yang mi 'gog go /de phyir 'gog par byed do zhes/ skur ba de ni khyod kyis btab/ /ces lan btab pa yin no/ /'on te dus gsum char du yang 'gog pa grub pa yin te/ sngon gyi dus kyi rgyu dang/ phyi ma'i dus kyi rgyu dang/ cig car gyi dus kyi rgyu yang mthong bas so/ /de la sngon gyi dus kyi rgyu ni ji ltar bu'i pha bzhin no/ /phyi ma'i dus ni ji ltar slob dpon gyi slob ma bzhin no/ /cig car gyi dus kyi ni ji ltar snang ba'i sgron ma bzhin no snyam du sems na de ni de lta ma yin par tshul 'di la skyon sngar bstan zin no/ /gzhan yang gal te de la yin na dgag pa srid par khyod kyis khas blangs la/ /de ni ma grub pas khyod kyis dam bcas pa yang nyams pa yin no/ tshul 'dis rang bzhin 'gog pa yang grub pa yin no/ /gang la stong pa nyid srid pa/ /de la don rnams thams cad srid/ /gang la stong nyid mi srid pa/ /de la ci yang mi srid do/ /gang la stong nyid 'di srid pa de la 'jig rten pa dang/ 'jig rten las 'das pa'i don thams cad srid pa yin no/ /ci'i phyir zhe na/ gang la stong pa nyid srid pa de la rten cing 'brel par 'byung ba dang/ 'phags pa'i bden pa bzhi dang/ dge sbyong gi 'bras bu dang/ khyad par du rtog pa thams cad srid do/ /gang la khyad par du rtogs pa thams cad srid pa de la dkon mchog gsum po/ /sangs rgyas dang chos dang/ dge 'dun srid do/ /gang la rten cing 'brel bar 'byung ba srid pa de la chos dang chos kyi rgyu dang/ chos kyi 'bras bu dang chos ma yin pa dang chos ma yin pa'i rgyu dang chos ma yin pa'i 'bras bu srid do/ /gang la chos dang chos ma yin pa dang/ rgyu dang 'bras bu srid pa de la nyon mongs pa dang nyon mongs pa kun 'byung ba dang/ nyon mongs pa'i gzhi rnams srid do/ /gang la sngar bstan pa de thams cad srid pa de la bde 'gro dang ngan 'gro rnam par bzhag pa dang/ bde 'gro dang ngan 'gror 'gro ba dang/ bde 'gro dang ngan 'gror 'gro ba'i sems can dang/ bde 'gro dang/ ngan 'gro las 'da' ba dang/ bde 'gro dang ngan 'gro las 'da' ba' i thabs dang/ 'jig rten pa'i tha snyad thams cad rnam par bzhag pa yin te/ tshig gis ji snyed gcig bstan par nus pas phyogs 'dis rang gi rtogs par bya'o/ /'dir yang/ gang zhig stong dang rten 'byung dag /dbu ma'i lam du don gcig par/ /gsung mchog mtshungs pa med pa yi/ /sangs rgyas de la phyag 'tshal lo/ /rtsod pa bzlog pa'i rab tu byed pa'i 'grel pa sa dang po rab tu dga' ba la bzhugs pa slob dpon nA gA rdzu nas mdzad pa rdzogs so// //rgya gar gyi mkhan po dz+nyA na ganha dang lo tsA ba bande ben rak+Shi tas bsgyur te gtan la phab pa'o// //yod dang med pa'i rtsod pa smra pa mun bsal te/ /bstan zab gnyis med de bzhin nyid chos snang gyur nas/ /srid pa'i mngal du skyes pa'i 'jig rten ma lus pa/ /lha dang mi dang lha min thams cad dge bar shog /dngos 'dzin gdon gyis brlams pa yi/ /rims nad rtag tu bzlog byed cing/ /'jig rten 'di yi mun sel ba/ /dri med mi g.yo rigs 'di yin// //theg pa chen po nyi shu pa 'phags pa klu sgrub kyis mdzad pa bzhugs so// //