བོད་ཡིག

e-texts based on the ACIP/ALL Input

gsang sngags mdza' dag la mnga' brnyes pa'i slob dpon chen po pad+ma 'byung gnas kyi mdzad pa'o// (//rdo rje rnam par 'joms pa'i 'grel pa bzhugs so/) /rgya gar skad du/ Arya badzra bi dA ra Na nA ma dA ra Ni TI kA ratna swA rA nA ma/ bod skad du/ 'phags pa rdo rje rnam par 'joms pa zhes bya ba'i gzungs kyi rgya cher 'grel pa rin po che gsal ba zhes bya ba/ rdo rje rnam par 'joms pa la phyag 'tshal lo/ /don dam gnyis med mchog tu gsang ba'i bdag /sangs rgyas byang chub sems sogs bskyed mdzad rdo rje'i sku/ /sna tshogs rnal 'byor sku gsum ye shes dag gyur pa'i/ /'jam dpal gsung gi dbang phyug la ni spyi bos mdung/ /rdo rje thams cad 'joms mdzad cing/ /khyad par gdug pa kun 'dul phyir/ /rdo rje'i skur gnas rnams 'joms dang/ /bla ma gzhon nu'i sde la bstod/ /sangs rgyas kun gyi gsungs pa yi/ /don grub rdo rje rnam 'joms ni/ /glam lhas ni byin brlabs nas/ /'jam dpal go chas gsol btab bshad/ /sangs rgyas mchog gis chos gsungs pa/ /mdo sde mdo na ba 'dul ba dang/ /rig pa 'dzin pa'i sde bzhir gnas/ /de yang bzhi ste bya ba'i rgyud/ /spyi dang bye brag de la gnyis/ /rtog pa bdag ni las su bshad/ /rigs gsum phye las rdo rje ste/ /mi bskyod phyag rdor bdud rtsi dang/ /mA ma kI dang lu gu rgyud/ /de dag don ston rdo rje ni/ /rnam par 'dzin gzungs gsungs pa ni/ /leg pa'i snying po gdul phyir dang/ /ma 'ongs pa la phyir gsungs pa/ /'di ni rtsa ba'i rgyud chen te/ /rdo rje lhun po'i ri rab zom/ /rgyud do cog ni brgya rtsa brgyad/ /de'i dang por 'di gsungs pas/ /rtsa ba bshad par rab tu grags/ /rgyud chen de'i don rnams kun/ /mdor bsdus zab mor ston pas na/ /mdo sder bde bar gshegs pas gsungs/ /de yi don rnams mdor bsdu na/ /sngon byung sangs rgyas 'phrul pa dang/ /rjes 'jug mngon rtogs man ngag go /dang po la ni rnam bzhi ste/ /rgyu dang rkyen dang 'bras bu dang/ /de'i 'jug ni bsdu bar 'dod/ /dang po lnga yin gnyis pa la/ /gnyis te de dag gnyis gnyis gsungs/ /gsum pa gsum de dang po la/ /gnyis gnyis dag du shes par bya/ /bzhi pa gnyis su dang po gnyis/ /gnyis pa bzhi ru shes par bya/ /dang po gnyis pa man ngag bzhin/ /dbang po rab 'bring tha ma la/ /bshad pa rnam pa gsum bya'o/ /dgos pa rnam pa gnyis su bstan/ /tshig don brgal lan mtshams sbyar ba/ /rnam pa lngar ni 'dir shes bya/ /de la lha dang sngags dbyer med pas rig pa 'dzin pa'i sde snod de/ /de yang rig pa 'dzin pa'i sde snod gsal ba'o/ /zhes gsungs pa dang/ sngags nyid lha ste de nyid sngags zhes gsungs so/ /de lta bu de la mdo sder yang grags te/ don gnyis mdor ston mdo sde zhes/ gsang sngags mdo sde'i tshul du ngas bshad nyon zhes gsungs so/ /de bshad par bya ba ni lnga ste/ brjod pa bya ba ni stong pa nyid kyi don rdo rje rnam par 'joms pa'i thabs dang bcas pa'o/ /brjod par byed pa ni gzhung gi tshogs so/ /de'i dgos pa ni rgyal po log pa'i snying po dang/ gdon ma rungs pa 'dul ba dang/ ma 'ongs pa'i skye bo byang chub la gnas par bya'o/ /dgos pa'i yang dgos pa ni de dag kyang dngos grub rnam pa gnyis thob par byed pa'o/ /'brel ba ni brjod bya rjod byed dag thabs dang thabs las byung ba ste/ thabs dang thabs byung ji lta bu zhes gsungs so/ /de ni rgyud kyi don nyid bshad par bya ste/ shes rab dang ldan pa la mtshan bstan pas go la/ de yang phan pa'i mjug nas drang bar bya ste/ rdo rje rnam par 'joms pa zhes bya ba'i gzungs zhes smos te/ de la rdo rje ni mi phyed cing mi shig pa'o phyir na ste/ stong pa nyid kyi ye shes so/ /de nyid lha dang gzungs la gdags par bya ste/ de yang rdo rje zhes brjod pas/ /rnam pa kun mchog ldan pa yi/ /stong pa nyid la rdo rjer brjod zhes pa dang/ lha dang sngags ni rdo rjer 'dus zhes gsungs so/ /des ni bdag gi don 'grub par byed pa ste/ 'og nas ston to/ /rnam pa ni dngos po ma lus pa ste/ de yang 'byung po la sogs pa dang/ rnam par rtog pa'o/ /de dag sngags dang rdo rje'i tshig bla dags kyi gnyis su med pa'i ye shes kyis 'joms pa ni med cing brlag par mdzad pa'o/ /de yang 'joms phyir rdo rjer brjod pa yin zhes so/ /des ni gzhan don 'grub par byed pa ste/ de yang 'chad par 'gyur ro/ /yang rdo rje rnam par 'dzin pa zhes pa ste/ don dang rnam pa'i sgo nas brjod do/ /gnyis ka'i don sgrub pa ni gzungs te de yang nyams pa las 'dzin cing mi rjed la don thams cad 'grub pas na'o/ /de yang gnyis te/ don brjod par bya bas 'byung po dang 'khor ba las skyob la/ tshig gi kyang de dag 'byung pa'o/ /de yang nyams pa las ni skyob pa'i gzungs/ /de yang don dang tshig tu 'dus zhes gsungs so/ /zhes bya ba ni ming ste 'di zhes pa'o/ /'di dag gis ni gzhung gi don ma lus pa ston par byed pas/ gsungs pa dang mi 'gal ba yin no/ /ma 'ongs pa dag gis ni rdo rje rnam par 'joms pa nan tan du byas pas bdag dang gzhan gyi don rdzogs par byad do zhes shes par bya'o/ /de ltar mtshan brjod nas/ da ni rdo rje'i mdo'i don bstan par bya ba ni 'di skad ces bya ba la sogs pa gsungs te/ de yang sngon gyi dbang du byas nas rdo rje'i mdo 'byung ba'i rgyu yin la/ ma 'ongs pa la ni 'bras bur yang 'gyur ro/ /de yang mtshan ma med pa'i phun sum tshogs pa lngar 'gyur te/ de la 'di skad bdag gis thos pa zhes bya bas sdud pa po bstan te/ sngon mthong zhing rjes su gnang ba'i bka' bzhi pas 'gal ba med do/ /de la ji ltar thos she na/ de la 'di skad thos zhes pa ni gzhung 'di'i don dang tshig ma lus pa la 'jug par byed de nye bar mngon sum dang ma bcos pa ste/ sgro skur dang bral ba'o/ /sus thos zhes pa ni bdag gis thos pa ni sdud pa po yang phyag na rdo rje nyid kyi mdzad pa ste/ bdag gsang ba thams cad 'dzin pa'i phyag na rdo rjes bcom ldan 'das la rna bas mngon sum du sgra don gyi rnam par thos te/ brgyud pa ma yin pa'o/ /da ni dus phun sum tshogs pa ston te/ de yang dus ji tsam na thos she na/ dus gcig ma thos te mi 'da' bas dus de kun tshogs pa'o/ /des ni dkon par bstan pa'o/ /yang na dus ni skad cig ma ste/ shes rab che bar ston to/ /gang la thos she na/ bcom ldan 'das la thos te zhes gsungs te/ des ni ston pa phun sum tshogs pa ni bde bar gshegs pa la sogs pa'i yon tan dpag tu med pa dang ldan pa'i bcom ldan 'das shAkya thub pa bdud bzhi bcom zhing/ yon tan drug dang ldan pa'i ston pa mchog tu gyur pa las thos par ston to/ /'o na 'di ni bcom ldan 'das kyis ma gsungs la rdo rje rnam par 'joms pas smas? pa? na bcom ldan 'das la thos pa zhes pas ji ltar rung zhe na/ 'di ni bcom ldan 'das nyid kyis gsungs pa yin te/ khro bo gnyis po nyid de nyid kyi ngo bo yin pa dang/ de dag la de'i nus pa zhugs pa yin pas 'gal ba med do/ /mdo gzhan bzhin no/ /gang du thos she na/ gnas phun sum tshogs pa ni rdo rje la bzhugs pa las thos pa ste/ de yang don gnyis med pa'i ye shes yin la/ rnam pa ni rdo rje rin po che'i gnas ri rab kyi shar lho nas rdo rje lhun po ri rab kyi chos? zhes bya bas phyogs la sogs pa rdo rjer gtams par thos pa'o/ /rdo rje gdan ni ma yin te/ rdo rje gdan du sngags gsungs pa ni med de/ de yang bsam gyis mi khyab pa'i mdo las/ shA ri'i bu de bzhin gshegs pa thams cad ni dang po rdo rje gdan la mngon par rdzogs par sangs rgyas pa yin yang der chos gsungs par ni mi 'gyur ro/ /de ci'i phyir zhe na/ der ni bdud 'dul ba las sems can gzhan 'dul ba ma yin te/ rdo rje snying po de da lta'i sems can gyi ma rtogs pa'i phyir ro/ /zhes gsungs pa'i lung dang 'gal ba'i phyir ro/ /der bzhugs pa ni gnas shing brten par ston te mdzad pa rnam pa gsum gyis rdo rje'i skyil krung du rdo rje dang seng ge'i gnas la bzhugs so/ /de ni bzhi pa'i don las gsum pa ste chos ston pa'i don du'o/ /'khor gang dang lhan cig tu thos she na/ phyag na rdo rje zhes pa thog mar drangs nas bstan to/ /de yang ma smos kyang rgyal po lta bu ste de'i dus na 'khor phyag na rdo rje la sogs pa'i rdo rje ming can du grags pa byang chub sems dpa' dpag tu med pa dang/ shA ri'i bu la sogs pa nyan thos dpag tu med pa dang/ 'od srungs la sogs pa'i dgra bcom pa dang gzhan yang lha la sogs pa grangs med pa dang/ lhan cig tu thos par stan te/ rdo rje lhun po'i ri rab kyi zom mdo bzhin no/ /de dag gis ni rdo rje'i mdo 'di'i rgyu dang mdo gzhan las khyad par du 'phags par bstan to/ /'dis ni 'di skad bstan par 'gyur te/ ma 'ongs pa'i gang zag dag rig sngags kyi sgo'i spyod pa spyad par 'dod pa dbang dang dam tshig thob cing yon tan dang ldan pas 'khor bzang po dang lhan cig tu gnas legs par dus bzang po la gnas te/ yo byad dang ldan pas maN+Dal byas la 'og nas 'byung ba'i bum pa bcas pa ste bsgrub par bya'o zhes pa'o/ /de yang sngags pas gnas bzang gnas te dus dang ldan 'khor dang 'byor pa rten dang ldan pas bsgrub zhes gsungs so/ /de ltar rdo rje'i las 'byung ba'i rgyu bshad nas/ da ni de'i rkyen gleng bslang ba bstan pa ni sangs rgyas kyi mthus zhes bya ba la sogs pa gsungs te/ des ni 'khor gyi gtso bo ting nge 'dzin la gnas pa'i gleng bslang gi rgyur 'gyur ba'o/ /de yang dus des bcom ldan 'das kyi 'khor rnams la chos gsungs pa ni thog mar dge ba la sogs pa ste/ 'dzam+bu'i gling na rgyal po gzugs can snying po'i bum skyes dgra zhes kyang grags/ /log pa'i snying po skyes tsam na rkang pa la lcags kyi gzugs can des kha nas mA ra ya 'don cing ma dang pha bsad de 'khor mi dge ba bcu la btsud pas mi ma yin pa thams cad 'khrugs pas nad la sogs pa sna tshogs byung ngo/ /des sems can thams cad sdug bsngal nas skyo ba so so las 'dod zhing smra'o/ /de rgyal po bzhis gzigs nas bcom ldan 'das la bskur bas cang mi gsung bar phyag na rdo rje la bskul te/ rdo rje gsor zhing khas blangs te rdo rje rnam par 'joms pa bstan te/ des sngags gsungs pas 'byung po dang log pa btul te 'di la zhugs pas byang chub thob par bshad do/ /de yang bram ze ni ma yin no/ /de la sangs rgyas ni nyon mongs pa'i gnyid las sad cing/ ye shes pad+ma ltar gyur pa ste/ spangs pa dang ye shes phun sum tshogs pa'o/ /de ni sangs rgyas shAkya thub par bstan te des bskul ba'o/ /de'i mthu ni nus pa ste de'i stobs kyi nus pa dang ldan pa'o/ /gang zhe na/ lag na rdo rje zhugs so zhes bya bar 'brel pa'o/ /don gnyis su med pa'i ye shes 'chang ba yin la/ rnam pa ni sangs rgyas thams cad kyis byin gyis brlabs shing/ gsang ba gsum ston pa drag po'i thogs pa ste 'khor gyi gtso bo gnod sbyin khro bo 'jigs pa mthu/ stobs dang ldan pa sangs rgyas thams cad kyi bstan pa 'dzin par grags pa 'di'o/ /gang ltar zhe na lus thams cad rdo rjer byin gyis rlabs nas zhes pa'o/ /de yang lus ni spyi bo la sogs pa'o/ /thams cad ces pa ngag dang yid kyang ngo/ / rdo rje ni de dag dang stong pa nyid dang/ thogs pa med cing nus pa dang ldan par byin gyis brlabs pa ni bsgyur ba ste nus pa can du'o/ /des ni khro bor 'gyur bar bstan to/ /des ni ma 'ongs pa'i rnal 'byor pa'i 'khor lo bya'o/ /zhes pa'i tha tshig go /gang la zhe na/ rdo rje'i ting nge 'dzin la ste gnyis su med pa'i ye shes dang thogs pa med pa la rtse gcig par snyoms par zhugs pa ni mnyam par bzhag pa'o/ /mdor na stong pa nyid las thugs kyi sprul pa rdo rje rnam par 'joms pa gdon pa thugs rtse gcig par 'gongs pa ste/ khyad par du bstan pa'i phyir ro/ /thugs kyi sprul pa dngos bstan pa'i phyir de nas zhes bya ba la sogs pa gsungs te/ smras so zhes bya bar 'brel to/ /de la de nas ni 'das ma thag pa'o/ /lag na rdo rje ni bshad do/ /sangs rgyas shAkya thub pa la sogs pa thams cad kyi mthu ni nus pa'o/ /byin gyis brlabs pa ni rang bzhin gyi shugs kyis so/ /gzhan yang byang chub sems dpa' ste de yang don dam pa'i 'bras bu gnyis su med pa la smon pa dang 'jug pas gnas pa'o/ /de yang byang chub nam mkha' i mtshan nyid de/ /kun tu rtogs pa thams cad spangs/ /de la sems dpa' gang yin pa/ /byang chub sems dpa' zhes bshad do zhes bya ba dang/ byang chub ni don dam pa'o/ /sems dpa' ni kun rdzob ces gsungs so/ /de yang sems dpa' chen po zhes sbyar ro/ /thams cad ni ma lus pa ste rdo rje spyan ras gzigs la sogs pa'o/ /de dag gis kyang byin gyi brlabs pa ste/ des ni ting nge 'dzin gzhan las khyad par du 'phags pa bstan to/ /lag na rdo rje'i thugs gnyis su med pa'i khro bo gdug pa tshul dgu dang ldan par 'byung ba ni rdo rje khro bo'o/ /las byung pa ni des sprul pa ste bzhi pa'o/ /gang byung zhe na rdo rje snying po ste rdo rje rnam par 'joms pa'i khro bo rdo rje bsnams pa ni lha dang sngags thams cad kyi 'byung gnas su gyur pa'o/ /des rab tu smras pa ni myur bar rab tu sngags gsungs pa ste gsum pa'o/ /'o na 'di ni phyag na rdo rje dang rdo rje rnam par 'joms pas smras pas bcom ldan 'das kyi bka' ma yin zhe na/ 'di ni bcom ldan 'das kyi bka' yin te/ bcom ldan 'das kyis byin gyi brlabs pa'i phyir dang/ tha mi dad pa'i phyir te/ dper na mdo gzhan bzhin no/ /de dag ni phyag na rdo rjes rdo rje rnam par 'joms pa 'khor bcas 'og nas sprul te mdun na gnas pa la bka' sgo nas/ des rdo rje rnam 'joms sngags kyi 'byung po 'dul bar byed pa gsungs pa'o/ /phyag na rdo rjes smras pa ni ma yin te/ rgyud dang 'gal ba'i phyir ro/ /'dis ni 'di skad ston to/ /rnal 'byor pas khrus byas te/ khro bo mi 'chi ba dang gnod pa med par byas te/ stan la gnas nas sprul pa byas la tshogs bsags te/ rdo rje gdan la gnas pas byin gyi brlab par gsol te/ sangs rgyas dang byang chub sems dpa' zhugs pas stong pa nyid la sogs pa'i byang chub pa'i lha drug gis bdag phyag na rdo rjer bya ba dang/ mdun du bum pa lha drug 'khor dang bcas pa bsam pa dang/ spyan drang ba dang/ mchod pa la sogs pa rgyud la brten pa sgrub thabs bzhin du bya'o zhes pa'i don to/ /de yang rgyud las/ dang po khrus byas rnal 'byor pas rdo rje gdan la gnas nas ni/ mchod dang gsol bas lha drug bsgom/ /stong pa yi ge sgra gzugs dang/ /phyag rgya mtshan ma drug yin te/ bum par bskyed sogs rdzogs byas la/ /nor bu spyod lam sngags bzlas te/ /sha la sogs pa bdun spang ngo/ /zhes gsungs so/ /de ltar gleng bslang ba'i rgyu bstan nas/ da ni gleng bslangs pa dngos bstan pa'i phyir/ mi chod pa zhes bya ba la sogs pa gsungs so/ /de yang 'di rnams ni rdo rje rnam par 'joms pas sngags kyi yon tan 'di lta bu zhes tshig tu gsungs pa dngos te/ de la yang gnyis las bdag gi don phun sum tshogs pa ni rdo rje'i tshig bdun gyi bston to/ /de la stong pa nyid dang sngags dang ting nge 'dzin ni rdo rje ste phyi rol rdo rje rin po che la chos bdun yod pa dang 'dra bar 'di la 'byung bas mi chod cing snying po yod pa'o/ /de la chus phye mar mi shig shing mi phyed pa'o/ /bden pa ni gnas pa ste mes thal bar mi 'gyur ba'o/ /srab ni gzhig par dka' ba ste rlung gi gtor du med pa'o/ /tshig de dag gis rdo rje ye shes de la skye ba la sogs pa bzhi dang/ mdza' bzhi dang 'bral bar shes par bya'o/ /des na mtshan ma'i dngos po dang/ gdon thams cad la thogs pa med pa ste gcod cing 'joms la bems po ma yin pa'o/ /de'i phyir mi 'gyur bar gnas pas bstan pa zhes sbyor ro/ /tshur la tshugs sam zhe na/ thams cad du ma pham pa ste rang la nyams pa med cing ma bcom la rgyal bas so/ /de yang sra brtan snying ldan khong stong med/ /mi phyed mi shig mi tshig pas/ /rdo rje zhes ni brjod pa'o zhes gsungs so/ /de dag gis ni sngon byung rgyal po log pa'i snying po la sogs pa nyams su blangs nas bdag gi don chas sku rdo rje lta bu'i ting nge 'dzin dang/ longs spyod rdzogs pa'i sku rdo rje lta bu'i grub pa'o/ /de yang bde gshegs las ni sna tshogs pa ma 'ongs pas na sngon du snyen pa rdzogs pas bdag don 'grub par shes par bya'o/ /zhes bstan to/ /bdag gi don grub nas gzhan gyi don med dam zhe na/ sems can thams cad skrag par byed pa zhes bya ba la sogs pa bco lngas sprul pa'i sku rdo rje lta bus gzhan gyi don 'grub par ston to/ /de yang bsdun las rin ?/ de yang las ni sna tshogs pa mngon spyod brgyad du rnam par grags/ /tshar gcas dang ni rjes bzung ngo/ /zhes gsungs so/ de la sems can ni kun gzhi srog dang bcas shing yid kyi rnam par shes pa dang ldan pa ste skyes gnas bzhis bsdus pa ris drug po thams cad do/ /de dag skrag par byed pa ni lus sems 'jig cing sdangs par byed pa ste drag po tshar gcod par byed pa'i rig sngags 'di smras so/ /zhes bya bar sbyor ro/ /'jil ba ni lus sems spa bkong nas 'gul mi nus pa'o/ /de yang sngags dang lha 'dis byed pa'o/ /de yang drag po'o/ /rig pa ni lha ste de'i sngags ni nus pa can de shes nas skyob pa'o/ /de yang gzhan thams cad kyis sbyar ba ste de dag gcod pa ni nus pa'i rgyud med par byed pa'o/ /de yang drag po'o/ /gnod par byed pa ni nus pa med cing zil gyis mnan nas mi g.yo ba ste/ sgyu mkhan bzang po'i sgyu ma bzhin no/ /de ni dbang ngo/ /zhi ba'i las ni thams cad 'joms par byed pa ste pha rol gyi sbyor ba ngan pa byad stems la sogs pa dang/ gos pas na las te sngon gyi las kyi sgrib pa thams cad do/ /de dag par byed cing bzlog pa'o/ /gzhan ni pha rol te 'byung po sems can no/ /de dag gi las ni nang la sogs pa dang sgrib pa ste 'jigs pa ni brlags par mdzad pa'o/ /gdon ni 'don par byed pa ste lha la sogs pa thams cad do/ /de dag brlag pa ni thal ba'i byed pa ste drag po'o/ thar pa ni sngar bzung ba las grol ba'o/ /de ni zhi ba'o/ /dbang ni 'byung po ni sems can thams cad de khams gsum du 'byung bas so/ /de dag 'gugs pa ni 'dren pa ste dbang du byas nas bstan pa la gnas par byed pa'o/ /rig sngags ni 'jig rten pa dang 'das pa'o/ /las ni nus pa ste zhi ba la sogs pa thams cad 'dis myur du byed du 'jug pa ste las la 'dzud pa'o/ /de yang dbang po/ /sngar ma grub pa ni mngon du ma gyur ba ste lha rnam pa gnyis kyi dngos grub po de dag 'dis grub par byed pa ni mngon sum du gyur pa'o/ /sngar grub zin a ni 'bras bu de yan bar chad kyis mkhyer bar byed cing don yod pa chud mi za ba'o/ /'dod pa ni yid kyi mngon par 'dod cing don du gnyer ba ste nor la sogs pa phun sum tshogs pa thams cad do/ /de dag 'dis sbyin pa ni 'di las byung zhing ster ba'o/ /de dag ni rgyas ba'o/ /srung ba ni nang dang gdon la sogs pa sngar ma 'ongs pa dag phyis mi 'ong par byed cing sdom pa'o/ /de yang zhi ba'o/ mjug bsdu ba ni zhi ba ste nad la sogs pa thams cad med par byed pa'o/ /rgyas pa ni tshe la sogs pa ma lus pa thams cad 'phel bar byed pa ste/ de gnyis dbang ni rjes su gzung ba'o/ /gzhan thams cad ni tshar gcod pa'o/ /drag po'i las la byung po dang sems can gang dag sangs rgyas kyi bstan pa la ma dad pa de dag rengs par byed pa ni mi g.yo ba ste ngag dang lus so/ /rmugs pa ni sems rmongs pa ste ci yang mi shes par byed pa'o/ /gsum pa'i sgra dang 'og gi tshig ni re re la sbyar ro/ /yang ni tshig de rnams ni man nga gi 'og gi sngags re re la sbyar bar bya'o/ /zhes bstan pa'o/ /de lta bu 'di rdo rje rnam par 'joms pas gsung du khro bo'i tshig du smras so/ /zhes sbyor te brjod pa'o/ /gang gis brjod ce na lag na rdo rje 'dir rdo rje rnam par 'joms pa la bya'i/ /phyag na rdo rje dngos ma yin no/ /gang gi brlabs na shAkya thub pa la sogs pa'i nus pas brlabs pa ni sangs rgyas kyi mthu ste/ de yang rgyal ba'i nyan thos pa dag ji rnyed chos ston dang zhes pa la sogs pa dang/ yang ston cing 'tshad pa rnams ni sangs rgyas kyi mthu'o/ /zhes bstan pa'i phyir ro/ /gang lta bu zhe na/ gsang sngags te sba zhing dman pa la mi bstan pas nus pa khyad par du 'phags pa'o/ /zhes bya ba'i tha tshig go/ nus pa gzhan las khyad par du 'phags shing phul du byung ba'i 'og gi rdo rje'i sngags ni mthu chen po 'di zhes pa ste de dag smras pa'o/ /de dag gi ni sngon gyi 'khor la yon tan ni gzhan don thams cad 'grub par bstan la ma 'ongs pa la ni sngon du bsnyen pa tshogs pas sgrub thabs bzhin byas pas de dag 'grub par 'gyur ro/ /zhes pao 'di skad ston te de ltar mchod pa la sogs pa rdzogs nas sngags kyi nor bu bzang ste/ sngags kyi gnas dang ldan pas rdo rje'i tshig dang khro bo'i ngag du bzlas pas bdag dang gzhan gyi don sgrub pa'i phro bsdu bya ste/ de yang bsnyen pa dang las sbyor gyis dus su sgrib pa la sogs pa med pa'i sbyor bas spyod las bya'o/ /zhes pa'i don to/ /de ltar rgyu dang rkyon rnam pa gnyis bstan nas da ni de'i 'bras bu gang bstan par bya ba'i chos phun sum tshogs pa rdo rje rgyud rdo rje'i sngags zab mo sngar gyi yon tan can de bstan pa'i phyir na mo zhes bya ba la sogs pa gsungs so/ /de la bdag gi dag don rtogs sla pa'i phyir brjod par bya ste/ sngon byung ba la ni rdo rje'i sngags 'di dag bkris pa bdag po la mchod pa brjod pa nas rnam par 'joms pa'i rdo rje gsungs pas 'byung po thams cad pa rnam pa bzhis tshar bcad pa dang/ rjes su gzung bas sangs rgyas la skyabs su 'dod pa la sogs pa'i tshul gyi dkyil 'khor du btsud de nas la sogs pa zhi bas mi dag sangs rgyas la sogs pa la dad de/ rgyal po log pa'i snying po yang gnas der 'od zer la zhon te 'ongs nas/ de bzhin du byas pas bkris las thar pa la gnas so/ /de yang 'og nas rgyal po zhes pa'o/ /bskrad pa dang/ las bzhi dang khro bo bzhi dang bcu bskul ba dang/ gtso bo la sogs pa drug po bskul ba'i tshul gyis so/ /ma 'ongs pa'i sgrub pa pos ni sngon du bsnyen pa la sogs pa la bsrung ba dang bsnyen pa la sngags mtshan gsum gang yang rung ba bzlas pa dang/ las sbyar la gnyis su bya ba dang/ las sgrub na gtso bo dang 'brel pa dang 'khor dang gnyi ga dang 'brel pa gsum gyi zhi ba'i la sogs pa'i las lha dang rdzas dang bsam pa dang phyogs dang dus dang sngags dang 'khor lo dang ting nge 'dzin dang bya bas sgrub pa ni sgrub pa'i thabs bzhin du shes par bya'o zhes pa'i don to/ /de yang rnal 'byor bsnyen pa gsum du byas/ /las la gnyis te las la gsum/ /gtso dang 'khor dang 'dul ba ni/ / las bzhi sngags sogs dbye bar bya zhes 'di'i bshad pa'i rgyud las gsungs so/ /da ni gzhung nyid la 'jug par bya ste/ de la dang po bkris pa'i don rnam pa gnyis kyi phyag bya ba ni/ na mo ratna tra yA ya zhes pa la sogs pas gtso bo gsum la 'dud pa'o/ /de dag ni sngags kun la shes par bya'o/ /'bru ni don nyams pa'i phyir bshad par mi bya ste rang nyid kyi sgras shes par byas la don yid la dran par bya'o/ /de nas tshar gcod cing bsrung ba'i sngags ni tadya thA oM la sogs pa ste nye bar sbyar ba'o/ /de yang dang po tha mar ye shes dang drag po dang shes pa'i gzhi 'dzug pa can de bzhin du shes par bya'o/ /da ni gzungs la gsum las dang po rgyas pa ste de yang gtso bo'i sngags ni sarba bidyA badzra badzra zhes pa la sogs pa ste bstod cing bod pa'o/ /ma 'ongs pas ni 'di la sngags gdags bar shes par bya'o/ /las dang 'brel pa ni man ngag bzhin du bzhi pa'i sngags ni he phu lu zhes pa la sogs pa ste snga ma bzhin no/ /tsa ra ni tsa ra la sogs pa ni rgyas pa'i'o/ /ki li ki la ya la sogs pa ni dbang gi'o/ /mA ra ya la sogs pa ni bsad pa'o/ /tshind+ha la sogs pa ni rig sngags bcad pa'o/ /band+ha la sogs pa ni rig sngags mnan pa'o/ /de bzhin skrag par byed pa la sogs pa la yang man ngag bzhin du sbyar ro/ /da ni 'khor gyis sngags bstan pa ni/ tsu ru zhes pa la sogs pa ste/ snga ma bzhin du byas pa ni rdo rje phur ba'i sngags so/ /trA sa ya la sogs pa ni rdo rje be con gyi'o/ /ha ra la sogs pa ni rdo rje tho ba'i'o/ /pra ha raM la sogs pa ni rdo rje gtum pa yi'o/ /de dag stod cing skul bar byed pa ni e hye la sogs pa'i sngags brtag ste bzlas par bya'o/ /de dag dang 'brel pa'i las sngags la zhi ba'i sngags la ma tis+thir badzra zhes bya ba la sogs pa'o/ /rgyas pa'i sngags ni d+ha ra d+ha ra zhes pa la sogs pa'o/ /dbang gi sngags ni na ma sa man ta zhes pa la sogs pa'o/ /gsang ba'i sngags ni a mu kaM mA ra ya phaT ces pa'o/ /rig sngags bcad pa'i sngags ni mahA ba le zhes pa la sogs pa'o/ /rig sngags mnan pa ni da ha zhes pa la sogs pa ste/ 'dir yang thams cad snga ma bzhin du byas pas las kun 'grub par 'gyur te sbyar ba gsum shes par bya'o/ /de yang rdo rje'i gsang sngags 'di yin te/ las kun thogs pa med par 'grub ces gsungs so/ /'dir man ngag gi gtso bo yab yum gyi sngags ni dang po oM dang tha ma'i yan lag bor la dza la la sogs pa'i na byin te ya hUM phaT swA hA gnyis shes par bya'o/ /steng dang 'og de bzhin du byas la 'khor gyi zhi ba'i ku la 'am lam bor te phyag 'tshal ba ni byin de rgyas pa'i d+ha ra'i ra la i byin la gtso bo yi bcing ba gnyis dbrog go/ yang na 'di ltar yang yin te/ thams cad snga ma bzhin la skrad pa'i sha la saM gyi stod phrogs te byin la gtso bo'i zhi ba'i ku ru gnyis kyi u phyi la ka ya e byin te 'khor gyi lha'i ma hA dang dbang gi sa man gyi na bsad pa'i ya gsod la e byin pa ni gcig ste/ de gnyis gang yang rung ba dam tshig bstan cing brtan par bya ba yin no/ /zhes bla mas bstan to/ /yang na de rnams ni sems can thams cad skrag par byed pa zhes pa la sogs pa dang rims pa bzhin sbyar bar bya'o/ /zhes dgongs so/ /da ni snying po bsdu ba bstan pa'i phyir/ na mo zhes bya ba la sogs pa gsungs te snga ma bzhin du shes par bya'o/ /de ltar lha lnga po'i 'khor na gnas pa'i thugs kyi khro bo bcu sngon ni bskul la/ ma 'ongs pa las bzhi 'grub pa yin pas de bshad pa ni/ ha ra ni hUM mdzad bskul ba ste drag po'o/ /d+hu na ni dbyug sngon can de dbang ngo/ /da ha ni gshin rje mthar byed de de yang dbang ngo/ /pa tsa ni mi g.yo ba ste drag po'o/ /d+ha ra ni rta mchog ste zhi ba'o/ /dA ra ya ni gzhan gyis mi thub pa ste rgyas pa'i'o/ /dA ru Na ni bdud rtsi 'khyil pa ste zhi ba'o/ /ts+tshinda ni khams gsum las rgyal ba ste rig sngags bcad pa'o/ /b+hinda ni stobs po che'i sngags te des rig sngags mnan pa 'grub pa'o/ /de dag gis ni bya ba kun snga ma bzhin du sbyar bas las thams cad 'grub par 'gyur ro/ /da ni lha rnams kyi yang snying shin tu yang bsdus pa gsungs pa ni na zhes pa la sogs pa ste de yang gtso bo rnams gnyis la mchod cing de'i snying po'o/ /hu lu ni rdo rje kI la ya'i ste rgyas pa'o/ /tiSh+Tha rdo rje be con gyi zhi ba'i'o/ /bad+ha? ni rdo rje tho ba ? te dbang gi'o/ /ha na ni rdo rje gtum po yi ste drag po yi'o/ /ya mri te ni pho nya dang mngag pa yab yum khro bo mi 'chi ba dang/ lu gu rgyud ma'i sngags te khrus dang bskrad pa la shes par bya ste de dag gis kyang de bzhin du 'gyur ro/ /'di skad ste sngon du bsnyen pa la ni gsum pa gang yang rung bzlas la sgrub pa pas la sgyur ba ni gnyis su shes par bya ste las bsgrub pa la ni man ngag bzhin du sbyar ro/ /de yang bsnyen pa gsum ste sgrub pa gnyis las sgrub so sor shes par bya zhes gsungs so/ /da ni de dag gi mjug bsdu ba cho ga phan yon dang bcas pa phun sum tshogs pa bstan te/ de yang sdug bsngal thams cad sel ba'i phan yon ni/ sdig pa thams cad byang byas nas zhes pa la sogs pa gsungs te/ de dag gi sngon byung du rgyal po log pa'i stobs la sogs pa'i 'khor rnams the tshom skyes pa la de dag brong pa skyed pa'i phyir gsungs la/ ma 'ongs pa la ni sgrub pa'i phan yon du sbyar ro/ /de la sdig ni sgrib bas na sdig pa ste srog gcod pa la sogs pa'i las so/ /thams cad ni de dag dang nye ba ma lus pa'o/ /'dis de dag byang bar byas pa ni dag par byed pa'o/ /gzhan yang der ma zad de lus ngag yid gsum zug rngu gzir bas na sdug bsngal te 'gyur ba la sogs pa gsum mam brgyad do/ /med par byed pa ni sel bar byed pa'o/ /de nas sems can zhes bya ba la sogs par 'brel te/ sems can gang dag sngon gyi las dang rkyen dang 'byung pos mig la sogs pa'i dbang po drug nyams pa ni long ba la sogs pa ste/ de la sngags 'dis bkrus nas nyams pa las sogs te thar zhes par 'brel to/ /de bzhin du tshe ni 'tsho ba ste de zad pa ni dus la bab ste de yang ring bar 'gyur ro/ /tshe nyams pa ni rkyen gyi tshe tshad las thung bar gyur ba ste de yang tshad du 'tsho'o/ /phun sum tshogs pa ni ma tshang ba med pa ste nor la sogs pa yin la/ de dag ma tshogs pa'i gyur ni min pa ste/ des sems can gang la chags pa ni gang la byung zhing gnas pa yang phun sum tshogs par 'gyur ro// lha rnams ni mthu dang rdzu 'phrul dang ldan pa'i 'jig rten pa dang 'jig rten las 'das pa'i lha ste/ de dag bsgrubs kyang 'phangs nas grub pa mi ster ba ni rgyab kyis phyogs pa ni ring ba'o/ /de yang nye bar byed do/ /bdag dang yid cugs? shing yid du 'ong ba ni mja' sdug ste so sor gnas pas skye bo ste bden pha ma mthong ba'o/ /de sdang ba ni byams pa dang bral ba ste de yang byams pa'o/ /bran ni 'khor bzang po'o/ /bza' mi nu chung ma la sogs pa'o/ /sogs pa ni ma lus pa'i nye ba'o/ /de dag 'byung pos gtses pa ni bskrag cing bcom pa ste de yang mi 'tsho/ yang bram ze la sogs gtses pa dang zhes glegs bam la lan gnas te/ 'jig rten bram ze dang rgyal po dang rde'u dmangs kyis ba dag gtses pa las thar ba'o/ /yang na bdag gi bram ze dang dge slong la sogs pa nus pa can dang zhing dag pas gtses pa yang nus pa zlog la zhing dag 'gyur ro/ /yang na bram zes khyer ba zhes pa ste bza' skar ngan pa la shi ba yang cho gas phan no/ /bdag dang gzhan gnyis ni phan tshun te de dag mi mthun pa ni sems mi btsugs cing ngag dang lus 'thab pa ste mthun par 'gyur ro/ /sngar longs spyod che ba la dbyig yin pas nor te gser la sogs pa'o/ /'brib pa ni bri ba'o/ /des rgyud la sdug bsngal bskyed pas gnod pa'o/ /mya ngan mngal dang gnod pa ni gdungs pas dub pa ste/ de la gdon gyis tshugs par sla'o/ /yang na dang zhes sbyar te dub pas gnod pa dang/ phal par gnod pa thams cad do/ /gzhan yang skrag cing bag tsha ba ni 'jig pa ste rgyal po'i chad pa la sogs pa brgyad do/ /phongs pa ni snga nas dbul ba'o/ /gzhan yang gdug pa bza' ste pa bsangs la sogs pa gnod cing de dag ngan pa la la bab pa'o/ /rgyu skar ni nam mkha' i la so sor 'thor nas rgyu ba ste smin drug la sogs pa'o/ /de dag ni khrus byas te bzlog pas zhi bar 'gyur ro/ /byang stems ces pa ni rig sngags ngan pa'i 'khrul 'khor gyi btsugs te gsad par 'dod pa'o/ /mi bzad pa'i gdon ni nad la sogs pa tsho bas cher 'debs pa ste rdzu 'phrul che ba'i lha la sogs pa'o/ /de dag gis nyen pas ni btab pa'o/ /mya ngan ni lus ngag yid gsum gdungs pa'i khyad par te de des phung po ngal te gnyid log pa 'am/ dngos su 'byung ba'o/ /de'i stobs kyis gnyid log pas sems rmongs te yid kyi rnam shes rgyu bas rmi lam ste/ der sdig pa mthong bas ni ngan pa ste btson ra la sogs pa'o/ /yang zhes pa bzlas pa ste kun la sbyar ro/ /yang na dang zhes pa so sor sbyar ro/ /de dag thams cad kyang 'di'i sgo nas sel cing de dag las thal bar 'gyur ro zhes sbyar ro/ /de dag gi rgyud las 'byung ba thams cad sel ba'o/ /da ni rgyud la bde ba thams cad ldan par byed pa gsungs pa ni rgyud do cog gi rtsa ba ste zhes pa blang ngo/ /de yang sngon du ni 'brel cing rgyun chags pas brgyud de rgyud do/ /cog ni ma lus pa'o/ /rtsa ba ni gzhan la ma ltos shing gzhan bskyed par byed pa ste/ de ni rdo rje lhun po ri rab zom gyi rgyud ces bya ba le'u brgya dang brgyad pa'i le'u yi dang por 'di gsungs la/ ngas 'di bshad pa'o/ /rgyud de bdag gi mthong ngo/ /ma 'ongs pa la ni yon tan ma lus pa ni rgyud do/ cog yin la de las 'byung bas rtsa ba'o/ /yang na tshes thams cad kyi rtsa ba rdo rje lta bu'i ting nge 'dzin yin pas so/ /la la dag rgyud thams cad kyi rtsa ba dbang bskur ba ste/ de yang chu la rag las bas zhes 'chad de ma yin no/ /gzhan yang dpal kun te bsten par 'os shing yon tan che ba ste/ 'byor pa dang bu la sogs pa'am tshogs gnyis so/ /des legs par brgyan pa ni de dag yongs su rdzogs shing tshang ba 'di'i sgo nas byed pa yin no/ /de nas tshe dang bsod nams 'phel bar 'gyur zhes par sbyar te bsod nams ni grags pa dang longs spyod de yid bde zhing lus ngag rgyas par byed pa'o/ /sdig pa kun ni gong du bstan pa'o/ /de la thar ba ni grol ba ste/ mngon par mtho ba dang nges par legs pa thams cad thob par 'gyur ba'o/ /zhes dgongs so/ /de dag ni spyi'i bya ba'i cho ga'i phan yon no/ /yang na las de dag la bya ba sor sbyar bar shes par bya'o/ /de ltar phan yon 'byung ba bshad nas/ da ni cho ga bshad par bya ba'i phyir/ des ni zhes bya ba la sogs pa gsungs te/ de yang sgrub pa po dang bsgrub bya sta gon la gnas pa'o/ 'di dag gi ni 'das pa la 'di ltar gyis cig ces gdams la ma 'ongs pa la ni cho ga bya ba dngos yin no/ /de la sgrub pa po dang bsgrub bya des ni rab bkrus gtsang ma yin zhes gsungs te/ phyi'i khrus ni chu dang sas legs par bkrus pas dri ma dag par bya ba ste lan gsum du'o/ /gtsang ma'i gos ni gzhan du longs ma spyad pa'i gos sar pa lan gsum du brje'o/ /de bzhin du zas dkar gsum bza' ba dang/ zhag cig smyung bar gnas par byas la/ nang gis khrus ni gang dag yid dge sems dang zhing zhes pa ste lus dang ngag dang yid gsum gyis mi dge ba bcu mi byed par sdom la/ sems dang pa ni dad pa'o/ /de dag gi ni rten gyi gang zag dang sta gon la gnas pa bstan to/ /de nas blang ba la sogs pa cho ga dang sgrub thabs las byung ba bzhin du dkyil 'khor 'byor ba'i bye brag gi bris la rdzas bkod de bsgrub par bya'o/ zhes bya ba'i bar du'o/ da yang dang po sta gon gnas pa yis/ /sa'i cho ga rdzogs byas te/ /'byor ba dkyil 'khor bris byas la/ /rten la brten de bsgrub par bya zhes gsungs so/ /de'i 'og tu khrus la sogs pa sngon du song bas lha bskyed pa ni mdo sde zhes bya ba la sogs pa'o/ /de yang sngon byung la ni mdo sde zab mo sangs rgyas kyi gsungs pa 'di mnyan par bya ba dang/ de'i phan yon bstan la rjes su 'jug pa ni lha bskyed pa dang sngags bzlas pa'i thabs su 'gyur ro zhes dgongs pa'o/ /de la mdo sde ni rgyud dang gcig pa ste don zab mo mdo sder ston la tshig mdo tsam du gsungs pas so/ /yang na gnas dang ston pa la sogs pa gsungs pa'o/ /de yang gnas rnams dang mtshan nyid dang/ chos don smos phyir mdo sde'o zhes pa dang/ tshig nyung ba la don rgyas pa'o/ /mdo sde dam pa blta bar bya zhes gsungs so/ /don du bya na gzungs sngags thams cad dang bcas pa ste de dam pa ni mchog go /mnyan par bya ba ni gdams pa ste sangs rgyas dang bla ma la rna bas thos shing shes par bya ba'o/ /de nyid gzhan gyi dka' bas zab mo sangs rgyas spyod yul te sangs rgyas kyis gsungs pa'o/ /yang na chos nyid stong pa'i lha la sogs pa drug po zab cing de sangs rgyas kyi sku ste spyod yul du bskyed pa'o/ /des ni bsnyen pa sgra la gnas pa'i bsam gtan gyi sngags bzlas pa yang shes par bya'o/ /zhes bya ba'i don te/ /nyan byed na ni thos na'o/ /gzi brjid ni 'od zer te dpal gang yin pa'o/ /yang na lha drug po'i don ni mdo sde yin la da nyan pa ni sgom pa'o/ /de ni bzlas pa'i bsam gtan ni nor bu'i phreng ba dang ldan pas mdo sde lha rnams kyi thugs ka nas gnas pa'i zla ba dang/ rdo rje dang sngags so/ /de'i 'od zer gyi spro bsdu ni gzi brjid do/ /des ji ltar bsams na srog chags ta rlung nang na gnas pa 'tsho ba'o/ /mi bzad pa'i nad ni 'tsho ba dka' ba'i mdzes ste 'byung ba las gyur pa dang/ klu'i gdon no// kyang zhes pa ni mi mthun pa'i rgyan te de yang zhe na nad gzhan smos ci dgos zhes pa'i don te/ /zhi bar blta ni zhi bar 'gyur ba'o/ /yang na zhi bar blta ni sngags bzlas so/ /de ni khro bo'i dag du las sbyor gyi sngags bzlas par bstan to/ /da ni rten gang la brten de sgrub pa ni gzer ram yang na ni zhes bya ba la sogs pa gsungs te/ bsnyen pa la bum pa gcig las la lnga'o/ /de'i rgyu ni rin po che gser ni rab bo/ /yang na ni zhes phyogs gzhan ston pa de 'dul ni 'bring ngo/ /kyang rung zhes pa ni bsdu ba ste zangs ni tha ma'o/ /de ltar ma 'byor na sa las bum pa dmar po nag por ri med par bya'o/ /de yang bum pa pad+ma dmar po'i mdog 'dra zhing zhes pa la sogs pa gsungs so/ /des ni bum pa'i rgyu bstan to/ /'di dag ni sngon gyi dus dang rjes kyi dus 'dra ba'o// da ni snying po dang rgyan ni chu yis dgang zhes pa la sogs pas ston te/ da yang 'dir chu bo chen po'i chu dang 'o mas nang dgang ba ste bkru ba dang bsang bas bya'o/ /'dir chu yi gser zhes bya bar 'dod de 'di ni rmongs pas mi shes par blta'o de nas gzhan du longs ma spyad pa'i ras kyi gos gtsang mas thor cog gsum gyi tshul du dkri'o/ /der snying po ni nor bu ste yid du 'ong ba'i mu tig mig med pa dang/ yungs kar te sgrub pa'i rdzas bgegs skrod pa snod dam par blugs te steng du gzhag go /dar? ba ni ri pa ste/ bkris pas lo ma dang bcas pa dang/ ku sha dang rma bya'i sgro bdun bdun khar gzugs so/ /dkon pas na rin chen de de dag rma med pa ni ma spyad cing ma brnyings pa'i sar ba'o/ /yang na mig med pa ste gser la sogs pa lnga dang/ tsan dan ni dri dang ldan pa dkar po ste/ de la sogs pa dri lnga dang bcas pa ni lhan cig don te til la sogs pa 'bru lnga dang/ ha sa de ba la sogs pa sman lnga dang/ bu ram la sogs pa snying po lnga gsang ba spyi rgyud bzhin du blugs par bya'o/ /der yang shel dang/ rdo rje pha lam dang me tog sngon po bcug la de'i phreng bas kha la brgyan no/ /de'i khar ni bkris pa'i shing mya ngan med pa la sogs pa 'bras bu can gyi brgyan la/ rdo rje bzhag ste bkris pa'i thag pas btags te las la sngar gzhug go /de dag ni bsnyen pa la shes par bya'o/ /de yang rin po che la sogs pa'i yon tan shes par bya ste/ lha'i mtshan ma ni dgod pa ma yin par shes par bya'o/ /de nas bzlas pa'i drang bstan pa'i phyir lan grangs zhes pa la sogs pa gsungs te/ yang nas yang du bskyar bas lan grangs te gzung rings ni nyi shu rtsa gcig yin la gnyis pa dang yang snying ni brgya rtsa brgyad du bzlas so/ /su ni byed pa gsum pa'i gsum pa ste de nas khrus bya zhes pa'o/ /'di skad ston te bzlas pa la ni grangs nges chog pa yin la/ ma 'das pa la ni sngon du bsnyen pa 'bum rdzogs nas las la bsam gtan dang ldan pas shes par bya'o/ /zhes pa'i tha tshig go /las la sbyar ba dngos bstan pa'i phyir rgyal po zhes gsungs te/ sngon byung la ni lha 'am mi che bas rgyal po ste log pa'i snying po'o de ni 'khor nye ba'i gdul bya la dgongs pa ste 'khor gzhan yang bkag pa ni ma yin no/ /rjes 'jug la ni rgyal po bsod nams smos te/ rgyal po la sogs pa thams cad ces sbyar ro/ /rtag tu ni dus gsum du'o/ /bum pa'i chu des khrus kyis shig dang zhes gdams pa'o/ /de ltar byas ni gong gi phan yon thob par 'gyur zhes sbyar ro/ /des na rnal 'byor pa dus gsum du bkru la/ bsgrub bya la ni ma zhi bar du khrus bya ba dang/ bya ba'i rgyud yin par bstan to/ /de yang rten mchog dag dang ldan byas nas/ /mkhas pa gang la bkru byas na/ /mngon mtho nges legs 'byung bar 'gyur zhes gsungs so/ /de dag gis ni 'di skad bstan par 'gyur te/ sngon du bsnyen pa rdzogs nas sta gon la gnas pas sa'i cho gas dkyil 'khor 'byor ba'i bye brag gis bris te bum pa dgod cing lhar bskyed la sngags dang ting nge 'dzin dang ldan pas bzlas te khrus kyi man ngag bzhin bya ba dang/ bsrung ba dang bkru ba la sogs pa byas te 'byor pa chung bas dpa' bo gcig pa brtag par bya'o/ zhes dgongs so/ /rdzogs pa ni thob pa ste rgyud chen po nas phyung zhes pa'o/ /'di ltar rdo rje'i gdams ngag 'di/ /nga yis sngon du don mthong gis/ /the tshom med par sgrubs shig dang/ /dpag med bsam pa rdzogs par byed/ /lha dang bla mas bskul ba'i phyir/ /'grel pa dri ma med pa 'di/ /sangs rgyas spas pas byas pa ste/ /'di yis kun kyang de grol shog /'phags pa rdo rje rnam par 'joms pa'i 'grel pa rin po che gsar ba zhes bya ba/ bya ba'i rgyud kyi grub pa sangs rgyas gsang pas mdzed pa rdzogs so// //mkhan po de nyid dang/ lo tsa ba dpa' many+dzu sh+rI warmmas bsgyur ba'o/ /phyis paN+Di ta dzan+te ta du la dang/ lo tsa ba 'og bsod nams mes pas bsgyur cing yang zhus te gtan la phab pa'o// //