བོད་ཡིག

e-texts produced with BDRC’s OCR application

rgya gar skad du/ b+ha ba sam pu Ta a mr-i ta ra sa khA hi la sam pa ra a ti an ta tse da tan tra nA ma/ bod skad du/ snang srid kha sbyor bdud rtsi bcud thigs 'khor ba thog mtha' gcod pa'i rgyud ces bya ba/ bcom ldan 'das mtshon med brjod las 'das pa'i sems nyid skye med kun bzang la phyag 'tshal lo// 'di skad bdag gis bshad pa'i dus cig na// 'og min gyi gnas mtha' dbus med pa'i gzhal yas khang / chos nyid kyis stong ra/ kun gzhi khyab brdal chen po'i dkyil 'khor/ rin po che'i 'od spungs pa/ 'od zer 'phel 'grib tu 'phro ba/ de'i gnas ni/ snying po don gyi sku gsum 'di ltar bzhugs/ bsam bral blo 'das brjod med chos sku dang // 'gag med bsam 'das skye med longs sku dang // thugs rje kun khyab 'dren med sbrul sku gsum// de ni ston pa'i phun sum tshogs pa'o// de'i 'khor yang 'di lta ste/ don gyi 'khor dang / ye nas gnas pa'i 'khor dang dus gsum gyi 'khor ro// don gyi 'khor ni 'di lta ste/ sems nyid skye ba med pa la/ rig pa 'gag pa med pa'i 'khor dang / chos nyid 'gyur ba med pa la/ yid 'gyur sna tshogs kyi 'khor dang / sems nyid gnyis su med pa la/ gzung 'dzin gnyis snang btags zhen pas 'khor ro// ye nas gnas pa'i 'khor yang 'di lta ste/ sa dang chu dang me dang rlung nam mkha'o// dus gsum gyi 'khor yang 'di lta ste/ 'das pa'i sangs rgyas dang / ma 'ongs pa'i sangs rgyas dang / da ltar ba'i sangs rgyas so// gzhan yang 'khor gyi tshogs ni 'di lta ste/ rjes su rnal 'byor dang / shin tu rnal 'byor dang / rnal 'byor chen po'o// nyid kyi rang bzhin gyi 'khor yang 'di lta ste/ rang bzhin lta ba'i 'khor dang / rang bzhin rtogs pa'i 'khor ro// de dag ni 'khor phun sum tshogs pa'o// bstan pa'i don yang 'di lta ste/ ye nas mtshon du med pa'i bstan pa dang / de la mtshon pa'i chos kyi sangs rgyas dang / sangs mi rgya ba'i bstan pa dang / mtshon bya mtshon byed gnyis med de/ tshig dang yi ge mi bzlog bstan pa'o// bstan pa phun sum tshogs pa'o// dus bstan pa ni 'di lta ste/ 'das pa'i rjes mi gcad/ ma 'ongs pa'i sngun mi bsu/ da ltar rkyen khar mi shor te/ dus gsum dbyer med kyi dus sngon du byung rjes 'jug gdung gsob dus/ dus phun sum tshogs pa'o// de nas 'khor tshogs de'i nang nas/ rdo rje sems dpas 'di skad zhus/ kye kye ston pa sems nyid kun bzang lags// phun sum tshogs don de ltar na// thog ma gzhi yi gnas lugs dang // sangs rgyas sems can so mtshams dang // yar 'khrul mar 'khrul bye brag dang // cis lan cis phan gtan tshigs dang // nga nyid rtogs par byed thabs dang // rtogs nas 'bras bu'i thob lugs dang // mi 'gyur gdeng gis zin lugs dang // yang ti spyi yi gnas lugs dang // rjes 'jug rnams kyi rtogs thabs dang // de dag zab par ston pas gsungs// snang srid kha sbyor bdud rtsi bcud thigs 'khor ba thog mtha' gcod pa'i rgyud las/ gleng gzhi phun sum tshogs pa yongs su bkod pa'i le'u ste dang po'o// // de nas 'khor gyi nang nas rdo rje sems dpa' stan las langs te/ pus mo btsugs thal mo sbyar nas 'di skad ces gsol to// bka' chen bshad lugs ji ltar lags// sems nyid kun bzang gsung du gsol// zhes gsol pa dang / ston pa sems nyid kun bzang gis// 'dus pa'i tshogs la bstan pa'i phyir// rin chen 'od 'bar gzhal yas khang // dbyings chen chos nyid stong pa ru// chos thams cad g.yo ba med pa'i ting nge 'dzin la snyoms par zhugs so// de nas 'dus pa'i tshogs rnams kun tu 'khor bar gzigs nas ting nge 'dzin de las bzhengs nas/ 'khor rnams la 'di skad ces bka' bstsal to// de yi spyi ti yo ga 'di/ 'dus pa'i 'khor la bstan par bya// 'khor rnams ma yengs gus par nyon// yang ti'i spyi yi bshad lugs 'di// theg pa gzhan las 'byung mi 'gyur// ma byung mi 'byung 'byung mi 'gyur// bka' chen bshad / lugs gsum du bshad// skye med mtshan med bshad pa dang // bla dwags tshig gis bshad pa dang // mtshon pa brdas 'gro la bshad pa'o// thun mong bshad lugs rnam gsum yang // byin gyis brlabs kyis bshad pa dang // rang gi ngo bos bshad pa dang // bsdebs sbyor tshig gis bshad pa'o// a ti spyi yi bshad lugs ni// skye med chos sku'i bshad lugs dang // 'gag med longs sku'i bshad lugs dang // thugs rje sbrul sku'i bshad lugs so// dbye bas gsum gsum dgu yin te// spyi don gsum du shes par bya// skye med mtshon med bshad lugs dang // mtshon pa'i chos kyis sangs mi rgya// mtshon las 'das pa'i chos shig dgos// bshad pa'i chos kyis sangs mi rgya// ma bshad pa yi chos shig dgos// bstan du med pas sangs mi rgya// bstan ston med pa'i chos shig dgos// rtag pa'i chos kyis sangs mi rgya// blo las 'das pa'i chos shig dgos// byas pa'i chos kyis sangs mi rgya// ma byas ma byung chos shig dgos// bsgrub pa'i chos kyis sangs mi rgya// byar med spros bral chos shig dgos// skye med mtshon med bshad lugs so// bla dwags tshig gis bshad lugs ni// mtshan nyid bde gsum bshad lugs dang // kro yog sde gsum bshad lugs dang // bskyed rdzogs rnam gsum bshad lugs dang // rim pa dgu yi bshad lugs ni// 'di ru mi brjod rang rang zhib// mtshon pa brdas 'grol bshad lugs ni// a he he he a la la la ho// shin tu ngo mtshar che ba'i bka'// s+thi ti yang ti 'di lta bu// gzhan na med de a la la// nga yi rang bzhin 'di lta ste// yod ni ci yang med pa la// snang ni cir yang snang ba'o// dngos po ci yang med pa la// rtag pa kun gyis rtsa ba byas// brjod pa'i yul du ma grub te// ming tshig kun gyi rtsa ba byas// tha snyad gang gis ma gos te// tha snyad kun gyi rtsa ba byas// skye shi kun dang bral ba la// skye rgas na 'chi'i rtsa ba byas// bskyed pa kun dang bral ba ste// thams cad bskyed pa'i gzhi ma byas// 'byung ba'i gzhi ma ma grub ste// snang srid skye 'gag 'byung ba'i gzhi// phyogs mtshams mtha' dbus kun bral te// mtha' dbus phyogs kun brten par bya// de sogs phyi nang bsam las 'das// ma nos bsam pa'i rtsa ba byas// byas kyang don gyis ngo bo ni// tshogs brgyad yul du ma gyur pa// rang bzhin mi dmigs brjod dang bral// gang gis kyang ni mtshon mi nus// rin chen 'od 'bar rang bzhin ni// mtshon dus ci yang med pa ste// ston ni rnam pa gnyis su ston// 'byung ni brgyad khri bzhi stong 'byung // bsdu na theg pa rim dgur bsdus// la ni tsi te ya ste bzlas// yin ni byang chub sems nyid yin// gnas pa skye med dbyings na gnas// gsal ni 'od kyi nang nas gsal// snang ni snang srid kun tu khyab// mthong du mtshan ma'i dngos po med// brjod du dmigs pa'i ngo bo med// bsam du blo yi yul las 'das// rig tu rig tshor rtsad nas bcad// dran du sems kyi gzhi ma rnyed// des na mtshon brtag kun dang bral// mtshon pa brdas 'gro la bshad lugs so// skye med chos sku'i bshad lugs ni// chos rnams skye med dbyings su bshad// 'gyur med chos sku'i ngo bor bshad// brjod med klong du bstims na bzhags// longs spyod rdzogs sku'i bshad lugs ni// chos rnams 'gags pa med par bstan// brdal khyab 'gags med longs sku'o// thugs rje'i sbrul sku'i bshad lugs ni// snang srid gnyis med sprul pa'i sku// sna tshogs snang la ngos bzung med// snang ba yul chags zhe na med// dran med sbrul sku'i bshad lugs so// byin gyis rlabs kyis bshad pa ni// ye thogs ye gnas ye dbyings nas// dbyer med ston pa nga yis bshad// snying po'i klong nas kun tu bzang pos bshad// rdo rje sems dpa' 'od gsal gnas nas mnyan// rang gsal khye'u chung 'od gsal sbubs nas bshad// rang gsal chen por kun gnas sbubs nas mnyan// rang gsal chen pos kun gsal gnas nas bshad// dga' rab rdo rje ri rab rtse nas mnyan// dga' rab rdo rjes ri rab rtse nas bshad// 'jam dpal bshes gnyen ri rab rked nas mnyan// 'jam dpal bshes gnyen ri rab rked nas bshad// klu rgyal 'jog pos rgya mtsho'i gting nas mnyan// bstan pas go ba ma yin te// byin gyis brlabs kyis bshad lugs so// rang gi ngo bos bshad pa ni// byang chub sems kyi ye shes te// ston pa'i sa yi skur byung nas// tshig dang yi ger mi ston te// bdag tu mi rtog gzhan mi rtogs// mi rtogs mnyam pa'i dgongs pa ston/ khams gsum sems can thams cad kyis// de rtogs sangs rgyas kun dang mnyam// rtsol ba'i bsam pas dbyings mi bskyod// byang chub sems kyi 'od zer te// ston pa chu yi skur byung nas// tshig dang yi ges mi ston te// bdag tu mi 'byed gzhan mi 'byed// mi 'byed mnyam pa'i dgongs pa ston/ khams gsum sems can thams cad kyi// de rtogs sangs rgyas kun dang mnyam// rtsol ba'i bsam pas dbyings mi bskyod// byang chub sems kyi ye shes de/ ston pa med pa skur byung nas// bdag tu mi 'dzin gzhan mi 'dzin// gzung 'dzin gnyis med dgongs ston pa/ khams gsum sems can thams cad kyis// de rtogs sangs rgyas kun dang mnyam// rtsol ba'i bsam pas dbyings mi bskyod// byang chub sems kyi rang bzhin te// ston pa rlung gi skur byung nas// bdag tu mi bsgrubs gzhan mi spongs// dgag sgrub gnyis med dgongs pa ston/ khams gsum sems can thams cad kyis// de rtogs sangs rgyas kun dang mnyam// rtsol ba'i bsam pas dbyings mi bskyod// byang chub sems kyi ye shes de// ston pa nam mkha'i skur bstan nas// bzang po mi bsgrub ngan mi 'dor// dbye gsal med pa'i dgongs pa ston/ khams gsum sems can thams cad kyis// de rtogs sangs rgyas kun dang mnyam// btsal ba'i bsam pas dbyings mi bskyod// de ni snang srid thams cad kyis// tshig dang yi ger mi ston te// rang rang dbyer med chos ston to// rang gi ngo bo'i bshad lugs so// sdeb sbyor tshig gis bshad lugs kyis// snyan nas snyan du brgyud de bstan// s+thi ti yang ti'i bshad lugs so// zhes gsungs so// gleng bslangs bshad lugs kyi le'u ste gnyis pa'o// // de nas sems nyid kun bzang la// rdo rje sems dpas 'di skad zhus// sangs rgyas sems can thams cad kun// ma byung gong na ji ltar gnas// 'dus pa'i 'khor la gsungs du gsol// zhes gsol pa dang / sems nyid kun tu bzang po des// rin chen 'od 'bar gzhal yas su// dbye ba med pa'i ting nge 'dzin la snyoms par zhugs te/ 'dus pa'i tshogs la gzigs nas ni// bzhengs nas 'khor la bka' stsal pa// sangs rgyas sems can ye stong du// dngos po ci yang ma grub pas// mtshon pas mi ldog mtha' las grol// thog ma'i gzhi la dbyer med pas// sangs rgyas sems can ming yang med// brda' dang tha snyad bzlog mkhan med// dpe dang don du ston mkhan med// tshig dang yi ger 'dogs mkhan med// bde sdug gnyis su 'dogs mkhan med// rgyu 'bras gnyis su rgyu mkhan med// bdag gzhan gnyis su 'byed mkhan med// sangs rgyas sems can gnyis ma grub// ci yang ma yin ngo bor gnas// mtshon pa'i sangs rgyas tshig las 'das// bsam brjod yul las 'das pa yin// ji ltar brjod pa mtshon las 'das// de phyir gzhi la dbyer med phyir// brtag bzhin kun dang bral ba yin// mtshon pa'i mtha' las 'das pa yin// rdo rje sems dpas 'di skad gsol// ston pa sems nyid kun tu bzang // kun gzhi'i gnas lugs ji ltar lags// zhes zhus pas// ston pas 'khor la bka' bstsal pa// bang mdzod zhing sa dar chags gsum// gzhi yi dpe ru shes par gyis// sangs rgyas sems can gzhi ngo yang // 'khor bar yang na mi brgya mtshar// mya ngan 'das pa rgya ma chad// gnyis med du yang rgya ma chad// tha snyad du yang rgya ma chad// yod ma myong la med ma myong // stongs ma myong la bsrungs ma myong // de bzhin bde sdug gsal ma myong // yin min gang stongs 'dod rtsol dang // zhen chags bzang ngan yod grub dang // sgrom 'jogs gzung 'dzin 'khrul sgrib dang // rtogs dang ma rtogs kun ma myong // gnyis su chad min gcig tu min// rgyu rkyen gnyis kyi skye 'jig med// ngo bo mi 'gyur rang bzhin dmigs// skye 'jig gang du'ang rgya chad med// mtshon med tshig med brten pa med// chos med ston med mnyam pa med// dbus med mtha' med phyogs mtshams med// sangs rgyas byang chub sems dpa' med// rigs med yid med sems kyang med// gnas rnams chags med zhen pa med// gzung 'dzin med pa'i rtog tshogs grol// rnam pa cing yang mi 'byed pa'o// zhes gsungs so// gzhi'i gnas lugs bstan pa'i le'u ste gsum pa'o// // de nas ston pa kun bzang la// rdo rje sems dpas yang zhus pa// sangs rgyas sems can so mtshams gang // yar rgyas mar 'khrul bye brag rnams// shin tu bzang bar bka' stsol cig/ zhes zhus pas// ston pa'i rgyal po sems nyid kun tu bzang po de/ rin po che 'od sbyor 'byed kyi ting nge 'dzin la snyoms par zhugs so// de las bzhengs nas 'di skad gsungs// sangs rgyas sems can so mtshams ni// rig dang ma rig mtshon ma mtshon// rtogs dang ma rtogs so mtshams yin// yar ltar mar 'khrul 'di lta ste// sngon thog ma nyid gdod nas gnas// skye med dbyer med sras shig 'khrungs// dbyer med gti mug chen po des// thabs kyis rgyal po yab tu bsten// skye 'gags kun bral yum gyi tshul// rtsis gdab med pa'i sras shig 'khrungs// thog ma med pa yab kyi tshul// tha ma med pa yum gyi tshul// dbye bsal med pa'i sras de yis// thog mtha' gnyis kyi dras thag gcod// rang bzhin ye gnas yab kyi tshul// kun khyab klong chen yum gyi tshul// 'od gsal chos nyid sras shig 'khrungs// chos rnams mnyam nyid dbyings su thim// bag chags g.yo ba yab kyi tshul// kun tu g.yo ba yum gyi tshul// 'gyu ba bu yi tshul du bskyed pa dang // 'byung ba yab kyi tshul du gnas// 'od lnga yum gyi tshul du 'khyil// rlung lnga sras kyis tshul du 'khrungs// rtsal la gdeng rnyed rtogs par shar// bu nyid yum gyi ngang du thim// ma la bu thim dbyer mi phyed// yab yum 'gyur med dbyings su thim// snying po yab yum mkha' klong las// rig rtsol ma 'gags bu rnams 'phyo// 'phyos ma rnyed snying po'i klong // zer dang shes pa ma g.yos thim// yab yum sras gsum dbyer med pas// thog mar ye nas sangs rgyas yin// chos nyid zhing dang phrad pas ye shes rang sa zin// rnam rtog rtsad nas bcad pas 'khrul pa rang sar grol// 'gyur med klong du thim pas chos skur grol// ma rig mun khang bcom pas ye shes rgya ma chad// ye shes 'char sgo bye bas ma rig 'khrul sgo bsdams// 'khor ba yongs sangs snying po chos skur rgyas// bya ba rtsol sangs byar med spros bral rgyas// yar kun tu bzang po de / ltar shes// cis phan gtan tshigs 'dri ba ste// bya btsal gang gis mi phan te// rang sar rang nyid thim pa min// rang nyid rang gis grol ba yis// rang nyid rang gi rtogs pa yin// spong len dgag bsgrub ma yin te// rnam rtog sangs nas ye shes rgyas// sus kyang rgyas su ma bcug ste// rang nyid rang gis rgyas pa yin// de ltar 'gyur med sangs rgyas rtogs tsan// ma rig med de dang drangs chen po yin// ye shes ye gnas dang drangs chen po yin// rnam rtog med de dang drangs chen po yin// chos nyid ye nas ngang drangs chen po yin// dus gsum med de dang drangs chen po yin// sku gsum ye yin dang drangs chen po yin// dug lnga chen pos dang drangs chen po yin// ye shes lnga ni ngang dngas chen po yin// 'khor ba med de dang drangs chen po yin// ye nas myang 'das yin te ngang drangs che// sems can med de dang dngas chen po yin no// ye gnas sangs rgyas yin te ngang drangs che// skye ba med de dang drangs chen po yin// 'gags pa med de dang drangs chen po yin// na ba med de dang drangs chen po yin// rga shi med de dang drangs chen po yin// stong pa med de dang dwangs chen po yin// gnyis su med de dang dwangs chen po yin// yul sems gnyis med dang dwangs chen po yin// gzung 'dzin med de dang dwangs chen po yin// dgag bsgrub spong len gnyis med dang drangs chen po yin// bya btsal phyogs ris gnyis med dang dwangs chen po yin// dbye bsal rtsis gdab gnyis med ngang dwangs che// rig pa myong med dang drangs chen po yin// yid kyis 'gyu med dang dngas chen po yin// sems kyis dmigs med ngang dwangs chen po yin// ming tshig brjod brtags zhen med ngang dwangs che// sa lam sbyangs bskyod med de ngang dngas chen po yin// rtog tshogs mtshan ma med de nga drangs che// brjod gzhi thams cad dang drangs chen po yin// sangs rgyas che ba'i yon tan de ltar ro// zhes gsungs so// sangs rgyas che ba'i yon tan bstan pa'i le'u ste bzhi pa'o// // de nas rdo rje sems dpa' yis// ston pa kun bzang la zhus pa/ khams gsum 'khor ba ci yis nyes// zhes zhus pas/ 'dus pa'i 'khor la bka' bstsal pa// a bi da ra rat+na saM ba ra a le me ma kye ma ho// yang dag don las gol ba rnams// rnam rtog bdag tu bzung ba yin// nam mkha' nam mkhas bzung ba sprin// rang mgo rang gi rkang pas mnan// rang gi gnya' lag rang gis bcings// rang gi rin chen rang gis bor// rang gi sgron me rang gis bsad// rang gi nyi zla rang gis bsgrubs// kye ma bdag 'dzin sems can nyon re mongs// mnyam pa'i don las phyogs ris byung // sangs rgyas sems can gnyis kyi gzhi// ngo bo spyi ba g.yo ba'i rlung // skye ba'i rig pa mnyam par gnas// dper na mtsho la dar chags 'dra// 'gyu ba rlung du mnyam pa la// rang sa ma zin gsum gyis len// sangs rgyas don de ma rtogs te// g.yo dang 'gyu dang mi 'gyu dang // zer dang 'od dang shes pa dang // sang sang seng seng rten med de// dran rig phyogs mtshams 'gyus pa yin// rtsal bu'i rig pa 'phyo sangs khyer// yin snyam rig pa chags sdang ste// gnas don ma shes don ma rig/ de la ma rig mun par bshad// 'gyu ba rang gi rgyu byas nas// sgrib g.yogs mun pa rkyen du 'byung // ye shes 'char sgo ma phyed pas// mun pa'i 'khor sgo rkyen du byung // ma rig 'khrul sgor 'khyam pa yin// rig pas tshol 'phro byas pa yin// yid ni 'gyu ba nyid dang bcas// sems ni gsal ba lnga ru bshad// gsal dang mi g.yo rgya ma chad// mi 'gyur g.yo zhing 'gyur ba ste/ sems kyi snang tshul lnga ru bshad// 'od gzugs ri gzugs sha gzugs shar// rig pa'i gzugs la 'od gzugs 'khrul// pha yin ma yin snyam byed kyis// mngal gyi sgo ru 'khyams nas ni// sha gzugs dngas ma'i gzugs su 'thums// pha yi zhe sdang rgyu las ni// sha dang rus pa'i tshul du chags// ma yi 'dod chags rkyen las ni/ khrag dang chu ser tshul du chags// dug gsum rgyu las lugs ngag yid// 'khrul pa smin pa'i 'bras bu yin// dngos po'i rkyen snang 'di ltar 'khrul// pha ma bu gnyen g.yul la sogs// de ru snang ste de ru gzung // de ru btags te de ru zhe na// 'khrul pa btags snang zhen dang gsum// dang po rig skyes yid du 'gyus// sems su gsal bas ming du btags// ming ni don med sems yin no// sems ni blos btags brjod rtogs yin// kun tu tshol dang gtan la 'bebs// nges 'jogs 'khor lo gsum du 'khrul// mnyam pa chen po'i chos nyid la// log rtog shes pa sna tshogs kyis// mi mnyam pa yi ngo bor bzung // de yi 'khrul pa 'bras bur ltas// 'khrul dang ma 'khrul gnyis med la// zhen rtogs mtshan ma brtas pa yin// min pa'i chos la yin par bzung // de yis 'khrul pa'i 'bras bur smin// rtsis gdab med pas rtsis gdab byung // dgag bsgrub med las spong len byung // bya btsal med las rtsol sgrub byung // de yis 'khrul pa'i 'bras bur smin// bdag gzhan med la bdag bzung nas// de ltar med las yongs bzung bas// rmi lam tshul las sdug bsngal myong // rigs drug skyes dgu de las byung // mi bden bden bzung rtog tshogs kyis// gzhi la med de rtog par bzung // bzung bas zhen nas chags te 'khrul// de ltar ma 'khrul gtan la dbab// cis len zhe na rang gis len// rang sa ma zin gsum gyis nyes// chos nyid ma dang ma phrad pa// rang la rang rig yi re mug/ ye shes rang sa ma zin pas// rang la rang nyid zhe re 'khrul// rnam rtog rang sar ma sangs pas// rang la rang nyid skyug re log/ snying po gong nas ma shar bas// rang gi rang nyid mun par 'thums// 'khrul pa rang sar ma grol bas// rang gis rang nyid mnar ba yin// sus kyang gnod pa ma bskyal te// sems dang chos sku ma 'dres len// dug gsum rtsa ba mchod len// zhen pa rang log ma byung len// dug lnga 'di dang ma bral len// gti mug mun pa mi sol len// ye shes nyi ma ma shar len// rang gi rang nyid 'khor du bcug/ rang gis rang nyid 'khrul du bcug/ ces gsungs so// mar 'khrul gtan la dbab pa'i le'u ste lnga pa'o// // de nas ston pa kun bzang la// rdo rje sems dpas 'di skad zhus// chos sku rtogs par bya ba'i thabs// bdag cag rnams la bstan du gsol// zhes zhus pa dang / ston pa kun tu bzang po des/ rin po che 'od 'bar ba zhi ba'i ting nge 'dzin la bzhugs so// de las bzhengs nas 'di skad gsungs// a ya ka ri mahA a ti ta la// theg pa'i rgyal po spyi ti yang ti 'di// theg pa gsum gyis spyi mes yin par bshad// skye med tshig med mtshon 'das yin pa la// a ma de ltar ma go sems can rnams// dngos po med par / mtshon par 'dod// 'di yang sems can nyon re mongs// skye med don la brjod par 'dod// 'di yang sems can nyon re mongs// dngos med don la dngos por 'dod// 'di yang sems can nyon re mongs// nga yi rang bzhin spyir ma grub// theg pa brgyad kyi kha smras 'dzugs// 'di yang sems can nyon re mongs// rang la mngon par zhen pa yis// theg pa brgyad kyis nga ma mthong // 'di yang gzhan lta nga rgyal rgyab kyis phyogs// 'di yang gnyis su med par gnyis su phye// 'di yang dug lnga med par spang bar 'dod// 'di yang sku lnga med par bsgrub par 'dod// 'di yang sems can med par spang bar 'dod// 'di yang sangs rgyas med par bsgrub par 'dod// 'di yang ma rig med par spang bar 'dod// 'di yang ye shes med par bsgrub par 'dod// 'di yang sems can nyon re mongs// yul sems med par spangs par 'dod// 'di yang sems can nyon re mongs// gzung 'dzin med par yod 'dod 'di// de la sogs pa'i gnyis snang kun// blo 'chos yin par ma rig gam// btags snang yin par ma rig gam// bla dwags yin par ma rig gam// brjod gzhi tha snyad yin par ma rig gam// blo dman chos su bstan pa ma rig gam// thams cad blo 'brid yin par rig gam// blo chos drang don yin par ma rig gam// btags snang zhen gsum chos kyis mi btub bo// zhes gsungs so// gnyis snang gi chos kyi mi grol bar bstan pa'i le'u ste drug pa'o// // de nas ston pa kun bzang la// rdo rje sems dpas 'di skad zhus// chos nyid mtshon du med pa'i don// bdag cag rnams la bstan du gsol// zhes zhus pas/ sems nyid ston pa kun bzang des/ rin po che 'od 'bar ba'i don mtshon du med pa'i ting nge 'dzin la snyoms par zhugs so// ting nge 'dzin de las bzhengs nas/ 'dus pa'i 'khor la bka' stsal pa// a ta ba tu ri a ba ma/ nga yis mtshon pa kun bral bshad// rdo rje sems dpas go bar zungs// skye med sngon med mtshon 'das pas// de la mtshon pas sangs mi rgya// mtshon du med pa'i chos shig dgos// sku gsum bsgrubs pas sangs mi rgya// de dang bral ba'i chos shig dgos// snang ba stong pa skye med gsum// de gsum bsgrubs pas sangs mi rgya// de dang bral ba'i chos shig dgos// sems dang rig pa yid dang gsum// de gsum bsgrubs pas nga re dang // sems dang ye shes bag chags gsum// de gsum 'dod pa de dag dang // rig pa stong pa gnyis med gsum// de gsum bsgrubs pas sangs mi rgya// de dang bral ba'i chos shig dgos// tshogs dang mtshon pa'i rtogs pa gsum// de gsum bsgrubs pas sangs mi rgya// de dang bral ba'i chos shig dgos// blang bya dor bya 'dzin med gsum// de gsum bsgrubs pas sangs mi rgya// de dang bral ba'i chos shig dgos// 'gyur med snying po chos nyid gsum// de gsum bsgrubs pas sangs mi rgya// de dang bral ba'i chos shig dgos// kun snang gsal ba 'dzin med gsum// de gsum bsgrubs pas sangs mi rgya// de dang bral ba'i chos shig dgos// rtsol dang bsgrub dang byed dang gsum// de gsum 'dod pas sangs mi rgya// de dang bral ba'i chos shig dgos// lta bya bsgom bya spyod bya gsum// de gsum bsgrubs pas sangs mi rgya// de dang bral ba'i chos shig dgos// snang ba btags pa zhen pa gsum// de gsum bsgrubs pas sangs mi rgya// de dang bral ba'i chos shig dgos// blo yul yid smon med gzugs gsum// de gsum bsgoms pas sangs mi rgya// de dang bral ba'i chos shig dgos// bsgrub 'dod dog pa 'thob rgyu gsum// de gsum 'dod pas sangs mi rgya// de dang bral ba'i chos shig dgos// rtog tshogs bzung ba chags pa gsum// de gsum bsgrubs pas sangs mi rgya// de dang bral ba'i chos shig/ / dgos// yi ge dgag bsgrub bla dwags gsum// de gsum bsgrubs pas sangs mi rgya// de dang bral ba'i chos shig dgos// snang ba phyogs ris kha dog gsum// de gsum bsgrubs pas sangs mi rgya// de dang bral ba'i chos shig dgos// gnyis snang gnyis med la sogs kun// bsam las 'das pas mdo tsam dbye// sgrub dngos sun dbyung de yis phyung // chos gcig bya ba'i mtshan nyid ni// la bzla ba yi gdam ngag yin// de yang 'di ltar shes par bya// chos gcig khyab pa'i ming de yang // gcig po de nyid gcig las 'das// 'das pa'i don la brjod du med// 'das pa'i don la mtshon du med// 'das pa'i don la gzung du med// bsam 'das don la 'dod rgyu med// bya btsal med pa 'das pa'i don// 'das pa'i don la blang dor med// 'das pa'i don la spro bsdu med// 'das pa'i don la lta sgom med// 'das pa'i don la spyod 'bras med// 'das pa'i don la bsrung rgyu med// 'das pa'i don la bgrod du med// 'das don thob rgyu yod las 'das// de la blo yis bcos su med// de la spros dang ma spros med// de la zin dang ma zin med// de la byung dang ma byung med// de la bzang ngan dbye bsal med// de la rtsis gdab bya rgyu med// de la gsal dang mi gsal med// mchog tu gsang ba'i chos nyid ni// snang bas gzhan ma thob mi 'gyur// de la lce yis brjod du med// brjod pas steng du mi phebs te// brjod pa thams cad bla dwags yin// bla dwags tshig la sangs rgyas med// ye nas smra bsam brjod las 'das// dran med yid la bzhag rgyu med// bsam med blo yi yul las 'das// sangs rgyas ye med bsgrub bya med// 'gyur med skye med chos sku de// ye nas yin pas bsgrub ma dgos// chos sku ye nas skye med la// skye med snyed kyi sgros mi gdags// nam mkha'i 'di ni med do zhes// blun po gang zhig rtog dpyod gtong // mkhas pas sngon nas yod mi 'dzin// ye nas gnyis su med pa la// bden pa gnyis 'dzin sun phyungs shig/ gnyis su med pa'i don mchog 'di// kun bzang sum phyung ma btub bo// des na de ltar shes par gyis// zhes gsungs so// chos nyid mtshon 'das kyi le'u ste bdun pa'o// // de nas ston pa kun bzang la// rdo rje sems dpas 'di skad gsol// mtshon du med pa'i don de la// rtsol sgrub bgyis na mi 'gal lam// zhes zhus pas/ ston pa kun tu bzang po des/ rin po che 'od 'gyur ba med pa'i ting nge 'dzin la snyoms par zhugs so// de las bzhengs nas 'di skad gsungs/ nga'i spyi ti yo ga 'dir// dgag sgrub spong len byung na 'gal// dug lnga spangs na nga spangs so// sku lnga bsgrubs na nga spangs so// ma rig spangs na nga spangs so// ye shes bsgrubs na nga spangs so// rnam rtog spangs na nga spangs so// chos nyid bsgrubs na nga spangs so// 'khor ba spangs na nga spangs so// myang 'das bsgrubs na nga spangs so// sems can spangs na nga spangs so// sangs rgyas bsgrubs na nga spangs so// bdag gzhan spangs na nga spangs so// bdag med bsgrubs na nga spangs so// phyogs ris byas na nga spangs so// dgra gnyen spangs na nga spangs so// gnyis 'dzin spangs na nga spangs so// gnyis med bsgrubs na nga spangs so// dmigs bsal bkag na nga spangs so// gsal ba bsgrubs na nga spangs so// lta bas bltas na chos nyid spangs// sgom pas bsgoms na chos nyid spangs// dam tshig bsrungs na chos nyid spangs// 'phrin las btsal na chos nyid spangs// sa lam bgrod na chos nyid spangs// 'bras bu bsgrubs pas chos nyid spangs// de yang ci yi phyir zhe na// de dag thams cad dgag bsgrub gnyis// lta ba lta byed rtsol ba'i nad// bsgom pa sgom byed rtsol ba'i nad// spyod pa spyod byed rtsol ba'i nad// 'bras bu sgrub byed rtsol paba'i nad// sa lam sgrol byed rtsol ba'i nad// de ltar spyad pas grol mi 'gyur// gnyis snang shes pas ma chod par// pha rol phyin pa shin tu gces// zhes gsungs so// dgag bsgrub spangs thob kyis mi grol bar bstan pa'i le'u te brgyad pa'o// // de nas ston pa kun bzang la// rdo rje sems dpas 'di skad zhus// ma 'khrul chos sku thob pa'i zabs// gdam ngag ston pas 'khor la gsungs// zhes gsol ba dang / ston pa sems nyid kun bzang des/ rin po che'i rtsis gdab med pa'i ting nge 'dzin la zhugs te/ de las bzhengs nas 'di skad gsungs/ chos sku 'gyur med thob pa'i thabs// rtsol sgrub bgyi ba mi 'tshal te// bya ba thams cad btang ba'i ngang // rang nyid rang sar bzhag par 'tshal// spong len chags 'dzin nad dang bral// nga yi bka' chem bstan lugs ni// theg pa gzhan la bstan byung med// a la la ho// nga yi bdud rtsi'i nyid khu 'di// nga ni snang srid kun tu snang // snang la snang ste nga ma mthong // ma mthong ba yi ngang la zhog/ nga ni snod bcud kun la khyab// kun la khyab pas ngos bzung med// ngos bzung med pa'i ngang la zhog/ nga ni kun gzhi dngos gzhi yin// dngos gzhi yin te khyab pa med// grub pa med pa'i ngang la zhog/ thams cad nga yis phye ba ste// byed mkhan rtogs mkhan gcig kyang med// ma phye ba yi nga la zhog/ nga ni kun la snang ba ste// kun gyis nga ni snang mi 'gyur// mi snang ba yi ngang la zhog/ nga yis thams cad byas pa ste// ngas ni yul yang ma byas pa'o// ma byas pa yi ngang la zhog/ nga yis thams cad / 'dul ba ste// nga ni sus ma btul ba'o// mi brtul ba yi ngang la zhog/ ngas ni thams cad btsal ba ste// nga ni sus kyang ma btsal lo// ma btsal ba yi ngang la zhog/ ngas ni thams cad spangs pa ste// nga ni sus kyang ma spangs so// ma spangs pa yi ngang la zhog/ ngas ni thams cad bsgrubs pa ste// nga ni sus kyang ma bsgrubs so// ma bsgrub pa yi ngang la zhog/ ngas ni thams cad brtags pa ste// nga ni sus kyang ma brtags so// ma brtags pa yi ngang la zhog/ ngas ni thams cad mtshon pa ste// nga ni sus kyang ma mtshon no// ma mtshon pa yi ngang la zhog/ ngas ni thams cad shes pa ste// nga yi rang bzhin shes pa med// ma shes pa yi ngang la zhog/ ngas ni thams cad bskyed pa ste// nga ni sus kyang bskyed pa med// ma bskyed rdzogs pa'i ngang la zhog/ ngas ni thams cad rtogs pa ste// nga ni sus kyang ma rtogs so// ma rtogs pa yi ngang la zhog/ rig pa skye ba med pa yis// myong ba med pa'i ngang la zhog/ yid la 'gyu ba med pa yis// g.yo ba med pa'i ngang la zhog/ sems la ming 'dogs med pa yis// spros btags 'dzin med ngang la zhog/ gnas lugs 'gyur med dang la zhog/ snang lugs rang mdangs ngang la zhog/ de gnyis dbye bsal med par zhog/ gnas lugs dngos po med par zhog/ snang ba dgag bsgrub med par zhog/ de gnyis rtsis gdab med par zhog/ phyi nang dkar dmar yul rnams kun// snang la rang bzhin med par zhog/ gnas lugs sems kyis rtsal rnams kun// mi snang rang bzhin med par zhog/ bar gyi gnyis snang gzung 'dzin kun// spros pa zag chod ngang du zhog/ skye ba med pa'i ngang la zhog/ 'gyur ba med pa'i ngang la zhog/ smra bsam brjod med dang zhog/ 'gags med chos sku'i klong du zhog/ rnam rtog gnyis med ngang du zhog/ 'jog pa'i tshig kyang gnyis med zhog/ ces gsungs so// nyams blangs bzhag thabs kyi le'u ste dgu pa'o// // de nas ston pa kun bzang la// rdo rje sems dpas 'di skad gsol// ma bcos rnal du bzhag pa yi// bzhag thabs man ngag ji ltar lags// zhes gsol pa dang / de nas ston pa sems nyid kun tu bzang po des/ rin po che 'od 'phro ba med pa'i ting nge 'dzin la zhugs te/ de las bzhengs nas 'di skad gsungs/ ma bcos rang dag rang bzhag thabs 'di ni// rdo rje sems dpas go bar gyis// nga la blta bar 'dod pa rnams// lta bar ma byed rang dgar zhog/ bltas pas mthong ba'i yul med kyis// ma bltas bzhag pas lha dang mjal// nga la bsgom par 'dod par rnams// ma sgoms yod na ngang la zhog/ 'gyur med ngang bzhag nga dang mjal// nga la spyod par 'dod pa rnams// ma spyod byar med dang la zhog/ byar med dang bzhag spyod pa nyid// nga la bsrung bar 'dod pa rnams// ma srungs mi 'da'i ngang la zhog/ srung med dang bzhag dam tshig yin// nga la rtsol bar 'dod pa rnams// ma rtsol rtsol med ngang du zhog/ rtsol med gdeng bzhag 'phrin las nyid// nga la bgrod par 'dod pa rnams// ma bgrod dbyer med ngang la zhog/ dbyer med dang bzhag sa lam rdzogs// nga la bsgrub par 'dod pa rnams// ma sbusgrubs bsgrub med ngang la zhog/ bsgrubs med ngang bzhag don rnams 'grub// nga la 'thob par 'dod pa rnams// 'thob rgyu med kyis rang sar zhog/ gzhan na med pas 'bras bu che// 'thob med thog ma'i don dang mjal// sna tshogs bsam yas chos rnams kun// cir snang sor bzhag ngang la zhog/ snying po chos sku'i rang bzhin nyid// cir snang rang bzhin med par zhog/ rtog tshogs blo yi yul snang rnams// snang la rang bzhin med par zhog/ gnyis snang gzung 'dzin 'di pa rnams// dbye bsal rtsis gdab med par zhog/ yid dpyod sems kyi dran rig rnams// rang sangs chen po'i ngang la zhog/ rtog tshogs sems kyi cho 'phrul rnams// ngang dwangs chen po'i ngang la zhog/ 'gyu ba rig pa brtags pa rnams// gsal mdangs chen po'i ngang la zhog/ ngang bzhag thams cad gsum du 'dus// 'thob rgyu med pa'i sku gsum thob// srid gsum zil gyis mnan pa yis// sa gsum ma mnan rang sar non// dug gsum rtsad nas bcad pa yis/ khams gsum 'khor ba phyags mas btab// ngo bo rang bzhin thugs rje'i snang ba'o// zhes gsungs so// ma bcos rnal du bzhag pa'i le'u ste bcu pa'o// // de nas ston pa kun bzang la// rdo rje sems dpas 'di skad zhus// snying po 'gyur med chos sku la// ming med ming btags ji ltar lags// zhes gsol pas/ sems nyid ston pa kun tu bzang po des/ rin po che 'od 'bar ba'i ting nge 'dzin la bzhugs so// de las bzhengs nas 'di skad gsungs/ chos la ming med mtshon med pas// mtshon pa'i ming gis gol bar bshad// gol sgrib mtshan nyid ngas bshad kyis// rdo rje sems dpa' yid la zungs// sangs rgyas med pas sangs rgyas ming yang med// med par 'dod pas sangs rgyas gol ba yin// chos sku med pas chos sku'i ming yang med// med par 'dod pas chos sku gol ba yin// longs sku med pas gzugs sku'i ming yang med// med par 'dod pas gzugs sku gol ba yin// 'khor ba med pas 'khor ba'i ming yang med// med par 'dod pas 'khor ba gol ba yin// myang 'das med pas myang 'das ming yang med// med par 'dod pas myang 'das gol ba yin// ma rig med pas ma rig ming yang med// med par 'dod pas ma rig gol ba yin// ye shes med pas ye shes ming yang med// med par 'dod pas ye shes gol ba yin// rnam rtog med pas rnam rtog ming yang med// med par 'dod pas rnam rtog 'khrul pa yin// chos nyid med pas chos nyid ming yang med// med par 'dod pas chos nyid 'khrul pa yin// phyogs ris med pas phyogs ris ming yang med// med par 'dod pas rang rig 'khrul pa yin// de dag gnyis su med pa la// gnyis su dbye ba byung bas sgrib pa yin// de dag thams cad ming med brjod med la// ming 'dogs brjod pa byung bas sgrib pa yin// 'gro ba'i lam sgo nor bas gol ba yin// sgo lngar 'khyams pas bzung ba 'khrul pa yin// gol sgrib nyis stong lnga brgya thams cad kyang // dbye na bsam yas bsdu na gsum du 'dus// zhes gsungs so// gol sgrib 'khrul gsum bstan pa'i le'u ste bcu gcig pa'o// // de nas ston pa kun bzang la// rdo rje sems dpa' 'di skad zhus// gol sgrib la bzla ji ltar lags// zhes gsol pa dang / ston pa sems nyid kun bzang de/ rin chen mdo thig le bsdu ba'i ting nge 'dzin la zhugs so// de las bzhengs te 'di skad gsungs/ theg pa'i gol sgrib bsam yas kyang // s+thi ti yang tir la bzla bshad// ma rtogs pa la gol sgrib snang // snying po'i don la gol sgrib med// ming med ming btags gol ba yin// brjod las 'das pas gol ba med// gzung 'dzin bcings pas sgrib pa la// dbye bsal med pas sgrib pa med// mtshon pa'i rnam rtog blo yis 'khrul// smra bsam 'das pas 'khrul pa med// gol sgrib bsam gyis mi khyab kyang // bsdus pa'i gol sgrib 'khrul dang gsum// 'char ba'i sgo nas 'khrul pa yang // bzlog thabs shes pas gol sa med// gnas pa ma rtogs sgrib pa yang // snying po'i don shar sgrib tu med// sgo lngar 'khyams pa'i 'khrul pa yang // yid rtsad chod nas 'khrul du med// thag chod gdeng ldan re dogs med// snying po'i don rtogs sgrib pa med// mnyam pa ris med 'khrul pa med// gnyis med don rtogs phyogs ris med// dbyer med don rtogs gzung 'dzin med// ye shes don rtogs ma rig med// sku gsum don rtogs dug gsum med// sku lnga don rtogs dug lnga rnams// sangs rgyas don rtogs sems can med// zag chod don rtogs yul sems med// ces gsungs so// gol sgrib kyis mi gos pa'i gdeng bstan pa'i le'u ste bcu gnyis pa'o// // de nas ston pa kun bzang la// rdo rje sems dpas don zhus pa// rang la ye nas yod pa yi// bya rtsal 'tshal ba mi 'tshal lam// zhes gsol pa dang / sems nyid kun tu bzang po de/ rin po che 'od lnga rang la gnas pa'i ting nge 'dzin la zhugs te/ de las bzhengs nas bka' bstsal pa/ rang la ye nas yod pa la// rtsol sgrub bya ba mi dgos pas// rdo rje sems dpa' yid la zungs// ngang drangs lta ba yin zhe na/ khyod kyi lta ba ma lta zhig/ ngang drangs bsgom pa yin zhe na/ khyod kyis sgom pa ma bsgom zhig/ ngang dwangs spyod pa yin zhe na/ khyod kyis spyod pa ma spyod cig/ ngang dwangs 'bras bu yin zhe na/ khyod kyis 'bras bu ma sgrubs shig/ ngang drangs sku gsum yin zhe na/ khyod kyis sku gsum ma sgrubs shig/ ngang drangs sangs rgyas yin zhe na/ khyod nyid sangs rgyas ma sgrubs shig/ sems nyid chos sku yin zhe na// chos sku gzhan nas ma tshol zhig/ btsal bas bskal par rnyed mi srid// dus gsum btsal yang mi rnyed do// btsal bas mi rnyed sangs rgyas so// bsgrubs pas mi 'grub sku gsum 'grub// gal te rnyed kyang rnam rtog go/ zhes gsungs so// rang gnas re med kyi le'u ste bcu gsum pa'o// // de nas ston pa kun bzang la// rdo rje sems dpas 'di skad zhus// ngang dwangs chen po ji ltar lags// zhes zhus pa dang / ston pa rin po che 'od skol ba med pa'i ting nge 'dzin la snyoms par zhugs so// de las bzhengs nas bka' bstsal pa// bdud rtsi rang zhun rang mdangs bshad// 'khor rnams ma yengs gus par nyon// a sa ra tsit+ta a pi// sku gsum mi 'gyur rang mdangs chen po yin// dus gsum ma spangs pa med de rang mdangs chen por gda'// ye shes btsal ba med de rang mdangs chen por gda'// ma rig spangs pa med de rang mdangs chen por gda'// chos nyid btsal ba med par rang mdangs chen por gda'// rnam rtog spangs pa med par rang mdangs chen por gda'// sangs rgyas blang du med de rang mdangs chen por gda'// sems can spangs pa med de rang mdangs chen por gda'// myang 'das bsgrub tu med de rang mdangs chen por gda'// 'khor ba spangs du med de rang mdangs chen por gda'// phyogs ris bza' gtad med de rang mdangs chen por gda'// snying po'i chos sku 'gyur med rang mdangs chen por gda'// rang nyid 'gyur ba med de rang mdangs chen por gda'// gzhi med 'gyur ba med par rang mdangs chen por gda'// brtags snang thams cad rang mdangs chen por gda'// zhes gsungs so// bdud rtsi rang zhun rang mdangs kyi le'u ste bcu bzhi pa'o// // de nas ston pa kun bzang la// rdo rje sems dpas 'di skad gsol// de las bzhengs nas 'di gsungs pa// a mun ta ri pe ta ya ti/ bdud rtsi bcud kyi sgron gsal bshad// 'khor rnams ma yengs gus par nyon// snying po 'gyur med chos sku'i klong nas ni// shes rig ma 'gags sna tshogs kun tu 'gyur// gar yang 'gro ba ma rnyed snying po yi// klong thim chos nyid ma 'gags rtsal snang thim// ma bu ngo sprad thog mar ye sangs rgyas// dbyer med dang thim ye nas rang sa zin// 'khrul pa rang sangs rnam rtog rang sar grol// skye med sa zin snying po klong na gsal// snang ba yid la ma byas gting gsal chen po yin// stong pa yid la ma byas gting gsal chen po yin// gnyis med yid la ma byas gting gsal chen po yin// sku gsum yid la ma byas gting gsal chen po yin// dug lnga yid la ma byas gting gsal chen po yin// snang stong yid la ma byas gting gsal chen po yin// bde sdug yid la mi byed gting gsal chen po yin// skye med yid la mi byed gting gsal chen po yin// de dag la sogs thams cad gting gsal chen po yin// zhes gsungs so// bdud rtsi sgron gsal gyi le'u ste bco lnga pa'o// // de nas ston pa kun bzang la// rdo rje sems dpas yang zhus pa// rdzogs chen spyi ti yo ga yi// ma bris dkyil 'khor ji ltar lags// zhes gsol pas/ de nas ston pa kun tu bzang po rin po che g.yo ba med pa'i ting nge 'dzin la snyoms par zhugs so// de las bzhengs nas 'khor rnams la bka' bstsal pa// b+ho hri ta ha na maN+Da la/ ma bris rdzogs pa'i dkyil 'khor bshad// 'khor rnams ma yengs gus par nyon// snying po'i rang bzhin 'gyur ba med// kun gzhi mkha' klong khyab brdal la// byang chub sems kyi dkyil 'khor bzhengs// chos nyid khyab brdal sa gzhi la// lung rigs gnyis kyis sa brtags nas// shes rab kyi yum gyi sa blangs te// kun gzhi chos nyid yangs pa'i gnas// chos dbyings dag pa'i chos khang du// sa blug khyab brdal chen por bsnyams// rnam rtog rdul bsal byang chub chus// mnyam pa nyid du byil byil byas// 'gyur med thig le ye shes mtshon// snying po 'gyur med dbus su zlum// tshogs brgyad rang shar pad 'dab brgyad// ye shes lnga ldan phyogs bzhi dbus// tshad med gru bzhi gtan tshigs sgo// rig pa bzhi yi rtags zur bzhi// gsal dang mi g.yo rgya ma chad// mi 'gyur bstan dang lnga ldan pas// dkar ser dmar sngo kha dog lnga// ma 'gags rol pa'i lha mos brgyan// chos dang chos nyid 'dres pa yis// dra ba dra phyed dar gyis dpyangs// chos nyid snang gsal sgo yis brgyan// mtha' gzhi bral zhing spros gcod pa'i// 'khor bzhi ye shes sgo bzhir mdzes// snying po 'gyur med ka ba btsugs// rang mdangs gsal ba'i nyi zlas brgyan// s+thi ti chos 'khor skor phyir // gdugs// rim dgu'i zil gnon rdo rje'i ra// nan rtags lta ba yid bzung bsgom// chos nyid bya spyod re dogs 'bras// bsres phyir me yi ra bas bskor// dkyil 'khor bzhengs na sems la bzhengs// chos nyid ka dag dkyil 'khor 'dir// theg pa gzhan la 'byung mi 'gyur// zhes gsungs so// ma bris pa'i dkyil 'khor bstan pa'i le'u ste bcu drug pa'o// // de nas rdo rje sems dpas yang zhus pa// ma bris pa yi dkyil 'khor de ltar na// dkyil 'khor de yi nges tshig gang // zhes zhus pas/ kun tu bzang pos bka' bstsal pa// nges tshig bshad kyis 'khor rnams nyon// mkha' dbyings rnam dag dkyil 'khor de// chos nyid byang chub sems la gnas// dkyil ni chos sku 'gyur ba med// rig rtsal 'gag pa med par 'khor// des na dkyil 'khor sems la rdzogs// ma nor dkyil la ma bcos 'khor// ma nor ma bcos dkyil 'khor de// chos nyid byang chub sems la rdzogs// snying po dkyil la snang tshul 'khor// snying po snang tshul sems la rdzogs// 'gyur med dkyil la ma bcos 'khor// 'gyur med ma rdzogs sems la rdzogs// skye med dkyil la 'gag med 'khor// skye 'gags gnyis med dkyil 'khor yin// dbyer med dkyil la snang srid 'khor// dbyer med sna tshogs dkyil 'khor yin// gnyis med dkyil la rtsis med 'khor// rtsis gdab gnyis med dkyil 'khor yin// zhes gsungs so// dkyil 'khor gyi nges tshig bstan pa'i le'u ste bcu bdun pa'o// // de nas ston pa kun bzang la// rdo rje sems dpas 'di skad zhus// dkyil 'khor nges tshig de lta na// de yi lha dang bzhugs gnas gang // zhes zhus pas/ kun tu bzang pos 'od yongs la khyab pa'i ting nge 'dzin la snyoms par zhugs so// de las bzhengs nas bka' bstsal pa// kun gyi mkha' dbyings klong dkyil du// chos dbyings 'pho zhing 'gyur ba med// rnam dag bsam gyis mi khyab pa// rin chen 'od 'bar dkyil 'khor du// sems nyid 'gyur med gtso mchog la// rig rtsal 'gags med 'khor dang bcas// ma bskyed yongs rdzogs lha tshogs ni// dbus phyogs nam mkha'i gdan steng na// gti mug rnam dag blo las 'das// bsam med skye med chos sku bzhugs// shar phyogs nyi zla'i gdan steng na// zhe sdang rnam dag skye 'gags med// rang byung longs spyod rdzogs sku bzhugs// lho phyogs khyung gi gdan steng na// nga rgyal rnam dag dran pa med// yid la mi byed sbrul sku bzhugs// nub phyogs rgya mtsho'i gdan steng na// 'dod chags rnam dag sku gsum du// dbyer med ngo bo nyid sku zhugs// byang phyogs rlung gi gdan steng na// phra dog / rnam dag sku bzhi rdzogs// mngon par byang chub sku chen bzhugs// bskyed nas bzhugs pa ma yin te// rtsol bsgrubs 'das te rang sar bzhugs// rigs lnga cha mthun khyad par 'phags// mtshams bzhir ma bskyed lha mo bzhugs// shar lho pad+ma'i gdan steng na// 'khrul yig byang chub sems su rig/ dri yi brtags zhen rnam dag pa// lha mo chen mo rig lcam bzhugs// lho nub pad+ma'i gdan steng na// rig pa 'dzin med gsal la drangs// reg bya'i rang bzhin rnam dag pa// lha mo chen gsal lcam bzhugs so// nub byang mtshams kyi pad+ma la// dran pa yid la byar med pas// sgra yi rang bzhin rnam dag pa// lha mo chen mo bde lcam bzhugs// byang shar mtshams kyi pad+ma la// yid la 'gru byed rang mdangs pas// ro yi tshor ba kun sangs pa// gnyis med lha mo stong lcam bzhugs// lha mo cha mthun khyad par 'phags// ma bskyed sgo ba'i bzhugs tshul ni// shar sgo sprin gyi gdan steng na// skye ba'i cho 'phrul rtsad gcod pa// sgo srung skye med mkha' gsal bzhugs// phung por zhen pa'i bdud rnams btul// lho sgo 'ja' tshon gdan steng na// na tsha'i sdug bsngal rtsad gcod pa// sgo srung ngang dwangs chen po bzhugs// nyon mongs dug lnga'i bdud rnams btul// nub sgo smig rgyu'i gdan steng na// rgas pa'i sdug bsngal rtsad gcod pa// sgo srung rang sangs chen po bzhugs// lha yi bu yi bdud rnams btul// byang sgor na bun gdan steng na// 'chi ba'i sdug bsngal rtsad gcod pa// sgo gsum chos nyid gting gsal bzhugs// 'chi bdag bdud rnams kun bcom nas// skye shi med pa'i ngang la bzhugs// ye nas sgo srung rnam bzhi yis// bdud bzhi bcom nas mtha' brgyad bral// chags 'dzin zhen pa'i mtsho nas thon// gzung 'dzin gnyis kyi sgrog nas khrol// dgag sgrub spong len 'dam nas thar// rig pa'i rtsal gnad lha tshogs kyang // rtsol bsgrub spyan drangs ma bskyed pa// thog ma nyid nas de ltar bzhugs// lha tshogs cha mthun khyad par 'phags// spyi ti yo ga 'di nyid las// theg pa gzhan las 'byung mi 'gyur// zhes gsungs so// ma bskyed yongs rdzogs kyi lha tshogs bstan pa'i le'u ste bco brgyad pa'o// // de nas rdo rje sems dpa' yis// kun tu bzang po la zhus pa// lha tshogs bzhugs tshul de ltar na// mtshams bcad chen po ji ltar lags// zhes gsol ba dang / kun tu bzang pos bka' bstsal pa// mtshams ni rang sems rang la bcad// mi rtog ye shes mtshams rgyal gyis// rang rtog bgegs kyis rgyal po bsal// bya ba med pa'i las rgyal 'di// gzung 'dzin nga bdag bgegs rnams bskrad// khro rgyal rang mdangs 'gyur med kyis// 'khrul rtog brtags zhen bdud rnams bskrad// ye shes rang shar khro bo yis// rnam rtog bgegs bsal rang gsal rang shar gnas// dbyer med ye gnas ye shes kyis// phyogs ris bgegs bsal mnyam nyid klong // ma 'dres kun rdzob ye shes kyis// rtsis gdab bgegs bsal rtsis med gnas// don grub rang gsal ye shes kyis// mtshan rtags 'dod pa'i bgegs bsal nas// 'gyur med mthar phyin dgongs par gnas// zhes gsungs so// rtog med rang mtshams kyi le'u ste bcu dgu pa'o// // de nas rdo rje sems dpa' yis// kun bzang nyid la 'di skad zhus// mi 'gyur snying po'i lha tshogs la// spyan drangs bzhugs mchod ji ltar bgyi// zhes gsol ba dang / kun tu bzang pos bka' bstsal pa// chos nyid don gyi gnas lugs la// spyan drangs bzhugs mchod mi mnga' ba// rtsal snang chos nyid la par bshad// snying po don dam chos sku yang // mi dmigs dbyings nas gshegs su gsol// 'od gsal rnam dag klong yangs nas// skye 'gags med pa'i longs sku yang // 'og min gnas nas gshegs su gsol// snang srid mkha' klong brdal ba nas// kun khyab dran med sbrul sku yang // 'gro ba'i don phyir gshegs su gsol// rang byung rang dag kun gzhi nas// sems kyi rtogs snang lha tshogs rnams// skye med bstan phyir gshegs su gsol// ka dag snying po'i lha tshogs la// rnam rtog gzung 'dzin kun chags nas// don dam 'gyur ba med par 'tshal// gnyis med mtha' bral klong du bzhengs// mkha' klong yangs pa'i gzhal yas su// mnyam nyid zang ka'i gdan khri la// ma bkag snying po'i lha tshogs rnams// mtshon med rang sar bstan par bzhugs// snang ba yul gyi bye brag kun// dgag bsgrub med par mchod par 'bul// 'dzin pa sems kyi dran rtog rnams// dngos po med par mchod par 'bul// phyi nang gnyis su snang ba kun// dbye bsal med par mchod par 'bul// yul du snang ba'i dkar dmar rnams// sor bzhag chen por mchod pa 'bul// sems las byung ba'i rang rtsal rnams// rtsis gdab med pa'i mchod par 'bul// gzung 'dzin gnyis kyis bcings pa rnams// spros zag med par mchod par 'bul// phyi rol yul snang du ma kun// rang mdangs med par mchod par 'bul// nang na gsal ba'i sems nyid 'di// mthong snang med par mchod par 'bul// snang zhing srid pa'i chos rnams kun// chags 'dzin med par mchod par 'bul// rgya nas 'debs kyis bzhes su gsol// nang 'dzin sems kyi dran pa rnams// rang ma dngas chen por mchod par 'bul// dmigs med dbyings su mchod par 'bul// rang gi lha ni rang mchod na// dngos grub ya mtshan chen po 'gyur// mchod pa 'bul na sems la 'bul// sems nyid snying po'i mchod pa ni// theg pa gzhan du yongs ma gsungs// mchod pa cha mthun khyad par 'phags// zhes gsungs so// spyan drangs bzhugs mchod kyi le'u ste nyi shu pa'o// // de nas rdo rje sems dpa' yis// kun bzang nyid la 'di skad zhus// dkyil 'khor lha tshogs de rnams la// bstod pas dgyes par ji ltar bya// zhes zhus pa dang / kun tu bzang pos bka' bstsal pa// don la dbye ba ru med kyang // mtshan ma brda' ru bstod pa bstan// ka dag chos dbyings gzhal yas na// thig le gcig pur bzhugs pa'i lha// lha rnams kun gyi gtso bo mchog/ byang chub sems dpar phyag 'tshal lo// 'gyur med kun khyab mkha' 'dra'i sku// ma rig mun sel nyi zla'i spyan// 'dod pa kun bral yid bzhin thugs// longs spyod rdzogs pa'i sku la bstod// dngos po med par kun khyab pas// spros pa mtha' dag gcod par byed// thugs rjes kun khyab 'gro ba'i mgon// sprul pa'i sku la phyag 'tshal lo// sku gsum dbyer med mtha' las grol// mtha' yas bsam 'das chos rnams kun// chos nyid ngang du 'dud mdzad pa// ngo bo nyid kyi sku la bstod// byis pa rnams kyis btags pa yi// rtsol sgrub bya/ rtsal las rnams kun// byar med spros bral lhun grub pa// mngon par byang chub sku la bstod// chags 'dzin spros pa kun 'chos nas// byams pa chen pos kun la khyab// dri yi tshogs kun sel mdzad pa// rig lcam sku la phyag 'tshal bstod// dgag bsgrub spongs len kun bral nas// snying rje chen pos 'gro ba 'dren// reg bya'i yul la dbye bsal med// gsal lcam sku la phyag 'tshal bstod// phyi nang gnyis med chos kyi ngang // dga' ba'i las rnams yongs su rdzogs// sgra yi rang bzhin spros dang bral// bde lcam sku la phyag 'tshal lo// gnyis 'dzin mtha' brgyad sku dang bral// ro yi btags zhen rnam par dag/ btang snyoms yongs su rdzogs par mdzad// stong lcam sku la phyag 'tshal lo// rgyu rkyen skye 'gags yongs dang bral// mthar 'dzin rtog pa'i rol pa rnams// chos nyid mkha' la rang gsal ba'i// shar sgo srung la phyag 'tshal lo// thams cad mnyam nyid ngang du rdzogs// rig tshor 'gyur ba ma lus pa// rang byung dang la dang ba nyid// lho sgo srung la phyag 'tshal lo// 'khrul pa'i snang ba ma lus pa// rang las byung nas rang du dag/ ma gsal rang sar sangs pa nyid// nub sgo srung la phyag 'tshal lo// btags dang zhen pa'i mtshan ma rnams// rang grol grol bar rang sar dag/ gsal ba drangs pa'i ngo bo nyid// byang sgo srung la phyag / 'tshal lo// bstod pa cha mthun khyad par 'phags// zhes gsungs so// snying po don gyi bstod pa'i le'u ste nyi shu gcig pa'o// // de nas rdo rje sems dpa' yis// sems nyid ston pa kun tu bzang // chos nyid dkyil 'khor lha tshogs la// bdud rtsi sman mchod ji ltar bya// zhes gsol pa dang / kun tu bzang pos bka' bstsal pa// 'khor rnams ma yengs gus par nyon// nga yi bdud rtsi sman mchod bshad// rang byung gdod nas rnam par dag/ rtsa brgyad stong la sbar ba'i sman// rtsa ba 'bum phrag yangs pa'i bcud// 'chi med bdud rtsi ra sa yin// thams cad 'dus pa'i snying po ste// 'gro drug sems can kun sgrol ba'i// dug lnga sel ba'i bdud rtsi mchog/ mi 'gyur snying po'i lha tshogs la// sman mchod dmigs med dbyings su 'bul// skye med bde chen dngos grub gsol// snying po'i rang bzhin 'gyur med kyang // snang srid chos rnams ma lus pa// bdud rtsi sman dag dgongs par bstan// rang byung rgyu rkyen skye 'jigs med// gzhi mo 'od gsal gdod ma nas// 'khrul snang ma rig rnam par dag/ rtsa ba byang chub sems dpa' yin// brgyad ni rnam shes tshogs brgyad de// stong ni theg pa brgyad khri stong // sbyar ni mnyam nyid klong du sbyar// sman ni nyon mongs brgyad kyi sman// rtsa ba thig le nyag gcig yin// 'bum phrag thig le'i rtsal snang yin// yangs pa chos nyid rol bas yangs// bcud ni snying po 'pho 'gyur med// bdud ni nyon mongs dug lnga ste// rtsi ni ye shes rnam lnga 'o// rang ni nga bdag gnyis yin te// sa ni bdag bcom chos nyid yin// yan lag theg pa rim brgyad de// thams cad rdzogs pa chen por 'dus// snying po spyi ti yo ga yin// thog mtha' gnyis kyis gdams ngag gis// 'gro drug g.yang sa gcod pa yin// dras thag gcod pa'i bka' lung gis// sems can ma lus dbyings su bsgral// skye med chos nyid klong du bzhag/ dug lnga zhe sdang chags 'dzin lnga// shes rtog lta sgom spyod 'bras sel// bdud ni rnam rtog phyogs rnams yin// rin chen 'od gsal shes pa'i mchog/ bdud rnams zhen med ngang du bcom// rtsi ni gnyis 'phrang gnas pa ste// thabs ni snang srid bde chen klong // mchod ni dmigs pa med par mchod// dgyes pa mnyam nyid chen por dgyes// dngos ni rang sems skye ba med// grub pa rtogs pa yi ye shes// e saM ka ra a sid+d+hi a/ zhes gsungs so// snang srid thams cad bdud rtsi rnam dag tu mchod pa'i le'u ste nyer gnyis pa'o// // de nas rdo rje sems dpa' yis// ston pa kun bzang la zhus pa// dkyil 'khor lha tshogs de rnams la// 'dus byas zang zing ma yin pa'i// chos nyid gtor ma ji ltar gtong // zhes gsol ba dang / de nas ston pa kun tu bzang po de rin po che 'od 'phel 'grib dbye bsal med pa'i ting nge 'dzin la snyoms par zhugs so// de las bzhengs nas 'di skad gsungs// chos nyid sems kyi gtor ma bshad// 'khor rnams ma yengs gus pas nyon// snying po'i rang bzhin 'gyur med la// rtsal snang ma 'gags gtor ma gtong // 'dus byas rdzas las ma byas pa'i// snang srid rgyas 'debs tor ma gtong // snod kyi 'jig rten gser dngul snod// nang bcud 'jig rten gtor ma'i rdzas// skye 'gro gzugs sogs gtor ma'i brgyan// rang las 'byung ba'i bdud rtsi lnga// dug lngas ka dag ye shes lnga// dug gsum ka dag sku gsung thugs// rnam shes rnam lnga gtor ma'i brgyan// dbang po'i yul lnga gtor ma'i rten// rang dag rgyal ba'i dgongs pa'i bcud// oM AHhUM gsum byin rlabs kyis// phyi nang snod bcud kyis bsdus pa'i/ khams gsum srid gsum 'gro drug rnams// mnyam nyid bdud rtsi rgya mtshor gyur// skye 'gags med par byin gyis brlabs// snang srid kyis bsdus chos rnams kun// skye med dbyings su mchod par 'bul// skye shi rtsad gcod byin gyis rlobs// dus gsum bde gshegs bsam 'das la// snang srid rgyas 'debs mchod par 'bul// skye ba med par bzhes su gsol// 'gyur ba med par byin gyis rlobs// bla med dkon mchog gsum po la// sems kyi btags snang mchod par 'bul// bsam brjod med par bzhes su gsol// rtags snang grol bar byin gyis rlobs// bla ma yi dam mkha' 'gro la// nyon mongs brgyad khri'i gtor mar 'bul// rang sar dengs par bzhes su gsol// sdug bsngal ka dag byin gyis rlobs// bka' srung mkha' 'gro chos skyong la// sems kyi dran rtog mchod par 'bul// 'gyur med klong du bzhes su gsol// skye ba med par byin gyis rlobs// snying po don gyi lha tshogs la// byung tshor thams cad gtor mar 'bul// spros thag chod par bzhes su gsol// rtsis gdab med par byin gyis rlobs// rigs lnga sku lnga yab yum la// phyi nang gnyis bzung gtor mar 'bul// dbye bsal med par bzhes su gsol// bkol ba med par byin gyis rlobs// bde lcam la sogs lha mo la// rigs yin dran sems gtor mar 'bul// rigs 'gru sems dpa' med par bzhes// g.yos pa med par byin gyis rlobs// shar gyi sgo srung mkha' gsal ba// gzung 'dzin chags zhen mchod par 'bul// dbye ba med par bzhes su gsol// shar grol chen por byin gyis rlobs// lho yi sgo srung rang sangs la// yul dang sems nyid gtor mar 'bul// 'gags pa med par bzhes su @#/ gsol// gnyis su med par byin gyis rlobs// nub kyi sgo srung rang mdangs la// ma rig gnyis 'dzin gtor mar 'bul// gsal ba'i klong du bzhes su gsol// ye shes rang sar byin gyis rlobs// byang sgo bsrung pa'i gting gsal la// lha sgom spyod 'bras gtor mar 'bul// zhe 'dod med par bzhes su gsol// ka dag chen por byin gyis rlobs// ming 'dogs thams cad gtor mar 'bul// btags nad med par byin gyis rlobs// bya btsal thams cad gtor mar 'bul// byar med chen por byin gyis rlobs// bzang ngan thams cad gtor mar 'bul// spong len med par byin gyis rlobs// gzhi dang rtsal snang gtor mar 'bul// ma bu dbyer med byin gyis rlobs// btang bya gtong byed med pa yi// sems kyi gtor ma khyad par 'phags// zhes gsungs so// rang sems gtor mar bkod pa'i le'u ste nyer gsum pa'o// // de nas rdo rje sems dpa' yis// ston pa sems dpa' kun bzang la// gtor ma'i nges tshig ji ltar lags// zhes gsol pas/ ston pas 'khor la bka' bstsal pa// gtor ma gtor ma zhes bya ba// 'gro drug gtor bas gtor zhes bya// de drug g.yang sa bcad pas ma// gnyis snang phul bas gtor zhes bya// gnyis su med pas ma zhes bya// ma 'gags 'byung/ bas gtor zhes bya// rtsis gdab med pas ma zhes bya// rig pa rtsal snang gtor zhes bya// gzhi la rtsal thim ma zhes bya// sna tshogs snang bas gtor zhes bya// brjod mtha' yas pas gtor zhes bya// brjod du med pas ma zhes bya// chos rnams gcig tu shes pas ma// gcig shes kun grol gtor ma'i mchog/ ces gsungs so// gtor ma'i nges tshig bstan pa'i le'u ste nyer bzhi pa'o// // de nas rdo rje sems dpa' yis// kun bzang nyid la 'di skad zhus// rdzogs chen spyi ti yo ga yi// dbang gi bskur thabs ji ltar lags// zhes gsol ba dang / de nas ston pa kun tu bzang po de 'od dang byin rlabs nang du 'bar ba'i ting nge 'dzin la snyoms par zhugs so// de las bzhengs nas 'khor rnams la// dbang gi bskur thabs bka' bstsal pa// snying po don gyi gnas lugs la// bskur bya skur byed gnyis med kyang // re zhig ma rtogs blo can la// rig pa sems kyi rtsal dbang bskur// kun gzhi klong yangs gzhal yas khang // 'dus ma byas pa'i mkha' dbyings su// chos nyid ka dag rtogs 'dod rnams// rtsol ba med pa'i tshul gyis 'jug/ dang po bum pa'i dbang nyid de// gnyis pa gsang ba'i dbang nyid dang // gsum pa shes rab ye shes dbang // bzhi pa rin chen tshig dbang ngo // rgyal thabs spyi blugs kyi la bzla// dang po bum pa'i dbang bskur ni// las dang skal ldan slob ma yin// snying po'i gdams ngag yod pa yi// bla ma de la zhu ba dbul// bla mas gnang bar gyur pa dang // rdzas dang yo byad ldan byas te// gzung 'dzin dag pa'i sa phyogs su// phyogs ris spangs pa'i sa phyogs der// mkha' klong yangs pa'i mchod khang du// 'gyur med dbyings kyi dkyil 'khor na// ma rig gsal ba'i gzhal yas khang // ma bskyed yongs rdzogs lha tshogs bzhugs// de la slob mas dbang nod de// skal ldan rigs can slob ma des// 'og min gnas mchog dkyil 'khor du// tshogs dang mchod gtor tshul bzhin bshams// bsgrub pa'i rdzas dang dkyil 'khor rdzas// rgya chad med par bsags par bya// de nas don ldan slob ma des// mchog gis skyabs 'gro sems bskyed de// byang chub chen po'i chu rgyun gyis// sems kyi dri ma dag par bkru// phyogs 'dzin blos byas sdig pa bshags// zhen chags dngos 'dzin med par 'bul// slob dpon gdan la bzhugs pa la// sgo gsum dang bas 'di skad zhu// e ma ho/ ye nas bde gshegs snying po la// nyon mongs ma rig las dbang gis// rang gi de nyid ngo ma shes// bskal bar 'grogs kyang de ma bskyed// lhan cig gnas kyang zhal ma mthong // nyon mongs dug lnga'i bdag nyid kyis/ khams gsum 'khor bar 'khyams 'gyur lha tshogs blta bar gyis// rang gi rin chen 'od gsal bstan// thog ma'i sangs rgyas ngo sprad do// zhes pas mig dbye lha ngo bstan// de nas slob mas me tog gtor// gang yin rigs kyi gsang mtshan gdags// de nas rdo rje slob dpon dang // skal bar ldan pa'i slob ma yis// ka dag lha la bsnyen par bya// re med rang gnas rtogs gyur nas// dbang bzhi rdzogs par bskur ba ni// slob ma'i spyi bor bum pa bzhag/ hUM/ chos dbyings rnam dag bum pa 'di// dbu yi gtsug tu bzhag nas ni// ye shes bum pa'i dbang bskur bas// snang srid ma 'gags chos sku ru// phyogs ris bral ba'i dbang thob shog/ de nas dbu rgyan bkon nas ni// rgyal ba rigs lnga'i dbang bskur bas// ye shes rnam lngar gsal ba dang // gzhan du ma btsal rang gnas pa'i// bla ma rigs lnga'i skur gyur cig/ de nas rdo rje sbyin byas te// ye shes rdo rje 'di gtad pas// ma nor ma bcos byar med pa'i// mi 'gyur brtan pa'i rdo rje yis// 'khor 'das chos rnams rgyas thob cig/ de nas dril bu sbyin byas la// stong nyid dril bu 'di sbyin pas// dngos med stong pa'i rang bzhin las// 'gags pa med pa'i rang sgra yis// chos rnams rang sar dengs par gyis// de nas bdud rtsi gtor ma dang // brda dbang byin la gsang don bstan// gnyis pa gsang ba'i dbang bskur ni// btags chos snang grags thabs yin te// rang bzhin dngos med shes rab yum// gnyis su med par rab sbyar bas// dbye bsal med par thob par gyis// gsum pa shes rab ye shes / yul la ma phye chos kyi dbyings// sems kyi ma sems chos kyi sku// chos sku chos dbyings brjod med klong // shes rab ye shes dbang bskur thob// ces gsungs so// bzhi pa rin chen tshig dbang ni// sems nyid rang dwangs rin chen de// rnam rtog mtshan ma'i tshogs las byung // chos nyid rang gsal rang dbang thob// rgyal thabs spyi blugs la bzla'i dbang // nges don rtags kyi ngo spyod bstan// spyi ti gsang ba'i dam tshig dpogs// 'gags med rtsal gyi gtor tshogs btang // zhes gsungs so// s+thi ti'i don dbang bskur ba'i le'u ste nyer lnga pa'o// // de nas rdo rje sems dpa' yis// ston pa kun tu bzang po la// dbang gi bskur tshul thob lugs zhus// ston pas 'khor la bka' bstsal pa// snying po ka dag ming med la// thob dang ma thob gnyis med de// de ltar ma rtogs gnyis su byung // dbang gi thob tshul rdzogs lugs ni// chos nyid ma bcos par gnas pas// gzhan yang gnas kyi dbang bskur thob// 'gyur med chos nyid skur gyur pas// sku yi dbang bskur chen po thob// sgra brjod med pa'i ngang gnas pas// gsung gi dbang bskur chen po thob// g.yo ba med pa'i dbyings thim pas// thugs kyi dbang bskur chen po thob// ma bskur ngang la rdzogs pa yis// sku gsung thugs kyi dbang bskur thob// dbang gi rdzogs lugs bstan pa ni// bum pa'i dbang yang sems la rdzogs// bum ni snying po 'od kyi bum// pa ni chos nyid ma 'gags pa// dbang ba skye med don la dbang // bskur ba gnyis su med par bskur// thob pa snying po chos sku thob// de phyir bum dbang sems la rdzogs// gsang ba'i dbang gi rdzogs lugs ni// gsang ba blo yi yul ma gyur// sgra bsam brjod las 'das pa yin// dbang ni brjod med don la dbang // bskur ba mtshon du med par bskur// thob ni brjod bral ngo bo thob// de phyir gsang dbang sems la rdzogs// shes rab ye shes rdzogs lugs ni// shes ni gzhi mo'i 'od las shes// rab ni ma bu gnyis ngo phrad// ye ni thog ma med pa ste// shes ni kun 'byung rang grol shes// dbang ni chos kyi sku la dbang // bskur ni dmigs dang bral bar bskur// thob ni chos nyid 'gyur med thob// rdzogs ni rang sems rang la rdzogs// rin chen tshig dbang rdzogs tshul ni// rin ni sems nyid rin po che// chen ni che ba lnga yis sbags// tshig ni brjod du med pa'i tshig/ dbang ni 'od gsal chos nyid dbang // bskur ni 'gyur med dbyings su bskur// thog ma'i sangs rgyas lnga rnams thob// de phyir tshig dbang sems la rdzogs// zhes gsungs so// dbang bzhir rdzogs tshul gyis le'u ste nyer drug pa'o// // rdo rje sems dpas yang zhus pa// dbang bzhi zil gyis gnon pa yi// rig pa'i rtsal dbang ji ltar lags// zhes gsol pa dang / ston pas 'khor la bka' bstsal pa// rig pa'i spyi blugs dbang bskur ni// pa ta spyi a ta sang ka ri/ zhes bya ste/ spyi blugs dbang gis bskur thabs kyis// chos sku cer gyis ston pa yin// snang zhing srid pas bsdus pa rnams// dgag sgrub med par dbang bskur bas// rang mdangs chos nyid gsal dag thob// gzung 'dzin gnyis snang bden gnyis rnams// dbyer med spros pa thag tshang ba'i// 'khrul snang rtsad gcod dbang bskur bas// rang sangs chen por rang dbang thob// snang srid rnam dag mkha' klong du// cir spyod chos nyid rol pa'i rgyan// chos can chos nyid ma dang phrad// ma bu dbyer med rang dbang thob// zil gnon rig pa spyi blugs dbang // dbang bzhi rgyas btab dbang gi rgyal// snang srid dbang bsgyur skye med rgya// 'gyur med ston pa dbyer med pa// bya ba kun btang dgag sgrub bral// sangs rgyas rang gi sems la dbang // snang srid rgyas 'debs 'khrul rtsa bcad// rang dbang rang thob brjod med klong // 'gyur med rang gnas dbang gi rgyal// byang chub sems kyis dbang bskur 'di// rtsol ba'i theg pa gzhan dag pas// ma byung 'byung ba ga la srid// s+thi ti'i dbang bskur gzhan las 'phags// dbang bskur rgyal po'i le'u ste nyer bdun pa'o// // de nas rdo rje sems dpa' yis// sems nyid ston pa kun bzang la// sems nyid tshwa tshwa ji ltar gdab// ces zhus pas/ de nas ston pa kun tu bzang po de chos nyid rang byung gi ting nge 'dzin la snyoms par zhugs so// de las bzhengs nas bka' bstsal pa// ye klong chos nyid dbyer med kyang // snying po'i rang bzhin g.yo med pas// yan lag rtsal gyi tshwa tshwa 'debs// 'khor rnams ma yengs gus par nyon// bya rtsol rtsol bsgrub mi dgos pa'i// chos nyid tshwa tshwa gdab pa ni// chos nyid 'gyur med sa gzhi la// thogs rdugs med pa'i 'byor rnon gyis// brgyad khri bzhi stongs brkos te// dran rtog btags zhen 'dag par brdzis// thig le snying po gcig tu dril// mnyam pa nyid du dgongs so byas// 'gyur ba med par byin gyis rlobs// thabs dang shes rab lag pa yis// thig le gcig tu 'bi 'bi byas// chos rnams chos sku gcig tu dril// chos dbyings yangs pa'i rkos phor du// rig rtsal 'gags pa med par bcug/ snang srid phyi nang gnyis med sbyar/ khams gsum 'khor ba'i spyi nas gdab// mkha' dbyings rnam bzhag dkyil 'khor nas// rtsal snang rig pa'i mchod rten byung // snying po yan lag 'dres pa yis// gzhi rtsal dbyer med mchod rten te// kun gyi stong nyid gnas su bzhag/ mkha' klong yangs pa'i khri steng du// 'gyur ba med par bzhugs su gsol// de lta'i mchod rten mtshan nyid ni// mtha' dbus med pas dbyibs zlum po// gang zag dbang po'i khyad par gyis// bang rim brtsegs ma dgu ru gnas// rgya khyon nam mkha'i mtha' dang mnyam// gzugs ni mi snang kun gyis dngos// dus gsum 'pho 'gyur med par bzhugs// mtshan nyid cir yang gzung du med// rang bzhin kun la khyab par gnas// ngo bo dmigs pa'i yul las 'das// sgra bsam brjod las 'das pa'i gdung // mtshan nyid mchod rten 'jig 'dral med par bzhugs// mtshan nyid cir yang gzung du med// rang bzhin kun la khyab par gnas// ngo bo dmigs pa'i yul las 'das// smra bsam mtshon las 'das pa'i gdung // tshwa tshwa 'debs na sems la thobs// rtsol sgrub mi dgos ngo mtshar che// tshwa tshwa mi mthun khyad par 'phags// zhes gsungs so// sems nyid tshwa tshwar bkod pa'i le'u ste nyer brgyad pa'o// // de nas rdo rje sems dpa' yis// kun bzang nyid la 'di skad zhus// sems kyi tshwa tshwa bzhugs pa'i gnas// skye med mchod rten ji ltar brtsig/ ces zhus pa dang / de nas ston pa kun tu bzang po de/ rin po che 'od mi 'gyur mi shig pa'i ting nge 'dzin la snyoms par zhugs so// de las bzhengs nas bka' bstsal pa// snying po skye med 'gyur med la// rtsal snang ma 'gags mchod rten ni/ khyab brdal chen po'i sa gzhi la// ka dag dbyings kyi thigs btab ste// 'gyur med brtan pa'i 'bri rdo btings// snang srid bsdus pa'i mchod rten brtsegs// ma lus rgyas 'debs sku gdung bzhengs// byams dang snying rjer ldan pa yis// nyon mongs brgyad khri 'dag pa brdzis// nga bdag gnyis kyis nang grogs byas/ khams gsum 'khor ba'i gdan khrir bcug/ bang rim tha ma mtshan nyid gsum// bar ma phyi rgyus gsum gyis byas// ma hA yo ga gsum pa ste// a nu yo ga bang rim bzhi// rdzogs pa chen po bum pa'i rten// spyi ti yo ga'i bum pa yi// snying po 'gyur med srog shing btsugs// ye shes bcu gnyis 'khor lo la// mkha' 'gro yangs pa'i char khebs gtibs// snying po yan lag bya ru btsugs// thabs dang shes rab nyi zlas brgyan// dbyings ni nam mkha' lta bur gnas// snang srid kun la khyab pa'i khyon// tshad ni tshogs brgyad yul ma gyur// snang ba'i yul med dmigs dang bral// dngos po mtshan ma'i spyod yul min// byis pa ma rab rtog ge'i blos// 'di ni mthong bar ga la nus// mtshan nyid mtha' yas kun dang bral// cir yang bzung du med pa'o// kha dog rin chen sna tshogs 'od// 'phro yang ngos bzung mtshon las 'das// rtsis gdab dbyer med zhal zhal byas// gzung 'dzin dri med dkar rtsis bskus// mnyam nyid dbye gsal med par gnas// zhes gsungs so// de nas rdo rje sems dpa' yis// kun tu bzang la yang zhus pa// mchod rten de yi nges tshig gang // zhes zhus pa dang / kun tu bzang pos bka' bstsal pa// snying po'i rang bzhin g.yo med la// yan lag rtsal gyi mchod rten shar// de la mchod rten zhes bya ba// mchod ni sku gsum dbyer med mchod// rten ni 'du 'bral med pa yin// mchod ni bsam du med pas mchod// rten ni blo yi yul las 'das// mchod ni skye ba med par mchod// rten ni 'gag pa med par rten// mchod ni dran pa med par mchod// rten pa yid la byar med rten// mchod ni snang zhing srid pa ste// rten ni rtsis gdab dbye gsal med// mchod ni sgrol lnga'i shes pa ste// rten ni spyod du mi 'jug go/ mchod ni phyi nang dkar dmar ste// rten ni ma chags zhen pa med// mchod ni snying po blo yangs te// rten ni chos sku 'gyur ba med// mchod ni mkha' klong sku bzhi ste// rten ni rig pa'i rtsal snang ngo // mchod ni ma 'gags rtsal snang thim// rten ni gnyis med ngang du gnas// mchod ni thig le chen po yin// rten ni spros pa mtha' dag bral// mchod ni sna tshogs rdzogs pa yin// rten ni ci yang spang ba yin// mchod ni bde ba chen po ste// rten ni sdug bsngal kun dang bral// mchod ni sna tshogs mtshan ma spangs// rten ni mi rtog ye shes rgyas// mchod ni skye med don gyi chos// rten ni 'gyur ba med pa'i sku// mchod ni gnyis snang ma lus byang // rten ni gnyis med chen por chug/ de phyir 'jig rten byang chub che// 'gyur med dbyings kyi mchod rten 'di// theg pa gzhan nas 'byung mi 'gyur// mchod rten cha mthun khyad par 'phags// zhes gsungs so// mchod rten gyi nges tshig bstan pa'i le'u ste nyer dgu pa'o// // de nas rdo rje sems dpa' yis// ston pa kun tu bzang po la// rdo rje sems dpas yang zhus pa// sbyin sreg chen po ji ltar lags// zhes zhus pa dang / de nas ston pa kun bzang des/ rin po che 'od kyis spros pa thams cad bsreg pa zhes bya ba'i ting nge 'dzin la snyoms par zhugs so// de las bzhengs nas bka' bstsal pa// snying po'i rang bzhin 'gyur med la// rtsal snang bu yis sbyin bsreg bya// skye med phrin las rnam bzhi yis// gdul bya bzhi las dgongs nas gsungs// zhi rgyas dbang dang drag po ste// s+thi ti yo ga'i sbyin sreg 'di// rdo rje #// sems dpas go bar gyis// de la zhi ba'i sbyin sreg ni// klong yangs thabs khung zlum po ru// sems can gzung 'dzin gyi bcings pa// thams cad zhi bar bya ba'i phyir// rnam par rtog pa'i mtshan ma kun// bkug la zab khung nang du bzhag/ shes rab me yis dag par sreg/ dbye sreg zhi ba'i ngang du tshig/ bsreg rdzas mchod bstod mi dgos te// sems kyi bsreg rdzas mchod bstod kyis// dug lnga rnam rtog thams cad zhi// drag po'i sbyin sreg bstan pa ni// chos dbyings e yi zab khung du// bden pa gnyis la zhen pa yi// sems can drag pos tshar gcod phyir// ye shes chen po'i me sbar ste// gnyis 'dzin gnyis med ngang du sreg/ dngos 'dzin rtsis gdab med par tshig/ mchod dang sreg rdzas bstod pa spangs// dbang ni chos dbyings zla gam du// thams cad dbang du bsdu ba'i phyir// skye rga na 'chi'i sems can dgug/ skye shi med pa'i ngang du bsgral// dgag bsgrub gnyis med don la dbang // rgyas pa'i sbyin sreg bstan pa ni// ye shes rang gsal rgyas bya'i phyir// lta sgom spyod pa 'bras bu la// zhen cing chags pa'i sems can kun// rang mdangs rin chen 'od 'bar mes// blos btags lta ba thams cad sreg/ yid bzung sgom pa thams cad sreg/ ched byas spyod pa thams cad sreg/ yid smon 'bras bu thams cad sreg/ mi blta bltar med chen por rgyas// mi bsgoms rtog med chen por rgyas// mi bcos bcos med byar med rgyas// mi bsgrub sgrub med thogs med rgyas// mchod bstod bsreg rdzas mi dgos te// sems kyi sbyin sreg khyad par 'phags// sbyin sreg gi le'u ste sum cu pa'o// // de nas ston pa kun bzang la// rdo rje sems dpas yang gsol pa// dug lnga dug gsum bsreg pa yi// thal ba ji ltar mnan par bya// zhes gsol pa dang / de nas ston pas bka' bstsal pa// snying po ma la 'gyur med kyang // chos can rtsal gyi rig pas non// rdo rje sems dpa' go bar bzung // rdzogs pa chen po'i gnyen sa ru// 'khrul pa rtsad gcod skyes bu yis// thabs dang shes rab lag pa ru// rang byung rig pa'i gtad phur bzung // chos dbyings rnam dag hom khung bru// nyon mongs chos dbyings thod par gzhug/ rnam dag rang grol re bas bskum// ye shes lnga yi tshon skud kyis// 'gyur med rgya gram mdud pa byas// nga bdag dgra bgegs dbyings su bkug/ ka dag gdeng chos g.yam pas bkag/ 'gyur med ri rgyal 'og tu mnan/ sku gsum rgyas pa'i pho brang gdab// skye ba med pa'i bro yang brdungs// e ma ho/ nga bdag gis bcings sems can kun// sngar yang ma grol da mi 'grol// de la gnod pa'i gnod chen ni// 'dre yi rtsa ba nga dang bdag/ de yi rgyab rten dug gsum ste// sdong lo brgyad khri bzhi stong rnams// skye ba med pa'i ngang du mnan// skye ba'i rig pa ma ldang zhig/ bcing ngo chos nyid dbyings su bcings// yid kyis dran rtog ma gyur cig/ bdag po 'gyur med rgya yis gdab// las kyi bag chags ma ldangs shig/ gcod do dug gsum rtsa ba gcad// sems dang dug lngar ma ldangs shig/ mnan no sku gsum 'og tu mnan// bskal pa brgyar yang ma ldangs shig/ lta ba chod de chod de mthong // phyogs med mtha' bral rgya yis gdab// sgom pa me re lhan ne zhog/ g.yo 'gul med pa'i rgya yis thobs// sbyong ba rbad de rgud de chod// bar chotshod spros bral rgya yis thobs// nyams myongs pan ne bun ner khyer// skye 'gags med par rgya yis thobs// 'bras bu 'ab se 'ubs ser thongs// sku gsum 'du 'bral med pa yi// re med rang gnas rgya yis thobs// ces gsungs so// dug gsum nga bdag mnan pa'i le'u ste so gcig pa'o// // de nas ston pa kun bzang la// rdo rje sems dpas yang zhus pa// nga bdag gnyis kyi dgra bgegs la// rang grol phur pas ji ltar gdab// ces zhus pa dang / de nas ston pa kun tu bzang po de/ snying po rin po che 'od rang byung gi ting nge 'dzin la snyoms par zhugs so// bzhengs nas 'khor la bka' bstsal pa// ye kloslong ngang la dbyer med kyang // rtsal snang bu la dgra bgegs rnams// rtsad gcod phur pa gdab thabs bshad// mi 'gyur sems kyi phur pa yis// sgrub med chos kyi dbyings su gdab// 'khor 'das dgra bgegs rtsad nas gcad// skye med ka dag phur pa yis// dngos med chos kyi dbyings su gdab// dngos po'i dgra bgegs rtsa ba gcad// dngos med zangs ka'i phur pa yis// rang byung rang mdangs dbyings su gdab// rnam rtog dgra bgegs rtsad nas gcad// re med rang gnas phur pa yis// ma btsal dbyings kyi ngang du gdab// re dogs dgra bgegs rtsad nas gcad// phur pa byang chub sems kyi rtags// byang chub sems kyi phur pa yis// srid gsum 'gro ba'i bdar sha bcad// ma btab bzhin du lhun gyis rdzogs// ma bsgrubs bzhin du ye nas grub// mnyam pa'i rgyal po rig par gnas// phur pa chos kyi dbyings kyis btab// gzhan du gdab pa'i gnas med de/ rang rig byang chub sems la gdab// phur pa 'dzin cha mya ngan 'das// gzung 'dzin rnam rtog nyid la gdab// phur pa dngos po kun dang bral// dngos med sems kyi phur pa yis// dngos po phyin ci log la gdab// gdab dang mi gdab dmigs mtha' 'das// phur pa skye ba med pa'i don// skye med sems kyi phur pa yis// sems la btab pas rig pa shar// dbyings la btab pas lhun gyis grub// gnyis su med pa gdal ba'i ngang / khyab brdal chen po'i phur pa yis// snang srid kun la khyab par gnas// de ltar rtogs na thebs pa yin// mngon du gyur na rtogs pa yin// tshig las 'das na sangs rgyas yin// grangs las 'das pas brjod du med// gcig dang gnyis su dbye ba med// ces gsungs so// rang sems phur par bkod pa'i le'u ste so gnyis pa'o// // de nas ston pa kun bzang la// rdo rje sems dpas yang zhus pa// gal te dgra bo ma sod na// mthu yis gsad thabs ji ltar lags// zhes zhus pas/ de nas sems nyid kun bzang des// rin po che 'od zer gyi dgra bo[:]kha phung du gsod pa zhes bya ba'i ting de 'dzin la snyoms par zhugs so// de las bzhengs nas bka' bstsal pa// chos nyid ma la dbyer med kyang / rtsal snang bu la dgrar gzung ba'i// rtsa ba 'gong po nga bdag yin// jo bo nyon mongs dug lnga yin// rgyab rten brgyad khri bzhi stong yin// dmag dpon log men lam mkhan dang // mi bden pa la bden 'dzin dang // mi byed lam du[:]byed mi 'jug/ de gsum mun pa'i 'khor sgo can// mi gsal mi thar mi khom dang // 'khor ba'i yul na gnas pa yis// ma rig gnyid log gzung 'dzin gos// chags sdang gnyis kyi sgrog tu bcug/ re dogs lcags 'brab khams gsum 'khyam// thar pa'i dus med 'o dod 'bod// sangs pa'i dus med mun nag gnas// rtogs pa'i dus med sems can la// bdag 'dzin pa dgrar langs pas// de lta'i dgra rnams bsad pa'i thabs// snying po chos sku'i slob dpon gyis// gcig shes kun grol slob ma btsal// ngang drangs chen po'i grub brda ston// 'gyur med dbyings kyi phur pa thobs// rang byung rang sangs drag sngags bzlas// 'gyu ba rang mdangs zor 'phangs pas// 'gong po nga bdag snying la brdegs// bdag med rang grol dbyings su bsgral// 'gyur med chos dbyings phur pa yis// jo bo dug gsum srog rtsa gcad// sku gsum rgyal ba'i klong du bsgral// rang byung chen po'i thun sngags brdegs// nyon mongs thams cad dus gcig brlags// chags zhen rtag 'dzin thams cad sangs// ma rig mi gnas klong du bsgral// dgra yi rtsa ba gcig chod pas// dgra rnams thams cad dus gcig sod// de la mthu bo che zhes bya// mthu ni snang srid thams cad de// che ba ma spangs mi gnas pa// mthu ni chos mkhan bu yin te// che ba chos nyid ma yis che// ma 'gags mi dmigs mthu bo che// rdzogs chen sems kyi mthu chen yin// zhes gsungs so// sems nyid mthur bkod pa'i le'u @#// ste so gsum pa'o// // de nas ston pa kun bzang la// rdo rje sems dpas yang zhus pa// sems kyi ser ba ji ltar dbab// zhes zhus pas/ de nas ston pa kun bzang de/ snying po rin po che'i 'od kun tu 'phro zhing chos nyid klong du bsdu ba'i ting nge 'dzin la snyoms par zhugs so// de las bzhengs nas bka' bstsal pa// chos nyid ngang la 'gyur med kyang // yan lag bu yis ser chen phobs// khams gsum 'khor ba'i sa gzhi la// nyon mongs dug lnga'i lo thog rgyas// yul sems gnyis 'dzin 'bras bur smin// ma rig zhing bzan sdug bsngal dag/ ma rtogs pa yi sems can la// rang mdangs rdo rje slob dpon gyis// phyi nang gnyis kyi thod pa ru// yul sems gzung 'dzin btsugs nas kyang // snying por rang byung sngags pa yis// zhen pa rang log phreng ba bgrang // shugs 'byung rang grol drag sngags bzlas// theg chen spyi ti'i gnyen sa ru// sku gsum 'gyur med skyed pra btsugs// mkha' klong rnam dag thod pa ru// blta bya bsgom bya spyod 'bras rnams/ khrag tu byas te bskol nas ni// lha med sgom med byar med zabs// rang byung dang drangs khro thabs sprugs// chos nyid nam mkha'i klong yangs su// longs spyod rdzogs pa'i sprin nag gtibs// 'gags med sbrul sku'i ser ba phobs// dug lnga'i lo tog gnyis 'dzin bcom// ma rig mun mtha' thal bar brlags// yul sems dgag sgrub skyo ngal mnan// nyon mongs brgyad khri'i lo thog la// de snyed chos sku'i ser chen phobs// nga bdag bden gnyis 'dzin pa la// chos sku rang sems chen por phobs// ma rig thibs po'i lo thog la// ye shes gsal ba'i ser chen phobs// ces gsungs pa'o// sems nyid ser ba phab pa'i le'u ste so bzhi pa'o// // de nas ston pa kun tu bzang po de// rin po che brda'i ting nge 'dzin la snyoms par zhugs so// de nas kun tu bzang po la// rdo rje sems dpas yang zhus pa// spyi ti'i nyams len ji ltar bstan// zhes zhus pas/ ting nge 'dzin las bzhengs nas ni// 'dus pa'i 'khor la bka' bstsal pa// pa sa a ga ya ya/ ma hA su kha ho/ s+thi ti'i man ngag brdas bstan pa// rdo rje sems dpa' yid la zungs// nam mkhar bro brdung / rim khar sos thob/ gangs dkar la mdung tshugs/ nam mkhar yul gyis/ rgya mtshor khyim gyis/ la khar dar phyor/ dbus kyi ri bo la mkhar gyis/ bar snang lus la gyon/ na bun mgo la gyon/ skar mda' sked la chings/ g.yas su nyi ma thogs/ g.yon du zla ba thogs/ sprin gyis lham gyon/ 'byung ba lnga'i g.yos gyis/ snang ba zas su zo/ srid pa lto ru tshugs/ 'ja' tshon rgyan du 'chor/ gcig sod/ gnyis spongs/ gsum brten/ gcig yul phyung / // gsum snying drongs/ gnyis ske chod/ gcig so 'dzin du bcug/ gsum gyi dgra dpung choms/ gnyis grogs su khyer/ long ma'i mig la nyi ma kho ba/ me 'bar na chus sod// sa gzhi lcags su tshugs/ rlung la mda' rgyob// dpung mkhan ngos zungs la dzag par khye/ thog mtha' gris chod/ dgra dpung choms/ rdzong du zhugs/ gnad khar srungs/ zam 'phrang sdoms/ zhes gsungs so// nyams len brdas bstan pa'i le'u ste so lnga pa'o// // de nas ston pa kun bzang la// rdo rje sems dpas yang zhus pa// theg pa gzhan la mi 'byung ba'i// 'khor ba g.yul bzlog gnad 'gags gang / zhes zhus pas/ de nas sems nyid kun tu bzang po des/ rin po che'i bskol ba med pa'i ting nge 'dzin la snyoms par zhugs so// de las bzhengs nas bka' bstsal pa// ri bsnyil me sod mtsho skom/ mdun khrod phyags mas thobs// rgan rgon sod la da phrug spos// chu bo zhon la seng ge khrid// nam mkha' gyon la sa gzhi zings// snang srid ltor tshugs rgya mtsho 'thungs// mkha' la mig ltos sprin mdzub tshugs// rgya mtsho chen po'i gting du nyol// nyi ma zla ba mig tu tshug/ rlung po gtod la mnan par bya// smig rgyu nam mkha'i dbyings su skyol// spre'u sod la dbyings su gdong / khye'u chung nam mkhar phyin pa yis// 'gro ba mi myong yoM mr-ig nas// na mo mkha'i dbyings sr-i zla gtsog gso so// kau zla'i mtshoms su shul btod nas// 'ja' tshon rnam lnga'i lam du zhugs// phyin pas 'gr-i sau mau rtid ljobs// mr-in stong gnyis su gsol gau / dgra zin gnyis kyi so mtshams su// mi 'jigs pa yi skyel ma tshol// sra ba'i go gyon rno'i mtshon thogs// bslu med grogs brten mgyogs rta zhon// 'phrang gsum nang du bsnyungs tshud la// dgra ngos bzung la zin par sod// gnad gsum nang du brtsigs la dbab// rgyal po btson du zin pa dang // dgra yi bu rnams bsad pa yis// rgyal khams cham la 'phab par 'gyur// dgra zin gnyis kyi 'khrug pa rdzogs// de nas gnad mkhar btsan po srungs// rdzong gsum nyal nas brten par nyal// so mtshams yul srungs 'phrang gsum bsdams// gal te dgra dmag dpung che bas// de yis zlog par ma gyur na// srid de gcad cing dmag dpon bsko// go cha mtshon cha nan tan bskyed// bsgom pa'i khrab chen lus la gyon// man ngag gnad kyi ske rags chings// byin rlab nus mthus khrag lag tshugs// gnyis su med pa'i rkang chas gyon// gsum 'brel 'khor gsum lus la gdags// ser bu gzhu la thabs shes mchog/ chang bzung nam mkha'i mig gcig po// gong na med pas ri bo'i brgyud// zug rngu med pa'i smyug ma la// tshad med bzhi yi sgro yis sgron// rno ngar ldan pa'i mde'u chug/ bar snang dag pa'i dong par btsa'// lta ba'i phub dang bsgom pa'i rmog/ gyon nas dmag la chas te 'gro// dmag dpon chen po skye med dang / 'gyur med 'gags med gnyis med bzhis// dpa' bo chen po bzhi btsal te// gras chod lam mkhan mngon shes can// dpa' bo chen po mthu bo che// de ltar brgyad sogs bsam las 'das// gnyis kyi 'khrug pa chen po shoms// stong ra'i nor bu rin chen la// gsal 'dun rnam gnyis ma mthun pas// dgra dmag dpung la mda' zhig 'phen// ser po'i gzhu mo gcig gi brdung // skyon brgyad bral ba'i mda' rting ste// gnyis ldan gcig dril mda' ltong sbyor// nam mkha' chen por mer gyis bkang // 'gong po lcags kyu can la brdegs// gnod sbyin med par lhan gyis shi/ rgya mtshor sor bzhag chen po'i mda'// mun nag 'khor lo'i snying la brdegs// nyi zla dag pa'i klong du shi/ bar snang dngos med rlung gis mda'// gnyis 'dzin blang dor snying la brdegs// sman dug med par rang sar shi/ dri med shel sgong chen po'i mda'// phyogs rnams 'byed pa'i snying la brdegs// bye brag med par lhan gyis shi/ mtsho gting nyi zla'i mda' 'phangs pas// lnga brgyad dgra bo'i snying la brdegs// lnga brlag brgyad bral klong du shi/ gros thag gcod pa'i mdun ldang gis// dgra dmag thams cad g.yul ngo bzlog/ rtsa ba rgan sdong mkhan rtsa ba chod// ces gsungs so// 'khor ba'i dpag dpung g.yul bzlog pa'i gdams dag bstan pa'i le'u ste so drug pa'o// // de nas ston pa kun bzang la// rdo rje sems dpas yang zhus pa// chos rnams bstan la 'bebs pa yi// s+thi ti'i brda' chos ji ltar spyod// ces zhus pa dang / kun tu bzang pos bka' bstsal pa// yul khams gcig la slob dpon gcig/ de la gces pa'i nor gcig yod// gter 'byung snod dang thob thabs gang // mi thob 'dre ngos zin song ngam// nor de sbas pa ngo shes sam// nor la phyogs med yul gcig yod// yul de gang yin ngos zin nam// nor bdag nyid gnyis ngo shes sam// nor de'i 'byung sgo gnyis shes sam// de la thob par byed thabs gsum// thob pa'i rtags la rnam pa bzhi// de dag gang yin ngo shes sam// yang kun gyi spyi yul chen po na// dbang chen gnyis la sbyi nor gcig/ de gnyis gcig gsod gcig zhog la// nor de rang gis thob par gyis// mig med mun pa'i smag rum sol// nyi zla'i mtshams su gnas 'chos la// snang ba chen po'i me long ltos// sa yi go la nam mkha'i stan// na bun zhar gyon phar snang nyol// spre'u chu gnyer lag pas zungs// @#// rlung po rkang pa'i 'og tu non// 'ja' tshon mgor tshugs ri rtsar 'dug/ chu bo khar 'thung dar gyis dril// yang / mun snang gnyis kyi so mtshams ni// ci btab skye ba'i ldum ra'i nang // thams cad yid 'ong me tog rgyas// 'bras bu rang mdangs rin po che// de la thams cad 'dod pa skyes// ma thob ma mthun gnyis su med// gnyis po 'khrug pa chen po byed/ khye'u ngang dwangs snang ba gsal// kun rig 'khrul gyi me long can/ khyod kyi so mtshams spyi sar song // skyed po gsum gnyis drug tshugs la// zangs chen gnyis su sman dug bskol// de nas rgad po rgad mo dang // phung byed bu tsha ming sring gsum// dmag dpon gsum gyis mgo drangs pa'i// grib so tsam gyis dmag 'ong gis// dug chu byin la dgra dpung choms// des ma sod na bzlog pa'i lto// gangs kyi rtser song seng ge zhon// nam mkha'i khams su mdu 'khor gyis// lhun po'i ri rtser me chen spor// rgya mtsho'i gting du mar me thogs// mun pa'i nang du nyi zla khyer// rlung po'i nang du ral gri bskor// 'chi med bdud rtsi'i bcud 'thung la// spangs la gser gyi phur pa thob// gangs la nyi ma shar du tshugs// de yis dgra dpung rtsad nas gcod// gnyen dang srid las dgra zhig med// de nas srid sde tshogs pa la// zas kyi bdud rtsi sman sbyin pas// sdug bsngal thams cad kun grol nas// bde chen chos sku'i sangs rgyas thob// kun kyang dbye bsal rtsis gdab med// dbu bsel nor bu bsags pa'i thabs// ngang drangs khye chung tshong la 'gro// chos nyid rta zhon zong bzhi khyer// sbyin pa'i rgyags phye ting 'dzin zas// sra ba'i go gyon rno mtshon thogs// 'jigs pa thub nges skyel ma tshol// chos nyid dbye zang yangs pa la// 'phrang chen bzhi bgrod la bzhi 'dzeg/ thang bzhi gcod cing la bzhi brgal// 'phrang gsum bsdams nas lam gsum 'byed// rdzong bzhir bzhugs shing lam bzhir nyal// langs pa rnam bzhir langs shing 'gro// 'gro sa bzhi bgrod pha rol na// mun snang mtshams kyi ldum ra na// rin chen dang dwangs rang mdangs la// sems nyid nor bu rin chen yod// mun nag sel ba'i nyi zla yod// 'khrul pa gcod pa'i spu gri yod// kun 'tsho'i shi gsos bdud rtsi yod// mi zad dkon pa'i gter chen yod// ngang dwangs khye'u chung der phyin pas// phyogs gcig mun pa phyogs gcig snang // mun snang gnyis kyi so mtshams na// sus kyang ma shes ma mthong zhing // sus kyang ma shes mi mngon pa// sus kyang ma rtogs mi 'gyur ba// sus kyang ma thos mi brjod pa// kun 'byung 'gyur med rin chen de/ khye'u chung dang dwangs 'od gsal lo// nor bdag rgan mo long ma la// bar bar shes rab rnam gsum btags// lung rigs gnyis kyis tshong rogs byas// blos btags lta bar rin du bcal// yid gzung bsgom par rin du bcal// tshang byas spyod par rin du bcal// yid smon 'bras bu rin du bcal// 'dod pa rin chen dam du bcal// 'dzin pa'i phung po rin du bcal// zhen pa'i mtsho mo rin du bcal// mun pa'i 'khor sgo rin du bcal// rin brgyad btsal bas nor zhig thob// gnyis su med par tshogs rdzogs nas// de nas rang gi gnas su log/ chos nyid dbyings kyi khyim du phyin// 'chi med bdud rtsi'i byon chang 'thung // ting 'dzin zas kyi ro mchog myong // bde chen gos la 'gyur med bstan// phyogs med klong du 'phrul gyis nyal// mi bya rtsol ba'i las mi bya// bya ba kun btang rang lugs bzhag/ chos nyid dbyings su gnyid log go/ brda yi man ngag don gyi gnad// rdo rje sems dpa' thugs la zhog/ ces gsungs so// 'khor 'das kyi chos rnams brdar bstan pa gtan la dbab pa'i le'u ste so bdun pa'o// // de nas ston pa kun bzang la// rdo rje sems dpas yang zhus pa// chos rnams dpe yis ji ltar mtshon// zhes zhus pa dang / de nas ston pa kun tu bzang po de/ rin po che 'od gsal ba'i ting nge 'dzin la snyoms par zhugs so// de las bzhengs nas bka' bstsal pa// 'khor rnams ma yengs gus par nyon// snying po don gyi gnas lugs de// mtshon pa'i yul du ma gyur kyang // re zhig nges pa'i sgo nas mtshon// mtsho dang bang mdzod sa gzhi gsum// kun gzhi mtshon dper shes par bya// chu dang 'khyag ram til 'bru gsum// gnas lugs mtshon pa'i dpe ru bshad// tho yor thag pa smig rgyu gsum// 'khrul pa mtshon pa'i dpe ru bshad// nyi zer spu gri shel phreng gsum// rtsal snang 'brel yod mtshon dper bshad// phug ron shel sgong ga bur gsum// snang tshul mtshon pa'i dpe ru bshad// tsan dan gla rtsi sgog pa gsum// shugs 'byung 'gags med dpe ru bshad// ral gri spu gri so dang gsum// shes rab mtshon pa'i dpe ru bshad// byis pa mdzub mo 'o ma gsum// gdams ngag mtshon pa'i dpe ru bshad// nam langs mig dang nyi ma gsum// rtogs pa mtshon pa'i dpe ru bshad// sprin dang lding rog mun pa gsum// sgrib g.yogs mtshon pa'i dpe ru bshad// lam nor dza mig grod 'jil gsum// gol sa mtshon pa'i dpe ru bshad// tsher ma mdung rtse mda' rtse gsum// rig pa mtshon pa'i dpe ru bshad// bya rgod nam mkha' khyung dang gsum// lta ba mtshon/ pa'i dpe ru bshad// me long 'ja' tshon sgron me gsum// sgom pa mtshon pa'i dpe ru bshad// bung pa glang chen smyon pa gsum// spyod pa mtshon pa'i dpe ru bshad// seng chen thog dang rbab dang gsum// phrin @/ las mtshon pa'i dpe ru bshad// na bran chu bur snying rdol gsum// nyams kyi dpe ru bshad par bya// lha khang nang gi lha tshogs dang // bum pa nang gi mar me dang // me long nang gi gzugs bcan gsum// sems nyid nang gsal dpe ru bstan// stag lpags gzigs lpags rma bya'i mdongs// sems nyid phyi gsal dpe ru bstan// shel slong gzi bkra chu dang gsum// phyi nang gnyis med dpe ru bshad// tshal nag dang nag bal nag gsum/ 'gyur ba med pa'i dpe ru bshad// rlung dang sbyin pa sprug pa gsum// nyams len mtshon pa'i dpe ru bshad// lo tog me tog rtsa kha'i zil// mi rtag mtshon pa'i dperu bshad// chu dang rtog mar 'dres pa dang // rgyal chu rlabs thim pa dang // 'da' tshon mkha' la thim pa gsum// dbyer med dpe ru shes par bya'o// dug la sngags kyis thebs pa dang // phur chus rgya mtshor byin ba dang // lan tshwa tshul thim pa gsum// phyir mi ldog pa'i dpe ru bshad// pad+ma rma bya dung dang gsum// dam tshig mtshon dper shes par bya// zla ba 'od dang skar chen gsum// ye shes dpe ru shes par bya// mi brgyad chu brgyad gzhu rgud gsum// rgun chad med pa'i dpe ru bshad// glog dang skar mda' 'phang 'phang gsum// bar de'i rtogs tshad dpe ru gsungs// gser dang ri bo rin chen gsum/ 'bras bu'i dpe ru shes par bya// chos nyid don gyi gnas lugs la// 'dra bzhi yod pas dpe ru mtshon// dngos gzhi med pas dmigs su med// skye med bsam 'das 'gyur med yin// mtshon du med pas dpe las 'das// re shig mtshon nas go phyir bstan// don gyi ngo bo brjod las 'das// zhes gsungs so// chos thams cad dpes mtshon nas bstan pa'i le'u ste so brgyad pa'o// // de nas rdo rje sems dpa' yis// kun tu bzang la yang zhus pa// chos sku mda' yi ngo sprod gang // zhes zhus pas/ de nas ston pa kun bzang des/ snying po ma bu dbyer med gdeng zin gyis ting nge 'dzin la snyoms par zhugs so// de las bzhengs nas bka' bstsal pa// snying po ma yi rang bzhin g.yos pa la// yan lag bu yis ma rtogs yul la 'jug/ de la chos sku brda yi ngo sprod bstan// rdo rje sems dpas gus par yid la zungs// 'gyur med / ngo sprod rnam gsum ste// gnas lugs 'gyur med ngo spyod dang // snang tshul ma nges ngo sprod dang // gnyis su med pa'i ngo sprod do// dang po gnas lugs bstan pa ni// rgyu rkyen skye 'jig dang bral bas// ngo bo 'gyur ba med pa la// rang bzhin dmigs su med pa ste// rin chen 'od 'bar gzhal yas na// gzugs med kun khyab sku gcig bzhugs// ming ni skye med brjod dang bral// kun snang rang sems 'bar zhes bya// de nyid rang la ngo sprad pa// chos sgra'i klong du thim pa la// 'gyur ba med par rgyu yis thobs// snang tshul ma nges don bstan pa// cir gyis snang ba'i dus nyid na// chos dbyings sdang gsal me long na// sor bzhag dbyer med dang dngas pa// rang byung rang brlag sku gcig bzhugs// ming ni gnyis med rang grol 'bar// de nyid rang la ngo sprad pa// phyi nang yul sems bzang du med// rang sangs rang mdangs gnyis med pa// dbye bsal rtsis med rgya yis thobs/ gnas lugs snang tshul gnyis med ni// 'phro 'du med pa'i rin po che// 'od gsal chen po'i khang pa na// 'phel 'grib med pa'i sku gcig bzhugs// ming ni 'dzin bral spros gcod bral// de nyid rang la ngo spyod pa// yul sems gnyis med snang stong med// phyi nang gnyis med dgag sgrub med// sgo lnga'i yul med chags zhen med// bdag gzhan gnyis med phyogs ris med// snang sems gnyis med phyogs ris med// snang sems gnyis med gzung 'dzin med// yid rig sems med 'gyur ba med// med pa ma yin stong zhing snang // yod pa ma yin snang zhing stong // gnyis ka ma yin dbye bsal med// gcig pa ma yin mtshon brjod 'das// rang byung rang brlag 'dzin zhen grol// chags sangs dang drangs rgya yis thobs// de gsum dril bas gcig tu 'dus// chos sku nyag gcig ngo sprod ni// snying po 'od kyi dkyil 'khor can// 'od mtha' med pa'i gzhal yas na// snying po dmigs med brjod dang bral// dri med rnam dag chos sku bzhugs// de nyid rang la ngo sprad thabs// dpe dang don dang gtan tshigs so// dpe ni 'di ltar shes par bya'o// rgya mtsho chu bran dbyer mi phyed// lan tshwa chur thim dbyer mi phyed// chu dang shel sgong me long nang // gzugs kyi bye brag ci shar yang // rang las gzhan du bskol ba med// phyi nang yul sems gzung 'dzin med// dbyer med dpe gsum dkyil 'khor na// gcig dang tha dad dag grol ba'i// mi gnyis gcig te nam mkha'i ngang // lhun grub gting gsal dbyings na gnas// don ni 'di ltar shes par bya// kun gzhi'i klong du snang srid thim// gzhi yi klong du rtsal snang thim// snying po'i klong du chos can thim// chos nyid klong du mtshan nyid thim// chos nyid byang sems klong dkyil du// blo yi spros pa ji snyed thim// thim dus ngos bzung rtsis gdab med// skye byed rig pa skye med thim// dbyer med gcig 'dres tha mi dad// gnyis med gcig ste nam mkha'i ngang // gcig dang tha dad dag las grol// snying po chos sku thig le gcig/ brjod med klong thim rgya yis thim// de yang ngo sprod gdams ngag ni// spang bya spong byed gnyis med kyang // ma rtogs blo la mtshon pa'i phyir// brjod bya thams cad brjod med dbyings su spangs// mtshon bya thams cad mtshon med ngang du spangs// ming 'dogs thams cad ming med ngang du bskrad// 'dod pa thams cad chags zhen med par sprad// gzung 'dzin thams cad 'dzin med ngang du bskrad// yul sems dgag sgrub gnyis med ngang du bskrad// rnam rtog bdag 'dzin rang brlag ngang du bskrad// 'khrul ba'i sdug bsngal rang sangs ngang du bskrad// shes dran btags tshad brjod med dbyings su bskrad// cir snang dngos med snying po'i klong du bskrad// stong nyid klong du shes rig sems thims pas// dbyer med gzir bas 'gyur med chos skur gnas// gtan tshigs ngo sprad 'di lta ste// gsal stong gnyis med dbyer mi phyed// snying po yan lag thim dbyer med// chos sku zer thim dbyer mi phyed// gzhi la rtsal thim dbyer mi phyed// chos dang chos nyid 'dres dbyer med// snang sems 'dres par dbyer mi phyed// blo dngos 'dres pas dbyer mi phyed// ma rig gsal stong dbyer mi phyed// dug gsum sku gsum dbyer mi phyed// dug lnga sku lnga dbyer mi phyed/ khyab brdal 'ub chub dbyer mi phyed// yid gnyis rang brlag dbyer mi phyed// sgo lnga rtogs med don mi phyed// rig stong gnyis med dbyer mi phyed// thams cad dbyer med ma dang phrad// mi 'gyur mi shig rang sa zin// rnam rtog 'khrul pa rang sar dngas// 'gyur med gnas thebs klong nas shar// skye med klong na chos sgra bzhugs// mi shigs rdo rje'i brag pas sra// stong pa kun gzhi snying po'i chos nyid du// rig skyes snang sems / btags zhen kun khyab brdal// kun gzhi'i klong du 'ub chub chen por bskrad// rtsis gdab dbye bsal gnyis med gzer gyis gdab// ces gsungs so// ngo sprod don gyi le'u ste so dgu pa'o// // nas ston pa kun tu bzang po la// rdo rje sems dpas yang zhus pa// rang sems bla mar bkod pa yis// gdams ngag bshad tshul ji ltar lags// zhes zhus pas/ kun tu bzang pos bka' bstsal pa// srang po'i rang bzhin 'gyur med kyang // yan lag rig pa'i bla ma bshad// rdo rje sems dpas yid la grangs// rang sems bla ma dgu yod de// ye thog gzhi yi bla ma dang // ye klong kun khyab bla ma dang // thog khyab gnyis med bla ma gsum// thog ma gzhi yi bla ma dang // ma 'gags rtsal gyi bla ma dang // gzhi rtsal gnyis med bla ma dang // kun gzhi yongs su bla ma dang // zer rigs ma 'gags bla ma dang // kun rig gnyis med bla ma gsum// ye rtogs gzhi yi bla ma des// tshogs brgyad yul du ma gyur pa'i// dmigs dang bral ba'i chos rnams bstan// ye klong kun khyab bla ma des// 'byed pa med pa'i chos rnams la// thog khyab gnyis med bla ma des// ma phye ma skol chos rnams bstan// thog ma gzhi yi bla ma des// snying po 'gyur med chos rnams bstan// ma 'gags rtsal gyi bla ma des// skye 'gags med pa'i chos rnams bstan// gzhi rtsal gnyis med bla ma des// rtsis gdab med pa'i chos rnams bstan// kun gzhi'i spyi khyab bla ma des// kun gzhi'i 'byung gnas yum du bstan// zer mig ma 'gags bla ma des// rgya chad phyogs med chos rnams bstan// kun rig gnyis med bla ma des// gzhi la rtsal thim dbyer med bstan// skye med sems kyi bla ma dgu// snying po rtsal snang gnyis med la// yan lag rim pa dgu ru bstan// sems nyid gzhi yi bla ma'o// snang tshul zer gyi bla ma la// ma hA gu rus drug tu gsungs// yid rig 'gyu med bla ma dang // ma bcangs sems kyi bla ma dang // skye med don gyi bla ma dang / khyab gdal chen po'i bla ma dang // 'bras bu sems kyi bla ma dang // brda' don spyod pa'i bla ma'o// yid rig 'gyu med bla ma des// skye med chos sku'i ngo bo bstan// ma bcos sems kyi bla ma des// longs spyod rdzogs sku'i ngo bo bstan// skye med don gyi bla ma des// sgra bsam brjod las 'das pa yi// sna tshogs gnyis med sbrul sku bstan/ khyab brdal chen po'i bla ma des// snang srid dbye bsal med pa yi// dbyer med ngo bo nyid du bstan// 'bras bu sems nyid bla ma des// mtha' dbus med pa'i klong chen du// 'bras bu thams cad gcig tu bsdus// snying po 'gyur med klong du thim// skye shi med par rgyu yis thobs// 'pho 'gyur med par gtod la gnon// skusgra bzhi dbyer med 'bras bu yang // mi bya bya btsal kun las 'das// brjod med bde chen dbyings su thim// brda' don ngo sprod bla ma ni// zos bsam sgom la blo sbyangs pa'i// ma rig mun sel sgron me des/ tshig gis yang dag don mtshon nas// re med rang la gnas pa yi// sangs rgyas 'bras bu ston par byed// ma hA gu ru rnam pa drug/ sangs rgyas las kyang mnyam pa yin// de yang ci yi phyir zhe na// bskal pa stong gi sangs rgyas kyang // bla ma dag la brten pas rgyas// de phyir ma hA gu ru rnams// snying dang mig bzhin bkur bar gyis// phyi yi bla ma bstan pa yis// nang gi bla ma gsal bar 'gyur// zhes gsungs so// snang srid kha sbyor bdud rtsi'i bcud zigs/ 'khor ba thog mtha' gcod pa'i rgyud las/ rang sems bla mar bstan pa'i le'u ste bzhi bcu pa'o// // rdzogs so// // slob dpon chen po pad+ma 'byung gnas dang lo sna ba dpal brtsegs kyis bskur nas mnga' bdag khri srong la gdams nas gter du sbas pa nyang gis bton pa'o// dge'o// sarba mang+ga laM/ sa