| e-texts navigator |
| Wylie |
318a1 སུ་ཡི་རང་ཞིང་ཡོངས་སུ་འཛིན་པར་སྨོན་ཏོ་ཞེས་བསྔགས་པ་བརྗོད་པར་གྱུར་ཏོ།། དེ་ནས་འཁོར་མང་པོ་ཐམས་ཅད་དགའ་མགུ་ཡི་རངས་པར་གྱུར་ཏེ། བཅོམ་ལྡན་འདས
318a2 ལ་ལན་གསུམ་བསྐོར་བ་བྱས་ནས་ཕྱག་བྱས་ཏེ་གྱེས་པར་གྱུར་ཏོ།། འཕགས་པ་སྤྱན་རས་གཟིགས་དབང་ཕྱུག་ཞལ་བཅུ་གཅིག་པ་ཞེས་བྱ་བའི་གཟུངས་རྫོགས་སོ།།
318a3 ཞུ་ཆེན་གྱི་ལོ་ཙ་བ་བཅོམ་ལྡན་འདས་ཀྱི་རིང་ལུགས་པ་བན་དྷེ་ཆོས་གྲུབ་ཀྱིས་རྒྱའི་དཔེ་ལས་བསྒྱུར་ཅིང་ཞུས་ཏེ་གཏན་ལ་ཕབ་པ།། བྱང་ཆུབ་སེམ།
318a4 དཔའ་འཕགས་པ་སྤྱན་རས་གཟིགས་དབང་ཕྱུག་ལག་པ་སྟོང་དང་མིག་སྟོང་དང་ལྡན་པའི་ཆོ་ག་ཞིབ་མོ།། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།། འདི་སྐད་བདག་གིས་ཐོས
318a5 པདུས་གཅིག་ན། བཅོམ་ལྡན་འདས་ཤཱཀྱ་ཐུབ་པ་རི་གྲུ་འཛིན་ན། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གི་གནས་ན་རིན་པོ་ཆེ་བཀོད་པའི་འཁོར་གྱི་ཁྱམས་ན་བཞུགས
318a6 ཤིང་། བཅོམ་ལྡན་འདས་རིན་པོ་ཆེའི་སེང་གེའི་ཁྲི་ལ་བཞུགས་ཏེ། ཁྲི་དེ་ནི་རིན་པོ་ཆེའི་མཆོག་སྣ་ཚོགས་དུ་མས་སྤྲས་པ། རིན་པོ་ཆེ་སྣ་བདུན་གྱི་རྒྱལ་མཚན་རྣམས་ཀྱིས་ཡོངས་སུ་བརྩེགས་པ
318a7 ལྷའི་བ་དན་སྦྱངས་པ་སྟེ། དེའི་ཚེ་སངས་རྒྱས་བཅོམ་ལྡན་འདས་སེང་གེའི་ཁྲི་དེ་ཉིད་ལ་བཞུགས་ནས་འདི་སྙམ་དགོངས་ཏེ། ངས་བྱང་ཆུབ་སེམས་དཔའ་ཐམས་ཅད་འཛིན་པའི་གཟུངས་བཤད་གོར་མ་ཆག
iiif viewer powered by OpenSeadragon
