| e-texts navigator |
| Wylie |
165b1 འདས་རྣམ་པ་གསུམ་པ་ཡིན་ཞེ་ན། བདག་ནི་དུས་གསུམ་མཐའ་ཡས་ཕྱིར།། ང་ནི་སྲིད་གསུམ་གདུལ་བྱའི་ཕྱིར།། གསུམ་མཆོག་འཇིག་རྟེན་གསུམ་ཀུན་ཕྱིར།། འཇིག་རྟེན་གསུམ་པ
165b2 ཁམས་གསུམ་ང་།། དེ་ལ་ཇི་ལྟར་བཅོམ་ལྡན་འདས་ཐམས་ཅད་ཉིད་ཡིན་ཞེ་ན། ང་ནི་བརྟན་པ་ཐམས་ཅད་བདེ།། བསོད་ནམས་ཀུན་མཆོག་ཆེ་བའི་ཕྱིར།། གཡོ་བ་སེམས་ཀྱིས་འདུས
165b3 བྱས་ཕྱིར།། སྒྱུ་མ་ཐམས་ཅད་ང་ཡིན་ནོ།། ཞེས་བྱ་བ་རང་གི་ལས་ཀྱི་བྱ་བའི་དེ་ཁོ་ན་ཉིད་རྡོ་རྗེ་སེམས་དཔས་གསུངས་སོ།། དེ་ལ་ཇི་ལྟར་དང་པོའི་གླུ་བྱུང་བ་ཤེས་པ་ཡིན་ཞེ་ན། སྲིད་པ
165b4 ཤིན་ཏུ་གྲུབ་པ་ཡི།། དབང་ཕྱུག་ཆེན་པོ་མཆོག་གྲུབ་ཕྱིར།། གཟི་ཅན་སེམས་ཅན་དོན་མཛད་ཕྱིར།། བསྐལ་པ་ཐོག་མར་བཅོམ་ལྡན་འདས་ཀྱིས་གསུངས།། དེ་ནས་དེ་གང་ཡིན་ཞེ
165b5 ནའདོད་ཆགས་ཆེན་པོ་བཅོམ་ལྡན་འདས།། རབ་ཏུ་དགའ་བ་མི་འགྱུར་མཆོག། གསང་བའི་ཕྱིར་ནི་སྙིང་པོ་བརྗོད།། ཡི་གེ་ཧཱུཾ་ནི་མི་འགྱུར་མཆོག། དེ་ནས་ཉེ་བའི་སྙིང་པོ་ཡི།།
165b6 དེ་ཁོ་ན་ཉིད་ཤེས་པ་ནི།། དེ་ཉིད་གསང་ཞིང་གསང་བ་དང་།། སྙིང་པོ་རབ་ཏུ་བརྗོད་པར་བྱ།། སྙིང་པོའི་རྗེས་སུ་སྒྲུབ་པར་འགྲུབ།། ཉེ་བའི་སྙིང་པོ་ཉིད་དུ་བརྗོད།། དེ་ལ་ཇི་ལྟར་བདེ
165b7 བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་གི་བཤད་པའི་རྒྱུད་ཡིན་ཞེ་ན། དངོས་གྲུབ་ཀུན་གྱི་མི་འགྱུར་བདེ།། བདེ་བ་ཆེན་པོ་ཞེས་བརྗོད་དོ།། རྡོ་རྗེ་དེ་ཉིད་དོན་ཡོད་གྲུབ།། དམ་ཚིག་འདའ
iiif viewer powered by OpenSeadragon
