| e-texts navigator |
| Wylie |
83a1 དེ་བཞིན་དུ་ངའི་ཆོས་བསྟན་པ་རྣམ་པ་སྣ་ཚོགས་གསང་བ། ཐར་པའི་གྲོང་ཁྱེར་གྱི་བདུད་རྩིའི་ཟས་ཀྱང་དེ་དང་འདྲ་བར་བལྟ་བར་བྱའོ།། སེམས་ཅན་ཐམས་ཅད་དང་ངའི་སྲས
83a2 དགེ་སློང་ཐམས་ཅད་ལ་དམ་པའི་ཆོས་མང་པོ་བརྟན་པོར་བཞག་གོ།། གཞན་ཡང་སེམས་ཅན་ཐམས་ཅད་ལ་ཕན་པའི་ཕྱིར། དེ་བཞིན་གཤེགས་པའི་ཡོན་ཏན་ཆེ་བ་ཉིད་བསྒྲགས་ཏེ། ཡི་གེ་འབྲུ་གཅིག་པའི
83a3 ཐིག་ལེའི་གཏམ་ཡང་བཞག་ནས། ཡོངས་སུ་མྱ་ངན་ལས་འདའ་བར་བྱའོ།། དེ་ནས་དགེ་སློང་དེ་དག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདའའོ་ཞེས་ཐོས་ནས། མི
83a4 དགའ་བར་གྱུར་ཏེ།། སྐྱི་བུང་ཞེས་བྱས་ནས། མིག་མཆི་མས་གང་བཞིན་དུ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་མང་དུ་བསྐོར་བ་བྱས་ནས། བཅོམ་ལྡན
83a5 འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་ཀྱིས་སྡུག་བསྔལ་བ་དང་། མི་རྟག་པ་དང་། བདག་མེད་པ་དང་། རྗེས་ཐམས་ཅད་ཀྱི་ནང་ན་གླང་པོ་ཆེའི་རྗེས་ཆེས་མཆོག་ཡིན་པར་བརྟན་ཏོ་ཞེས
83a6 གསུངས་ཏེ། དེ་ལྟར་མི་རྟག་པའི་འདུ་ཤེས་བསྟེན་ཅིང་བསྒོམས་ཏེ་མང་དུ་བགྱིས་པས། འདོད་པའི་འདོད་ཆགས་ཐམས་ཅད་ཟད་པར་འགྱུར། གཟུགས་ཀྱི་འདོད་ཆགས་ཐམས་ཅད་ཟད་པར་འགྱུར།
83a7 གཟུགས་མེད་པའི་འདོད་ཆགས་ཐམས་ཅད་ཟད་པར་འགྱུར། མ་རིག་པ་ཐམས་ཅད་ཟད་པར་འགྱུར། ལྷག་པའི་ང་རྒྱལ་ཐམས་ཅད་མ་ལུས་པར་ཡང་དག་པར་ཆད་པར་འགྱུར་ལགས་སོ།།
iiif viewer powered by OpenSeadragon
