| e-texts navigator |
| Wylie |
108a1 སྤོས་ལྔ་ནི་ཙན་དན་དང་། ཨ་ཀ་རུ་དང་། དུ་རུ་ཀ་དང་། ག་པུར་དང་། བུ་ཤེལ་ཅི་གཞུག་པར་བྱའོ།། ནས་དང་། གྲོ་དང་། སྲན་མ་དང་། འབྲས་དང་། ཏིལ་མར་གཞུག་པར
108a2 བྱའོ། ། བུ་རམ་དང་། སྦྲང་རྩི་དང་། མར་དང་། ལན་ཚྭ་དང་། ཏིལ་གཞུག་པར་བྱའོ། གཙང་མའི་རས་ཁ་ཚར་མ་ཉམས་པས་དཀྲིས་ཏེ་དབུས་སུ་གཞག་གོ། གང་བའི་བུམ་པ་བཞི་གཞག་པར་བྱའོ།།
108a3 པོག་པོར་བཞི་དང་། མེ་ཏོག་ལ་སོགས་པ་བཞིའང་གཞག་པར་བྱའོ།། དེ་ལྟར་རྫོགས་པས་འདི་བསམ་གཏན་དུ་བྱའོ།། ཡི་གེ་ཏཾ་ལས་བྱུང་བའི་བརྩོན་འགྲུས་དང་ལྡན་པའི་ཡུམ་སྒྲོལ་མ
108a4 དཔའ་མོ་རྣལ་འབྱོར་མའི་ལུས་སུ་བསྒོམ་པ་ནི། པདྨ་རྒྱས་པ་ལས་བྱུང་ཞིང་ཟླ་བ་རྒྱས་པ་ལ་བཞུགས་པ། སྐུ་མདོག་སྟོན་ཀའི་ཟླ་བ་ལྟར་དཀར་བ། གཞོན་ནུ་ལང་ཚོ་ལ་བབ་པ་ལྟ་བུའི་སྐུ།
108a5 དོ་ཤལ་དང་དཔུང་རྒྱན་རིན་པོ་ཆེའི་ཆུན་འཕྱང་ལ་སོགས་པས་མཛེས་པར་བརྒྱན་པ། པཉྩ་ལི་ཀའི་གོས་ཀྱིས་སྨད་དཀྲིས་པ། ཀ་ཤི་ཀའི་རས་ཀྱིས་སྟོད་གཡོགས་པ། སྐྱིལ་ཀྲུང་ཕྱེད་པ་དང
108a6 བཅས་པ། ཞལ་གཅིག་ཕྱག་གཉིས་པ། ཞལ་འཛུམ་ཞིང་སྤྱན་འཁྲུག་པ། ཕྱག་གཡས་པ་མཆོག་སྦྱིན་མཛད་པ། གཡོན་པ་ཨུཏྤལ་སྡོང་བུ་དང་བཅས་པ་འཛིན་པ། སྐུ་ལ་འོད་ཟེར་འཕྲོ
108a7 ཞིང་པདྨ་དཀར་པོ་གེ་སར་དང་བཅས་པའི་དཀྱིལ་ན་བདུད་རྩིའི་རྒྱུན་སྐུ་ལས་འོད་ཟེར་འཕྲོ་བ་ཅན་དུ་བྱང་ཆུབ་སེམས་དཔའ་དཔག་ཏུ་མེད་པ་དང་བཅས་པ་བསམས་ཏེ་བཟླས་པར་བྱའོ། །
iiif viewer powered by OpenSeadragon
