| e-texts navigator |
| Wylie |
283a1 ངག་བསྒྲགས། ། སྣང་ཞིང་སྲིད་པའི་ཆོས་རྣམས་ཀུན།། བསྡུས་ཕྱིར་བསགས་པའི་སྐུ་དམ་པ།། རྟོག་བྲལ་རྒྱུད་དུ་སིམ་གནས་པ།། འབྱུང་ཕྱིར་སྙིང་པོ་ཞེས་སུ་བསྒྲགས།
283a2 དག་དང་མ་དག་ཐམས་ཅད་ལ།། འཁོར་བ་ཇི་སྲིད་པར་སྣང་བ།། གཉིས་ཀ་མཛེས་པར་བྱེད་པས་ན།། རྒྱུན་དུ་ཡང་དག་བསྒྲགས་པ་ཡིན།། དཔལ་དང་རྡོ་རྗེ་སྙིང་པོ་དང་།། རྒྱན་ཅེས་བྱ་བ་བཞི་པོ་ནི།། འབྲེལ
283a3 ཅིང་གྲུབ་པར་བྱེད་པའི་ཕྱིར། ། རྒྱུད་ཅེས་བྱ་བར་བཤད་པའོ།། ཆོས་ཀྱི་ཕུང་པོ་བརྒྱད་ཁྲི་དང་།། བཞི་སྟོང་གི་ནི་གྲངས་སྙེད་ཀྱི།། མཚན་གྱི་དོན་ནི་འདི་དོན་དུ།། ཡང་དག་འདུས་པར་ངས་བཤད་དོ།།
283a4 གཞན་དུ་དོན་ནི་མ་བསྒྲགས་པ།། བླ་མ་ལ་ནི་གུས་པ་ཡི།། སློབ་མ་ལ་ནི་མ་རྟོགས་པའི།། རྒྱུད་གཞན་དག་ཏུ་སྦས་པའོ།། དོན་འདི་ཡང་དག་མ་ཤེས་ན།། ཇི་སྙེད་དོན་ནི་བསམ་ཡས་པ། ཤེས་ཀྱང་དེ་ཡི
283a5 འབྲས་བུ་མེད། ། དེ་འདོད་མཉེས་བྱས་ཡང་དག་བླང་།། དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས། ཡེ་ཤེས་གསུམ་གྱི་མཚན་འབྱུང་བ་ཞེས་བྱ་བའི་ལེའུ་སྟེ་དགུ་པའོ།། །། རྟག་པར
283a6 མི་ཕྱོགས་སྨྲ་བ་དང་། ། བླ་མ་སྨོད་བྱེད་བརྩོན་པ་ལ།། དམ་ཚིག་ཕྱིར་ནི་ཡོངས་བསྒྲལ་བྱ།། དེ་ཡི་ཤ་ཁྲག་ཀླད་པ་རྣམས།། དྲངས་ཏེ་ཚོགས་ཀྱི་སྟོན་མོ་བྱ།། དེ་ལྟར་མ་བྱས་སྡུག་བསྔལ་ཚོགས།། གཏི་མུག
283a7 ཅན་དེས་ཐོབ་པར་འགྱུར། ། ནད་ཐམས་ཅད་དང་ཁྲོས་ཆེན་དང་།། འཇིགས་དང་ཉེ་བར་འཚེ་བ་ཡི།། བསྐལ་པ་གྲངས་མེད་བྱེ་བ་རུ།། སྡུག་བསྔལ་ཆེན་པོ་རབ་རྙེད་ཅིང་།། འི་དོད་འབོད་པས་སྦྲུལ་གྱིས་བརྒྱན།།
iiif viewer powered by OpenSeadragon
