| e-texts navigator |
| Wylie |
252b1 སུ་གྲགས། ། ཀོ་ས་ལ་ནི་ལྟེ་བར་ཤེས།། ཏྲི་ས་ཀུ་ནེ་རྣ་བའི་རྩ།། ཁ་ཡི་པདྨ་ཀ་ལིང་ཀ། མགྲིན་པ་ལཾ་པ་ཀར་ནི་བརྗོད།། སྙིང་ནི་ཀཱན་ཅིར་ཤེས་པར་བྱ།། ཧི་མ་ལ་ཡ་མདོམས་སུ་ཤེས།། མཚན་མ་གྲྀ་ཧ་དེ་བ་དང་།། པྲེ་ཏ
252b2 པུ་རི་བཤང་བའི་ལམ། ། བརླ་གཉིས་སུ་ཝརྞྞ་དྭཱི་པ།། སཽ་རཥྚ་ནི་བྱིན་པ་གཉིས།། རྐང་པའི་བོལ་ནི་སིན་དུའི་ཡུལ།། སོར་མོ་རྣམས་ལ་ན་ག་ར།། མཐེ་བོང་གཉིས་ནི་མ་རུར་ཤེས།། ཀུ་ལུ་ཏཱ་ནི་རྐང་པའི་མཐིལ།།
252b3 དེ་ལྟར་གནས་ཀྱི་རྣམ་དག་དང་།། ས་བཅུ་རྣམ་པར་དག་པ་ཉིད།། དེ་ཉིད་དང་ལྡན་ཤེས་པར་བྱ།། ཐིམ་དང་ལོངས་སྤྱོད་བདག་པོ་ཉིད།། འཇུག་པ་ལ་སོགས་བྱེ་བྲག་གིས།། རིམ་གྱིས་རྡོ་རྗེ་སེམས་དཔའ
252b4 ཉིད། ། དེ་ནས་གཞན་ཡང་རབ་བཤད་པ།། རླུང་རྣམས་ཀྱི་ནི་མཚན་ཉིད་མཆོག། སྲོག་གི་རླུང་ནི་སྙིང་ཁར་གནས།། མི་བསྐྱོད་བྱེ་བྲག་རིགས་ལས་སྐྱེས།། མདོམས་ན་གནས་པའི་ཐུར་སེལ་ནི།། རིན་ཆེན
252b5 འབྱུང་ལྡན་བྱེ་བྲག་སྐྱེས། ། སྟོད་དུ་རྒྱུས་པ་ལྐོག་མཐར་གནས།། འོད་དཔག་མེད་པའི་རང་བཞིན་ནོ།། མེ་དང་མཉམ་གནས་ལྟེ་བར་གནས།། དོན་ཡོད་གྲུབ་པའི་རང་བཞིན་ནོ།། ཁྱབ་བྱེད་ཡན་ལག་ཀུན་ལ་གནས།།
252b6 རྣམ་སྣང་མཛད་ཀྱིས་བྱིན་གྱིས་བརླབས།། དབང་པོའི་སྒོ་ཡི་རྒྱུན་ལས་ནི།། སྲོག་དང་རྩོལ་བ་རྒྱུན་འདི་དང་།། དུས་ཀུན་ཏུ་ནི་རྒྱུ་བ་ནི།། སྲོག་ཅེས་བྱ་བ་ཡིན་པར་བཤད།། སྲོག་དང་རླུང་དང་ཕྱི་ས་དང་།། དེ་བཞིན
252b7 དུ་ནི་ཁུ་བ་སོགས། ། འོག་འདྲེན་འདི་ནི་ཐུར་སེལ་རླུང་།། རྟག་ཏུ་རྣལ་འབྱོར་པས་ཤེས་བྱ།། རྒོད་དང་ཟ་དང་བལྡག་པ་དང་།། ཀུན་ཏུ་འཐུང་དང་འཇིབ་པ་དང་།། གང་ཞིག་རྟག་ཏུ་མཉམ་གནས་དང་།
iiif viewer powered by OpenSeadragon
