| e-texts navigator |
| Wylie |
18b1 ཡི་གེ་ལྕེ་ཡིས་ཡོངས་བསྒྱུར་བའོ།། ཀ་ཚན་དུད་པ་ལས་བྱུང་ཉིད།། ཙ་ཚན་དཀར་པོ་ཡང་དག་མཚུངས།། ཊ་ཚན་དུང་ལས་ཡང་དག་འབྱུང་།། པདྨ་ཉིད་ལས་ཏ་ཡི་ཚོགས།། དབྱངས་བཞི་ཡི་ནི་འདུ་ཤེས་སུ།།
18b2 སོ་སོར་དབྱངས་ནི་འཆང་བའོ།། ཡི་གེ་གཉིས་ལས་ཀུན་འབྱུང་བ།། དབྱངས་ཀྱིས་ཡི་གེ་དམན་པ་ཉིད།། ཁ་དོག་མེད་ཅིང་ཁ་དོག་འབྱུང་།། གཟུགས་མེད་གཟུགས་ཀྱི་ངོ་བོ་ཉིད།། རིང་བ་མ་ཡིན་ཐུང
18b3 བ་མིན། ། རིག་པ་དང་ནི་རིག་མིན་ཉིད།། སྟོང་མིན་སྟོང་པའི་ཡང་དག་དངོས།། གང་གི་ཡེ་ཤེས་མཁས་པའོ།། གཟུགས་དང་སྟོང་པ་དེ་བཞིན་དབུས།། བློ་དང་ལྡན་པས་གཟུང་བར་བྱ།། སྲོག་གི་ཡི་གེར
18b4 ལྷན་ཅིག་པས། ། ཇི་ལྟར་གཟུགས་དོན་མཛེས་པ་དང་།། ཡིད་འོང་འོད་ཟེར་ཡི་གེ་ནི།། དུས་ལས་འདས་པ་ཕྱག་འཚལ་འདུད།། སྟོང་པ་དང་ནི་པདྨ་རྒྱལ།། པདྨ་དཀར་པོའི་ཡི་གེ་ནི།། དེ་བཞིན་གང
18b5 ཤེས་རྣལ་འབྱོར་པ། ། སྦྱོར་བའི་གདན་གྱི་མིང་ཉིད་ཡིན།། སྟོང་པས་ལུས་ནི་སྦྱར་བྱས་ལ།། སྟོང་པ་ཉིད་དུ་ལྷན་ཅིག་བསྐྲུན།། ས་བོན་བསྐྲུན་པ་ཙམ་གྱིས་ནི།། ཡི་གེའི་མཚན་ཉིད་ལྷན་ཅིག་གོ།། རབ
18b6 ཏུ་བྱེད་པ་ཞེས་བྱ་བའི་ལེའུ་གསུམ་པ་རྫོགས་སོ། ། ། བརྫུན་གྱི་ཚིག་ནི་མི་སྨྲ་སྟེ།། བརྫུན་དུ་སྨྲ་བར་རབ་སྒོམས་པས།། བསླབ་པ་ཐམས་ཅད་རྣམ་པར་མནན།། ཉེས་པ་ཐམས
18b7 ཅད་ཀུན་གྱི་གནས། ། ཆགས་པའི་ཐེག་པའི་རང་བཞིན་གྱིས།། འཁོར་བའི་ཕུར་པ་ལས་རབ་བཏགས།། མི་གཙང་བུམ་པའི་མར་ལྟ་བུ།། ཐམས་ཅད་དུ་ནི་རྟག་ཏུ་སྤང་།། ལུས་ཀྱི་རྣམ་པ་གསུམ་ཉིད
iiif viewer powered by OpenSeadragon
