| e-texts navigator |
| Wylie |
13a1 དཔལ་ཉི་མའི་འཁོར་ལོའི་རྒྱུད་ཀྱི་རྒྱལ་པོ་རྫོགས་སོ།། ། རྒྱ་གར་གྱི་མཁན་པོ་ག་ཡ་དྷ་ར་དང་། ལོ་ཙབ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་ཅིང
13a2 ཞུས་ཏེ་གཏན་ལ་ཕབ་པའོ། ། རྒྱ་གར་སྐད་དུ། ཤྲཱི་ཛྙཱ་ན་རཱ་ཛ་ཏནྟ་རཱ་ཛ། བོད་སྐད་དུ། དཔལ་ཡེ་ཤེས་རྒྱལ་པོའི་རྒྱུད་ཀྱི་རྒྱལ་པོ།
13a3 དཔལ་བདེ་བ་ཆེན་པོ་ལ་ཕྱག་འཚལ་ལོ།། ཀྱེ་མ་སངས་རྒྱས་ཀྱི་སངས་རྒྱས།། ཀྱེ་མ་སངས་རྒྱས་མཛད་པ་ལེགས།། གང་ཕྱིར་སེམས་ཅན་ཐམས་ཅད་ཀྱིས།། མྱ་ངན་འདས་པ་ཐོབ
13a4 བྱའི་ཕྱིར། ། དད་དང་བརྩོན་འགྲུས་རྫོགས་བྱས་ཏེ།། བླ་མའི་རྗེས་སུ་འཇུག་པར་བྱ།། རང་རིག་གཉིས་སུ་མེད་པ་ལ།། གཞན་རིག་གཉིས་སུ་འཛིན་པས་འཁྲུལ།། གཟོད་ནས་མ་སྐྱེས་མ
13a5 གྲུབ་ལ། ། སྐྱེས་དང་གྲུབ་པར་འཛིན་པས་འཁྲུལ།། དངོས་པོ་རོ་མཉམ་གྱུར་པ་ལ།། དམན་དང་གྱ་ནོམ་འཛིན་པས་འཁྲུལ།། འཁོར་བ་ཡོངས་སུ་ཤེས་པ་ཉིད།། མྱ་ངན་འདས་པར
13a6 བརྗོད་པ་ལ། ། སངས་རྒྱས་སེམས་ཅན་རྟོག་པས་འཁྲུལ།། རང་བཞིན་ལྷུན་གྱིས་གྲུབ་པ་ལ།། རྒྱུ་དང་རྐྱེན་གྱིས་སྐྱེ་བས་འཁྲུལ།། བརྡ་དང་ཐ་སྙད་བྲལ་བ་ལ།། བློ་ཡི་སྤྱོད་ཡུལ
13a7 བྱེད་པས་འཁྲུལ། ། མཐའ་བྲལ་དབུ་མར་གནས་པ་ལ།། རྟག་དང་ཆད་པར་འཛིན་པས་འཁྲུལ།། ཤེས་བརྗོད་ཡུལ་ལས་འདས་པ་ལ།། བདག་དང་བདག་གིར་འཛིན་པས་འཁྲུལ།།
iiif viewer powered by OpenSeadragon
