| e-texts navigator |
| Wylie |
134b1 ཕྱི་རོལ་ནང་ན་བདག་མེད་ན།། སུ་ཡི་བུ་ཡིན་ཅི་ཞིག་ནོར།། སྐྱེས་པ་བུད་མེད་རྣམས་ཀྱི་རིགས།། བརྒྱ་དང་སྟོང་ཕྲག་མང་པོ་དང་།། ལོངས་སྤྱོད་ལེགས་པར་བསྒྲུབས་པ་ཡང་།། འཆི་བདག་དབང་དུ
134b2 འགྲོ་བར་འགྱུར། ། བསགས་པ་ཀུན་གྱི་མཐའ་ཟད་ཅིང་།། བསླང་བའི་མཐའ་ནི་འགྱེལ་བར་འགྱུར།། ཕྲད་པའི་མཐའ་ནི་འབྲལ་བ་སྟེ།། གསོན་པའི་མཐའ་ནི་འཆི་བ་ཡིན།། གསོན་མཐའ་འཆི་བ
134b3 ཡིན་པས་ན། ། སེམས་ཅན་ཐམས་ཅད་འཆི་འགྱུར་ཞིང་།། དགེ་སྡིག་འབྲས་བུ་ཉེར་འགྲོ་བའི།། ཇི་བཞིན་ལས་ཀྱི་རྗེས་སུ་འབྲང་།། སྡིག་པའི་ལས་ཀྱིས་དམྱལ་བ་དང་།། བསོད་ནམས་བྱས་པ
134b4 བདེ་འགྲོ་སྟེ། ། གཞན་དག་གིས་ནི་ལམ་བསྒོམས་པས།། ཟག་མེད་མྱ་ངན་འདས་པར་འགྱུར།། གང་ཡང་སངས་རྒྱས་རང་སངས་རྒྱས།། སངས་རྒྱས་རྣམས་ཀྱི་ཉན་ཐོས་ཀྱང་།། སྐུ་ལུས་འདི
134b5 ནི་སྤོང་མཛད་ན། ། སྐྱེ་བོ་ཕལ་པ་སྨོས་ཅི་དགོས།། གང་དུ་གནས་ཀྱང་འཆི་བས་མི་ཚུགས་པའི།། ས་ཕྱོགས་དེ་ནི་ཡོད་པ་མ་ཡིན་ཏེ།། བར་སྣང་ལ་མེད་རྒྱ་མཚོའི་ནང་ན་མེད།། རི་བོ་རྣམས་ཀྱི་གསེབ
134b6 ཏུ་ཞུགས་ནའང་མིན། ། བྱུང་དང་འབྱུང་བར་འགྱུར་བ་ཇི་སྙེད་པ།། ཀུན་གྱིས་ལུས་འདི་བཏང་ནས་འགྲོ་བ་དང་།། དེ་ཀུན་འཇིག་པར་མཁས་པས་རྟོགས་ཀྱིས་ཏེ།། ཆོས་ལ་གནས་ཀྱིས་ཚངས་པར
134b7 སྤྱད་པ་སྤྱོད། ། རྒ་བ་མཐོང་ཞིང་ནད་ཀྱིས་སྡུག་བསྔལ་དང་།། སེམས་དང་བྲལ་བའི་ཤི་བ་མཐོང་ནས་ནི།། བརྟན་པས་བཙོན་ར་འདྲ་བའི་ཁྱིམ་སྤངས་ཀྱི།། འཇིག་རྟེན་ཕལ་པས་འདོད་སྤང་ནུས་རེ་སྐན།།
iiif viewer powered by OpenSeadragon
