| e-texts navigator |
| Wylie |
234b1 མ་འབྲུ་བཞི་ལྷུང་བཟེད་ཀྱི་ནང་དུ་སོང་བས་གླིང་བཞི་ལ་དབང་བྱེད་པར་གྱུར་ཏོ། ། འབྲུམ་བུ་གཅིག་སྤྱི་བོ་ལ་ཆགས་པས་ལྷ་རིམ་པ་གཉིས་ཀྱི་ལོངས་སྤྱོད་མྱོང་བར་གྱུར་ཏོ།། དེའི་ཚེ་ན་ཉེ་གནས་རྣམས་ཀྱིས་སངས
234b2 རྒྱས་ཀྱིས་གསུངས་པ་ཐོས་ནས། ལ་ལ་ནི་འབྲས་བུ་དང་པོ་ནས་གཉིས་པ་དང་། གསུམ་པ་དང་། དགྲ་བཅོམ་པའི་བར་དུ་ཐོབ་པར་གྱུར་ཏོ།། འཁོར་མང་པོའི་རྣམས་བཅོམ་ལྡན་འདས་ཀྱིས
234b3 གསུངས་པ་ལ་རྗེས་སུ་ཡི་རང་ནས་མངོན་པར་དགའ་འོ། ། རྒྱལ་པོ་སྤྱི་བོ་སྐྱེས་ཀྱི་ལེའུ་སྟེ་བཞི་བཅུ་ལྔ་པའོ།། ། བུ་མོ་སུ་མ་ནའི་བུ་བཅུའི་ལེའུའོ།། འདི་སྐད་བདག་གིས་ཐོས
234b4 པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།། དེའི་ཚེ་ན་ཁྱིམ་བདག་མགོན་མེད་ཟས་སྦྱིན་གྱི་བུ་མོ་ཐ་ཆུང
234b5 སུ་མ་ན་ཞེས་བྱ་བ་མངའ་བྱད་མཛེས་ཤིང་བལྟ་ན་སྡུག་པ་ཞིག་ཡོད་དེ། བུའི་ནང་ན་བུ་མོ་ཐ་ཆུང་དེ་ལ་ནང་ན་བྱམས་པས་གར་འགྲོ་ཡང་ཁྲིད་དོ།། དུས་གཞན་ཞིག་ན་ཁྱིམ་བདག་སངས་རྒྱས་ལ་ཕྱག་འཚལ
234b6 དུ་སོང་བ་དང་། བུ་མོ་ཡང་ཕྱི་བཞིན་སོང་ནས། བུ་མོ་དེས་སངས་རྒྱས་མཐོང་བ་དང་ལྷག་པར་དགའ་བའི་སེམས་སྐྱེས་ཏེ། སྤོས་ཀྱིས་སངས་རྒྱས་བཞུགས་པའི་གནས་ཀུན་བྱུགས་པར་བསམས་པ
234b7 དང་དེའི་ཚེ་བུ་མོ་དེའི་ལག་ན་ཨ་འབྲའི་འབྲས་བུ་ཞིག་ཐོགས་པ་ལས། བཅོམ་ལྡན་འདས་ཀྱིས་འོན་ཅིག་ཅེས་བཀའ་སྩལ་པ་དང་། བུ་མོས་ཀྱང་དེ་མ་ཐག་ཏུ་བཅོམ་ལྡན་འདས་ཀྱི་ཕྱག་ཏུ
iiif viewer powered by OpenSeadragon
