| e-texts navigator |
| Wylie |
237a1 འགྱུར་བའི་སེམས་ཅན་གང་ལགས་པ་དེ་དག་ཀྱང་། བཅོམ་ལྡན་འདས་དགེ་བའི་རྩ་བ་ངན་ངོན་དང་ལྡན་པ་མ་ལགས་ན། གང་འཛིན་པ་དང་། འཆང་བ་དང
237a2 ཀློག་པ་དང་། གཞན་དག་ལའང་རྒྱ་ཆེར་ཡང་དག་པར་ཏུ་སྟོན་པ་དང་། མདོ་སྡེ་འདི་ལ་མེ་ཏོག་དང་། བདུག་སྤོས་དང་། འཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང
237a3 གདུགས་དང་། རྒྱལ་མཚན་དང་། བ་དན་དག་གིས་མཆོད་པ་བགྱིད་པ་ལྟ་སྨོས་ཀྱང་ཅི་འཚལ་ཏེ། སེང་གེའི་སྒྲ་བསྒྲགས་པའི་མདོ་སྡེ་འདི་སེམས་ཅན་གང་གིས་རྣ་བར་ཐོས་པར་འགྱུར་བ་དེ་ནི
237a4 བཅོམ་ལྡན་འདས་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་ལགས་སོ། ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་ལ་ལེགས་སོ་ཞེས་བྱ་བ་གནང་སྟེ། རིགས་ཀྱི་བུ་ཇི་སྐད
237a5 སྨྲས་པ་དེ་བཞིན་ཏེ། ལེགས་སོ་ལེགས་སོ།། གང་དེ་བཞིན་གཤེགས་པའི་ཡང་དག་པའི་སེང་གེའི་སྒྲ་འདི་ཐོས་ནས་རབ་ཏུ་དང་བའི་སེམས་ཀྱིས་ལེགས་སོ་ཞེས་བྱ་བ་འགའ་ཞིག་རྗེས་སུ་འབུལ་ན་ཡང
237a6 རིགས་ཀྱི་བུ་འམ། རིགས་ཀྱི་བུ་མོ་དེ་དགེ་བའི་རྩ་བ་ངན་ངོན་དང་ལྡན་པ་མ་ཡིན་ཏེ། དེ་དག་ངས་ཡོངས་སུ་བཟུང་བ་ཡིན་ནོ།། བྱང་ཆུབ་སེམས་དཔའ་ཆེན་པོ་བྱམས་པས་ཀྱང་མགྲོན་དུ་གཉེར་བར
237a7 བྱེད་དོ། ། དེ་དེ་དག་གིས་ངའི་བྱང་ཆུབ་ཕྲག་པ་ལ་ཁྱེར་བ་ཡིན་ནོ།། གང་སྙིགས་མ་དག་ལ་བབ་པའི་ཚེ། མདོ་སྡེ་འདི་ལ་མོས་པའི་སེམས་ཅན་དེ་དག་ནི། ངས་ཡོངས་སུ་སྨིན་པར་བྱས་པ་ཡིན་ནོ།།
iiif viewer powered by OpenSeadragon
