| e-texts navigator |
| Wylie |
236a1 @སུ་བཙལ་བར་བྱའོ།། རིགས་ཀྱི་བུ་བྱང་ཆུབ་ཡོངས་སུ་ཚོལ་བར་འདོད་པས་རང་གི་ཉེ་བར་ལེན་པའི་ཕུང་པོ་ལྔ་ལས་བཙལ་བར་བྱའོ།། ཆོས་ཀྱི་རྣམ་གྲངས་འདིའི་དོན་ཇི་ལྟ་བ
236a2 བཞིན་བཤད་པ་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྣམ་པ་དྲུག་ཏུ་གཡོས་སོ།། སྣང་བ་ཆེན་པོས་འཇིག་རྟེན་ཁྱབ་པར་ཤིན་ཏུ་སྣང་བར་གྱུར་ཏོ།། བཅོམ་ལྡན་འདས་དེ
236a3 བཞིན་གཤེགས་པ་ཆོས་འཕགས་ཀྱི་ལྗགས་ཀྱི་དབང་པོ་ཕྱུང་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ལྗགས་ཀྱི་དབང་པོས་ཡང་དག་པར་བཀྲམ་པར་གྱུར་ཏོ། ། ལྗགས་ཀྱི་དབང་པོ་དེ
236a4 ལས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བྱུང་སྟེ། འོད་ཟེར་དེ་དག་གིས་སེམས་ཅན་དམྱལ་བ་ཆེན་པོ་ལ་སོགས་པ་ནས། སྲིད་པའི་རྩེ་མོའི་བར་གྱི་འཇིག་རྟེན་གྱི་ཁམས་ཐམས་ཅད་སྣང་བར
236a5 བྱས་སོ། ། དེ་ནས་བཅོམ་ལྡན་འདས་ཀྱི་ལྗགས་ཀྱི་དབང་པོ་དེ་ཉིད་སྔར་བསྡུས་ནས་འཁོར་གྱི་དཀྱིལ་འཁོར་ཐམས་ཅད་ལ་བཀའ་སྩལ་པ། གྲོག་པོ་དག་ལྕེ་འདི་ལྟ་བུ་ཡོད་པ་ནི་བརྫུན་མི་ཟེར་ཏེ།
236a6 གྲོགས་པོ་དག་ངས་གཏམ་ཅུང་ཟད་ཇི་ལྟ་བ་བཞིན་བཤད་པ་དེ་ལྟར་བརྟགས་པ་དང་། དེ་ལྟར་དད་པ་དང་། ཡིད་ཆེས་པར་གྱིས་ཤིག། དེ་ནས་ས་བཅུ་ལ་གནས་པ་དང་། ལྷ་དང་། ཀླུ
236a7 དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་ལ་སོགས་པ་དང་། མི་དང་། མི་མ་ཡིན་པའི་འཁོར་ཐམས་ཅད་སྟན
iiif viewer powered by OpenSeadragon
