| e-texts navigator |
| Wylie |
219a1 གཞན་གྱི་འོད་རྣམས་ནི་མདོ་སྡེ་ཐམས་ཅད་དང་། ཏིང་ངེ་འཛིན་ཐམས་ཅད་བསྒོམ་པར་བྱ་བ་བསྒོམས་པའི་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འོད་ལས་འདས་ཏེ་ཐལ་ལེ་མ
219a2 འདུག་གོ། ། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་འོད་ནི་འོད་ཐམས་ཅད་ལས་འདས་ཏེ་ས་ལེར་སྣང་ལ། སེམས་ཅན་ཐམས་ཅད་ཀྱི་སྤུ་དྲུང་དུ་ཞུགས་ནས་བྱང་ཆུབ་ཀྱི་སེམས་མི་དགོས་སོ་སྙམ་སྟེ།
219a3 མ་བསྐྱེད་དུ་ཟིན་ཀྱང་བྱང་ཆུབ་ཀྱི་རྒྱུ་ངེས་པར་ཐོབ་པར་འགྱུར་ཏེ། དེ་བས་ན་མིང་ཡང་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ།། གསོལ་པ། བྱང་ཆུབ་ཀྱི་སེམས་མི་དགོས་པར་འཛིན་ཀྱང་སེམས་ཅན་ཐམས་ཅད
219a4 ཀྱི་ལུས་ཀྱི་བ་སྤུའི་ལུང་བུ་ཐམས་ཅད་དུ་ཞུགས་ནས། བྱང་ཆུབ་ཀྱི་རྒྱུ་མངོན་པར་འགྲུབ་པར་འགྱུར་ཞེས་བགྱི་བ་འདི་ལ་གཏན་ཚིགས་བཀའ་སྩལ་འཚལ་ལགས་སོ།། བཅོམ་ལྡན་འདས་བསྟན་པ་ཕམ་པ་བགྱིད
219a5 པ་དང་། མཚམས་མ་མཆིས་པ་བགྱིད་པ་དང་། མདོ་སྡེ་སྤོང་བ་དང་འདོད་ཆེན་པ་དག་ཀྱང་གདའ་ལགས་ན། གལ་ཏེ་སེམས་མ་བསྐྱེད་དེ་མི་དགོས་པར་འཛིན་ཀྱང་བྱང་ཆུབ་པའི་བྱང་ཆུབ་ཀྱི་རྒྱུར་དུ་ལགས་ན
219a6 སངས་རྒྱས་ཀྱིས་གསུངས་པ་ལ་བྱེ་བྲག་ཅི་མཆིས་ཏེ། ཡང་ན་བཞི་པོ་དེ་དག་མ་མཆིས་ཞེས་བཤད་འཚལ་ལགས་སོ།། ཡང་ན་དེས་སྡིག་པ་འབྱང་བར་འགྱུར་ཞེས་བཤད་འཚལ་ལགས་སོ།། བཅོམ་ལྡན
219a7 འདས་ཀྱིས་བཀའ་སྩལ་པ། འདོད་ཆེན་པ་མ་གཏོགས་པ། ཡོངས་སུ་མྱ་ངན་ལས་འདས་པ་ཆེན་པོའི་མདོ་འདི་རྣ་ལམ་དུ་གྲག་ཅིང་ཐོས་པ་ཙམ་གྱིས་ཀྱང་ཐམས་ཅད་ལ་བྱང་ཆུབ་ཀྱི་རྒྱུ་ཡོད་པར་འགྱུར་ཏེ
iiif viewer powered by OpenSeadragon
