| e-texts navigator |
| Wylie |
215a1 སྐྱེས་པའི་རབས་ཀྱི་ཟླ་བ་ཞེས་བྱའོ། ། དེ་བས་ན་དེ་བཞིན་གཤེགས་པ་རྟག་པ་དང་བརྟན་པ་ཡིན་ནོ།། རིགས་ཀྱི་བུ་གཞན་ཡང་དཔེར་ན་ཟླ་བ་དང་ལྷ་མ་ཡིན་གྱི།
215a2 དབང་པོ་སྒྲ་གཅན་ཕྲད་པའི་ཚེ། འཇིག་རྟེན་པ་རྣམས་ཀྱིས་ཟླ་བ་གཟས་ཟིན་ཏོ།། སྒྲ་གཅན་ནི་ཟླ་བ་ལ་འཛིན་པར་ཡང་མི་བྱེད་ལ། དེས་ནི་དེ་ལ་ཟ་བར་ཡང་མི་ནུས་ཏེ། སྒྲ
215a3 གཅན་གྱི་ལག་པས་ཟླ་བ་བསྒྲིབས་ནས་འོད་མི་སྣང་བྱེད་པར་ཟད་དེ། ཟླ་བ་ལ་རྨ་ཡང་མེད། ཉོན་མོངས་པའང་མེད་དོ།། ཇི་ཙམ་དུ་སྒྲ་གཅན་གྱི་ལག་པས་ཟླ་བ་བཀབ་པ་དེ་ཙམ་དུ
215a4 ཟླ་བའི་འོད་མི་སྣང་བར་འགྱུར་ལ་སྒྲ་གཅན་གྱིས་ཟླ་བ་བཏང་བའི་ཚེ་ནི་ཁ་ནས་འབྱུང་བ་ལྟ་བུར་སྣང་སྟེ། མི་རྣམས་ཀྱིས་ཟླ་བ་ནི་སྡུག་བསྔལ་ཞིང་འདུག་གོ་སྙམ་དུ་འཛིན་ཏེ
215a5 ཟླ་བ་ནི་རང་བཞིན་ཁོ་ནར་འདུག་བཞིན་དུ་བདག་ཉིད་སྒྲ་གཅན་དང་ལྷན་ཅིག་ཏུ་འདུག་པར་སྟོན་ཏེ། འདི་ནི་འཇིག་རྟེན་གྱི་ཆོས་ཉིད་དོ།། སྒྲ་གཅན་བྱེ་བ་སྙེད་ཀྱིས་ཀྱང་ཟླ་བ་གསད་པ
215a6 འམ་གཞིག་པར་མི་ནུས་ཏེ། ཟླ་བ་རང་ཉིད་དེ་ལྟར་སྟོན་ཏོ།། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉིད་ཟླ་བ་ལྟ་བུར་སྟོན་པར་མཛད་དེ
215a7 མ་འོངས་པའི་དུས་ཀྱི་དོན་དུ་ངན་སེམས་ཀྱིས་ཁྲག་ཕྱུང་བའི་མཚམས་མེད་པའི་ལས་བསྟན་པའི་ཕྱིར། དེ་ལ་སོགས་པ་འདོད་ཆེན་པོའི་མཐའ་དང་། དགེ་འདུན་གྱི་དབྱེན་གྱི་ཆོས་ཐ
iiif viewer powered by OpenSeadragon
