| e-texts navigator |
| Wylie |
174a1 དང་དེ་དག་ནི་སེམས་ཅན་ཐམས་ཅད་ལ་ཕན་པ་དང་། ཐུགས་བརྩེ་བའི་ཕྱིར་ཐེག་པ་ཆེན་པོའི་ཚུལ་དུ་གསུངས་པས་ན། བདག་གིས་ཀྱང་ཤིན་ཏུ་རྒྱས་པ་ཞེས་བྱ་བ་བཤད་པར
174a2 བྱའོ། ཞེས་ཟེར་བ་དེ་ལྟར་དམ་འཆའ་བར་བྱེད་པ་གང་ཡིན་པ་དེ་དག་གི་སྟོན་པ་ནི་ང་ཡིན་གྱི། དེ་མ་ཡིན་པ་རྣམས་ཀྱི་སྟོན་པ་ནི་ང་མ་ཡིན་ནོ།། དེ་དག་ནི་ངའི་ཕྱིར་རབ་ཏུ་བྱུང་བ་མ་ཡིན་ཏེ། དེ་དག
174a3 ཐམས་ཅད་ནི་མུ་སྟེགས་པའི་བུ་ཡིན་ནོ་ཞེས་ཟེར་བ་དེ་ལྟ་བུ་ནི་སངས་རྒྱས་ཀྱིས་གསུངས་པའི་མདོ་སྡེ་དང་། འདུལ་བ་ཡིན་པར་རིག་པར་བྱའོ་ཞེས་དེ་སྐད་སྨྲོས་ཤིག། བདུད་ཀྱིས
174a4 སྨྲས་པའི་མདོ་སྡེ་དང་། འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་མཐུན་པར་བྱེད་པ་ཡིན་པར་རིག་པར་བྱའོ།། སངས་རྒྱས་ཀྱིས་གསུངས་པའི་མདོ་སྡེ་དང་།
174a5 འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ།། དེ་བཞིན་གཤེགས་པ་ནི་ཡོན་ཏན་དཔག་ཏུ་མེད་པ་དང་ལྡན་པ་མ་ཡིན་ནོ།། མི་རྟག་གོ།
174a6 ཡོངས་སུ་མྱ་ངན་ལས་འདས་པའོ།། སྟོང་པར་གྱུར་པའོ།། བདག་མེད་པ་སྟོན་པའོ།། འཇིག་རྟེན་དང་མཐུན་པར་བྱེད་པ་མ་ཡིན་ནོ།། ཞེས་ཟེར་བ་དེ་ལྟ་བུའི་མདོ་སྡེ་ནི་བདུད་ཀྱིས་སྨྲས་པའི
174a7 མདོ་སྡེ་དང་། འདུལ་བ་ཡིན་པར་རིག་པར་བྱའོ།། སངས་རྒྱས་བཅོམ་ལྡན་འདས་ནི་བསམ་གྱིས་མི་ཁྱབ་ཅིང་། ཡོན་ཏན་བསམ་གྱིས་མི་ཁྱབ། དཔག་ཏུ་མེད་གྲངས་མེད་པ་དང་ལྡན་པ་ཡིན་ནོ།། རྟག་པའོ།།
iiif viewer powered by OpenSeadragon
