| e-texts navigator |
| Wylie |
201b1 དེ་མ་ཡིན་ཏེ། དེ་ནི་ཡང་དག་པ་མ་ཡིན་ནོ།། སྨྲས་པ། བཙུན་པ་འོད་སྲུངས་ཆེན་པོ་འདི་ཇི་སྙམ་དུ་སེམས། གང་ཡང་དག་པ་མ་ཡིན་པ་དེ། ནམ་ཡང་ཡང་དག་པར་འགྱུར་རམ། སྨྲས་པ
201b2 དེ་ནི་མ་ཡིན་ནོ། ། སྨྲས་པ། ག་ནས་བརྟན་ཡང་དག་པ་མ་ཡིན་པ་གང་ཡིན་པའི་ཡང་དག་པ་མ་ཡིན་པ་དེ་ལས་འདོད་ཆགས་དང་། ཞེ་སྡང་དང་། གཏི་མུག་སྐྱེས་པར་འདོད་དམ། སྨྲས་པ།
201b3 དེ་མ་ཡིན་ནོ།། སྨྲས་པ། བཙུན་པ་འོད་སྲུངས་ཆེན་པོ་དེ་ལྟ་བུ་ཡིན་དུ་ཟིན་ན། གང་དག་གི་སེམས་ཅན་རྣམས་ཀུན་ནས་ཉོན་མོངས་པར་འགྱུར་བའི་འདོད་ཆགས་དང་། ཞེ་སྡང་དང་། གཏི
201b4 མུག་གང་ཡིན། སྨྲས་པ། རིགས་ཀྱི་བུ་དེ་ལྟར་ན་ཆོས་ཐམས་ཅད་རང་བཞིན་གྱིས་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བའོ།། སྨྲས་པ། བཙུན་པ
201b5 འོད་སྲུངས་ཆེན་པོ་འདི་ལ་བསམས་ཏེ། འདི་སྐད་དུ་ཆོས་ཐམས་ཅད་ནི་སྒྱུ་མས་སྤྲུལ་པའི་རང་བཞིན་ནོ་ཞེས་སྨྲས་སོ།། གང་བསྟན་པ་འདི་བཤད་པ་ན། བྱང་ཆུབ་སེམས་དཔའ་སྟོང་ཕྲག་བཞི
201b6 བཅུ་རྩ་བཞི་རྗེས་སུ་འཐུན་པའི་བཟོད་པ་སྐྱེས་སོ། ། དེ་ནས་བཅོམ་ལྡན་འདས་ལ། ཚེ་དང་ལྡན་པ་འོད་སྲུངས་ཆེན་པོས་འདི་སྐད་ཅེས་གསོལ་ཏོ།། བཅོམ་ལྡན་འདས་སུ་དག་གིས་མིག་གིས་བྱང་ཆུབ
201b7 སེམས་དཔའ་དྲ་བ་ཅན་གྱི་འོད་མཐོང་བར་གྱུར་པའི་སེམས་ཅན་དེ་དག་ལ་ངན་སོང་ངན་འགྲོ་ལོག་པར་ལྟུང་བའི་འཇིགས་པ་འཚལ་བར་མི་བགྱིའོ། ། སུ་དག་འདི་ལ་ཆོས་བསྟན་པ་ཐོས་པར་གྱུར་པའི་སེམས་ཅན་དེ
iiif viewer powered by OpenSeadragon
