| e-texts navigator |
| Wylie |
193a1 མཚན་ཉིད་ཀྱང་དེ་བཞིན་དུ་བལྟའོ། ། འདི་ལྟར་ཆོས་ཐམས་ཅད་ལ་མི་གནས་ཤིང་སྤྱོད་པ་དང་། སྐྱེ་བ་དང་། འབྱུང་བ་དང་། འཕོ་བ་དང་། འཆི་བའང་སྟོན་ལ།
193a2 སངས་རྒྱས་ཀྱི་ཞིང་དག་ནའང་གདའ་བ་དེ་དག་ལ་ལྷག་པར་ཤེས་རབ་ཀྱི་སྤོབས་པ་འདི་ལྟ་བུས་ཡང་སྤོབས་པར་འགྱུར་རོ།། བཅོམ་ལྡན་འདས་ཤེས་རབ་ཀྱི་སྤོབས་པས་རྣམ་པར་འཕྲུལ་པ་འདི་ལྟ་བུ་མཐོང་ན།
193a3 རིགས་ཀྱི་བུ་འམ། རིགས་ཀྱི་བུ་མོ་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེད།། །། བམ་པོ་གསུམ་པ།། ཡང་དེའི་ཚེ་བྱང་ཆུབ
193a4 སེམས་དཔའ་ཀུན་ཏུ་མེ་ཏོག་ཅེས་བྱ་བ་འཁོར་དེར་འདུས་ཤིང་འདུག་པར་གྱུར་ཏེ། དེས་གནས་བརྟན་ཤཱ་རིའི་བུ་ལ་འདི་སྐད་ཅེས་སྨྲས་སོ།། གནས་བརྟན་ནི་དེ་བཞིན་གཤེགས་པས
193a5 ཤེས་རབ་ཅན་གྱི་མཆོག་ཏུ་གསུང་ན། འདི་ལྟར་ཤེས་རབ་ཀྱི་སྤོབས་པ་རྣམ་པར་འཕྲུལ་པ་འདི་ལྟ་བུས་རྣམ་པར་འཕྲུལ་མི་ནུས་པ། ཅི་གནས་བརྟན་གྱིས་ཆོས་ཀྱི་དབྱིངས་ཁོང་དུ་མ་ཆུད་དམ
193a6 གནས་བརྟན་གྱིས་སྨྲས་པ། ཀུན་ཏུ་མེ་ཏོག་བཅོམ་ལྡན་འདས་ཀྱིས་ཉན་ཐོས་རྣམས་ནི་ཡུལ་ཇི་ལྟ་བ་བཞིན་དུ་སྟོན་ཏོ།། སྨྲས་པ། བཙུན་པ་ཤཱ་རིའི་བུ་ཅི་ཆོས་ཀྱི་དབྱིངས་ཡུལ་དུ་བཟང་ངམ།
193a7 སྨྲས་པ། དེ་ནི་མ་ཡིན་ནོ།། སྨྲས་པ། འོ་ན་ཇི་ལྟར་གནས་བརྟན་ཤཱ་རིའི་བུ་ཡུལ་ཇི་ལྟ་བ་བཞིན་དུ་སྟོན། སྨྲས་པ། ཉན་ཐོས་ཀྱི་ཁོང་དུ་ཆུད་པ་ཇི་ཙམ་པར་བསྟན་པའང་དེ་ཙམ་མོ།།
iiif viewer powered by OpenSeadragon
