| e-texts navigator |
| Wylie |
177a1 ཡང་ཚངས་པ་ཕུང་པོ་རྣམས་ཕུང་པོ་རྣམས་ཞེས་ཐ་དད་དུ་འདོགས་པ་ལ། གང་སྨྲ་བ་དང་སྨྲ་བར་ལྟ་བ་འདི་ནི་འཇིག་རྟེན་ནོ།། གང་ལྟ་བ་དེའི་རྗེས་སུ་འབྲང་བ་འདི་ནི
177a2 འཇིག་རྟེན་ཀུན་འབྱུང་བའོ། ། གང་ལྟ་བ་དེ་ཇི་ལྟ་བ་བཞིན་མཚན་ཉིད་འགག་པ་དེ་ནི་འཇིག་རྟེན་འགག་པ་ཞེས་བྱའོ།། ལམ་གང་གིས་ལྟ་བ་དེ་དག་མི་འཛིན་པ་དེ་ནི་འཇིག་རྟེན་འགོག་པར་འགྲོ
177a3 བའི་ལམ་སྟེ། ཚངས་པ་ངས་འདི་ལ་བསམས་ནས་ང་ནི་ལུས་འདོམ་གང་བ་འདི་ལ་འཇིག་རྟེན་དང་། འཇིག་རྟེན་ཀུན་འབྱུང་བ་དང་། འཇིག་རྟེན་འགོག་པ་དང་། འཇིག་རྟེན་འགོག་པར
177a4 འགྲོ་བའི་ལམ་དུ་འདོགས་སོ་ཞེས་ཚིག་དེ་སྐད་བཤད་དོ། ། དེ་ནས་བཅོམ་ལྡན་འདས་ལ།། ཚང་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ།། བཅོམ་ལྡན་འདས་དེ་བཞིན
177a5 གཤེགས་པས་གང་འདི་འཕགས་པའི་བདེན་པ་བཞི་བསྟན་ན། བཅོམ་ལྡན་འདས་འཕགས་པ་རྣམས་ཀྱི་བདེན་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཚངས་པ་འདི་ནི
177a6 སྡུག་བསྔལ་བའོ་ཞེས་བྱ་བ་དེ་ནི་འཕགས་པ་རྣམས་ཀྱི་བདེན་པ་མ་ཡིན་ནོ། ། ཚངས་པ་འདི་ནི་སྡུག་བསྔལ་ཀུན་འབྱུང་བའོ།། འདི་ནི་སྡུག་བསྔལ་འགོག་པའོ།། འདི་ན་སྡུག་བསྔལ་འགོག་པར་འགྲོ
177a7 བའི་ལམ་མོ་ཞེས་བྱ་བ་དེ་ནི་འཕགས་པ་རྣམས་ཀྱི་བདེན་པ་མ་ཡིན་ནོ། ། དེ་ཅིའི་ཕྱིར་ཞེ་ན། ཚངས་པ་འདི་ནི་སྡུག་བསྔལ་བའོ་ཞེས་བྱ་བ་དེ་ཅི་སྟེ་འཕགས་པ་རྣམས་ཀྱི་བདེན་པ་ཡིན་དུ་ཟིན་ན། དེ་ན
iiif viewer powered by OpenSeadragon
