| e-texts navigator |
| Wylie |
153a1 བར་མི་བྱེད་པའི་ཕྱིར་རོ། ། གལ་ཏེ་དེ་དེ་ལྟར་ཚོལ་བར་བྱེད་ན་ནི་དེའི་ཕྱིར་དཆོག་ཤེས་པར་འགྱུར་བ་ཞིག་ན། གང་གི་ཕྱིར་ཚོལ་བར་མི་བྱེད་པ་དེའི་ཕྱིར་ཆོག་མི་ཤེས་སོ།།
153a2 སྨྲས་པ། འཇམ་དཔལ་དེ་བཞིན་གཤེགས་པ་མ་གཏོགས་པར་ཁོ་བོ་ལྟ་བུ་ཆོས་ཉན་པ་དེ་ལྟ་བུ་ཁྱོད་ཀྱིས་ག་ལ་རྙེད། སྨྲས་པ། བཙུན་པ་ཤཱ་རིའི་བུ་ཁྱོད་ཤཱ་རིའི་བུ་ཡོངས་སུ་མྱ་ངན་ལས་མི་འདའ་བའི
153a3 ཆོས་ཅན་ཡིན་པས་མོས་སམ། སྨྲས་པ། མོས་སོ།། སྨྲས་པ། ཇི་ལྟར་མོས། སྨྲས་པ། ཆོས་ཐམས་ཅད་ཡོངས་སུ་མ་གྲུབ་པས་ན། ཁོ་བོའང་ཡོངས་སུ་མྱ་ངན་ལས་མི་འདའ་བའི་ཆོས་ཅན
153a4 ཡིན་ནོ་སྙམ་དུ་དེ་ལྟར་མོས་སོ། ། སྨྲས་པ། བཙུན་པ་ཤཱ་རིའི་བུ་ཁྱོད་ཤི་འཕོ་མེད་པ་དང་། སྐྱེ་བ་མེད་པའི་ཆོས་ཅན་ཡིན་པར་མོས་སམ། སྨྲས་པ། མོས་སོ།། སྨྲས་པ། ཇི་ལྟར་མོས། སྨྲས་པ
153a5 ཆོས་ཀྱི་དབྱིངས་སུ་གཏོགས་པའི་ཕྱིར་ཏེ། ཆོས་ཀྱི་དབྱིངས་ལ་འཆི་འཕོ་འམ། སྐྱེ་བ་མེད་པ་དེ་ལྟར་མོས་སོ།། སྨྲས་པ། བཙུན་པ་ཤཱ་རིའི་བུ་ཁྱོད་དགྲ་བཅོམ་པ་ཟག་པ་ཟད་པ། མི་ཤེས་པ་དང་ལྡན
153a6 པར་མོས་སམ། སྨྲས་པ། མོས་སོ།། སྨྲས་པ། ཇི་ལྟར་མོས། སྨྲས་པ། ཤེས་པ་དང་མི་ཤེས་པ་མཉམ་པ་ཉིད་ཀྱི་ཕྱིར། དགྲ་བཅོམ་པ་ཟག་པ་ཟད་པ་མི་ཤེས་པ་དང་ལྡན་ཏེ། འདི་ལྟར་མི་ཤེས
153a7 པ་དང་། ཤེས་པ་ནི་མི་ཟད་པའི་ཆོས་ཅན་ཡིན་པའི་ཕྱིར་དབེན་པ་སྟེ། དེ་བས་ན་མི་ཤེས་པ་དང་། ཤེས་པར་རྣམ་པར་མི་རྟོག་པའི་ཕྱིར་དགྲ་བཅོམ་པ་ཟག་པ་ཟད་པ་མི་ཤེས་པ་དང་ལྡན་པར་མོས་སོ།།
iiif viewer powered by OpenSeadragon
