| e-texts navigator |
| Wylie |
148b1 ཀྱིས་མཁྱེན་བཞིན་དུ། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ།། འཇམ་དཔལ་ཁྱོད་ཀྱིས་ཆོས་ཀྱི་དབྱིངས་ཤེས་སམ། གསོལ་བ། གལ་ཏེ་དམིགས་ན། བདག་གིས
148b2 འཚལ་ལགས་སོ། ། བཀའ་སྩལ་པ། འཇམ་དཔལ་འཇིག་རྟེན་གང་ལ་སྤྱོད་ཤེས་སམ། གསོལ་པ། བཅོམ་ལྡན་འདས་འཇིག་རྟེན་ནི་སྒྱུ་མ་སྤྲུལ་པའི་མི་གང་ཁོ་ན་ལ་སྤྱོད་པ་དེ་ལ་སྤྱོད་ལགས་སོ།།
148b3 བཅོམ་ལྡན་འདས་འཇིག་རྟེན་ཞེས་བགྱི་བ་དེ་ནི་མིང་ཙམ་དུ་བས་ཏེ། བདག་གིས་ནི་གང་བསྟན་པར་བགྱི་བའི་འཇིག་རྟེན་གྱི་དངོས་པོ་དང་། འཇིག་རྟེན་གང་ལ་སྤྱོད་པ་ཡང་དག་པར་རྗེས་སུ་མ་མཐོང
148b4 ལགས་ཏེ། བདག་གིས་ནི་འཇིག་རྟེན་ཆོས་ཀྱི་དབྱིངས་ལས་ཐ་དད་པར་ཡང་དག་པར་རྗེས་སུ་མ་མཐོང་ལགས་སོ།། དེ་ཅིའི་སླད་དུ་ཞེ་ན། མ་མཆིས་པའི་སླད་དུ་ལགས་སོ།། བཅོམ་ལྡན་འདས
148b5 ཀྱིས་འཇིག་རྟེན་གང་ལ་སྤྱོད་ཅེས་བཀའ་སྩལ་པ་དེའང་གཟུགས་ཀྱི་ངོ་བོ་ཉིད་གང་ལགས་པ་དེ་ལ་ནི་འཆི་འཕོ་དང་སྐྱེ་བའང་མ་མཆིས། དེ་ལ་ནི་འཇིགས་པ་འམ། རབ་ཏུ་འཇིགས་པའང་མ་མཆིས་ན།
148b6 གང་ལ་སྤྱོད་པར་འགྱུར་ལགས། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་ཀྱི་ངོ་བོ་ཉིད་གང་ལགས་པ་དེ་ནི། གཏན་མ་མཆིས་པའི་སླད་དུ་སྐྱེ་བ
148b7 འམ། འགག་པ་མ་མཆིས་ལ། མཚན་ཉིད་གཅིག་ལས་མི་འདའ་སྟེ། འདི་ལྟ་སྟེ། མཚན་ཉིད་གཅིག་པ་ལགས་སོ།། བཀའ་སྩལ་པ། འཇམ་དཔལ་འདི་ཇི་སྙམ་དུ་སེམས
iiif viewer powered by OpenSeadragon
