| e-texts navigator |
| Wylie |
128b1 དེ་ནས་བཅོམ་ལྡན་འདས་ཀྱིས་དེའི་ཚེ་སྐུ་ལས་འདི་ལྟ་བུའི་འོད་རབ་ཏུ་བཏང་བས། འོད་དེས་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་རྒྱས་པར་གང་བར་གྱུར་ཏོ།། ཆོས་ཀྱི་རྣམ་གྲངས་འདིའི
128b2 ཐོག་མ་དང་། བར་མ་དང་། ཐ་མ་བཤད་པ་ན། སེམས་ཅན་དཔག་ཏུ་མེད་གྲངས་མེད་པ་ནི་བྱང་ཆུབ་ཏུ་སེམས་སྐྱེས་སོ།། སེམས་ཅན་དཔག་ཏུ་མེད་གྲངས་མེད་པ་དག་ནི་བཟོད་པ་ཐོབ་པར་གྱུར་ཏོ།།
128b3 སེམས་ཅན་ལ་ལ་དག་ནི་སེམས་རྣམ་པར་གྲོལ་ལོ།། ལ་ལ་དག་ནི་ཆོས་ཀྱི་མིག་རྣམ་པར་དག་གོ།། ལ་ལ་དག་ནི་འདོད་ཆགས་བྲལ་བ་རྙེད་དོ།། ལ་ལ་དག་ནི་ལྷ་དང་མིའི་ཕུན་སུམ་ཚོགས་པ་ཡོངས་སུ
128b4 བཟུང་བར་གྱུར་ཏེ། སངས་རྒྱས་གཞན་དག་ལའང་བལྟ་བའི་ཕྱིར། རྒྱུ་བསགས་པར་ཡང་གྱུར་ཏོ།། དེ་ཐམས་ཅད་ལའང་བཅོམ་ལྡན་འདས་རྗེས་སུ་ཐུགས་རང་ངོ་།། བཅོམ་ལྡན་འདས་ཀྱིས་དེ་སྐད
128b5 ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་མཛོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། བྱང་ཆུབ་སེམས་དཔའ་ལྟད་མོ་ཅན་དང་།
128b6 བྱང་ཆུབ་སེམས་དཔའ་ལག་ན་རིན་པོ་ཆེ་དང་། བྱང་ཆུབ་སེམས་དཔའ་རིན་ཆེན་དཔལ་དང་། བྱང་ཆུབ་སེམས་དཔའ་ཡོན་ཏན་རྒྱལ་པོའི་འོད་དང་། བྱང་ཆུབ་སེམས་དཔའ་བསོད་ནམས་ཀྱིས་བརྒྱན་པ་དང
128b7 བྱང་ཆུབ་སེམས་དཔའ་ངན་སོང་སྤོང་བ་དང་། བྱང་ཆུབ་སེམས་དཔའ་ཆོས་ཀྱི་རྒྱལ་པོ་དང་། ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་པ་འོད་སྲུངས་ཆེན་པོ་དང་། ཚེ་དང་ལྡན་པ་ཀུན་དགའ་བོ་དང
iiif viewer powered by OpenSeadragon
