| e-texts navigator |
| Wylie |
109a1 གཤུང་བ་དང་། ཉམས་པར་བྱེད་པ་དང་། བརྙས་པ་དང་། འདྲིད་པ་དང་། སྡིགས་པ་དང་། གྲགས་པ་མ་ཡིན་པར་སྤྱོད་པ་དང་། ངོ་ཚ་ཤེས་པ་དང་། ཁྲེལ་ཡོད་པ་སྤངས་པ་དང་།
109a2 མི་དགེ་བ་བཅུའི་ལས་ཀྱི་ལམ་རྣམས་ལ་མངོན་པར་དགའ་བའི་སེམས་དང་ལྡན་པ་དང་། དགེ་བ་ཐམས་ཅད་ལ་སྤྱོད་པ་སྤངས་པའི་སེམས་དང་ལྡན་པ་དང་། བསོད་ནམས་དང་། ཤེས་རབ་དང་བྲལ་བ་དང་། ཚེ
109a3 ཐུང་ཞིང་ངན་སོང་དུ་འགྲོ་བ་དེས་ན། སེམས་ཅན་འདི་དག་ཐམས་ཅད་དེ་བདག་གིས་ནི་ལོངས་སྤྱོད་དང་། ཉེ་བར་སྤྱོད་པ་ཐམས་ཅད་ཀྱིས་ཚིམ་པར་བྱེད་ཀྱང་མི་ནུས། ཡོངས་སུ་སྨིན་པར་བྱེད་ཀྱང་མི་ནུས་སོ།། །
109a4 འདི་ལྟར་སྐྱེས་བུ་དམ་པ་ཁྱོད་ནི་སངས་རྒྱས་ཐམས་ཅད་ཀྱི་ཆོས་ལ་རག་མ་ལས་པར་ཤེས་ཤིང་། མཁས་པ་ཁྱོད་ནི་ཏིང་ངེ་འཛིན་དང་། གཟུངས་དང་། བཟོད་པ་ཐམས་ཅད་ལ་རྣམ་པར་སྤྱོད་པ་ལ་མཁས་པའི་ཕ
109a5 རོལ་ཏུ་སོན་པ། སྙིང་རྗེ་དང་། སྙིང་བརྩེ་བས་བརྒྱན་པ། མཁས་པ་ཆེན་པོ་ཤེས་པའི་ཕ་རོལ་ཏུ་སོན་པ་ཁྱོད་ནི་བྱང་ཆུབ་སེམས་དཔའི་ཚོགས་ཐམས་ཅད་ཀྱི་ནང་ན་རྒྱལ་མཚན་གྱི་མཆོག་ཏུ་གྱུར་པ། སེམས
109a6 ཅན་ཐམས་ཅད་ཡོངས་སུ་སྨིན་པར་བྱེད་པ་ཡིན་པས། ང་ཁྱོད་ཀྱིས་གླིང་བཞི་པ་འདིར་སྙིང་རྗེ་དང་། སྙིང་བརྩེ་བ་དག་སྐྱེད་ཅིག། གླིང་བཞི་པ་འདི་ན་ཀླུ་ཁྲོ་བོ་དག་ཇི་ལྟར་བཟློག་པར་རུས་པ་དང་། གནོད
109a7 སྦྱིན་དང་། སྲིན་པོ་དང་། ལྷ་མ་ཡིན་དང་། གྲུལ་བུམ་དང་། ཡི་དགས་དང་། ཤ་བ་ཁྲོ་བོ་དང་། ལུས་སྲུལ་པོ་ཁྲོ་བོ་དག་ཇི་ལྟར་བཟློག་པར་ནུས་པ་དང་། དེ་དག་ཅི་ནས་ཀྱང་དུས་སུ་ཆར་འབེབས།
iiif viewer powered by OpenSeadragon
