| e-texts navigator |
| Wylie |
103b1 མཁའི་གཏོས་ཡངས་པ་བཞིན་དུ་སྤྱོད་པར་བྱེད་ཀྱང་། དེ་ཆེ་བར་ཡང་མི་མངོན་ནོ།། ཆུང་བར་ཡང་མི་མངོན་ནོ།། བྱང་ཆུབ་སེམས་དཔའ་རང་གི་སྨོན་ལམ་གྱི་སྟོབས་མ་གཏོགས་པར་ཡང་དང་ཡང་མངལ་གྱི་གནས་སུ
103b2 སྐྱེ་བར་མི་འགྱུར་རོ། ། ངན་འགྲོར་སྐྱེ་བར་མི་འགྱུར་རོ།། བུད་མེད་དུ་མི་འགྱུར་རོ།། སྐྱེ་བ་དམན་པ་འཐོབ་པར་མི་འགྱུར་རོ།། ཡན་ལག་ཉམས་པར་མི་འགྱུར་རོ།། ལུས་དང་། ངག་དང་། ཡིད་ཀྱི
103b3 སྤྱོད་པ་ལ་འཁྲུལ་པར་མི་འགྱུར་རོ། ། སེམས་ཅན་ཡོངས་སུ་སྨིན་པར་བྱ་བའི་ཕྱིར་རང་གི་སྨོན་ལམ་གྱི་སྟོབས་མ་གཏོགས་པར་སངས་རྒྱས་ཀྱི་ཞིང་སྟོང་པ་དག་ཏུ་སྐྱེ་བར་མི་འགྱུར་རོ།། དེ་རྟག་པར་སངས
103b4 རྒྱས་ལ་བལྟ་བ་དང་། ཆོས་མཉན་པ་དང་། དགེ་འདུན་ལ་བཀུར་སྟི་བྱ་བ་དང་མི་འབྲལ་བ་ཡིན་ནོ།། དེ་ཤེས་རབ་དང་། བསོད་ནམས་དང་། ཏིང་ངེ་འཛིན་དང་། ཐབས་མཁས་པ་དག་གིས་སེམས་ཅན
103b5 ཡོངས་སུ་སྨིན་པར་བྱེད་པ་ནས། ཡོངས་སུ་མྱ་ངན་ལས་འདས་པ་བླ་ན་མེད་པའི་བར་ལ་འཇིགས་པ་མེད་པ་དང་མ་བྲལ་བ་ཡིན་ནོ།། དཔལ་ཆོ་ག་ཤེས་བྱང་ཆུབ་སེམས་དཔའ་སེམས་དཔའ་ཆེན་པོས་གོ་ཆ་ཆེན
103b6 པོ་དེ་ལྟ་བུ་བགོས་ནས། བསམ་གཏན་དང་པོའི་ཕ་རོལ་ཏུ་ཕྱིན་པ་ཡོངས་སུ་སྦྱོང་ཞིང་སློབ་པ་ན། འདོད་པའི་ཁམས་ལས་ཡང་དག་པར་འདའ་བར་བྱེད་དོ།། དེ་བཞིན་དུ་བསམ་གཏན་གྱི་ཡན་ལག་རྣམས
103b7 ཀྱང་ཤེས་པར་བྱེད་དོ། ། ཡན་ལག་ལྔ་དང་ལྡན་ཞིང་ཡན་ལག་ལྔ་རྣམ་པར་སྤངས་པ་ཡིན་ནོ།། དེ་བཞིན་དུ་རྫུ་འཕྲུལ་གྱི་རྐང་པ་བཞིས་རྩེ་བ་མངོན་པར་ཤེས་པ་ཡིན་ནོ།། སངས་རྒྱས་བཅོམ་ལྡན་འདས་དེ
iiif viewer powered by OpenSeadragon
