| e-texts navigator |
| Wylie |
85a1 སངས་རྒྱས་རྗེས་སུ་དྲན་པའོ། ། གཞན་ཡང་ཆོས་གཅིག་སྟེ། ཆོས་སྒྲུབ་པ་སྙིང་པོར་བྱེད་པའི་ཆོས་རྗེས་སུ་དྲན་པའོ།། གཞན་ཡང་ཆོས་གཅིག་སྟེ། ཕྱིར་མི་ལྡོག་པའི་དགེ
85a2 འདུན་དང་ལྡན་པའི་དགེ་འདུན་རྗེས་སུ་དྲན་པའོ། ། གཞན་ཡང་ཆོས་གཅིག་སྟེ། ཉོན་མོངས་པ་ཐམས་ཅད་བསལ་བའི་གཏོང་བ་རྗེས་སུ་དྲན་པའོ།། གཞན་ཡང་ཆོས་གཅིག་སྟེ། བྱང་ཆུབ་ཀྱི
85a3 སེམས་མ་བརྗེད་པའི་ཚུལ་ཁྲིམས་རྗེས་སུ་དྲན་པའོ། ། གཞན་ཡང་ཆོས་གཅིག་སྟེ། རྣམ་པར་དག་པའི་ཆོས་དང་ལྡན་པའི་ལྷ་རྗེས་སུ་དྲན་པའོ།། གཞན་ཡང་ཆོས་གཅིག་སྟེ། ཕན་པ་དང་། བདེ
85a4 བ་དང་ལྡན་པའི་ཕན་པར་འདོད་པའོ། ། གཞན་ཡང་ཆོས་གཅིག་སྟེ། བསམ་པ་བརྟན་པར་གྱུར་ཅིང་མོས་པ་དྲག་པའོ།། གཞན་ཡང་ཆོས་གཅིག་སྟེ། སེམས་ཅན་ཐམས་ཅད་རབ་ཏུ་ཐར་པར
85a5 བྱ་བ་ལ་མཆོག་ཏུ་དགའ་བའོ། ། གཞན་ཡང་ཆོས་གཅིག་སྟེ། ཆོས་ཟབ་མོ་ལས་ངེས་པར་འབྱུང་བའི་དམ་པའི་ཆོས་ཡོངས་སུ་ཚོལ་བའོ།། གཞན་ཡང་ཆོས་གཅིག་སྟེ། ཟང་ཟིང་མེད་པའི
85a6 སེམས་ཀྱིས་ཆོས་སྦྱིན་པའོ། ། གཞན་ཡང་ཆོས་གཅིག་སྟེ། ཆོས་མཉན་པའི་ཕྱིར་ལྷགས་པ་རྣམས་ལ་ནད་པར་འདུ་ཤེས་པའོ།། གཞན་ཡང་ཆོས་གཅིག་སྟེ། ཆོས་ལ་སྨན་དུ་འདུ་ཤེས་པའོ།།
85a7 གཞན་ཡང་ཆོས་གཅིག་སྟེ། བདག་ལ་སྨན་པར་འདུ་ཤེས་པའོ།། གཞན་ཡང་ཆོས་གཅིག་སྟེ། དམ་པའི་ཆོས་ཡུན་རིང་དུ་གནས་པར་བྱ་བའི་ཕྱིར་ཀུན་ཏུ་སྲུང་བའོ།། གཞན་ཡང་ཆོས
iiif viewer powered by OpenSeadragon
