| e-texts navigator |
| Wylie |
77b1 ཡོངས་སུ་དཀར་བར་མི་འགྱུར་བའི་མི་ཤེས་པའི་གཏི་མུག་གི་ལིང་ཏོག་དེ་ལ་གང་ཡོངས་སུ་མི་འཛིན་ཅིང་། མི་ལེན་པ་འདི་ནི། དམ་པའི་ཆོས་ཡོངས་སུ་འཛིན་པ་ཞེས་བྱའོ།། རིགས་ཀྱི་བུ་གཞན
77b2 ཡང་གང་བསྒྲུབས་ནས་སྤང་བར་བྱ་བ་དེ་ནི་ཆོས་མ་ཡིན། འདུལ་བ་མ་ཡིན་ནོ།། གང་བསྒྲུབ་པར་ཡང་མི་བྱ། སྤང་བར་ཡང་མི་བྱ་བ་འདི་ནི་ཆོས་སོ།། འདི་ནི་འདུལ་བའོ།། བསྒྲུབས་ནས་སྤང
77b3 བར་བྱ་བའི་ཆོས་གང་ཞེས་ན། འདུས་བྱས་ཀྱི་ལམ་སྟེ། བསྒྲུབས་ནས་སྤང་བར་བྱ་བ་དེ་ནི་ཆོས་མ་ཡིན།། འདུལ་བ་མ་ཡིན་ནོ།། བསྒྲུབ་པར་བྱ་བ་ཡང་མ་ཡིན།། སྤང་བར་བྱ་བ་ཡང་མ་ཡིན
77b4 པ་གང་ཞེ་ན། གང་བརྗོད་དུ་མེད་པ་དང་། སྐྱེ་བ་མེད་པ་དང་། འབྱུང་བ་མེད་པ་སྟེ། དེ་ནི་བསྒྲུབ་པར་བྱ་བ་ཡང་མ་ཡིན། སྤང་བར་བྱ་བ་ཡང་མ་ཡིན་པའོ།། གང་བསྒྲུབ་པར་བྱ་བ་ཡང་མ་ཡིན།
77b5 སྤང་བར་བྱ་བ་ཡང་མ་ཡིན་པ་དེ་ཆོས་སོ།། དེ་འདུལ་བའོ།། ཅིའི་ཕྱིར་དེ་ཆོས་ཡིན། དེ་འདུལ་བ་ཡིན་ཞེ་ན། རང་བཞིན་གྱི་མ་སྐྱེས་པའི་ཉོན་མོངས་པ་རྣམས་སྐྱེ་བ་མི་བྱེད་པས་དེའི་ཕྱིར་དེ་ཆོས
77b6 ཡིན། དེ་འདུལ་བ་ཡིན་ཞེས་བྱའོ།། ཆོས་དང་འདུལ་བ་གང་ཡིན་པ་དེ་ནི་སྐྱེ་བ་མེད།། འགག་པ་མེད་དོ།། གང་སྐྱེ་བ་མེད། འགག་པ་མེད་པ་དེ་ནི་ཟད་པར་མི་འགྱུར་རོ།། དེ་ལྟར་ཟད་པ་མེད་པ
77b7 དང་། སྐྱེ་བ་མེད་པའི་ཆོས་དང་འདུལ་བ་དེ་ནི། ཇི་ལྟར་བྱུང་བ་མེད་པ་དེ་ལྟར་ཡོངས་སུ་གཟུང་བ་མེད་དོ།། གང་ཡོངས་སུ་གཟུང་བ་མེད་པ་དེ་དམ་པའི་ཆོས་ཡོངས་སུ་འཛིན་པའོ།། རིགས་ཀྱི་བུ་དེ་ལྟར
iiif viewer powered by OpenSeadragon
