| e-texts navigator |
| Wylie |
79a1 སྐྱེས་པར་གྱུར་ཏེ། དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན
79a2 མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ།། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས། ཀླུའི་རིགས་མཆོག་ཅེས་བྱ་བ་འཇིག་རྟེན་དུ་བྱུང་བར་གྱུར་ཏོ།།
79a3 དེར་དེ་བཞིན་གཤེགས་པ་ཀླུའི་རིགས་མཆོག་དེ་བཞུགས་ཏེ། བྱང་ཆུབ་ཐོབ་བོ།། ཡང་འོད་སྲུངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀླུའི་རིགས
79a4 མཆོག་དེས། ། བྱང་ཆུབ་སེམས་དཔའི་ཐེག་པ་ལ་ནི་བྱེ་བ་ཕྲག་བདུན་ཅུ་ཡོངས་སུ་སྨིན་པར་བྱས། ཉན་ཐོས་ཀྱི་ཐེག་པ་ལ་ནི་བྱེ་བ་ཕྲག་བརྒྱད་ཅུ་ཡོངས་སུ་སྨིན་པར་བྱས། རང་སངས་རྒྱས་ཀྱི་ཐེག་པ
79a5 ལ་ནི་བྱེ་བ་བརྒྱ་སྟོང་ཕྲག་དགུ་བཅུ་རྩ་དྲུག་ཡོངས་སུ་སྨིན་པར་བྱས་ནས། ཕྱིས་བཅོམ་ལྡན་འདས་དེ་བཞིན་གཤེགས་པ་ཀླུའི་རིགས་མཆོག་དེའི་ཉན་ཐོས་ཀྱི་དགེ་འདུན་དཔག་ཏུ་མེད་པར་གྱུར་ཏོ།། ཡང
79a6 འོད་སྲུངས་དེ་བཞིན་གཤེགས་པ་ཀླུའི་རིགས་མཆོག་དེའི་ཚེ་ཚད་ནི་ལོ་བཞི་ཁྲིར་གྱུར་ཏེ། དེས་ལྷ་དང་བཅས་པའི་འཇིག་རྟེན་གྱི་དོན་བྱས་ནས། ཡོངས་སུ་མྱ་ངན་ལས་འདས་ཏེ། དེའི་སྐུ་གདུང་དག་ཀྱང
79a7 རྒྱས་པར་གྱུར་ཏོ། ། དེའི་མཆོད་རྟེན་ནི་བྱེ་བ་ཕྲག་སུམ་ཅུ་རྩ་དྲུག་ཏུ་གྱུར་ཏེ། དེ་དག་ལ་སེམས་ཅན་དེ་དག་གིས་མཆོད་པ་བྱས་པར་གྱུར་ཏོ།། འོད་སྲུང་བཅོམ་ལྡན་འདས་ཀླུའི་རིགས་མཆོག་དེ།། ཡོད
iiif viewer powered by OpenSeadragon
