| e-texts navigator |
| Wylie |
44b1 པའི་ཆོས་དེ་དག་ནི། དེ་བཞིན་དུ་མ་ཡིན་ཞིང་། གཞན་དུའང་མ་ཡིན། ཇི་ལྟར་ཆོས་རྣམས་དེ་བཞིན་གཤེགས་པ་དང་། དེ་བཞིན་གཤེགས་པའི་ཉན་ཐོས་དང་། བྱང
44b2 ཆུབ་སེམས་དཔས་མཐོང་བའི་ཆོས་དེ་ལྟ་བུ་ནི་དེ་བཞིན་ཉིད། མ་ནོར་བ་དེ་བཞིན་ཉིད། གཞན་མ་ཡིན་པ་དེ་བཞིན་ཉིད་དེ། དེའི་ཕྱིར་དེ་བཞིན་ཉིད་ཅེས་བྱའོ།། རབ་ཀྱི།
44b3 རྩལ་གྱིས་རྣམ་པར་གནོན་པ། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པའོ།། རབ་ཀྱི་རྩལ་གྱིས་རྣམ་པར་གནོན་པ
44b4 ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཆོས་གང་འབྲི་བའི་ཕྱིར་རམ། འཕེལ་བའི་ཕྱིར་ཉེ་བར་གནས་པ་མ་ཡིན་ནོ།། ཆོས་གང་འདུ་བའི་ཕྱིར་རམ། འབྲལ་བའི་ཕྱིར་རམ།
44b5 བྲི་བའི་ཕྱིར་རམ། གང་བའི་ཕྱིར་རམ། སོགས་པའི་ཕྱིར་རམ། མི་སོགས་པའི་ཕྱིར་རམ། འཕོ་བའི་ཕྱིར་རམ། མི་འཕོ་བའི་ཕྱིར་རམ། སྐྱེ་བའི་ཕྱིར་རམ
44b6 འགོག་པའི་ཕྱིར་རམ། ཀུན་ནས་ཉོན་མོངས་པའི་ཕྱིར་རམ། རྣམ་པར་བྱང་བའི་ཕྱིར་རམ། འཇུག་པའི་ཕྱིར་རམ?། ལྡོག་པའི་ཕྱིར་རམ། ཀུན་འབྱུང་བའི་ཕྱིར་རམ།
44b7 ནུབ་པའི་ཕྱིར་རམ། མཚན་ཉིད་ཀྱི་ཕྱིར་རམ། མཉམ་པའི་ཕྱིར་རམ། མི་མཉམ་པའི་ཕྱིར་རམ། ཀུན་རྫོབ་ཀྱི་ཕྱིར་རམ། དོན་དམ་པའི་ཕྱིར་རམ། བདེ་བའི་ཕྱིར་རམ
iiif viewer powered by OpenSeadragon
