| e-texts navigator |
| Wylie |
166a1 སྤྱོད་མང་བ་དང་། འབྲུ་དང་། དབྱིག་དང་། གསེར་དང་། མཛོད་དང་། བདེ་བ་བསགས་པ་མང་པོ་དང་། ཟན་པོ་དང་། བྲན་མོ་དང་། ཞོགས་འཚ་བ་མང་པོ་དང་། མཛའ་བཤེས་དང་། ཉེ་དྲ་དང་། སྟུག་གི་གཉེན་མཚམས་མང་བ་དེ་དག་ནི།
166a2 གསོན་པའི་མཐའ་ཡང་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ།། གང་ཡང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ།། ཡུལ་ལ་དབང་བ། མཐུ་ཐོབ་པ། ས་ཆེན་པོའི་དཀྱིལ་འཁོར་དུ་མངོན་པར་རྒྱལ་བས་གནས
166a3 པ་དེ་དག་གི་གསོན་པའི་མཐའ་ཡང་འཆི་བ་ཡིན་ཞིང་མཐར་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ།། གང་ཡང་དྲང་སྲོང་ནགས་ན་གནས་པ་རྩ་བ་དང་། འབྲས་བུ་ཟ་ཞིང་རྩ་བ་དང་། འབྲས་བུ་ལ་སྤྱོད་པ། རྩ་བ་དང་འབྲས
166a4 བུས་འཚོ་ཞིང་གནས་པ་དེ་དག་གི་གསོན་པའི་མཐའ་ཡང་འཆི་བ་ཡིན་ཞིང་མཐར་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ།། གང་ཡང་རྒྱལ་ཆེན་བཞིའི་རིས་ཀྱི་ལྷ་རྣམས་དང་། སུམ་བཅུ་རྩ་གསུམ་དང་། འཐབ་བྲལ
166a5 དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་རྣམས་ཏེ། དེ་དག་གི་གསོན་པའི་མཐའ་ཡང་འཆི་བ་ཡིན་ཞིང་མཐར་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ།། གང་ཡང་བསམ་གཏན
166a6 གསུམ་པ་ཐོབ་པའི་ལྷ་རྣམས་ཏེ། དགེ་ཆུང་དང་། ཚད་མང་དགེ་དང་། དགེ་རྒྱས་པ་སྟེ། དེ་དག་གི་གསོན་པའི་མཐའ་ཡང་འཆི་བ་ཡིན་ཞིང་མཐར་ཡང་འཆི་བར་འགྱུར་ཏེ། སྐྱེས་ནས་འཆི་བར་མི་འགྱུར་བ་མེད་དོ།། གང
166a7 ཡང་བསམ་གཏན་བཞི་པ་ཐོབ་པའི་ལྷ་རྣམས་ཏེ། སྤྲིན་མེད་དང་། བསོད་ནམས་འཕེལ་དང་། འབྲས་བུ་ཆེ་བ་དང་། འདུ་ཤེས་མེད་པའི་སེམས་ཅན་དང་། མི་ཆེ་བ་དང་། མི་གདུང་བ་དང་། ཤིན་དུ་མཐོང་བ་དང་།
166a8 གྱ་ནོམ་སྣང་དང་། འོག་མིན་གྱི་ལྷ་རྣམས་ཏེ། དེ་དག་གི་གསོན་པའི་མཐའ་ཡང་འཆི་བ་ཡིན་ཞིང་མཐར་འཆི་བར་འགྱུར་བ་སྟེ། སྐྱེས་ནས་འཆི་བར་མི་འགྱུར་བ་མེད་དོ།། གང་ཡང་གཟུགས་མེད་པའི་ལྷ་རྣམས་ཏེ།
iiif viewer powered by OpenSeadragon
