| e-texts navigator |
| Wylie |
111b1 པ་བསླབ་པ་ཤེས་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་སྐད་གསུངས་སོ། ། ཐམས་ཅད་མཁྱེན་པ་བླ་མེད་པའི།། སངས་རྒྱས་ཡེ་ཤེས་ཐོབ་འདོད་པས།། ཆོས་རྣམས་གང་ཡང་མི་བཟུང་ཞིང་།། ཆོས་རྣམས་གང་ཡང
111b2 མི་འདོར་རོ། ། གང་ཞིག་སྐྱེ་བར་འགྱུར་བ་ཡི།། ཆོས་ནི་གང་ཡང་མི་རྙེད་དེ།། ཆོས་རྣམས་འབྱུང་བ་མེད་པ་ལ།། བྱིས་པ་དག་ནི་འབྱུང་བར་འདོད།། ཆོས་རྣམས་ཤེས་པར་བྱ་བ་དང་།། སྤང་བར་བྱ་བར་སྲོག་ཆགས་འཆད།། བྱིས་པ་སྐྱེ
111b3 བའི་སྤྱོད་ཡུལ་ཅན། ། སྐྱེ་བ་མེད་ལ་དང་མི་འགྱུར།། བྱང་ཆུབ་ལམ་ནི་དམ་པ་དང་།། ལམ་གྱི་ཆོས་རྣམས་བཏང་བྱས་ཏེ།། བྱིས་པ་གཉིས་ལ་ཆགས་པ་སྟེ།། གཉིས་སུ་མེད་པ་མི་ཤེས་སོ།། སྒྱུ་མ་སྣ་ཚོགས་གྱུར་པ་ལ།། བྱིས་པ་རྣམས
111b4 ཀྱིས་ཐ་དད་མཐོང་། ། འདི་ལ་ཐ་དད་ཡོད་མ་ཡིན།། དེ་དག་ཐམས་ཅད་མཚན་ཉིད་ཅིག། སོ་སོའི་སྐྱེ་བོར་གང་བརྗོད་དང་།། འཇིག་རྟེན་སངས་རྒྱས་མཁས་པ་དག། མི་གཉིས་གཉིས་སུ་དབྱེར་མེད་དེ།། དེ་དག་སྒྱུ་མའི་ཚུལ་དུ་མཉམ།། བྱིས
111b5 པ་ཁ་ཅིག་སྨྲ་བ་ནི། ། ནམ་ཞིག་བདག་ཅག་འདོད་ཆགས་ཟད།། ཞེ་སྡང་གཏི་མུག་ཞི་བར་འགྱུར།། ནམ་ཞིག་ཉོན་མོངས་མེད་པར་འགྱུར།། མེད་ལ་ཡོད་པར་འདུ་ཤེས་པའི།། འདོད་ཆགས་ཞེ་སྡང་གཞིག་པའི་ཕྱིར།། གང་དག་སྟོང་པ
111b6 ཉིད་སྟོན་པ། ། དེ་དག་ཆགས་པ་བྱས་ན་འདས།། ཟད་པ་མེད་ཅིང་སྐྱེ་མེད་པར།། མྱ་ངན་འདས་པ་ཡང་དག་བསྟན།། ཟབ་ཅིང་སྐྱེ་མེད་གང་བརྩོན་པ།། དེ་དག་དེའི་བསྟན་ལས་རིང་།། སྦྱིན་དང་ཚུལ་ཁྲིམས་འདུ་ཤེས་དང་།། གང་དག་བྱང་ཆུབ
111b7 འདུ་ཤེས་དགའ། ། དེ་དག་མཚན་མའི་སྤྱོད་ཡུལ་བས།། ང་ཡི་བྱང་ཆུབ་དེས་མི་རྟོགས།། བྱས་པ་མེད་པས་རྨོངས་པ་དག། ཆོས་རྣམས་གཅོན་དུ་མི་ཤེས་ཏེ།། ཆོས་རྣམས་མཚན་ཉིད་གཅིག་པ་ལ།། དེ་དག་ཐ་དད་འབྱེད་པར་བྱེད།། གང
111b8 གིས་ཆོས་འདི་ཤེས་པ་ནི། ། ངོ་བོ་ཉིད་ཀྱིས་མཚན་མེད་པ།། སོར་མོ་ལྔ་ཡི་ལག་པ་བཞིན།། དེ་དག་བྱང་ཆུབ་རྙེད་མི་དཀའ།། བྱང་ཆུབ་གང་དང་ཡང་མི་རིང་།། གང་དང་ཡང་ནི་ཉེ་བ་མེད།། རྟོག་དང་རྣམ་རྟོག་གང་ལྡན་པ།། དེ་དག་བྱང་ཆུབ་རབ
iiif viewer powered by OpenSeadragon
