| e-texts navigator |
| Wylie |
46b1 ལུས་དང་སེམས་ལས་སུ་རུང་བར་བྱེད་པའོ། ། བསྒྲུབ་པ་ནི་མངོན་པར་འདུ་བྱ་བ་མེད་པའི་རྫུ་འཕྲུལ་རབ་ཏུ་ཐོབ་པར་བྱེད་པའོ།། གཞན་ཡང་རྩོམ་པ་ནི་བྱང་ཆུབ་ཀྱི་ཡན་ལག་རྣམས་ལའོ།། རྟུལ་བ་ནི་ལམ་ལའོ།། སོ་སོར་རྟོག་པ་ནི་ཞི
46b2 གནས་དང་ལྷག་མཐོང་ལའོ། ། བསྒྲུབ་པ་ནི་རིག་པ་དང་རྣམ་པར་གྲོལ་བ་ལའོ།། གཞན་ཡང་རྩོམ་པ་ནི་འཇུག་པའི་སྤྱོད་པའོ།། རྟུལ་བ་ནི་དཀར་པོ་རྣམ་པར་མཐོང་བའི་སྤྱོད་པའོ།། སོ་སོར་རྟོག་པ་ནི་སེམས་ཤིན་ཏུ་སྦྱངས་པའོ།།
46b3 བསྒྲུབ་པ་ནི་ཕྱིར་མི་ལྡོག་པའི་ཡེ་ཤེས་སོ།། བློ་གྲོས་རྒྱ་མཚོ་གཞན་ཡང་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་འབར་བ་དེས་བྱང་ཆུབ་སེམས་དཔའ་གོ་ཆ་སྲ་བ་ལ་འདི་སྐད་ཅེས་བཀའ་སྩལ་ཏོ།། རིགས་ཀྱི་བུ་བརྩོན།
46b4 འགྲུས་དེ་ནི་གང་ལུས་དང་སེམས་ཡོངས་སུ་སྦྱངས་པའོ།། བརྩོན་འགྲུས་དེ་ནི་གང་རྒྱུ་དང་ལྟ་བ་དང་བྲལ་བའོ།། བརྩོན་འགྲུས་དེ་ནི་གང་མིང་དང་གཟུགས་ཡོངས་སུ་ཤེས་པའོ།། བརྩོན་འགྲུས་དེ་ནི་གང་ངར་འཛིན་པ་དང་།། ད་ཡིར
46b5 འཛིན་པ་འགོག་པའོ། ། བརྩོན་འགྲུས་དེ་ནི་གང་འཛིན་པ་དང་འཆི་དབའ་དོར་བའོ།། བརྩོན་འགྲུས་དེ་ནི་གང་སྒྲིབ་པ་རྣམས་དང་ཀུན་ནས་ལྡང་བ་རྣམས་རྣམ་པར་སེལ་བའོ།། བརྩོན་འགྲུས་དེ་ནི་གང་འགྱོད་པ་དང་ཐེ་ཙོམ་སྤོང་བའོ།།
46b6 བརྩོན་འགྲུས་དེ་ནི་གང་མདུད་པ་རྣམས་དང་ཟུག་རྔུ་རྣམས་དང་ཡང་དག་པར་སེལ་བའོ།། བརྩོན་འགྲུས་དེ་ནི་གང་དམིགས་པ་དང་། རྒྱུན་ཆད་པ་ལས་ཤིན་དུ་འདའ་བའོ།། བརྩོན་འགྲུས་དེ་ནི་གང་ང་རྒྱལ་དང་མངོན་པའི་ང་རྒྱལ་རྣམ
46b7 པར་སྤོང་བའོ། ། བརྩོན་འགྲུས་དེ་ནི་གཞི་དང་གནས་ལས་ཤིན་ཏུ་འདའ་བའོ།། བརྩོན་འགྲུས་དེ་ནི་གང་རྗེས་སུ་ཆགས་པ་དང་ཁོང་ཁྲོ་བ་སྤོང་བའོ།། བརྩོན་འགྲུས་དེ་ནི་གང་མ་རིག་པ་དང་སྲིད་པའི་སྲེད་པ་རབ་ཏུ་སྦྱངས་པའོ།།
46b8 བརྩོན་འགྲུས་དེ་ནི་གང་ཆགས་པ་དང་ཞེ་སྡང་ཀུན་ཏུ་མི་རྒྱུ་བའོ།། བརྩོན་འགྲུས་དེ་ནི་གང་གཏི་མུག་དང་སོ་སོར་མི་རྟོག་པ་དང་བྲལ་བའོ།། བརྩོན་འགྲུས་དེ་ནི་གང་ནང་དང་ཕྱིའི་སྐྱེ་མཆེད་རྣམས་ཡོངས་སུ་ཤེས་པའོ།།
iiif viewer powered by OpenSeadragon
