| e-texts navigator |
| Wylie |
9a1 ལ་ལ་སྦྱོར་བ་མཐའ་ཡས་པ་ཞེས་བྱ་བ་དེ་ལ་སྙོམས་པར་ཞུགས་སོ། ། བྱང་ཆུབ་སེམས་དཔའ་ཆོས་ཀྱི་བློ་གྲོས་སྙོམས་པར་ཞུགས་མ་ཐག་ཏུ་ཕྱོགས་བཅུའི་ཕྱོགས་རེ་རེའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་སྟོང
9a2 ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་ཕ་རོལ་ནས་སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱིས། ཞལ་མངོན་པར་བསྟན་ཏེ། སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང
9a3 མཚན་རྡོ་རྗེའི་སྙིང་པོ་ཞེས་བྱ་བར་འཐུན་པ་ཤ་སྟག་གོ། ཕྱོགས་གཅིག་ཇི་ལྟ་བར་ཕྱོགས་བཅུ་རྣམས་ནས་ཀྱང་དེ་བཞིན་ཏེ། སངས་རྒྱས་བཅོམ་ལྡན་འདས་དེ་དག་གིས་དེ་ལ་འདི་སྐད་ཅེས་བཀའ་སྩལ་ཏོ།། ཆོས་ཀྱི་བློ་གྲོས་ཁྱོད
9a4 ལྟར་བྱང་ཆུབ་སེམས་དཔའི་ཏིང་ངེ་འཛིན་སྦྱོར་བ་མཐའ་ཡས་པ་ལ་སྙོམས་པར་ཞུགས་པ་ལེགས་སོ་ལེགས་སོ། ། རིགས་ཀྱི་བུ་འདི་ལྟ་སྟེ། བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་འདི་ཉིད་ཀྱི་སྔོན་གྱི་སྨོན་ལམ་དང་།
9a5 སྔོན་གྱི་བྱིན་གྱི་རླབས་དང་། ཁྱོད་ཉིད་ཀྱི་དགེ་བའི་རྩ་བ་ཉེ་བར་བསྟན་པས་འདི་ལྟ་སྟེ་ཆོས་ཐམས་ཅད་བསྟན་པར་བྱ་བ་དང་། སངས་རྒྱས་ཀྱི་ཡེ་ཤེས་རྣམ་པར་སྦྱང་བ་དང་། སངས་རྒྱས་ཀྱི་ཡེ་ཤེས་རྣམ་པར་འཕེལ་བར་བྱ་བ་དང་། ཆོས་ཀྱི
9a6 དབྱིངས་སུ་འཇུག་པར་བྱ་བ་དང་། སེམས་ཅན་གྱི་ཁམས་རྣམ་པར་དགྲོལ་བ་དང་། ཆགས་པ་མེད་པའི་ཡེ་ཤེས་ལ་འཇུག་ཅིང་ཆུད་པར་བྱ་བ་དང་། ཀུན་དུ་སྦྱོར་བར་བྱ་བ་དང་། སྐད་ཐམས་ཅད་བརྗོད་པར་བྱ་བ་དང་། ཐམས་ཅད་མཁྱེན
9a7 པའི་ཡེ་ཤེས་ལ་འཇུག་པར་བྱ་བ་དང་། ཆོས་ཐམས་ཅད་ལ་སྒྲིབ་པ་མེད་པར་བྱ་བ་དང་། དུས་གསུམ་ཐམས་ཅད་ཡོངས་སུ་ཤེས་པའི་ཆོས་བསྟན་པ་ལ་འཇུག་པར་བྱ་བའི་ཕྱིར་ཕྱོགས་བཅུ་ནས་དེ་བཞིན་གཤེགས་པ་སངས་རྒྱས
9a8 ཀྱི་ཞིང་སྟོང་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཐམས་ཅད་ཀྱང་མཚན་མཐུན་པ་འདི་དག་ཐམས་ཅད་ཁྱོད་ལ་བྱིན་གྱིས་རློབ་ཀྱིས་རིགས་ཀྱི་བུ་འདི་ལྟ་སྟེ། བྱང་ཆུབ་སེམས་དཔའ་རྣམ་པར་གཞག་པ་བཅུ་ལས་བརྩམས་ཏེ། སངས་རྒྱས
iiif viewer powered by OpenSeadragon
