| e-texts navigator |
| Wylie |
175b1 སྒོ་རྣམས་ནི་དབྱུག་པའི་དབང་ཕྱུག་དང་། མགོའི་དབང་ཕྱུག་དང་དྲིལ་རྣ་དང་དྲག་པོ་ཆེན་པོའོ།། ཕྱི་རོལ་ཏུ་ནི་འབྱུང་པོ་རྣམས་དང་། ཡི་གེ་རྣམས་བྲི་བར་བྱའོ།། དེ་ནས་སློབ་དཔོན་ཐལ་བ་གཙང་མས་ལུས་བསྐུས་ཤིང་གོས
175b2 གཙང་མ་བགོས་ཏེ། བདུད་རྩེ་གསུམ་གྱིས་མཚན་མ་གཞག་པར་བྱའོ།། ཞུགས་ནས་ཀྱང་སྙིང་པོ་བཟླས་པར་བྱའོ།། དེ་ནས་སློབ་མ་དེ་བཞིན་དུ་བཅུག་ལ་ལག་པར་མདུང་རྩེ་གསུམ་པ་བྱིན་ནས་ཆོས་བཤད་པར་བྱའོ།།
175b3 སེམས་ཅན་ཀུན་ལ་ཕན་ཕྱིར་དང་།། བསྟན་པ་ཐམས་ཅད་བསྲུང་ཕྱིར་དང་།། འདོད་ཀུན་བདག་པོ་ཉིད་ཀྱི་ཕྱིར།། དྲག་པོའི་ལས་ལ་གནས་པར་གྱིས།། དེ་ནས་ཕྱག་རྒྱའི་ཡེ་ཤེས་བླངས་ཏེ་གཏོར་མ་སྦྱིན་པར་བྱའོ།། དེ་ནས
175b4 བརྩམས་ཏེ་འཇིགས་པ་མེད་པར་དངོས་གྲུབ་ཐམས་ཅད་དང་ཕུན་སུམ་ཚོགས་པ་ཐམས་ཅད་ཀྱི་བདེ་བ་དང་། ཡིད་བདེ་བ་ཐམས་ཅད་རྗེས་སུ་མྱོང་ནས། དྲག་པོའི་འཇིག་རྟེན་དུ་མཆོད་པར་འགྱུར་རོ།། དཀྱིལ་འཁོར་ཆེན་པོ
175b5 ཞི་བའི་མདུང་ཐུང་གིས་མཚན་པ་ཞེས་བྱའོ།། དེ་ནས་མ་མོ་ཐམས་ཅད་ཀྱིས་བཅོམ་ལྡན་འདས་ལ་ཕྱག་འཚལ་ཏེ། དང་པོ་མགྲིན་གཅིག་ཏུ་ཐམས་ཅད་དགུག་པ་དང་གཞུག་པ་དང་གསང་བ་དང་བསྒྲུབ་པའི་དམ་ཚིག་ཅེས
175b6 བྱ་བ་རང་གི་དེ་ཁོ་ན་ཉིད་ཀྱི་སྙིང་པོ་འདི་ཕུལ་ལོ།། བྷྱོ། དེ་ནས་འདིའི་དཀྱིལ་འཁོར་བཤད་པར་བྱ་སྟེ། ཟུར་བཞི་པ་བྱང་གི་སྒོ་ཅན་གྱི་དཀྱིལ་འཁོར་ཐིག་བཏབ་ལ། དབུས་སུ་ནག་པོ་ཆེན་པོ་གར་བྱེད་པ་བཞིན་དུ་བཞག་པར་བྱ།
175b7 དེའི་ཕྱོགས་དང་འཚམས་སུ་མ་མོ་བརྒྱད་བྲི་བར་བྱ་སྟེ། འདི་ལྟ་སྟེ་དྲག་མོ་དང་ཚངས་པ་མོ་དང་ཁྱབ་འཇུག་མོ་དང་གཞོན་ནུ་མོ་དང་། ནག་མོ་དང་ནག་མོ་ཆེན་མོ་དང་ཤ་ཟ་མོ་དང་སྲིན་མོའོ།། དཀྱིལ་འཁོར་གྱི་ཕྱིའི
175b8 མཚམས་རྣམས་སུ་དྲག་པོའི་མཁའ་འགྲོ་མ་བཞི་བྲི་བར་བྱ་སྟེ། ཞི་བ་མོ་དང་བེ་རུན་ཊ་དང་གཏུ་མོ་དང་འཇིགས་བྱེད་མ་རྣམས་སོ།། དེ་རྣམས་ཀྱི་མཚན་མ་ནི་མདུང་རྩེ་གསུམ་པ་དང་། ཕྲེང་བ་དང་འཁོར་ལོ
iiif viewer powered by OpenSeadragon
