| e-texts navigator |
| Wylie |
45a1 ལྷ་རྣམས་ཐམས་ཅད་འབྱུང་བ་ནི།། ཡང་དག་ཏིང་འཛིན་དབྱེ་བ་ཡིས།། ཞེ་སྡང་གཏི་མུག་འདོད་ཆགས་དང་། ཡིད་བཞིན་ནོར་བུའི་དམ་ཚིག་སྟེ།། རིགས་ལྔར་གྱུར་པ་འདི་དག་གིས།། འདོད་དང་ཐར་པ་རབ་བསྒྲུབས་པས།།
45a2 དཀྱིལ་འཁོར་ཡོངས་སུ་རྫོགས་པར་འགྱུར།། དག་དང་མ་དག་གྱུར་པ་རྣམས།། འདིར་ནི་རིགས་ལ་གནས་པ་སྟེ།། རིགས་དང་ཕྲ་བའི་ཆ་བརྟེན་པས།། ལུས་སེམས་ཆོས་ནི་རབ་ཏུ་དབྱེ།། ལུས་ནི་ནམ་མཁའ་ལྟ་བུ་སྟེ།། སེམས་ནི་སྒྱུ་མའི
45a3 རྣམ་པར་འབྱུང་། ། དག་ནི་བྲག་ཆ་ལྟ་བུ་སྟེ།། དབྱེར་མེད་རྡོ་རྗེ་ལྷན་ཅིག་སྐྱེས།། རྟེན་དང་རྟེན་པ་དབྱེར་མེད་པས།། ཐམས་ཅད་ཆོས་ཉིད་སེམས་ལ་གནས།། སེམས་ཅན་སངས་རྒྱས་གཉིས་སུ་བཏགས།། སྣོད་བཅུད་སྣང་བའི་ཡུལ་རྣམས་དང་།།
45a4 བརྟན་གཡོ་ཁམས་གསུམ་རང་རིག་པ།། སྲིད་གསུམ་མ་ལུས་ཆོས་ཉིད་དེའི།། སྣང་བ་གཟུགས་དང་སྒྲ་ལ་སོགས།། དྲི་དང་རོ་དང་རེག་བྱ་དང་།། ཐམས་ཅད་ཆོས་ཉིད་བག་ཆགས་འབྱུང་།། རྒྱུ་ལས་འབྲས་བུ་བསྐྱེད་པའི་ཕྱིར།། གཅིག་ལས
45a5 དུ་མའི་ཆོས་ཀུན་ཤར། ། དུ་མ་ཉིད་དུ་དམིགས་མེད་དེ།། ཐམས་ཅད་སྟོང་ཕྱིར་མ་སྐྱེས་པའོ།། དེ་སྐད་ཅེས་གསུངས་པ་དང་།། དེ་ནས་དེ་བཞིན་གཤེགས་པ་དེ་དག་ཐམས་ཅད་དང་།། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ
45a6 ལ་སོགས་པ་རྣམས་རབ་ཏུ་དགའ་ཞིང་ཡིད་རང་སྟེ། ། བདེ་བ་དང་ཡིད་བདེ་བ་བླ་ན་མེད་པ་ཐོབ་ནས་ལུས་ངག་ཡིད་གསུམ་སྐུ་གསུང་ཐུགས་རྡོ་རྗེ་ལ་རབ་ཏུ་གནས་པར་གྱུར་ནས་ཆེད་དུ་བརྗོད་པ་འདི་ཆེད་དུ་བརྗོད་དོ།། ཨེ་མའོ།། རང་ལུས་སྒྱུ་མར
45a7 གྲུབ་པ་དག། ནམ་མཁའ་ལྟ་བུར་སྐྱེ་བ་མེད།། དབང་པོའི་གཞུ་དང་མཚུངས་པ་ཉིད།། སྟོང་པ་ཉིད་ནི་རྡོ་རྗེའི་སུ།། ལུས་ནི་རང་བཞིན་མི་དམིགས་པས།། དག་པ་ཆེན་པོ་ཡེ་ཤེས་ལུས།། ངག་ནི་བྲག་ཆའི་སྒྲ་དང་མཚུངས།། བརྗོད་པའི་དུས་ན་སྟོད་པ
45a8 སྟེ། ། བི་ཝང་སྒྲ་བཞིན་རྟེན་འབྲེལ་གྱིས།། རང་གྲག་བརྗོད་པ་ཐ་སྙད་ཙམ།། སེམས་ནི་རང་འབྱུང་དག་པ་ལ། ཡེ་ཤེས་ཆེན་པོ་རང་གནས་ཉིད།། རྒྱུ་རྐྱེན་ཚེགས་པ་བྲལ་བ་ལས།། སྣང་བ་ཙམ་དུའང་མི་གནས་པའོ།། དེ་ནས་བཅོམ་ལྡན་འདས་དཔལ
iiif viewer powered by OpenSeadragon
