| e-texts navigator |
| Wylie |
47b1 བསྲུང་བར་འདོད་པས་ནི་ཆང་གི་རྫས་རྣམས་ཡུངས་དཀར་ལ་ལན་བདུན་བསྔགས་ན་ཐུབ་པར་འགྱུར་རོ། །ནད་ཞི་བར་འདོད་པ་ལ་ནི་ནད་དང་འཐུན་པའི་སྨན་ནམ་ཆུ་ལ་ལན་བདུན་བསྔགས་ཏེ་འཐུངས་སམ་བྱུགས་ན་ནད་ལས་གྲོལ་བར་འགྱུར་རོ། །ལས
47b2 གང་བྱེད་པ་ཐམས་ཅད་ལ་འང་ལན་བདུན་བཟླས་བརྗོད་བྱས་ན་བསམས་པ་དེ་གྲུབ་པར་འགྱུར་རོ། །འཕགས་པ་རྡོ་རྗེ་འཇིགས་བྱེད་ཀྱི་གཟུངས་ཞེས་བྱ་བ། མ་རུངས་པ་ཕྱིར་བཟློག་པ། རྫོགས་སྷོ།། །།འཕགས་པས་གསུངས
47b3 པའི་གཟུངས་རྣམས་རྣམ་མང་ཡང་། །རྡོ་རྗེ་འཇིགས་བྱེད་ཞལ་ནས་གསུངས་པའི་གཟུངས། །བསྲུང་བྱའི་ལས་བདུན་ལྡན་པའི་གཟུངས་མཆོག་འདི། །ཀུན་གྱི་ཐུན་མོང་མ་ཡིན་རྣལ་འབྱོར་དམ་པའི་གཟུངས། །རྣལ་འབྱོར་གྱི་དབང་ཕྱུག་ཆེན་པོ
47b4 དོན་ཡོད་རྡོ་རྗེའི་ཞལ་སྔ་ནས་བསྒྱུར་ནས། བོད་ཀྱི་བན་དེ་སྐྱོ་འོད་འབྱུང་ལ་གནང་ངོ་།། །། འཕགས་པ་བདུད་རྩི་ཐབ་སྦྱོར་གྱི་སྙིང་པོ་བཞི་པ་ཞེས་བྱ་བའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི
47b5 སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །དེ་ནས་ཁྲོ་བོ་ཆེན་པོ་བདུད་རྩི་ཐབས་སྦྱོར་གྱིས་འཁོར་འདུས་པ་ཐམས་ཅད་ལ་གླང་པོ་ཆེའི་ལྟ་སྟངས་ཀྱིས་བལྟས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན
47b6 འདས་འདིའི་སེམས་ཅན་རྣམས་ནི་བསོད་ནམས་དམན་པ་དང་། ཚུལ་ལ་མི་གནས་པ་དང་། ཕ་མ་ལ་མ་གུས་པ་དང་། བསོད་ནམས་ཆུང་བ་དང་། དད་པ་མ་མཆིས་པ་དང་། གླགས་ཚོལ་བ་དང་། རྟག་ཏུ་ཟང་ཟིང་ལ་བརྐམ་པ་དང་། རྟག་ཏུ་ལོག་འདྲེན
47b7 དང་། འཚེ་བ་ཅན་དང་། ཤ་ཟ་རྣམས་ཀྱིས་ཟིན་པ་ལགས་ཏེ། བགེགས་དང་ལོག་འདྲེན་དེ་དག་གཞིག་པ་དང་། མཐར་གཏུག་པའི་སླད་དུ་གསང་སྔགས་བཤད་པར་འཚལ་ལོ། །དེ་ནས་བཅོམ་ལྡན་འདས་ཀྱིས་རྡོ་རྗེ་ཁྲོ་བོ་ལ་འདི་སྐད་ཅེས་བཀའ
47b8 སྩལ་ཏོ། །བདུད་རྩི་ཐབ་སྦྱོར་གང་ཁྱོད་སེམས་ཅན་ཐམས་ཅད་ལ་ཕན་པའི་ཕྱིར་ཞུས་པ་ནི་ལེགས་སོ་ལེགས་སོ། །ཁྱོད་ལ་དེ་བཞིན་གཤེགས་པས་གནང་གིས་སེམས་ཅན་ཐམས་ཅད་ཀྱི་དོན་གྱི་ཕྱིར་གསང་སྔགས་ཤོད་ཅིག་།དེ་ནས
iiif viewer powered by OpenSeadragon
