| e-texts navigator |
| Wylie |
226a1 པོ་ཆེ། །རོ་ལངས་དག་གིས་བྱར་ཅི་ཡོད། །དེ་དག་ཀྱང་ནི་ངའི་ཞགས་པས། །ཀུན་ནས་ཡོངས་སུ་བསྐོར་བ་ཡིན། །ཞགས་པ་ཀུན་གྱིས་དེ་དག་ཀྱང་། །རྨུགས་ཤིང་ཤིན་ཏུ་རྨོངས་པར་བྱས། །འདི་ཡིས་བདག་གིས་ཀུན་འགྲུབ་ཅིང་། །
226a2 གསང་སྔགས་ཚིག་རྣམས་གྲུབ་གྱུར་ཅིག་།ན་མ་སིད་དྷ་ནཱན། སིད་དྷྱན་ཏུ་མན་ཏྲ་པཱ་ད་སྭ་སྟིར་མེ་སརྦ་སཏྭཱ་ནན་ཙ་སྭཱ་ཧཱ། སངས་རྒྱས་ཀུན་གྱི་སྟོབས་གང་དང་། །དགྲ་བཅོམ་རྣམས་ཀྱི་སྟོབས་གང་དང་། །དམ་པའི་ཆོས་ཀྱི་གཟི་བརྗིད་ཀྱིས། །
226a3 བདེ་ལེགས་སུ་ནི་རབ་གྱུར་ཅིག་།འཕགས་པ་སངས་རྒྱས་ཀྱི་གཟི་ཡིས་རྟག་ཏུ་འཇིགས་པ་ཐམས་ཅད་ལ་སྭཱ་ཧཱ། ཆོ་ག་ནི་ལན་དྲུག་བཅུ་རྩ་གཅིག་བཟླས་བརྗོད་བྱས་ཏེ། ཀཻ་མེ་རུ་དང་། བལ་གཙང་མ་ལ་སོགས་པའི་སྐུད་པ་དམར་པོ་ལ་མདུད་པ་དོར་རོ། །
226a4 དེ་བཞིན་དུ། བྱབ་པ་ཡང་བྱའོ། །འབྱུང་པོ་ཐམས་ཅད་དང་། རྗེད་བྱེད་དང་། སེམས་རྣམ་པར་གཡེང་བྱེད་ལ་སོགས་པ་དང་། དུག་བྱིན་པ་དང་། དུག་བྱས་པ་དང་། རྐང་གཉིས་པ་དང་། རྐང་བཞི་རྣམས་ལ་ཀུན་ཏུ་འགྲོ་བ་གྲུབ་པའི་མཆོག་ཡིན་ནོ། །བཅོམ་ལྡན་འདས
226a5 ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་རོ་ལངས་བདུན་པ་ཞེས
226a6 བྱ་བའི་གཟུངས། རྫོགས་སྷོ།། །།རྒྱ་གར་གྱི་མཁན་པོ་བི་ཤུད་དྷ་སིང་ཧ་དང་། བན་དེ་ཡེ་ཤེས་སྙིང་པོའི་སྡེས་བསྒྱུར། རྒྱ་གར་གྱི་མཁན་པོ་བིད་དྱ་ཀ་ར་སིང་ཧ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་ཞུས་ཏེ་གཏན་ལ་ཕབ་པ།། །།
226a7 རྒྱ་གར་སྐད་དུ། ཨཱརྱ་ག་ཎ་པ་ཏི་ཧྲི་ད་ཡ། བོད་སྐད་དུ། འཕགས་པ་ཚོགས་ཀྱི་བདག་པོའི་སྙིང་པོའོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན།
226a8 བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཤ་སྟག་དང་ཐབས་གཅིག་ཏུ་བཞུགས་ཏེ། དེ་ནས་བཅོམ་ལྡན་འདས
iiif viewer powered by OpenSeadragon
