| e-texts navigator |
| Wylie |
213b1 སྟོང་པ་ཉིད་ཀྱང་ཡེ་ཤེས་སོ། །དེ་ནས་བཅོམ་ལྡན་འདས་ལ་ཐོགས་པ་མེད་པའི་བྱང་ཆུབ་སེམས་དཔས་འདི་སྐད་ཅེས་གསོལ་ཏོ། །མི་ཚེ་གཅིག་ལ་སྐྱེ་ཞིང་འཆི་བ་ལས་དཀའ་བ་མ་མཆིས་ན། སྐྱེ་བའི་ཚེ་ཡང་ཉི་མ་མ་བདམས་པར་སྐྱེ། འཆི་བའི་ཚེ་ཡང་ཉི་མ་མ
213b2 བདམས་པར་འཆི་ན་ཤི་བའི་འོག་ཏུ་ཤིད་གཏོར་བགྱིད་པའི་ཚེ་དུས་བཟང་ངན་མ་བདམས་ནས་ཤིད་བགྱིས་ན་ཉེས་པ་མང་པོ་འབྱུང་སྟེ། རབས་ཆད་པ་དང་། དབུལ་ཕོངས་པ་དང་། ཁ་མཆུ་མང་པོ་འབྱུང་ན་འདི་ཅིའི་སླད་དུ་འབྱུང་ཞེས་གསོལ་པ་དང་། བཅོམ་ལྡན་འདས
213b3 ཀྱིས་བཀའ་སྩལ་པ། སེམས་ཅན་ཤིད་གཏོར་བྱེད་པའི་ཕྱིར་དྲིས་པ་ཤིན་ཏུ་དགེའོ། །ཡོང་གནམ་ས་གཉིས་ནི་ཤིས། ཉི་ཟླ་གཉིས་ནི་དགེ་ཞིང་སྣང་། མིའི་རྒྱལ་པོ་བྱང་ཆུབ་སེམས་དཔའ་ནི་ཤིན་ཏུ་བྱམས་ཤིང་སྙིང་རྗེ་ཆེ་སྟེ། སེམས་ཅན་ཀུན་ལ་བུ་གཅིག་པ་བཞིན་དུ་མཉམ་པར་བལྟས
213b4 ཤིང་། ཡུལ་ཆོས་བཟང་པོ་བསྟན་ན་མི་དགེ་བའི་ལྷ་མ་སྲིན་དང་། ཡི་དགས་ཀུན་བོས་ཤིང་མཆོད་པས། འདྲེ་གདོན་གྱི་རྣམ་པ་རྣམས་མི་ཟས་བཟང་པོ་ཞིམ་པོ་བདར་བས་ཆགས་ཏེ། མི་ལ་ནི་སྡུག་བསྔལ་སྣ་ཚོགས་འབྱུང་། དམ་པའི་ཆོས་ལ་ནི་ཡིད་མ་ཆེས། འདྲེ་གདོན་གྱི་ཆོས་ལ་ནི
213b5 སྲོག་གིས་མཆོད་ནས། དམར་གསུམ་དབྲལ་དུ་ཟ་བ་ལ་ནི་ཡིད་ཆེས་ཏེ་ལོག་པར་བལྟས་ཤིང་སྤྱད་པས་རབས་ཆད་པ་དང་། དབུལ་ཕོངས་པ་དང་། ཉེས་པ་སྣ་ཚོགས་འབྱུང་ངོ་། །བུ་ཕོ་མོ་འབྱུང་བའི་ཚེ་སྣང་བརྒྱད་ལན་གསུམ་བཀླགས་ན་བུ་བཙའ་སླ། ཡིད
213b6 གཞུངས་མཚན་དང་ལྡན། མི་འམ་ཅི་ལ་སོགས་པས་མདངས་མི་འཕྲོག་ཅིང་། ཡེ་འདྲོག་གིས་འཆི་བར་མི་བྱེད་དོ། །དུས་ལ་བབ་ཏེ་ཤི་བར་གྱུར་ན་ཡང་སྣང་བརྒྱད་ལན་གསུམ་བཀླགས་ན་ཕྱི་མ་ལ་གནོད་པ་སྣ་གཅིག་ཀྱང་མི་འབྱུང་ངོ་། །ཉི་མ་ཐམས་ཅད་དགེ་བ་ཡིན། །རྒྱུ
213b7 སྐར་ཐམས་ཅད་བཟང་པོ་ཡིན། །དགྲ་བཅོམ་ཐམས་ཅད་ཟག་པ་ཟད། །སངས་རྒྱས་ཐམས་ཅད་རྫུ་འཕྲུལ་ཆེ། །ཤིད་བྱེད་པ་ཡང་ཡོ་བྱད་ཅི་འབྱོར་པ་དང་། ནམ་ནུས་པ་ན་སྣང་བརྒྱད་ལན་གསུམ་བཀླགས་ནས་ཤིད་བྱས་ན་ཤི་བ་ཡང་མཐོ་རིས་སུ་སྐྱེའོ། །བུ་ཚ་དང
213b8 གཉེན་རྣམས་ཀྱང་ཕྱུག་བཙན་པར་འོང་ངོ་། །མ་ཆད་པ་ཡང་ཤར་ལྷོ་ནུབ་བྱང་འདྲི་ཞིང་བརྟག་མི་དགོས་ཀྱིས། ས་གར་བདེ་བ་དང་། མི་གར་དགའ་བར་ལྷ་བཙུན་ཡང་དེར་དགའ་ཡིས། དྷར་མ་ལན་གསུམ་བཀླགས་ཏེ་མ་ཆད་པ་དེར་བརྩིགས་ན་ནམ་དུ་ཡང་ཉེས་པ་མེད་དེ། སྒོ་ནི་ཕྱུག
iiif viewer powered by OpenSeadragon
