| e-texts navigator |
| Wylie |
124b1 རིགས་ཀྱི་བུ་མོའམ། དགེ་བསྙེན་ནམ། དགེ་བསྙེན་མ་དེས་ཕྱོགས་བཅུ་དང་། ཕྱོགས་རེ་རེའི་དེ་བཞིན་གཤེགས་པ་འབུམ་ཕྲག་བྱེ་བ་ཁྲག་ཁྲིག་ཏིལ་གྱི་གང་བུ་སྙེད་དགུ་བཅུ་རྩ་དགུ་ལ་ལྷ་རྫས་ཀྱི་མེ་ཏོག་དང་། བདུག་པ་དང་། དྲི་དང་།
124b2 མེ་ཏོག་ཕྲེང་རྒྱུད་དང་། བྱུག་པ་དང་། ན་བཟའ་དང་། ལྷབ་ལྷུབ་དང་། རྒྱན་གྱིས་མཆོད་པར་འགྱུར་རོ། །ཕྱོགས་རེ་རེའི་དེ་བཞིན་གཤེགས་པ་ལ་དེ་བཞིན་གཤེགས་པའི་མཆོད་པའི་སྤྲིན་རིན་པོ་ཆེ་སྣ་བདུན་ལས་བྱས་པའི་རི་རབ་ཆེན་པོ
124b3 ཙམ་གྱི་ཕུང་པོའི་ཡོན་ཏན་འབྱུང་བར་འགྱུར་རོ། །དེ་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་དང་། སེམས་ཅན་གྱི
124b4 ཚོགས་ཆེན་པོ་དེ་རྣམས་ཀྱང་ཡ་མཚན་དུ་གྱུར་ནས་གཅིག་ལ་གཅིག་འདི་སྐད་དུ་མཆོད་རྟེན་རྙིང་པ་ཕྱག་དར་དང་། གྱོ་མོའི་ཕུང་པོ་དེ་བཞིན་གཤེགས་པའི་བྱིན་གྱི་བརླབས་ཀྱིས་བྱིན་གྱིས་བརླབས་ནས། འདི་ནི་ཆོ་འཕྲུལ་གྱི་ཆོ་འཕྲུལ་ཆེན་པོ
124b5 སྟོན་པས་མཐུ་ཆེ་བ་ཡིན་ནོ་ཞེས་ཟེར་རོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་སུས་ཕྱག་དར་གྱི་ཕུང་པོར་བགྱིས་པ་ལས་རིན་པོ་ཆེའི
124b6 མཆོད་རྟེན་དུ་གདའ་བར་བགྱིས། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་འདི་ཕྱག་དར་གྱི་ཕུང་པོ་མ་ཡིན་གྱི། འདི་ནི་རིན་པོ་ཆེ་སྣ་བདུན་ལས་བྱས་པའི་རིན་པོ་ཆེའི་མཆོད་རྟེན་ཆེན་པོ་ཡིན་ནོ། །ལག་ན་རྡོ་རྗེ་འོན
124b7 ཀྱང་སེམས་ཅན་རྣམས་ཀྱི་ལས་ཀྱི་འབྲས་བུ་རྣམ་པར་སྨིན་པ་སྟོན་པས་ནུབ་པར་འགྱུར་གྱི། སངས་རྒྱས་རྣམས་ཀྱི་དེ་བཞིན་གཤེགས་པའི་རིང་བསྲེལ་གྱི་སྙིང་པོའི་མཆོད་རྟེན་རྣམས་ནི་འཇིག་པའམ། འགྱེས་པར་མི་འགྱུར
124b8 ཏེ། དེ་བཞིན་གཤེགས་པའི་རྡོ་རྗེའི་སྙིང་པོའི་སྐུ་ཇི་ལྟར་འགྱེས་པར་འགྱུར། འོན་ཀྱང་སེམས་ཅན་རྣམས་ཀྱི་ལས་ཀྱི་འབྲས་བུ་རྣམ་པར་སྨིན་པ་སྣང་བ་ལས་ཀྱང་ནུབ་པར་གྱུར་ཏོ། །ལག་ན་རྡོ་རྗེ་གཞན་ཡང་ཕྱི་མའི་དུས་ཕྱི་མའི་ཚེ་སྡིག་པ
iiif viewer powered by OpenSeadragon
