| e-texts navigator |
| Wylie |
189b1 ཆད་མེད། །གསལ་བྱེད་སྟོབས་དང་བྲལ་བའི་ཚེ། །མ་ལུས་བདེ་ཆེན་ཕྱག་རྒྱ་སྟེ། །ལུས་སེམས་མཉམ་དུ་གནས་པ་ཉིད། །ཚད་དང་རྒྱ་དབྱིངས་རོ་ལས་འདས། །དཔག་མེད་བདེ་བའི་རོལ་མོ་ནི། །སངས་རྒྱས་ཀུན་གྱི་དགྱེས་ཆེན་ཏེ། །ཐིག་ལེ་ས་བོན་ཟག་པ་བྲལ། །
189b2 བདེ་ཆེན་ཉམས་མྱོང་རྒྱུན་མི་ཆད། །རང་ཉིད་ཐིག་ལེར་ཉམས་མྱོང་བས། །སྙིང་པོའི་ཐིག་ལེ་བྲལ་བ་མེད། །ཕྲ་ཞིང་རྡུལ་བྲལ་དྲི་མ་མེད། །རྡོ་རྗེ་ཐིག་ལེ་དྲིལ་བུ་ཉིད། །འབད་རྩོལ་མེད་པར་རང་སྣང་བ། །བྲལ་ཐོབ་མེད་པའི་ངོ་བོར
189b3 གནས། །གང་དུ་ཡོན་ཏན་ཚོགས་ཀྱིས་རབ་རྒྱས་པ། །བདེ་ཆེན་ཆུ་རྒྱུན་ལྟ་བུའི་རྒྱུན་ལས་བྱུང་། །ཚོགས་གཉིས་ཡོངས་རྫོགས་བདག་གཞན་ལྷུན་གྱིས་གྲུབ། །གཞན་ན་མེད་དེ་རང་ཉིད་སྣང་བར་ཟད། །རང་བཞིན་གནས་ཕྱིར་གཞན་ནས
189b4 འོང་བ་མེད། །ཞེན་པ་བཟློག་པས་བདག་ཞལ་བདག་གིས་མཐོང་། །རྡོ་རྗེ་སེམས་དཔའ་སྒྱུ་འཕྲུལ་དྲ་བ་གསང་བ་མེ་ལོང་གི་རྒྱུད་ཆེན་པོ་ལས་ལམ་གྱི་ཁྱད་པར་མ་ལུས་པ་བཤད་པའི་ལེའུ་སྟེ་བཅུ་གཅིག་པའོ།། །།
189b5 དེ་ནས་གཞན་ཡང་བཤད་བྱ་བ། །མ་ལུས་ཀུན་གྱི་བསྒྲུབ་བྱ་ཉིད། །ཕྱོགས་བཅུ་མ་ལུས་རྡུལ་སྙེད་ཀྱི། །ཆེ་བའི་ཡོན་ཏན་བཤད་པར་བྱ། །མཐར་ཕྱིན་ལྔ་ཡི་རང་བཞིན་ནོ། །རྟོགས་དང་འབྲས་བུར་གནས་མོད་ཀྱི། །མཐོང་དང
189b6 གོམས་དང་གྲུབ་པ་ཉིད། །ཐུན་མོང་འབྲས་བུར་ཡང་དག་བཤད། །ཡང་དག་མཐར་ཕྱིན་འབྲས་བུར་ནི། །ཐབས་ཆེན་ཐབས་ལས་བྱུང་བ་ཡི། །ཡིད་བཞིན་ནོར་བུ་རིན་པོ་ཆེ། །དཔག་མེད་ཡོན་ཏན་ལྷུན་རྫོགས་པ། །ཚད་དང
189b7 དམིགས་པ་ལས་འདས་པ། །བསམ་ཡས་ལྷུན་གྱིས་གྲུབ་པ་སྟེ། །ནམ་མཁའི་མཐའ་ལྟར་དཔག་མེད་པ། །ཐམས་ཅད་མཁྱེན་པའི་ཡེ་ཤེས་ནི། །མ་ལུས་མཆོག་གི་གཏེར་གྱུར་པ། །ཟད་འཕེལ་མེད་པའི་ནོར་བུ་སྟེ། །
189b8 མ་ལུས་ཀུན་ལ་མཉམ་དུ་གནས། །སངས་རྒྱས་ཀུན་གྱི་རང་བཞིན་ནི། །རྒྱ་དབྱིངས་ཚད་ལས་འདས་པ་ཡི། །དག་དང་མ་དག་ཅི་སྣང་ཡང་། །བླང་དོར་ཕྱོགས་རིས་ཡོངས་ཀྱིས་མེད། །རང་བྱུང་འོད་གསལ་མཎ་ཌལ་ལ། །མ་ལུས
iiif viewer powered by OpenSeadragon
