| e-texts navigator |
| Wylie |
183a1 ལྷན་ཅིག་སྐྱེས་པའི་ཏིང་འཛིན་ལ། །ལས་བཞི་མ་བཙལ་རྫོགས་པར་ལྡན། །རོལ་པའི་ཚུལ་དང་ཐིག་ལེ་གཉིས། །པད་མ་རྡོ་རྗེ་སྙིང་པོའི་རྩ། །ཉམས་དང་སྦྱོར་ཚུལ་གང་ཡིན་པ། །གསང་བའི་སྦྱོར་བའི་དུས
183a2 སུ་བལྟ། །གནས་པ་རྩ་ཡཾ་ཚུལ་དག་ནི། ཁ་དོག་དབྱིབས་སོགས་ཐ་དད་པས། །མཆོད་རྫས་ཉི་ཟླར་བཅས་ཀུན་ལ། །གཟར་བུ་གཉིས་བཅས་ཐབས་ཕུལ་བས། །ཐིག་ལེ་ཆེན་པོར་འབབ་པར་འགྱུར། །གསང
183a3 བའི་དོན་ལ་དགའ་བ་དང་། །རིག་པའི་བརྟུལ་ཞུགས་སྤྱོད་པ་དང་། །དབང་པོ་དར་ཅིང་སྨིན་པ་དང་། །ཐིག་ལེའི་དོན་ལ་མོས་པ་དང་། །རླུང་དང་བཅུད་ལ་གོམས་པ་ཡིས། །རྣལ་འབྱོར་ཕོ་མོར་བཅས་པ་ཀུན། །དྲན་རྟོག་ཕྱི་མ་བཅས་པའི
183a4 ཡིད། །གདུལ་བྱའི་དོན་དུ་དེ་བཤད་དོ། །གང་དག་ཐབས་ལ་མཁས་པ་དང་། །དབང་དང་དམ་ཚིག་ལྡན་པ་ཡིས། །ཐབས་དང་སྦྱོར་བ་ལ་བརྩོན་ཞིང་། །ཉི་ཟླ་རྩེ་སྦྱོར་དབང་ཐོབ་ནས། །གཟུང་ཟློག་འབྱོངས་བའི་གར་ཐབས་ཀྱིས། །
183a5 དངོས་པོ་ལྷན་ཅིག་སྐྱེས་པའི་དོན། །སེམས་ལྔའི་ཚུལ་གྱིས་གསལ་བར་སྐྱེ། །ཉི་ཟླ་ཞོན་པའི་རྫུ་འཕྲུལ་དང་། །རྒྱུ་བའི་རླུང་ལ་དབང་ཐོབ་པས། ཁམས་བཞི་འདུས་པའི་སྙིང་པོ་ལས། །བདེ་ཆེན་ཐིག་ལེ་མི་རྟོག་པ། །
183a6 ཐབས་ཀྱིས་ད་ལྟར་མངོན་དུ་སྣང་། །ཐབས་དང་བྲལ་བའི་སློབ་དཔོན་གྱིས། །སྐལ་མེད་ལས་ཀྱིས་དམན་པ་ལ། །དབང་དང་བརྒྱུད་པ་བྲལ་བ་ཡིས། །ཚིག་དང་རིགས་པས་ཅི་བསྟན་ཀྱང་། །རིགས་ངན་རྒྱལ་སར་བཞག
183a7 པ་ལྟར། །བདག་ཕུང་གཞན་རླག་འཇིག་པར་འགྱུར། །གང་དུ་གསང་བའི་ཐིག་ལེ་ཉིད། །གསང་བའི་ལམ་ལྔར་ཉམས་སྐྱེས་པས། །ཟག་མེད་བདེ་བའི་དཀྱིལ་འཁོར་དུ། །མཁའ་འགྲོ་གསུམ་ལ་གང་བརྟེན་ནས། །
183a8 ཡེ་ཤེས་ཐིག་ལེ་རྒྱ་དཔག་མེད། །རིམ་པས་མཐར་ཐུག་གནས་སུ་འགྱུར། །གང་ཞིག་འདི་ལ་འདྲེས་གོམས་པས། །རྒྱུ་བ་ཐིག་ལེར་ཐིམ་པ་དང་། །དྲན་རྟོག་ནམ་མཁར་གསལ་བ་དང་། །བདེ་ཆེན་སྔོན་དུ་སྨིན་པ་ཡིས། །
iiif viewer powered by OpenSeadragon
